Pakaiya kingaite hinkho danglamna

(Daniel 1:3-21; Matt. 10:17-20)

          Leiset’a hin chihna, themna chule bol theina kidang dang neiho hi mijousen datmo um akisan aki-otcha cheh-e. Hinla Pathen thu (Bible) hi isim leh Pakaiya kingaite hi datmo le ochat umpen tah-in akilange. Ajehchu, akhohetnau le achihnau chule athepnau hi vannoi mite-a sangin danglamna aum’e.

          Daniel le aloi mithum hohi Judah mi ahiuve. Babylon lengpa Nebuchadnezzar in  Jerusalem khopi adelkhum’in, alah phat’in gouthil tamtah achom’in chule Judah mi phabep gal-hingin akaiye ti imuve. Hiche ho lah-a hi Daniel le aloi mithum hohi pangkha ahiuve. Amaho gal-hinga kikai lona pen chu Babylon gam doi Houin lhacha ding ahiuve (Dan. 1:2). Pathen theng lhachate chu doilim semthu pathen lhacha-a apan jeng diu chu khoto umtah ahi. Doilim semthu pathen lhacha ding ahijeh-un lengpan amaho chu doiphung houin’a akoiye ti imuve. Achenna diu gam le abih tah-a nitin’a hinkho amanna diu mun jong hinkho lamvaina thei ahitai ti akichen’e. Hinla Pakaiya kingai jing jeng Daniel le aloite din aboi poi. Ajehchu, hitobang mun phalou le muntheng lou ho-a kona hi Pakaiya kingaite hinkho danglamna chu kihedoh thei bou ahi.

          Pathenin achate, alhachate mun phalou le muntheng lou ho-a umdia aphalji hi datmo ding ahipoi. Ajehchu, alhacha asottol John Baptist hoilai mun’a akoiyem ? Gamthip gamgo mun’a akoiye (Mat. 3:1). Jesu achapa deipen hoilaiya akoiyem ? “... Lhagaovin gamthip’a apuitou tai,” (Mat. 4:1).Chule Jesu kiseiletna kho jong Nazareth kho ahi ti iheuve. Hiche phat laiya dinga chu Nazareth hi minse tah anahi ( Jn. 1:46). Houin sunga Pathen cha hina lim le mel put sanga ju le sa nehna mun, Pathen kihou louna mun ho-a Pathen cha hina lim le mel put chu adih tahbeh chu ahi. Hitobang hinkho mangdoh chu mi alhom’e. Hinla Daniel le aloi mithum hon vang Pathen chate hinkho danglamna chu vannoi mite semthu pathen houte anga asulang jouvun ahi.

          Mat. 10:16 sunga hin Jesun, “Veuvin ngeihon lah-a kelngoi kilhalut banga kasol nahiuve. Hijehchun, gul bangin ching theiyun, vakhu bangin lungnem’un,” tin ana seiye. Daniel le aloite hin Jesu thuhil toh kitohchet in hinkho ana manguve ti akimuchen’e. Lengpa thupeh nemheo chan ajuiyun, hinla a-Pathen’u toh akhen thei diu thil ho-a vang hangsan tah-in pan alauve. Mat. 10:17-20 sung hi isim leh Daniel le aloite panlah dan hi adihna akimuchen theiye. “Keima jal’in vaipote le lengho anga kailut’un natin, hinla amaho le chidang namdangte henga kathupha hettohsah-a napan diu ahi ... nasei ding dol’un lungkham hih-un, apettah le kipe nauvin nate. Ajehchu, nalunggel mai mai nasei diu ahipon, nasung’uva cheng na Pau Lhagao chun namanchah uva aseiding ahibouve.”

          Neh le don’a chule houva kisuhboh theina mun’a jong Daniel le aloite hi ading jouvun, hitobang dinmun’a kon hin Babylon mite milim le doi le ai houte angsunga Pakaiya kingaite hinkho danglamna chu asulang tauvin ahi. Babylon hi amaho din mukhah lou gam ahi. Judah gam’a chonna ho jouse kitho theilouna gam chu ahitai. Agam pao atho diu, agamsunga kihou semthu pathen ahou diu, asil achen’u chule amin jengu jong khel’a um, aneh adon ho jouseu jong kikhel sohkei ahi. Hitobang mun’a hi Gul banga chihna le Vakhu banga nunnemna chu amanchah-u ahi. Tulai hinkhoa jong hitobang hinkho hi man’a kihinso ding angaiye ti imuve. Leiset’a leng nalai ihijeh-un leiset chonna le kivaihomna hi moh peldoh jeng thei ahipoi. Peldoh jeng dingin Pathen thun eihil pouvin, Ama deilam dol’a kiheitoh jo dingin eihil jouvin ahi. Hitobanga chu Daniel le aloite hin leiset’a hinkho ana man’uva mihem le Pathen mitmu-a nolnabeiya ana um ahiuve.

          Tulaiyin internet mangcha thei ho din ima jouse het loi theina aumtai. Hiche het theina hohi technology khantouna thil ho jal ahi. Hinla Daniel le aloite vang chun mihem chihna-a kisem doh “internet” hilouvin Pathen’a kona het theina (Divine internet) joh mangin Babylon lenggam pumpia phunsan jouse le mitphel doithem jouse hetna ajat som chenga themjon akhokhel’un thunei vaihom’in ana pangun ahi. Hitobang hin Pakaiya kingaite hinkho danglamna chu imu theiyui.

~~~