(Heb.12:1-2; I Cor.9:26)
Paul’in Corinth mite alekhathot na-a “Hitia
chu lhaiya kahin, abidoi kicheh neilou kahi pon, onghom lai khut tum’a su-a
jong kahipoi,” tin aseiye (I Cor. 9:26). Paul hin Damascus khopam’a hinkho
kikhelna kidang tah anei ni-a pat in cholnga louvin thohhat tah-in abidoi
kicheh tah neiyin malam non alhaiye ti imuve. Christian tamtah lah-a bidoi
kicheh neilou kium’inte. Paul’in abidoi atihi Hebrew lekhathot sunpan itahsan
bulpiu kikhonna (finisher of our faith) Jesu ati hi gelchep ding ahi.
Bidoi lam mano-a lhai ding thu isei
nauva Jupi le Sumkong (the Hare and the Tortoise) thusim veuhite. Jupi
le Sumkong hi kilhaitet dingin akitem lhon’e. Sumkong hi lhaithei lou oltah-a
vatho bou ahin, hinla Jupi lhaiya hat, mitphet kah-a gamcheng lhai jeng thei
toh lhai kitet ding chu a-olmo deh poi. Akilhaitet nikho’u alhing tai. Akipatna
diu le alhunna diu asemtoh lhon tai. Jupi lhaiya hat tah ding chun Sumkong toh
kilhaitet ding chu thasit aum lheh jenge. Jupin Sumkong ajotho behseh jeh in ki
ol lhai jongle kikhel thou ding tin thingphung limnoi khat’a akinop umtai. Anom
umlena lamin ana ihmumil tai. Sumkongpa vang kiseh tah in akipat’ a konin
abidoi lam alhunna ding mun jonin kinom um louhel’in ache che jengtai. Bidoi
mun Sumkong alhun ding konchan Jupi a-imut’a konin ahung khangdoh in thei top
soa alhai vangin Sumkong chu bidoi mun alhung masa thou thou tai.
Hiche thusim’a konhin kihilna ding
phatah ineiyui. Bol theina jatchom chom inei jeh-uva mijouse sanga abidoi mun
chu ilhun diu ahipoi. Sumkong banga gunchu tah le kiseh tah a cholnga louva
malam no-a kalsong ho bou chu abidoi mun lhung ding ahi. Jesun “... amasa
tamtah nukhah ding, anukhah tamtah masa ding ahi,” ati.(Mat.20:16). Bidoi
kicheh jousen damlaini phatpha aneiho mohman thaithap ponte. Bidoi lam mano a
kilhaitetna ding hin tahsa hatna, chihna, thepna le boltheina dang ima
angaipoi. Pakai a dettah a kingai ding, Hebrew lekhathot sunpan asei banga Jesu
hi vetkah-a neijoh ding ahi ti iheuve.
Bidoi lam mano-a lhaina-a eisumo thei
tamtah aum’e ti Hebrew 12:1 sunga imuve. “... einoh phahsah jouseu le
ichung’uva kaijing chonsetna hi pailhan, thohhat tah-in imasang’uva kilhaitetna
lam’a hin lhaiyute” Ichung’uva kaijing chonsetna hohi kisim joujai thei
ponte. Aboncha eisunoh phah thei cheh ahijeh-a pailhah jeng chu ngaiya ahi.
Canaan gam jon’a che Israelte, tamtah chu ajotnau alhung jou tapouve ti iheuve.
Neh le don chunga lunglhai lou jeh, lamkai hinom jeh, abang phunchelna jeh-in
Canaan gam alhung jou tapouve. Tahsan chate kiloikhomna sunga phunchelna ho
jong hi bidoi lam’a lhaina-a eisumo tah khat ahi. Phunchelna hi Pathen engkalna
ahiji-e. Thuchih khat chun - “Muthim sapset sangin mei vah in” (Intstead
of cursing the dark light candle) tin aseiye. Moh-a han’a phunchel sanga ase
semphat joh chu Pathen deilam ahi.
Vahchoila sempa chun - “Che
jing’ute O Zion chate. Ilenna diu gam loupi ahung naitai” tin langei tah anabol’e (Lth. No. 52). Malam
no-a kalson hi chol le nan umding ahi. Lamkah-a kiman thaithapna ding tamtah
umding ahi. Hiche phat teng chule Hebrew lekhathot sunpan “Tahsan bulpi le
kikhonna Jesu lam kat jing’ute,” tia Christian masaho atilkhouna thuhi
geldoh-ute. Jesu vejing ho chu leiset hoina le loupina muna mit chu thim ding
ahi. Ajehchu Jesu hoina le avah chun mit chu asuh thim ding ahi. Vetsahnan vah
emsel jeng chu chomkhat ve lechun thil dang imacha muthei tapon nate. Jesu lam
kat jing ho jong hitobang chu hidiu ahi.
Shiv Khera in “You can win” kiti lekhabu anasutna-a chun bidoi kicheh
neiding thudol’a hiti hin anaseiye. Mi vahle khat hin lampi-a tehse upa khat
akitopi-e. Mipa chun tehsepu koma chun “Kache na lampi hi hoilam jotna ham
?” tin adong’e. Tehsepun, “hoiya che ding nahim ?” atile mipa chun “kahepoi”
tin adonbut’e. Tehsepu chun, “hoiche lampi hijongle najuinom nom juitan”
atipeh-e. Tehsepu chun ipijeh-a chutia chu adonbut ham ? Ajehchu mipa chu ache
jeng vanga achena ding jong helou ahin, chena ding bih neilou nah nah chun
ajuinom nomna lampi ajuithei mong ahi. Bidoi neilou chu ajotna lhung lou ding
ahi. Tahsan chate din ibidoi pipen’u chu Jesu Christa ahi ti hetchet angaiye.
~~~
No comments:
Post a Comment