Jesua hinna: Lenggam

"Na Lenggam hunglhung hen"

Thupi kithopi dia kisem

Thupi : “Alenggam”

Thupi: “Lenggam chu Pathen Lenggam “ - Mat.25:34.

Thupi : “Lenggam’a Lut”-Lk.18:18-27

Thupi : “Lhagaova chimtih neilou” -Mat. 5:3

Thupi : “Pathen dei bol jeh-a bolset toh”- Mat. 5:10.

Thupi : “Bul’a kihen ho lhadoh” Lk.4:18d,Lk. 4:18-20.

Thupi : “Mitcho kho musah” Lk.4:18 d ; Mt. 9:27-31; Jn.9:1-12.

Thupi : “Insung Pathen Lenggam”

Gen. 2:5-8 ; Josh. 24:15 ; Mk. 10:29-30; Lk. 4:18.

Thupi : “Khosung Pathen Lenggam”

Nehemiah 2:1-5; John 1:29; Luke 10:27.

Thupi : “Houbung Pathen Lenggam”

Exo.15:1; Minbu 1:1-3; Acts 9:1-19;

I Cor.6:19-20; Jn. 2:16, 19-22; Matt.16:18.

Thupi : “Kivaihomna a Pathen Lenggam”

I Kgs. 3:7-13; Pro. 23:1-10; 24:5; Rom. 12:9-21.

Thupi : “Chapangte le Pathen Lenggam”

Prov. 22:6; 20:7; Labu 37:37; Lk. 2:49; Mk.10 :13-16.

Thupi : “Kuki Sahnit Nikho le Pathen Lenggam”

Gen. 2:7; Eze. 37:1-14; Lk. 23:34.

Thupi : “Jalhang hinkho-a Pathen Lenggam”

Job 14:5 ; Thuhilpa 12:7, 13-14;

Matt. 11:25-30; 25:31-46 ; 5:1-12.

Thupi : “Tahsanna-a Pathen Lenggam” Heb. 12:1,7.

Thupi : “Taona a Pathen Lenggam”

I Sam 12:23; I Thes.5:17.

Thupi : “Natoh a Pathen Lenggam” I Thes. 4:9-21.

Thupi : “Thilpeh a Pathen Lenggam” II Cor. 8:1-5.

Thupi : “Mission natoh a Pathen Lenggam”

Lk. 4:17-18.

Thupi : “Thupeh nit’a Pathen Lenggam” John 14:15.

Thupi : “Tupet’a Pathen Lenggam” Mat. 6:10.

Thupi : “Pakai munsem”

Jn.14:2,3; 17:24; I Thes. 4:17b; Heb. 13:14.

Thupi : “Tahsante kilekitna ding”

Heb. 10:13; 13:14; Ps. 39:12; Col. 3:1,2.

Thupi : “Pumhat’a lothei lou Pathen Lenggam”

Thuchih 11:30 ; II Sam.11,12; Mat. 2; Phil. 2:6.

Thupi : “Gal jousoh Pathen Lenggam”

I John 3:18 ; Mat. 4:1-14 ; Thuphon 20:7-10.

Thupi : “Jalenna tahbeh Pathen Lenggam”

Thupi : “Pakai hungkit tei ding”

Mat. 26:64; Jn. 14:3; Thup. 22:12,20.

Thupi : “Ahung ding galdot”

Titus 2:12-13; 2 Peter 3:11; 1 John 2:15-17.

Thupi : “Na Lenggam hung lhung hen””

Matthew 6:10.

NB: Hiche hi keisei ahipoi. September 2014 Kisuhhalna Thupi kithopina, Pastor hon, hahsatah a asem'u hi amahthah sanga mihon phatchompina anei diu kineppina a kakoi ahi. Rev. H.Haolai M.Th makaina noiya, Theologian thah kineiho Pr. Thangsem Changsan BD, Paogoulen Lenthang BD, Martin Zairem Hengna BD, Ng. Thangneikim Hengna BD, Ng. Linda Changsan le adang ho hinjih ahi.

THUMUN HILCHETNA

Tukum 2014 Lhalam Kisuhhalna Thupi “Na Lenggam hunglhung hen” Mat.6:10 (a) ahi. Hiche hi eihon Pakai taona tin atamjon iheuvin hinla phatecha ivetchet le Pakaiyin taona eihil’u tijoh ding ahi. Ajehchu, aman (Pakai Jesu) hiti hin taovun tia asei ahi. (Mat. 6:9 (a). Pakaiyin taona eihilnauva thugol thum channa ahin, “Na” thucheng umje chu van’a um ipau ‘Pathen’ tina ahi. Thucheng bulhingset’a seidin “Pathen Lenggam” (Pathen vaihomna) tia hetdingin aphai. Hichu Matthew sut Kipana Thupha jihpan Jewte dia asut ahijeh-in apaocheng mandan akhel’in “Van’a Lenggam” atin, hinla Kipana Thupha dang jih hon “Pathen Lenggam” ti paocheng amangun ahi. Ipichu hitaleh abul’a thucheng/ paocheng chom chom akiman vangin athudoi hi thakhat ahi. Christa tahsante hon ikineppiu le ikinepnau tampi lah a khat ahi. Jesu Christa leiset’a alenlaiya athuhil thumun pipen khat jong ahi.

Thupi kilahdohna Bible simmun ipansatnau hi ivet le taona thu ahijeh-in Christian jousen anaman thucheng khohtah le manlutah khat anahi. Chule Bible themsang ho kinelna thumun khohtah angahlhahna kichen tah umtheilou thu khat ahikit’e.

Chule “Na Lenggam hunglhung hen” tia taona-a seithei/ mangthei miho chu Christa tahsan dettah miho le Ama Lenggam um tahbeh ahi tia tahsan le ahunglhung ding ngahlel miho hiteidin tahsan aum’e. Leiset’a lenggam tampi umjongle Pathen Lenggam umdan Bible’a kisun ho hechen miho, anop dingdan, aloupi dan le adang dang hethem miho hitei dingin jong tahsan le ginchat aum’e.

Achainan, tukhanga Christian ten ihetchet diuva pha khat chu ithumun’uva Pathen Lenggam/ Van’a Lenggam ti sangin “Pathen vaihomna (The reign of God)” tia hetding ahi tin Bible thu hetgilna nei mihon eiseipeh tauvin ahi. Thupi 30 (Somthum) ihin sei tengu jongle hiche hi sumil louva lunggil’a vopjing din jong ikitem’uve.

Thupi hi bahneo neo 30 semdinga gon ahijeh-in noiya banghin mangchau hite -

Hapta khatna - Na Lenggam (Pathen Lenggam umdan)

Hapta nina - Tudinmun’a Pathen Lenggam

Hapta thumna - Ahung lhung ding Pathen Lenggam

Hapta lina - Lenggam hung lhung hen.

HAPTA KHATNA - PATHEN LENGGAM

Lhalam 01, 2014 . Thupi : “Alenggam”

Jesun Pathen Lenggam thu ahung lhangsam’e (Mk.1:14-15). Leng chule lenggam thudol hi masang laiya pat’a tukhanga jong kimang jing nalai ahi. Gamkhat’a vaipo-a pangpa chu leng akitin, ama gam chu alenggam akiti. Pathen Lenggam kitihi Bible’a thuhil pipen khat’in aum’e. Ama Lenggam chu hetchet theina din Pathenin van chunga ahin, vannoiya ahin thil ijakai mihem le ganhing ju le va jouse chunga athaneina aphondoh-a ima jouse chunga athanei aphondoh-a ima jouse chunga Ama vaihomna akiphondohna hi ahi. Hichu mihem khat’in ahettoh theina dinga Jesu Christa tahsanna dih tah neiya mithah soh ding, Pathen vaihomna noi le asunga bulhingset’a kipehlut ding angaiye.

Pathen Lenggam hidan chu Pathen leiset’a hung kumlha-a athaneina le aloupina phondoh-a, agiloupa le apet’a leiset gitlouna adouna thu hi ahipen’e.

Vetchetna dingin –

1. Ama leiset’a hung kumlha-a leiset’a amite lungsung le amite lah-a Lhagaova vaihomna apat ahi. (Jn.14:23; 20:22). Ama thaneina lhingset to leiset’a hung kumlha ahi (Is.64:1; I Cor.4:20). Hichu leiset’a thilkeo le kivaihomna hilouvin, lhagaolam joh-a igeldiu ahi. Pathen Lenggam chu vannoiya kon ahipon chunga pat ahijoi (Jn.18:36).

2. Pathen thanei tah-a akiphondoh chun vannoi hi phat hahsa le boina alhut’in, agiloupa vaihomna hi tijatna asohdoh tai (Mat. 4:3ff; Mk. 1:24). Chule Vannoi mite lunggel boina jong ahitai. Hijehchun, John Baptist le Jesun asei bangin Vangam lutna dinga ngaikhoh tah le abul chu lungheiya Kipana Thupha tahsan hi ahi (Mk. 1:15).

3. Atahbeh Pathen thaneinan leiset asuhkeh chu –

a. Agiloupa thunei le vaihomna chunga Pathen Lhagao thahat’in ajo-a vai ahop (Mat. 12:28; Jn. 18:36), ti akimudoh-e (Jn. 12:31; 16:11). Chule Satan henkol le chonset’a pat mihem huhhingna (Mk.1:34; Acts 26:18).

b.Thilmah/ Thilkidang boltheina le damlou veiseho damsah, mithisa kaithou theina thahat (Mat. 4:23; 9:35).

c. Kipana Thupha kiseiphong chun chonset dihlou dan, thudih, atah chule thutanna ho aphongdoh tai (Mat. 11:5; Jn. 16:8-11).

d. Lungheina Kipana Thupha tahsan ho huhhingna (Jn.17:17; Acts 2:38-40).

e. Hat tah-a tahbeh-a Christa hettohsah-a panna dia Lhagao Theng’a Baptize chan (Acts 1:8).

4. Alenggam hetdoh theina dia khohtah chu mikhat’in ahinkho-a adih le chamna chule Lhagao Theng’a kipana anei hi ahi (Rom.14:15).

5. Tahsanbu (Bible) a Pathen Lenggam hi hop thum akihom’e tia hetding ahi.

i) Achesa Pathen Lenggam (Lk. 13:28, Mat. 8:11)

ii) Apet’a Pathen Lenggam le

iii) Khonunga hunglhung ding Pathen Lenggam ahi. Apet’a Pathen Lenggam kitihi Jesu amatah-in asei hichu Ama thuseina toh thilbol hin avetsah ahi. (Mk.1:15b; Lk.18:16-17; Col.1:13; Heb. 12:28). Hiche hin abidoi chu tahsante apet’a Pathen Lenggam’a iumdiu ahi. Hinla chamkim tah-a Pathen vaihomna le thaneina chu hetchet ahinai poi. Agiloupa natoh chu chejom jing ding leiset khang kichaini geiya (I Tim.4:1; II Tim.3:1-5) Chuche nikho teng jongle Christa tahsan dettah mi le a-Lenggam lothei hina din apet’a Pathen Lenggam hetchet angaiye.

Khonunga hunglhung ding Pathen Lenggam chu chamkim tah-a Pathen vaihomna chu hunglhung ding hiche hi Pakai Jesu tahsante ikinepnau lenpen chu ahitai. Hichea hin Pathen thanei tah le loupitah-a hung ding Pakai Jesu leiset’a thutan’a ahung tengle Lenggam hunglhung ding (Mat.24:30; Lk.21:27; Rev.19:11-20; 20:1-6). Achaina Christan melma chonset dougal, thaneina jouse le thahat tincheng asuhmang soh teng Lenggam chu Pa-Pathen apehdoh ding, chutengle Lenggam chu chamkim ding, Christa jeng jong Pathen noiya lutding ahi (I Cor.15:25-28; Rev.20:7-21:8).

~~~~~~0~~~~~~

Lhalam 02, 2014. Thupi: “Lenggam chu Pathen Lenggam “ - Mat.25:34.

Jesun anasei lenggam hi mihem’a ahipon, Pathen Lenggam joh ahi. Hia chu eiho akhomite ihiuve chule Ama-a ikitah diu angaiye. Lenggam hi koiman ahin pohlut ngailou, aumsa ahi. Pathen lungdei bol’a athilgon subulhitte chu, “Vannoi kisemtil’a pat’a nangho dia gonsa kikoi Lenggam chu hung louvin,” tia kou ahi (Mat.25:34). Hijehchun, hiche hi Hou lamkaiten asemthu-u hilou, mihem’in chonna thah asemthu jong hilou, chule mihem’in khonunga dia asemthu jong hilou thil chu ahi. Hiche hi Pathen thilbol ahin, Lenggam hi Pathen Lenggam ahin, mihem dia kipe chu ahi.

Lenggam hi eihon isemthu-u le isemdiu jong ahipoi ti ihet’u angaiye. Hinla gonsa Lenggam’a chu ichendiu, agammi ihiuva, ikhosah-uva chule nom isah diu ahijoi. Lenggam a chengsa banga eihon jong thusei le ihinkhouva Lenggam thu hettohsah-a ipan’uva agammi ihidan’u iseiphong diu ahijoi. Pathen mingailut jeh-a bou thu lhangsap leh Kipana Thupha hettohsahna lam’a Pathen manchah-a ipan’uva midang ipuilut diu ahi. Hichu Ama pang louva eima changa bolthei aumpoi. Chonset lunghei jal’a Jesu thilpeh ikisan’uva, Pathen Lenggam’a ilut diu chule thilsemthah ihidiu ahi. Hijeh-a chu inatohna mun’u le miho hindan dungjuiya Pathen na itohpan jiu ahi. Pathen Lenggam’in gamgi aneipon, alen’in vannoi pumpi ahop’e. Thilpeh kisan jouse chu Pathen Lenggam sunga alut jitai.

Vannoi kisemtil’a pat’a a-Lenggam chu ana kigongsa hita jongle Jesu Christa-a konin bou thupitah le kichen tah-in iheuve. Mihemte henga Jesun hiche thil manbeiya kipehi akisan nadiuvin anaseiye. Hiche chu Pathenin mihemte Pathen Lenggam’a alut theina dia anapeh chu ahi. Jesu natoh le ahinkho-a konin bou Pathen vaihomna akihen chule akimuchen’e. Pathen Lenggam’a lut theina dinga kot chu Jesu bou ahi (Jn.10:7). Ama Lenggam chu kichen tah-in akilang’in, muntin’a mihemte jong akou jing’e. Jesu nungsun’a peldoh chun Lenggam lut louna le polam’a umna chule Lenggam’in apeh chamna, kipana hinkho chamkim kitiho mansahna ahi.

Hiche thil kimohpeh hi idia idonda diuham? Mihemte kilepdohna ho eima Houbung dinmun’a seiyute. Mihem’a kilep ihiu le Houbung chu athiding kon ahitai ti hetding ahi. Pathen Lenggam Kipana Thupha aseiphong tengle Lhagao lam le tahsa-a khantouna aum ji-e.

~~~~~~0~~~~~~

Lhalam 03, 2014 Thupi : “Lenggam’a Lut”-Lk.18:18-27

Lenggam mikhat hina dia Lenggam iti lut ding ham ? Lunghei hi ngaichat khoh pentah ahi. Mihem’in ahinkho lampi akhel’a, Jesu hi a-Pakai Huhhingpu dinga akisan ngaiya ahi. Hichea chun ipipi angai dem ? Khangdong mihaopa thuseina adonbutna khat imuve (Lk.18:18-27). Ama chu Danthu jouse nit Hougut tah mi hijongle alhahsamna khat aum’e. Aman anahol jing tonsot hinna, kipana le chamna hinkho chu Jesu henga ahin lhut ahi. Ahin, Jesun anei agou jouse ajohdoh-a chule mivaichaho ahoppeh-a chujouva anung ajuina dia atep chun khangdong mihaopan anabol ngam tapoi. Tahbeh-a seidin ahaona chun akipalsah tai. Ahaona toh akikhen theipon, Jesu ajuijou tapon, lung himo tah in achemang tai. Jesu chule amabou hinkhoa amasapen’a koihi Jesu Pakaiya nei tina ahi. Sum ngailut hi setna bulpi ahi (I Tim.6:10).

Niseh a kihinsona dinga lungkhamna hohin Jesu Lenggam’a konin mi achomkhen jin ahi. Hiche ho jeh-a chun, Jesun mi ahil masahsa ahitai (Mat. 6:25-33). Leiset chunga hinna dia lunggimna le lungkhamna hohin Lhagaolam hinkhoa din eichomkhen jitai. Jesun vacha hoa konin eihilchen tauve. Hampa, phaicham’a Lily pahcha khu anaseiye. Hiche ho jouse Pathenin aching jing’e anati. Atahsante dia hunga ahin, ngaichat jouse pe-a jong Ama ahi. Ihinkhouva amasapen’a koiding chu Pathen Lenggam hol le Pathen tahsan’a kisan ding hi ahi.

Pathen Lenggam’a kona puidohna lampi phatah khat chu Houlam’a tahsan lhem hina hi ahi (Mat 23:13-15). Jesu khang laiyin Pharisees ho chu Hou-lamkai anahiuve. Ahinla, polam mitvet dia Hougut tah anahiuve. Atahbeh chu alungthim’u Pathen’a kona ana gamlhai. Mihem’in amaho ajabol’uva chule achoisang diu ana deiyuve. Houva lunglut dan’in akilang’un hinla, mihemte lungthim duhan anabol’uve. Houlam’a dih louna le mihem choisang ding deina hin Lenggam mi ihina diuva konin eichomkhen jiuve tihi ihet diuva pha ahi.

Lenggam’a kona miho, Houbung ho gamlha tah a umsah ji-a mihem lungput ho ilah-uva itobang um’em. Hiche hoa kipalna thei ho jouse mun ot louva, Pathen Lenggam mi hina/ lutna thei hina dingdol aseito thoa na tohding aphai.

~~~~~~0~~~~~~

Lhalam 04, 2014 “LENGGAM LOHO/ MITE” THUPI BAHKAI KHATNA -

Thupi : “Lhagaova chimtih neilou” -Mat. 5:3.

Jesun thu ana lhangsap le anatoh lona ajeh pipen chu Pathen Lenggam thu jeh hi anahi. Lungheiya Kipana Thupha kisan jouva Lenggam’a lutdia mi anakouseh hilouvin, Lenggam’a koitobang ho um’em tijong anasei tha-e. Mikhat chun Lenggammi hitheina dia neiding phabep aum’e. Alangkhat’a Mihem lungthim le lunggel hinkhoa Pathen achen tengleh hichun amachu Lenggammi ahitai ti aphongdoh-e. Hiche hi lamtampi-a seithei hinante, hijongle thupi bahkai thum’in seiyuhite.

Bible’a anunnomte thudol kisutna-a amasapen chu, “Lhagaova chimtih neilouho anunnom’ui, Van’a Lenggam chu amaho-a ahi,” tin akisun’e. Hichun mihem lah a Pathen chenna thudol ahetsah ahijoi. Lhagaova chimtih neilouho, lhagaova vaichaho chu koi hiuvam? chule iti ihet theidiu ham?

Lhagaova chimtih neilou kitihi hinkho umchan dol khat kiseina ahi. Pathen ang’a nunnem’a um’a chule hichu kilahdoh sah-a, lhagao hinkhoa ahomkeo hidan chule mihem’in Pathen panpina angaichat dan tahlahna chu ahi. Ama pang louva chamkimlou dan phondohna ahi. Lhagao hinkhoa adamlou ahi kihet ho bou chun Pathen’a kona pilhinna akimui (Mat. 9:12).

Lhagaova chimtih neilou kiti hin kiletsahna le kihoitho sahna jouse pailhah tina ahi. Mihem hi thil tamtah chungin akiletsah nomji-e. vetsahnan - thilnei, thepna, jat le nam, haosatna le adang dang. Thilpha jouse eipeuva Pathen angsung’a lhagao hinkhoa lhinglel tah le imacha ihilou dan kilahdoh sahding ahi.

Hinna le hinkho malsomna eipeuva Pathen henga kipumpeh-a ngaijingna chu lhagaova chimtih neilou tina ahi. Lhagaova chimtih neilou hinkho le lhinglel tah hina hi mihem ten akihethem thei jipoi. Ajehchu, eima geldan’in boltheina ho, chihna, hetgilna le thahat vanga hinkhoa lolhinna neidan’in ikigel’uve. Ahinla koima amacham’a kisemthei aumpoi. Pathen phatna chunga kingai ngensen ihibouvui. Pathenin apeh loule koiman ima aneithei poi. Jesun lhagaova chimtih neilouho chu ana pahcha-e. Ajehchu, ahinkho diu le thilpeh achanna diuvin Pathen’a kipumpeh-in Pathen thahatnan akingamla jiuve.

Houbung mite ihinkhouva Pathen’a kingai tahbeh ihinah um ? Chamkim ikisah um ? kingaitou hite. Taona mang jing hinkho chu “Lhagaova chimtih neilou” hetna ahi. Taona hinkhoa Houbung mite Pathen’a kingai ding lampi pha ahi. Itaona diuvin Phariseepa le Kaidongpa taona geldoh-ute (Lk.18:9-14). Jesu-a bou hinkho chamkimna aum’e. Lhagaova chimtih neilou, vaichaten chamkimna Jesu bel’u te. Hitobang mite chu Lenggam loding ho ahiuve.

~~~~~~0~~~~~~

Lhalam 05, 2014 “LENGGAM LOHO/ MITE” THUPI BAHKAI NINA

Thupi : “Pathen dei bol jeh-a bolset toh”- Mat. 5:10.

Pathen Lenggam to kisaiyin Jesun nunnopna chomkhat asei kit’in hichu - “Pathen dei bol jeh-a bolset thohho anunnom’ui, Van’a Lenggam amaho-a ahi” ati. Pathen lungdeiya hinkho mangho chu michondih, adih bol ahiuve. Pathenin hinkho lampi asem chu ajuiyu ahi. Hiche lampi chu Pathen lampi ahi.

Pathenin mihemte abolna hi adih-in aphai, hinla mihem ten ama ibolnau hi dih hinam ti ivet le ihinkhouva Pathen lunglhaina iboldoh lounau muntamjo ahitai. Pathenin mihemte koma angeh adei chu hettheina din Israelte henga Themgao hon anaseipeh jing’ui, Mihemte lah a thudih ngailutna chule kihepina aum tengle Pathen mi ihiu akihei. Ajehchu, Pathenin hitin aseiye, “thildih bolding, tantih neilou lungset umsah ding, kineosah nunnem tah-a i-Pathen’u to kiloikhom jing ding ahi” (Micah 6:8). Mihem hi hon le loi lah a lhajing, khat le khat chunga kingai jing ahijeh-in alaiya thudih atah chule phatna vaihomsah ding ahi.

Ichennau leiset’a hin bolsetna hi lamchom chom’a mun jousea, natohna, lhatkhomna, kivaihomna, Houthua, muntin le gamtin’a chule mihem khat le khat kikah, jat le nam phung le chang kah-a amachal’in mun le phat tampi alotan ahi. Hichu lungthim le atah athodoh-in mimal, insung, khosung, Houbung, nam le gam nasatah-in asuboi tan ahi. Hinla iseinom’u chu Pathen natoh le Amadei boljeh-a bolset toh suh gentheiya um thina chan’a thoh ati ahi. Pathen thu le Hou tahsan jeh-a kisugenthei gimbolna le thina changei hi India gamsung jenga jong ana tamtan ahi. Het theinan - Orissa gam’a Missionary Staines le achapa teni meiya ahallih-u, tunaicha Jesu tahsan ho Houin kihal, numei-pasal khen umlouva voh le den thina tohho geldoh-ute. Hou dang/ Nepali Christian’a lut ho a-inkoten in’a pat anodoh jitauve. Hichu Houthu Pathen deibol tahsanna jeh ahin, amaho Pathen’a dia mihangsan ho ahiuve. Amahon Pathen Lenggam’a mun aneitauve, nunnom ahitauve.

Christian tahsan thusim’a Pathen dei hol atah le adih bol ho chun leiset’a bol gentheina atoh-uve ti akimudoh-e. Hiche hi leiset’a agiloupa natoh, Pathen tahsanlou le hephalou te natoh ahin, amahon tahsante chu adem’un, aseiseuvin, ahotbol’un, avetdauvin, abolseuvin chule athat jitauve (Mat.10:22; 14:9;Jn.15:19). Christiante chun bol gentheina le lhepna athoh galkai tengle Pathen to lengvai apohkhom ding ahi ti ahet tengle kipah joh ding ahi (2 Tim. 2:12).

Pathen Lenggam thu-tahsan le chena lhongpi chu itih-a kikhel lou ahi, “Christa Jesu sunga Hou-ngaisah-a hinnom jousen bolsetna atoh teiding ahi (2 Tim.3:12).” Pathen dei bol jeh-a bolset tohho anunnom’ui ajehchu, Pathen Lenggam mite ahiuvin chule Lenggam chu amaho-a ahi”. Christa tahsan nungjui hina-a nangin demna, seisetna, bol gentheina ijat nato tah em ? Nangin atahsan ho nabolset khah em ? Jesu min’a min nahouset khah tah em ? Pathen natohna, thudih, atah, thilpha nabolna-a demna, engbolna ijat nato tah em ? ti kingaitou hite. Pathen Lenggam mite hitheina din Pathen thudih, atah chu hangsan tah-in seiphong’ute.

~~~~~~0~~~~~~

Lhalam 06, 2014 (Misemni Jan)

“LENGGAM TOHGON” THUPI BAHKAI KHATNA -

Thupi : “Bul’a kihen ho lhadoh” Lk.4:18d,Lk. 4:18-20.

Christian tahsanbu (Bible) phatecha ivet leh tahbeh-a seidin Lenggam chu aum’in hinla bulhing’in aum naipoi ti iheuve. Jesu-a konin Lenggam chu akitung doh-in hichu mijouse ding, vannoi thilsem jouse ahopsoh ahi. Hijehchun, leiset chunga thilsem namkim henga Lenggam hi lhunsah ding ham tihi Lenggam tohgon lenpen tah ahi. Nazareth Houin’a Lenggam tohgon tongdoh dia hunga ahije chu Jesun anaseidoh-e (Lk. 4:18-20). Tohding nei, pehding ney-a hung ahidan Jesun kichen tah-in anaseidoh tai. Vannoi pumpi henga ana lhangsap Lenggam chu mijouse pedinga Pathenin Amahi thao ananusa ahitai. Atoh ding thil chomcheh nga chule amaho chu kikhen theilouva thakhat’a pangkhom aum’e. Hicheho lah a chun akhoh cheh ni seiyuhite.

Leiset’a mijouse hi thilchom chom’in bul’a ahen cheh ahi. Lenggam’a umlou michu thildang khat’a kihen ahi. Alangkhat’a chonset thaneina chun tahsa, lhagao chule hinna hi bul’a ahen ahi. Hiche chun chonsetna hi limchom chom tamtah-in akilang’e (2Pet.2:19).

Mikhat chu ama kilhendoh chonna in atahsa bul’a ahen jong aum’e. Khamna thei tichu lou, ju, biri, sada, khaini, kichep chatvaina dang dangin mi ahenden imuve. Dumchep bom le adang dang chunga khun aphat louna akisun cheh-e. Ahinla aneho le achep amon ho akitang deh poi. Khamna thei semdoh hon sum tamtah tah aveipung’un, golseh (Sports) kichepna hoa jong sum tamtah tah-in akithopi jiuvin, hijehchun, aphatlou dan tampi ihet vangun asemho (copamany) akisutang thei deh poi. Mitam tah-in hiche khamna thei neh chu alha thei tapon, hitichun khamna thei soh le bul’a hen’in i-um gam tauve. Hitobang chun khamna thei Lou (Drug, ju, etc.) neh le don bul’a tampi kihenden i-um tauve. Adeh-in insung mopo minu-mipate khangdongte hiche bul’in ahen tah jeh-in, mitampi tahsa atongkhan, natna gihsatah tah-in alhunkhum jitai. Hijehchun, insung chatvaina, hinkho setna tampi asohdoh tai. Hichun Houbung, kho le veng Nam sung jong atongkhan ahi. Amavang hichea kona ongthol nom tahbeh hon Jesu koma panpina athum’u le jalenna amudiu aum’e. Hichea kona chu amahon Pathen mingailutna jal’a chonchan phalou ho adalhah-uva, kipana, lung-olna, chamna hinkho (Lenggam hinkho) aneidiu ahi. Hitobang hinkho suse-a chonna phalouva kona chamlhatna penom jing Jesu chu bel’ute.

Mihem lunggel jong bul’a kihen thei ahi. Lekhasun khat chun, “nasimdoh chun ami nahisah ding ahi” ati. Milim chavai, tolthana thusim, kichatna thusim, T.V. seriel, Internet (Facebook, watts-up, skype), film phalou hohin mihem lunggel le lungthim ajollhauvin athunun ji-e. Hijehchun, toltha, chonset bol le thilse tulai hin ilah-uva apung tul-tul jeng tai. Lunggel’in mi na atohsah ahin, lungthim’a hitobang thilseho abusah tengle thina le manthahna tailou ipi ba aumdem ? Tulai khangthahte lah a kintah-a haodoh ding deinan, sum le pai ngaichatna asang tai. Ahinla amun’a ding lampi chu kijoulhepna, hunam le adih louva kibolna, thisan kisona ahijitai. Hiche mihem lunggel bul’a kihenna hin mimal, insung, Houbung, Khosung le Pathen Lenggam atohkhah ahi. Hijehchun, Paul’in “lungthah kengun lang limchom puvin,” tia anasei iheuve (Rom.12:1-2). Jesun bou lungthim bul’a kihen ho jalenna apeh thei ahi. Jalenna pehdin Jesun nakouve, Jesu kom beltan.

Lhagao hinkhoa bul’a kihen jong aum’e. Hiche hi thet umtah hinkho ahi. Judate chun Romete noiya soh-a kihen tilouvin Houlam thusim’in jong ahen’u ahi. Namdangte dia phattheiboh channa thei mi hitah sangin, Pathen lhenchomte ahinau tahsanna chu achom khen’un, Romete Houthu le Houlam chondan’in ana henchah tauve. Hiche akikhen nauva kona sutlham dia Jesu hunga anahi. Pathen Lenggam tohgon suhbulhitna dia aneiyu danthu chu Jesun adih lam’in analedoh peh-uve. Mihemte hi thilkhat’in mijouse tahsa lunggel le lhagao lam’a kihenna adih louva pat’a lhadoh-a Pathen Lenggam mite dia jalensah hi Lenggam tohgon ahi. Hicheho nunglam’a chu chonset akisel’e. Mutheilou ahivangin thil bolthei le thanei tah ahi. Kihuhdoh nading lampi Jesu-a bou aum’e. Athahatna le athuneina jal’a nalhadoh-a chule Ama Lenggam’a chan naneisah ding ahi. Jesu nungjui miten, Houbung le mimal’in soh-a kihente lhadohna kin’a kisahlelna anei jing’ui. Hiche kin’a hi nang jong napan hinam ?

...............................

Lhalam 07, 2014 (Pathenni Nilhah)

“LENGGAM TOHGON” THUPI BAHKAI NINA -

Thupi : “Mitcho kho musah”

Lk.4:18 d ; Mt. 9:27-31; Jn.9:1-12.

Mitcho kiti hi mihem tahsa tibah natna khohpen tah khat ahi. Mitcho chu milhinglou, tibukimlou, khomulou, niseh phatseh-a thilsoh muthei talou, ahinkhou ivet’a ahin dan’u imuchet le lungset lainat umtah ahiuve. Nang le kei bangin itibep kho muding anom tadem ? iti lungset lainat um hitam ? Mitcho-a napenlou jeh-in Pathen thangvah-in.

Ahinla, mitampin ahethempon, mitcho-a pen hi ama ahiloule anu-apa chonset-ga, Pathen gaosapna ahi tin atahsan’ui (Jn. 9:2). Hichu Jesun adonbutna-a, “ama le anu-apa chonset vang jong hilou, Pathen natoh loupi kiphondoh theina dinga amahi mitcho-a peng ahibouve,”ati (Jn. 9:3). Atahbeh-in Pathen Lenggam tohgon’a Jesun aseibangin, mitchopa chu aboldam’in, Ama Pathen thilbol theina kidang tah mitin’in ahet phat’in mitchopa ahin midang tampi ahin Jesu atahsan tauve.

Jesu, Amatah-in mitcho khomusah ding hi ama kin atohding ahidan anaseidoh-in, tahbeh-in aseibangin mitcho tampi kho amusah tai (Mat. 9:29; Jn.9:6-7). Chonset’in mitin asunen’in, koima ahoidoh thei aumpoi. Hitobang nat le sat, tibukimlou, tahsa kisuhlou kiti hohi mikhat chonsetna in asosah ahiji poi. Tahsa lam’a mitcho hon kho amuthei nadiuva Jesu hunga anahin, hiche natoh chu seijuiten anajom’un, tukhangin ama nungjuiten itohjom jing diu Ama dei ahi. Tahsa lam mitcho iseinau banjom’in lenggel le lhagao lam’a mitcho jong seithau hite.

Lunggel lam’a mitcho jong aum’e. Lunggel lam’a mitcho kiti chu - Kichang khohsahna nei, midang khohsahna neilou ho ahiuve. Hitobang mihohi lunggel lhasam ahiloule thilkhat’a bou lunggel neimi tin iheuve. Lunggel dang leh lunggelna chom hon alungthim kot’u akha jeh-in thildanga alunglut thei pouve. Lunggel lam’a mitcho hi tahsa lam mitcho sangin akhoh joi. Jesun Pharisee ho chu lamkai mitcho miphalhem, mitcho, mingol tin ana kiminsah-e (Mat. 23:13,16,17). Mit aneiyun amuthei pouve ajehchu alungthim’u chu kichang khohsahna le kichang ngailutna in ana lodim tai. Aman Pathen na atoh chu amuthei diuvin le alungthim kot’u ahonna diuvin Jesu Lhagao lam’a mitcho ho chu chounan ana neiye. Hiche lungthim kot kikhah hi akihondoh louva ahile midang toh alhakhom theipoi. Alung akhelna diu, alungkot ahon’uva chule kho amuna diu anungjuiya anatoh tongjom din Jesun miho akou jinge.

Lhagaova mitchotna hi tahsa le lunggel lam’a mitchotna sangin aphamo joi. Amaho chu polam’a muthei Houlam hinkho-a kisalel lheh-un tin, hinla leiset’a Pathen natoh dan hi mupouvinte. Lhagao mitcho hon midangte hinkho-a kona Pathen thilbol ho amulouvu ahi. Midangte phatna ho akimudoh lou jeh-in Houlam’a loichom chomho ahung kisepdoh tauve. Hou thugil lam’a gelphah louvin chondan phabep amohjui jingun ahi. Ama khang laiya miho lhagaova amitchot nauva kona chamlhatsah dia Jesu leiset’a hung anahi hi ahethem pouve. Pathenin Alenggam tohgon amite boldia adei chu midang ho khohsah-a chule ngailut ding hi anahi. Lhagaova mitcho hon anatahsan’u chu ahile thil mantam hoa Pathen akihou le akipah-e tihi anahi. Hichu danthu jui, neival sum le thil tamtah Pathen’a todoh ahi. Ahinkho-a anatoh a konin Jesun Hou dihtah itobang ham ti anavetsah-e. Houlam danthu jengbou khohsah chu aphanan, hinla mihem hinkho ahijoi danthun hinkho asuhset sanga machal sahjoh ding ahi (Jn. 8:1-11 to tekah in). Hitobang mitchotna-a konin jong Jesun khomuna anapei.

Tunin tahsa-a mitcho ihilou jeh-un Pathen thangvah-in umhen ! Ahinla Houbung mite lah a lunggel lam le lhagao lam’a mitcho atam tai. Jesun namitchotna a kona jalensah dingin nakou jinge. Ama bel’in Alenggam tohgon hechen’in lang Jesu bangin natoh-in vetsah tan.

.~~~~~~0~~~~~~

Lhalam 08, 2014 (Sempatni Jan)

Thupi : “Insung Pathen Lenggam”

Gen. 2:5-8 ; Josh. 24:15 ; Mk. 10:29-30; Lk. 4:18.

Pathenin leiset chunga hin mihem mangchan jilmun (Institution) ana phutdoh-in ahi. Jilmun chu Insung (Home) akitin ahi. Hiche insunga chu Pathen le mihem (family) khat’a chengkhom ahi. Vangset umtah-in Pathen le mihem guitan louva kiloikhomna insung chu chonsetnan mun analo tah jeh-in ana kikhen’in, hinla Pathen ngailutna jal’in Jesu Christan athisan’in mihemte chonset’a jeh’a sesa Insung chu ahin tungdoh kit’in ahi. Pathen insung chu Christa Lhagao Theng to kiloikhomna mun, Pathen Lenggam kinbolna dia jilmun sangpen le abul ahi. Hiche insung chu tuni geiyin akhangtou jingin leiset alodim tan ahi. Hinla, ilah-uva mihem tampi Pathen vaihomna (Reign of God) insunga chenglou atam’in ahi. Hitobang Insunga cheng minu-mipa le chate tamtah Insung kivaipohna, kivaihomna, khankho toltoh-in aumthei tapon ahi. Hijehchun, Insung kitihi Pathen vaihomna pang louva tundoh thei ahilou dan akicheh-in ahi. Chule Pathen to kiloikhom lou Insung chun Alenggam kinbolna aneiding chu thil hahsa ahi ti mudoh theiyin aum’in ahi. Insung Pathen Lenggam thudol hi thah vet’a, hetgil’a hinna-a neiding hi mihem khat hinkho-a giltah chu ahitan ahi.

Pathenin Adam le Eve mangchan Eden hon’a Insung ana tungdoh-in ahi (Gen. 2:5-8). Pathenin anatundoh Insung chu leiset chunga Vangam tobang ahin, Hiche insung nomtah chu Vangam lim kimuna ahi. Hinla vangset umtah chu Adam le Eve chun Eden hon’a Insung nomtah Vangam lim chu Damun anaso lhontan ahi. Pathenin Adam le Eve chu hiche Insunga thilsem jouse kingaina ding le veching ding lamkai dia anatun chu ahin, hinla amanin soh hinkho-in ana kisemdoh lhontan ahi (Gen. 3:9-11; Rom. 5:12).

Pathen tundoh Insunga Adam le Eve suhkhel lenpen tah chu -

(a) Zalenna amangkhel lhonin ahi.

(b) Pathen to kiloikhomna bul asuhdet lhonlou jeh ahi.

(d) Lungul’a um chonset lhepna chu alunggil lhon’a mun (space) ahin sempeh lhon jeh ahi.

(e) Pathen tahsan’a dettah aneilhon lou jeh ahi.

Pathenin Insung sesa chu ahinsom peh-in Ama dia kitah mihem ho; Abraham, Mose, Joshua adang dang mangchan Israel Insung vannoi miten vetkah-a aneidin Canaan gam jon’in ahin puiyin ahi. Hinla phat tampi Pathen Insunga khosa mihemte hindan, lungput chonset lunggul hin apuimang jingin ahi tihi Israel Insunga hin akimudoh theiyin ahi. Alangkhat’a Pathen tundoh Insung ahethem mi abeideh pon ahi. Israel Insung lamkai minthang tah Joshuan “kei le ka-insung miten vang Pakai kin kabol diu ahi,” tin ana phongdoh in ahi (Joshua 24:15).

Joshuan “Kei le ka-insung miten” ati hin Mipa- minu le chate Pathen vaihomna sungil’a kitulut ahinau aseidoh-in, chuban’a Joshua hi mipa khat a-Insung Pathen lungdeiya thunun jou ahina akicheh-in ahi. Chuban’a Mihem khat’in ama le a-Insung mite Christa mi ahina japi angsung’a aphondoh jouna akimudoh theiyin ahi (Mat. 10:32-33 vekah in).

Kitepna Thah (Bible) ivet le Jesun kicheh tah-in Pathenin jilmun (Institution) ana tundoh sunga chengte natoh, kivaihomna ipi aboldiu Ama hinkho tah-a hilchet na apen ahi. (Phil. 2:1-11). Jesun Hiche Insunga chengten atohdiu dol aphondoh chu - “Tahlelte henga Kipana Thupha seipeh ding, sohchangte lhadohna thu seipeh a, mitcho ho khomuna ding seipeh ding, nehchinto-a umho lha-ong ding seipeh-a hung kahi, “ ana tin ahi (Lk. 4:18). Hiche tongdia hi Pathenin Insung hi kijil themna mundia anaphudoh ahi.

Jesun aseibena-a chun, Pathen vaihomna Insunga natohna dia mihem khat’in ahinkho-a thil tampi akikhenpi angaina aseiyin, Pathen lunglhaina-a tongten tahsa le Lhagao hinkho changeiya damna amudiu anaseidoh in ahi (Mk. 10:29-30).

Danthu thempa le Pakai Jesu kihouna hi giltah-a igelle, Pathen Insunga cheng mipa- minu le chate chun mihem hinkho-a thupi cheh lungthim, hinkho, lunggel, hetna, thaneina pumpia Pakai Pathen ngailut’a Akin le Ana tohding hi thupeh lah a chungnung pen le mihem hinkho-a Pathen vaihomna Insunga hinlona pentah hidin tahsan aumin ahi (Mk.12:32-33).

Hiche ihinsei houhi tukhanga mihemte hinkho hito vekah leuhen, mihem khat chu Jalhang hinkho-a ahinkho man, atohdoh, achondan, ahindan, alunggel, alungthim, aboltheina hinkho-a um thil ijakai hi ahung kijilna, akiseiletna Insung chu mihemte changval cheh hinkho hin itobang ham ti kicheh tah-in a phongdoh-jin ahi.

Amina Christa nungjui te Insung chu aphatna sanga asetnan vai ahomjon ahi. Hicheho jeh hin Kuki chate jalhang hinkho-a kitomona (conflict), kicham louna, kinah, kibao, kivetdana soh jiho jouse jong hi mihem khat Pathen to kiloikhom lou Insunga hung kondoh jiho jeh ahi. Hijehchun, Kuki Christian ten igelgil diuva khoh chu, Christa sunggil a pumkhat tah a kisahdoh angaiyin, kithopi Lhagao Theng to kiloikhom angaiyin, Christa chondan, natoh, ijakai hi vetkah (model) a neiya hiche leiset’a Insung isemnauva hin panlah angaiyin ahi.

Pathenin minu le mipa jeng jong tahsa, lhagao pumkhat’a Pathen Vaihomna Lenggam Insunga natong dia anagon ahi (Mk. 10:8). Hiche chungvum’a chun goulah-a goulupen cha eipeuvin Pakai deiya tilkhou le seilet ding hi minu le mipa khat Christan thu apeh chu hija ahi (Eph. 6:4). Tunia cha le naute ase tampi kisepdoh ho jong lungdong poute ajehchu, Pathenin atundoh Jilmun (Institution) a kikhoukhah dan adihlou jeh ahipen’e. Insung adih tah lou jeh chun, jalhang hinkho-a Pathen choisangna le, Tahsan dang hon Christa mel ihinkhouva amudoh jouloun ahi.

Pathen Lenggam (Vaihomna) Insung suhdih nadin, vaikon, vailhun’a Pathen Lhagao Theng to kiloikhom’a hiche Insung chu sahdoh, tundoh-a kivaipoh/ kivaihom ding hi giltah-a i in chenauva geldin aphai.

~~~~~~0~~~~~~

Lhalam 09, 2014 (Leisemni Jan)

Thupi : “Khosung Pathen Lenggam”

Nehemiah 2:1-5; John 1:29; Luke 10:27.

Kho ititeng Khopi, Thinglhang kho aum’in chule jat tamtah pao le ham, chondan, khandan kibang lou, achom cheh gamsung khat’a jong chengkhom ahi. Thupi hi laneo jep utin Assam gam’a Kuki Christiante dinmun to kitoh-a gelding hinte. Pi le Pu khanga pat Assam gam’a Kukite hi District chom cheh-a vetsahnan - North Cachar Hills (Dima Hasao), Karbi Anglong, Karimganj tiho-a hin anakhosa ahiuvin ahi. Christa nungjui hinkho iman masang’uva pat Pi le Pute lhangpi-a ana kivaipohnau, pasal/ numei khat hung kikhou khahna chu Khotol cheh-a pat anahi. Tuhin Pathen jal’in Christian ihinau jong Kum 100 (Jakhat) valset ahitai. Hinla, Pi le Pu khanga pat chena lhongpi ina juihou Khosung kivaipohna akipailha deh pon ahi. Ajehchu, Pi le Puten Chung Pathen ana ging’un thil ijakai Khankho neitah-in anatol’un, inchen, khosahna ahin, khosunga jong Chung Pathen hetpina-a kikhoukhah anahiuve (Joshua 1:8)

Hijehchun, tulai banga lekhathepna ana neilou vangun khosunga hung kiseilen mihem khat chun, alungthim’a ngailutna thupha achengin ahi. Hiche chun ahinkho lhumkei ateh geiyin thilpha bolna hinkho apen ahi (Pro.22:6). Tukhanga Christa nungjui Kukite khosung kivaipoh, hindan, nun le khan ho ivet le mitin hin Jalenna amangkhel gamtan, kivaihomna, kivaipohna ase gamtaiye. Christa nungjui ikisah vangun ikhochennau hinkho hin Christa nunchan athodoh pon ahi. khogem kijam tobang ahitan ahi. Ajeh chu, Pathen loupina mudoh thei umlou ahi. Kho tundohna thei tha, lungthim hung konna chu Pathen jal bou ahin. Pathen to kiloi-khom Haosa, Upa, Kho-Chaga ngaichat um ahi. Hijehchun, Pi le Puten Chung Pathen khankho Bulpi khonung juiya ana khosah banguva eihon jong Pile pute hinkho vetkah a neiya khosung Pathen vaihomna (Lenggam) isodiu hi thulai mugiltah chu ahitai.

Pi le Pute khosunga pat ahung kiseilet dan’u hi hseibe leuhen -

1.Khosung kitihi Kukite dia kibulphuna, lungmon, lhamonna jalhang hinkhomna, thutah a kivaihomna mun khat’a ana neiyu ahi.

2.Chondan, khandan kihilthemna, incheng jouse pumkhat hinkho mankhomna mun ahi. Thil le lo jong neilhanga ana neikhom’u ahi.

3. Pute chun gamsa ; sakhi, sasan, ngalchang salentah ahin kap teng jongle akappa le abecha hon insah, inlhang khosunga mi koukhom’in ana nekhom jiuvin ahi. Athilbol’u chu milunglen chuban’a hongphal le hopjau (Inclusive) hinkho ana neiyun ahi. Hiche chu ahinkhouva ngailutna-a akiseiletna pau chun aboldoh sah jouvu ahi. Tunin sakap, samatna ding vang aum behseh tapon hijongle aneijou pan insah inlhang nei le gou alamdoh thil kiphal tah-in ahomdoh nadem tihi gel leuhen tahsan aum behseh tapon ahi.

4. Khosung jenga jong Haosan Thempu lungngapnan ananeiyin, thil ijakai aseidoh masanga Chung Pathen kinbol Thempu anadong’in Thempun hinte atiteng thuphondohna ananeiyin kipalna le kisuhmona Haosa jengin jong Chung Pathen le Kho-Chaga ang’a ananeiji pon ahi. Tulai Haosa (Inpipu) kingaina theilou, lungmonpi theilou, Pathen to kiloikhom lou atamtan ahi. Kho-Chaga lungmong’a chensah lou, Khankho-a kikankhomna him him umtalou khosung tampi Kuki Christiante lah a atamtan ahi. Hiche ho chu hoiya imudoh theiyum itile Jalhang hinkhomna mun’a thilse bol’a pang jiho-a kona akimuchen theiyin ahi.

5. Pi le Pute khochena’a jalhang hinkhom dan seiding tampi umjongle Somge phatchomna chu veleuhen ;

1) Khosunga akina akidel aum jongle aphatchan aphel khen jouvuvin ahi.

2) Khosunga In meiyin akah jongleh aphatchan aphelmit jouvun ahi.

3) Gucha michom, sahang khosung mite sukhathei jouse amahon ahoibit jiu ahi.

4) Janlaiya api, aputeu lungmong tah-a akicholdo sah-uva amahon khohna jousea pan alah jiu ahi.

5) Janlaiya gal hungkon jongle amahon akimaitopi jiu chu ahi.

6) Avaicha panhu-a lom aum jongle na atohpeh-uva, thing apoh peh-uva, lou alhohu-uva hinkho chu Khankho-a atol jengu chu hija ahi.

7. Som hohi Haosan jong manchahna thei chan’a amanna, ama hohi tom-ngaitah hiuva ahi.

Pi le Pute jalhang hinkho khochena a-hin Khankho-a hung kiseilen peh-uva ahin, hijehchun, kacholtai ti koima umlouva, aki lung tonau thusim tampi kisei ahi.khosung khat jenga jong Haosa, atohkhompiho chule Thempu hon j atohding dol cheh atongun, hijehchun, Chung Pathen jong aloupina bang tah-a a choihoiyu ahi.Tukhang hi ivet le Kukite hi atamjo Christian ihiu ahitan, ichondan hou ivet le kingailutnan ilah-uva vai ahom tapon ahi. Kijatona umbehseh talou, thudih, thutah-in vaihom talou, khosung kivaipohna jeng jong atamjo ivet le Haosa dihlou tah-a vaipo, milham hinkho ivet le Haosa jana umtalou, chon chatvaina le kidah dah um’a ihinau tamtah aumtan ahi. Ichenna jouseuva mi nuisat, jalenna neilou, notthap’a um ihitauve. Christa nungjui hinkho iman vang’uva thanopna le kipana jong umchom behseh talou, atot, akichem to kibang jeng hinkho atamtan ahi. Khat le khat jong kichimgam ihitauve. Ipijeh pentah-a khogem banga hibanga kivaipohna hoi, kingailute chu hitia ium’u ham, koi ingoh diu ham, Christian ihijeh-uva imanthah-u ham ? Lunggil’a igeldiuva pha chu ahile ihatmonau, ikilungto lounau, Khosung, vengsung, chenkhomna-a eikangom’uva Khankho (Khankho bulpi Jesu) to hinkhomna toltoh-a aumlou phat’a hitia hi kichim gam ahitaiye, kijatona aum tapon ahiye. Hiche KHANKHO hi suh hing’a aumkit kahsen Khosunga hi Mipi hinkhomna hile lungkhat kengkhat’a idin joulou diuvin akilangin ahi. Khankho hi imihem chenkhompi, thilsemho le Pathen to hinkhomna-a eikankhom diuva ahi.

Kipana Thupha hi veleuhen Jesu Christa hi Khankho Bulpi chu hija ahi. Aman anasei chu ahile “Nangman nalungthim pumpi le nathahat pumpi le nahinkho pumpi, nalunggil pumpia Pakai na Pathen nangailut’a chule nangma nakingailut banga naheng nakom nangailut ding ahi,” tin anaseiye (Luke10:27). Asei banga Aman Ngailutna-a thina changei atoh-a vannoi akankhom thei ahi (John 1:29). Hiche Christa ngailutna sunga umte chun kilungtona, hatjouna, phatna, kiseingaina aneiya lhukam den ngailou ahi ti akicheh-in ahi. Pi le Puten Khankho anajuiyu jong chu hiche Kipana Thupha Jesu chu hija ahitan ahi. Hijehchun, tua idinmun’uva ikikan khomnau Khankho hoilam igeiyu tam V.D.P., K.S.O.,Youth Club., K.C.K ho hi somge dinmuna gelmat thei ahitan hinla thideh duh-a ijui phel phul’un, Pathen dei to kitoh a isuhhat diuhi imopohnau ahiye. Israelte chu achapan laiyuva pat’a Torah hi sun le jan’a achateu ahil’u ahin, tunia eihon Pi le Pute kiseingaina Khankho ho ichateu lunggil’a muchi itupeh-u hinam, chapanghon thilpha bolnomna ahung pilhin teng alung’uva aneiyu hinam, aphatmo teng’ule koi ingoh diu ham, eiho thepmo hung hiji ahiye.

Judahten a-hinkhouva apu, apateu khosahna Jerusalem khopi chu hetman louva akiletsah hoithonau jeh-a khogem’a kijam’a, khankho toltoh ding mijong umtalou, mitotnopna le daithang’a um hiuva ahin, Nehemiah lunggel’a Pathenin na ahin toh-a aman ana pohnat pentah akilungtonau hinkho Pathen’a kingaiya Khankho giltah athodoh kit diu gelkhoh-a pan alah jal’a lolhing ahinau imuvin ahi (Nehemiah 2:1-5).

Tuni hin Nehemiah lekhabu hi eiho hinkho to suitoh theiya um thil tamtah um ahin, adeh-a khosung lhacha, Haosa, semang, pachong, kho-chaga hon igel’uva ipohdoh diu jong angaiyin ahiye.

Ihin seihou jouse lagom’a thukhina-a kaneinom chu ahile Nehemiah lamkai hina alolhinna hi ; ahung khandohna le ahung kiseiletna apu, apate khochen dol asumil pon ahiye, aninan alhutasa tundohna dinga ngaikhoh jouse hin subulhitpeh-a Pathen ahiye, hichun avetsah chu Pathen lungdei jong hija ahi. Tunin Kuki chate Christa nungjui hinkho iman nauva Khosung kivaihomna, hindan aman nauva hin Nehemiah banga ihahsatnau ipi ingaichat’u ham tia eidong diule eikithopi diu Christa ibel tengule umdoh ding hija ahi. Christa ibelna diuva hin Aman adeile Anatoh jouse le Pi le Puten anajuiyu lungkhat, kengkhat’a adinnau Khankho (Jesu) to ki loikhomna ijamtoh-uva, idotoh tengule Khosung Christa vaihomna (Lenggam) a ihinkhom nauhi pumkhat hung hintin tohdoh lelding le jomolso lelding um taponte.

~~~~~~0~~~~~~

Lhalam 10, 2014 (Vahchannni jan)

Thupi : “Houbung Pathen Lenggam”

Exo.15:1; Minbu 1:1-3; Acts 9:1-19;

I Cor.6:19-20; Jn. 2:16, 19-22; Matt.16:18.

Thu lah a thuhah pentah le mihemten ahaseipen hi Houbung thucheng hi ahi. Hinla, ilah-uva koiman hetgil’a Christa Jesun adeibanga mangcha mihem alhomlheh jenge. Houbung Pathen Lenggam seidohna ding hin Houbung kondoh dan hetchetna agongso le atah hina bang tah-a het’a juiding hi thupi tah ahi. Aban’a, Pathen Insung Houbung hi ijalhang hinkhou khandohna le kisahdohna ahin, ahuinun (environment) hi vaihom, milham ho/ Khat le khat kah a boina tampi aum jin ahi. Hinla, hiche hohi lungdonpi louding ahi. Ajeh pentah chu Pathenin a gon bang Houbung gongso hetchet loujeh le man nom loujeh ahi. Hijehchun, hetchetn’a pumkhat’a dinkhoma hinpi ding hi igeldiu hinte.

Houbung hi atungdoh Pakai ahi (Matt.16:1). Pakaiyin atundoh Houbung chu ; Khat, thengseh,chonset to umkhom theilou ahi. Hiche Houbung ati hi mihem khat cheh chunga um hinkho hi ahi. Mi khat cheh chu, Christa sungil’a akikan khom teng pumkhat asoh jin, hiche pumkhat hinkho chu tahsa tah’a Houbung limso hi ahi.

Hebrew paocheng “edah”, (a thucheng hin alamdoh chu Israelten gamthip ajot laiyuva chun Pathen min’a akisuh khomnau le pumkhat a Pathen avahchoi khomnau gongso (Exo. 15:1). le Greek paocheng “Ekklesia” (Greek miten kum jabi 508-322 BC laiya chu kiloikhomna (Democratic Assembly) tia ana neiyu le ana minvou, Hiche mun’a chu numei le pasal koihile lungkhat tah-a thilsoh thunoh ho sutlhap khom dinga kikoukhom jiu ana hi). Hb.edah le Gk.Ekklesia gongso hi Pakaiyin ana tundoh gongso chuto aum dan kibang ahijeh chun, Bible them hon, Houbung thucheng kondoh na chu Hb.edah le Greek Ekklesia apat ahin, manu ahi.

Hb.edah hi ivetle Pathen angsunga kikou na ahi’in, Greek Ekklesia, “Ek” leh “kales” kigomkhom ahi. Ek kiti hi “akonin” tina ahin “kales” hi “kou” ahiloule “kakouve” tina ahi. Hiche gongso hin aseidoh chu Houbung hi chonset le nopsahna-a pat kikoudoh tina ahi. Paul hinkho kikhel dan hi veleuhen Christa Jesun akou masang chun, aman Christiante suhgam’a thagam ding hi ama kin lenpen dan’in agel’in ahi. Thempu chungnung koma Christiante suhchimit nading chun phalna lekha kilah dia achepet tah in Damascus khomol’a Jesun anakhokhel peh-in ama natong din anakou jotan ahi (Acts 9:1-19). Jesun, “Saul, Saul ibol’a nangin neibolset jing ham ?” ativangin Paul’in koi ahi ahepon ahi. Jesu dia melma lenpen ahi chu Paul’in ana kihetdoh pon ahi. Jesun Paul hinkho akhel peh in, miphachom tah asohdoh in ahi. Hiche laiya gel ding chu Jesun Paul akoudoh hi atheng dinga akou ahi, aban’a Christa Jesun Houbung ati hi mihem khat hinkho hi hija ahi (I Cor.6:19-20).

Hinla, Houbung gongso (nature) le lim (Image) dih loutah hin pandoh chu, Roman Catholic Church ahi. Amahon,Houbung gongso edah le Ekklesia apat hita louvin, “Kuriakon” (pa thanei, vaihom lungput) gongso Houbung gongso a ahin tulut tauvin ahi.

Hijehchun, agongso dihlou tahpa hi Roman Catholic khanga chun “Kyriakon” (thanei vaihom lungput) chun Houbung ahin vaipo tan ahi. Hiche khanga thil soh umchan ivet le Pope thaneinan vai ahin homtan ahi. Jalenna, kibahna, chamlhatna mipi hinkho-a chun aumdoh thei tapon ahi. Pope hon Houbung chu sumkol veina chonset ngaidamna certificate ho ahin joh-un Houbung lungput chu dihlou tah in ahung khanglen peh tan ahi. Kum jabi 19 century phat lai chun Houbung thusim’a suhmil theilou Martin Luther’in hiche Houbung chu kithahsem phatna (reformation) ahinbol doh in tunin vannoiya Houbung miten Pathen thu (Bible) jalen tah in ihin simthei tauvin ahile, Houbung gongso Pakaiyin agon chu hetdoh theiyin aumtaiye. Hinla lungput dihlou Houbung gongso chu ilah-uva suhmitmon ahing jingin ahi. Aban’a Western Missionary hon lhumlam gam’a pat’in Kukite lah’a Houbung kikhen telsan (Kuriakon) ahin polut’un hiche gongso jong chu dihlou tah ahin, hijehchun, ilah-uva pumkhat theilouna, kibungkhen nan vai ahomden tan ahi. Hiche lunggel dihlouna hohin Houbung Pathen vaihomna insung jalhang hinkhomna asuse mong mong jenge tihi akimudoh theiyin ahi. Mitam tah’in atahsa khamna thei, huh le jonthnhoiyin asubohjin, abangin, lungput dihloutah in Houbung kivaihomna a lunthim phalou agolin khat le khat akinahsah in, konkhat’in Christan a gon bang hilouvin sum le pai muna din Houbung gam kichep nan aneijiuvin ahi. Pakai tundoh Houbung hi Christian tamtah’in Thagum vaihopna, ahao,avai khena mun chule kibung khena, sumkol veina mun a so jiuve.

Jesun Houin asuhtheng chung changa hin Judate henga Jesun “... kapa in chu kiveina mun naso lou diu ahi,” anatin ahi. Tahsa tah a Houin kitung jeng jong mihem lunggel athen le Pathen alunglhaiyin ahi ti akicheh-e (John 2:16).

Aban’a Judaten Jesu koma thil hicheng nabol theina ding hi melchihna ipi neivetsah diu ham ? Jesun adonbutna-a chun “Hiche Houin hi sumang’un nithum’in tungdoh inge ati”. Hinla, Judaten ananuisat bep’un ahi. Jesun ama tahsa chu Houin dol’a aseina ahi chu seijuiten thina-a pat athodoh nichun ahethem bep’un ahi (John 2:19-20).

Hiche laiya gelgil dia pha chu Jesun Houbung asei hi mihem hinkho hiding ahi. Paul’in mihem hinkhoa thenna, ngailutna aumteng hiche Christa min’a kiloikhomna Houbung Theng, pumkhat hinkho chu hung umdoh ding bou ahi ati. Christa chu Houbung tungdohpa ahi. Ajehchu, aman athisan’a achohdoh ahiye.

Houbung hi aneipa Christa ahin, achate eiho hi hiche Houbung chu ihiuve chule pumkhat’a kiloikhomna Christa sunggil’a hi ineidiu athupi in ihinkhou Christa a deibanga iman chah teng’ule Houbung Pathen Lenggam (vaihomna) hung kilangdoh ding ahi.

~~~~~~0~~~~~~

Lhalam 11, 2014 (Vanghomni Jan)

Thupi : “Kivaihomna a Pathen Lenggam”

I Kgs. 3:7-13; Pro. 23:1-10; 24:5; Rom. 12:9-21.

Kivaihomna thucheng isei tengle mihemte lungthim’a hin ngailutna sangin thagum’a vaihomna lungput hin mun alo masajo jin ahi. Hiche kivaihomna hin tahsa mihem’a um jalhang hinkho (social life) kivaihomna (political) kivahna (economic) le Houkin (Religious practice) dinmun hi pelthei ahipon ahi. Hiche hinkho-a hi vannoi leiset mihemte jalhang hinkho hi kitol ahi. Bible pumpi thu chedan jong ivet le kivaihomna hinkho-a hi kitol ahi. Hijehchun, Bible thuhil jong chu kivaihomna hi Pathen tundoh ahin, Amahi chihna le vaihom themna-a manding angaina hi thulai mugilpen khat’a anakisei ahi. Tukhang jenga jong kivaihomna hinkho-a hi Pathen hi chihna bulpi-a neiding hi khohpen tah ahi. Houbung, khosung, gamsung kivaihomna hinkho-a hi vaipo le vaihom mihem khat chun Pathen (chihna) aneiloule Pathen Lenggam gongso chu umdoh theilou ding ahi.

Kitepna Lui (Bible) in kivaihomna tampi seijong le Solomon lengpa hinkho hi ivet le apa David in athi-san jouva kum chapangcha Israel mite vaihom dinga leng’a tun ahitan, Aman jong ahinkho-a alhahsapna, alhinlelna tampi geldoh-in ami hinan kisonjouna anei tapon ahi. Hijehchun, Pathen (chihna) bulpi henga ataona ocheng veleuhen -

vv-7-9 “Vo Pathen ! chapang vaikonje, vailhunje helou hijong leng kapa khel’in leng neichansah tai” tin onem heucha le kinoigolna Pathen angsung’a ocheng chu akamsung’a ahung potdoh in ahi. Aninan, vaikonje, vailhunje helou chapang hijong leng ati hin ; Israel mi hijatpi chunga ama-a kisonna aneilou chu aphongdoh in ahi, athumnan, apa David hatna le loupina-a kisong louvin Pathen asong jon ahi ti aseidoh in ahi.

v-9- “Hijeh chun se le pha kahet khen’a thudih a Namite kavaihom peh theina din chihna neipen. Achuti loule namite hijatpi iti kavaipoh jouding ham ?” ati.

Hiche lai sunga thucheng, thugol hin thugil tampi aseidoh in ahi. Hiche lah a geldoh thei chu -

(i) Solomon vaipo ding ahitah jehchun vaihomna hinkho-a thupi tah, thudih Pathen deiya tohdoh ahina din thilse, thilpha huinun (environment) hetkhen athupi dan aseidoh-e. Hinla, mihem lunggel’in ahet bukim joulou ding jehchun Pathen kithopina athupi dan aseidoh in ahi.

(ii) “Na mite kavaihom peh theina din...” Solomon’in Israel mipite chu ama thunoi, asoh tobangin agelpoi Pathen chate, Ama gou vetup ding le puihoi dinga akingansena thucheng akohdoh in, mihem tamtah in Houbung jenga jong mopohna khat atuh le amihem chankhompi ho noisena lungput aneijin ahi. Hinla, Solomon vang chuti ahipon Pathen aging jon ahi.

(iii) Pathen lungdeiya vaikon vailhun ding le kisuhmona umlouva tohdoh ding khohpen’a aseidoh in ahi.

vv- 10-13 hichelai chang sunga hin Pathen lungdeiya Solomon in vaihomna hinkho-a kal asena ding hin ataona hi Pathen alunglhaiyin ahi. Hijehchun, koima neikhah lou chihna le hetna apen chule athum louhel hinkho lhumkeiya nei le gou ding haona apeh than ahi.

Mihem hinkho-a hin mitam tah in anatohna-a Pathen lungdei masat louvin ama lungvul haona ham nei le gou ngana din akisalel masajon, pum hat’a genthei chaga chanvou tampi aneh mangpeh in indim dim’a nei le gou akhol’in, hinla Pathen kinbolna din miphachom lou tah hinkho mihem tampi aum’in ahi. Hijehchun, mihem khat hinkho-a hi Pathen lungdei amasat thei teng tahsa-a nei le gou hohi Ama alunglhai le apeh jeng ahi ti igeldoh diu aphai (I Lengte 3:7-13).

Hebrew Literature thuchihbu bung 23:1-10 gei veleuhen; thuchihbu sunpan adoi le atup pipen hi hinkho-a Pathen suhmil’a lamvaina thei thil tampi - duchat jeh-a chonset soh a panthei ahidan, hao ding deijeh-a mangthei thil kisahlelpina lunggel hin vaihom dinmun’a din Pathen to kigamlhat thei ahidan aseidoh ahi. Hijehchun, thuchih sunpan Ankong jengcha jong miphalou to nekhom hih-in tin anaseiye. Ajehchu, Pathen hi atheng loule aphalou toh umkhom theilou ahina aseidoh in ahi. Chule “Chagate gam lahpeh dan, chagate panpi jing Pakai ahin, amaho jal’a Pakaiyin na kinahpi ding ahi,” tin ana seiyin ahi (Pro. 23:10-11).

Thuchih sunpa hin Pathenin ihinkhouva ipi adei ham kivaihomna hinkho-a iti panlah ding ham ti aseidohna ban’a Pathen dei bol chu lunglhai um phatna, natoh mihem dia jong kipa, lungmon um hinkho ahidan aseidoh in ahi. Aman aseibena-a chun thahat sanga chihna phat johna, pumhat sanga hetna aphachom joi atin ahi (Pro. 24:5). Hichu hoiya kon ham tia igel le Pathen’a kon ahi (Pro.1:7).

Chunga kisei jouse lahgom’in kivaihomna hinkho hin Pakai (chihna) apanlou teng kibung khennna, losapna, jumna, maimohna, thina khop hel hinkho changei lamdoh thei ahi. Mihem hinkho hi kivaihomnan alamkai ahin, aphat aset chu kivaihomna kong tol ho khut’a kingam ahi. Hijehchun, vaihom ho Pathen toh akiloikhom angaiyin chule chihna Lhagao Theng chu alunggil’a akilamkai sahding angaiyin ahi.

Kitepna Thah lam chu ivet le Paul’in, “Pakai lhachan pangun” tin anaseiyin ahi (Rom. 12:11). Aninan, japi maiya thilpha bolding gel’un tin Rome mite henga anaseiyin ahi (Rom. 12:17).

Chunga kiseiho jouse hi gil tah-a gel pum’a thukhina kineinom chu jalhang hinkhomna Houbung, khosung, gamsung leh insung dinmun’a vaihom hon Pakai lhacha ipan diu akhoh in ahi. Chule thilpha ipiham hetna dia chihna (Christa) kivon ding, Amatoh kiloikhomna guitan louva kiguijopna taona hinkho-a panlah angaiyin ahi. Hiche bollou lamkai, Mipa, Minu, Chate, Haosa, Pastor, Evangelist, Govt. Officers koihile avaihomna mun chu Pathen Lenggam (Vaihomna) gongso (nature) langdoh jouponte ti tahsan aum’in ahi. Hinla, Christa (chihna) kivonte vang thudih thutah in vaihom’un tin avaihomna Insung, Khosung, Gamsunga chamna pumkhatna, ngailutna, thutah, khotonan Christa vaihomna gongso hin semdoh inte.

~~~~~~0~~~~~~

Lhalam 12, 2014 (Gansemni Jan)

Thupi : “Chapangte le Pathen Lenggam”

Prov. 22:6; 20:7; Labu 37:37; Lk. 2:49; Mk.10 :13-16.

Pathen Lenggam thu akisei tengle notthap louhel ding chu Chapangte hinkho hi ahi. Jesu Christan leiset’a phat chomcha na anatoh sungin Chapangte hi thetna him him aneipon, chusangin hoitah a khoukhah ding le khohsah ding angaina Ama tah in ana vetsah in ahi (Mk. 10:16). Chapangte hinkho hi Pakai Amatah in gapha ahinkhouva asodohna dingin bul dettah in anaphut’in ahi. Tukhang hin Chapang khohsahna alhasam lheh jengtan hijehchun, Chapang phalou tampi Christa nungjui hinkho imannau jalhang hinkhomna-a hin akisepdoh in ahi. Hitobang chun minu/mipa, insung, khosung, Houbung chule gamsung mite din gaphalou asepdoh-un imitlhi pulna diu hinkho amang tauvin ahi. Koijeh-a hitobang hi Chapangte hinkho-a hung ga-doh hintem tihi Nu le Paten igeldiu angaitan ahi. Minu-Mipan isuhkhelnau tampi lah a hettheiya um chu -

(a) Chapang chu achonna dingdol tah a khoukhah lou jeh.

(b) Ahinkhouva Christa to akiloikhomna diu mun (Space) sempeh lou jeh.

(d) Tahsa themjil jengseh igel’uva Christian Education kihilthem lou jeh.

(e) Minu-Mipa kitah thilpha bol alhom tah jeh a Chapang dinga vetsui thei aumtah lou jeh ahi.

Houbung miten Chapang hon Jesu Christa hi Pakai leh Huhhingpa-a aneiyuva ahinkho lhumkeiya ateh geiyuva asuhmil louna diuvin chondan, leiset khantou to kitoh in Children Bible School minputsah in ibol’uvin hiche jenga jong Nu le Pa ahethem lou tampi aum’in ahi.Chapang hinkho hi jinga Khompi (pillar) leh Minu-Mipa kingaina ahin, asemkhel ten khang tampi agu aneuvin asempha ten khangsotpi aga aneh u ahi. Hijehchun, Chapangte hinkho semtupna dingin Minu-Mipa pumkhat’a Chapangte hi Pathen thua iseilet diuhi giltah a igeldiu aphan ahi.

Chapangte hinkhoa hin akum poh a lungthim, lunggel aum’in ahinkhouva tahsa, hindan, chondan chun ahin thodoh sahjiu ahi. Aninan, Chapang hinkho atahsa, alunggel akhantou to kitoh in aumnau, akhosahnau insung chondan le jalhang hinkhoa chondan ahuinun chun nasatah in alungthim sunguva alutjin ahi. Hijehchun, ahinkhompi a-insungmite kitah a Pathen nei angaiyin ahi. Jalhang hinkhoa akhosahnau mun chu Insung, School, Houbung, Khosung, Khopi, ahi. Akhosahnau poh-a hin alungthim sung’uva thil tampi lut’a ahi. Hijehchu, Chapang hindan lunggel le lungthim het angaiyin ahi. Chapangte hi akikhanlhit tolhonin tahsa, lunggel, lungthim athanopnau hohi ivet le jalhang lah a lhatnomna toh hungkhang tha peh ahi. Ahinkhou hi pilhin lam mano jing ahiuve.

Hijehchun, Chapangte hi akhanlai phat’uleh midang gelkhohna, mipi tohkhomna-a thanopna, aneiyun ahi. Hinla, pilhinna anei masang’un pasal numei atum tum’a lhatna aneijiuvin ahi. Pilhin domna ahinnei teng’ule numei pasal lhatkhomna phat ahinpha kit jiuvin ahi. Hijehchun, Chapang a-insunga akikhoukhah dan chun jalhanga ahindan nasatah in apodoh jiuvin ahi. Chapangte hinkho hetthempeh angaina tampi aum’in ahi. Ajehchu, Chapang hinkho-a hin amabou kigel thupina, midang jong achunga aum’e ti geldohna, midang suhlunglhai nomna, pachatna agelsang, jalhang hinkhomna ajabol, jalhang hinkho hi mimal’a kingam ahi ti ageldoh phat, jalhang chonchan’a chedan lhongpi ahetthem phat’u, thil tampi ahinkhouva hetthem angaiyin ahi. Hijehchun, Chapang chu hetthemna le khohsahna vetsah ding ahi. Akhohsah ding umlou banga agellouna diuva panlah ding ahi. Changa dinjou dan lampi hilding ahi. Chule thusim angainom phat’u ahin, kijil themlai phat ahijeh-un abolsa thil hou velbol nomna aneijiuvin ahi tihi hetthem peh angaiye.

Thuchihbu sunpan hitin ana seiyin - “Chapang chu achonna ding dol’in khoukhah lechun ateh geiya asuhhmil louding ahi “ (Pro. 22:6). Hiche laiya geldoh thei chu ipi ham ? Chapang chonna dingdol tah chu gelgil angaiyin ahi. Pathenin Chapangte chu Alenggam kinbol dia adei ahi. Aphatcha thilpha, thildih, Pathen dia tohdan hilthem ding hi aseidoh nom chu hija ahi. Hitobanga aphatcha kiseilen Chapang chu Houbung, Khosung, Gamsung, Insung dinga khompi dettah le Pathen dia manchah phatah hiding ahi.

Hitobang Chapang semna ding hin Minu-Mipa mopohna alen’in ahi. Thuchih sunpan; “Mipa kitah thildih bol chu achate din hamphat aumlheh e,” tin anaseiye (Prov. 20:7). Minu-Mipa hi Chapangte dinga Jilkung lenpen Pathen nganse ahin, amani Pathen’a akitah le Chapang semna dia thanom teilhon ding ahi. Chule Pathenin gou lah a goulupen apeh chate hi akhokhah dia mopohna neiya kitep Minu-Mipa hilhon ahi. Mihem khat aset, aphat hi aneolaiya anu, apan ahinsem dan dan’a pilhing ahiteng’ule aga hungsoh dohji ahi. Hijehchun, Minu-Mipa mopohna kitihi alen’in ahi.

Psalm sunpan, “Thilse jamsan’in thilpha bol’in chutile nachaten gamsung alojing diu ahi,” atin ahi (Ps. 37:37). Minu-Mipan hinkhoa thildang tampi kisahlelpi ding leiset’a umjongle Pathenin Chapang hinkho semdia eingasenau suhmil louding ahi. Chapang hinkho aphat le ichennau gamsung jeng jong damna, chamna le ngailutnan vai ahom’a gamneipa Pathenin hiche ichatehou chu gamsunga vaihom dinga atun ding hija ahi, Psalm sunpan kicheh tah in aseidoh in ahi.

Jesu Christa neolai phat chu ivet le anu Mary le apa Joseph in aholmo lhon’a nithum nia agamudoh lhon’a Jesun ajah lhon’a asei thucheng “Idia neihol khoh lhon ham ? kapa insunga kaum teiding nahet lhon lou ham ?” atipeh-e (Lk. 2:49). Hichelai mun’a Jesun asei thulai mugil tah chu - “Kapa insunga kaum tei ding” atihi gel leuhen, Chapang khat chu Christa Jesu sunggil’a aumding aseidoh in ahi. Aninan, Chapang hinkho puihoi ding chu Christa Jesu ahina akohdoh in ahi. Hijehchun, Minu-Mipan Chapang chu asempa Pathen sunggil’a aumsah ding chu imopohnau ahi.

Aban’in, mi phabep in Chapangho Jesu anga ahin puinauva chun seijuiten anaphoh un, hiche dinmun’a hin Jesu lungput hi veleuhen ‘alung phatmopi in ahi’. Hichun avetsah chu, Jesun avaihomna insunga Chapang ngainatna anei ahi ti mudoh thei ahi. Chule Jesun Chapang hinkho hi phatah a jinga lamkai ding le Alenggam’a natong dia bulphu ding akhohje aseidoh ahi. Hijehchun, Jesun aseiyin, “Kakom’a hungsah un jada hih-un Pathen Lenggam chu hitobang hoa bou ahiye,” ati (Mk.10:13-16). Chapang lungtheng seh hinkho hi Pathen ngailutna thugil tulut peh dinghi asempa (Pathen) lungdei ahiye ti igel diuvin aphai.

Achaina din, Chapang lhoh, lunggel, lungthim hepum’in Christa Jesu deiya Chapang semdin panlau hitin chule Chapang hinkho sem kitihi In foundation (abul) kitung le agu (Frame) ho kisutopan tobang ahin hijehchun, gentheina le cholna tampi umding ahi. Hijong le ahinkhouva gapha isodoh teng’ule Pathen le mihemte kipah ding ahi. Chapang lungtheng seh a hung penga ahin, insung, khosung, Houbung, gamsung huinun (environment) ase, apha tampi lah a Christa sepai Chapangte ikhoukhah nauva hin Minu-Mipaten eiho hetna jengseh chamkim pontin Pathen to ikiloikhom diuhi akhoh in ahi. Hichae Chapangte hi Christa Jesu manchah phapen tah dia ikhoukhah diuhi giltah in gel’in tongdoh teiyute.

~~~~~~0~~~~~~

Lhalam 13, 2014 (Misemni Jan)

Thupi : “Kuki Sahnit Nikho le Pathen Lenggam”

Gen. 2:7; Eze. 37:1-14; Lk. 23:34.

Kuki Sahnit Nikho le Pathen Lenggam (vaihomna) thu ahin, alai jamtoh ding chu ; Hinkho jabol ahitheina ding le ngaidam thu hi ahi.

Kuki Sahnit Nikho (Black Day September 13) : Kuki Christian Church lamkai hon ana hilchetna-a chun Kukite puchon pachon dol’in, agam gam’a chomjep umjeng jongle, mihem thina hi lamnin akikhen’in, (1) Nat le sat’a thi chu thipha akitin, (2) Gal le Sahang tha chule kitohkhahna (accident) a thi chu thise akiti.

Thipha-a thi chu leitol’a kivuiya akivui nikho ajing le Selnit kiti-a, khosungmi vaikon natong louva pul kidoupi-a ahi. Thise-a thi vang chu insunga jong along (thilong) kipulut ngailou vuibouva kijam’a khopam’a kivui chule akivuini ajing nikhoa chu Sahnit kibol’a, loukon natong umlouva pul kidouva ahi.

Selnit le Sahnit kibol hi jabolna ahin chule athite insung lhamonna jong ahi. Sahnitna kibol hi mihem’in ajeh beiya atha ahija athajeh chu Haosa, Upan thu asei chaiya kichamna aumdoh tengle akichaiya kikoi ahi.

English paova “September 13, 1993 Black Day” tia Nampin Sah kinit hi, February 10, 1996 nikhoa chu NSCN (IM) Tangkhul te lamkaina noiya Kukite monabei nunao chapang, numei, tehse voise demlou, mitcho elbai geiya mi 900 val athau chule nikhat sunga atam tha penniu September 13, 1993 ni-a Aimol (Tamei) a pasal 87 chule Gelnel 17, agom’a Kukite 104 kitha ni chu atha jouse gopsoh a “Sahnit” kibolpeh chule athi ho thu seitohna aum kahsea kinit jing ahitai. Mihem hijat, monabei kithat chu phatkhat le agu thouthei ahijeh-a, seitoh a, agu thosah louna dia lamkaiten adoh-u le United Naga Council toh kihou dia aseijeh-un, March 29,1994 chun UNC le Kuki Inpi akihouvun, April 4,1994 man kihouna aumkit’in NSCN (IM) hon akha jeh-un seitohna aumthei tapoi.

Mithat hon seitohna ding ahol’uva seitoh a champi akisat kah a hiche nikho hi Sahnit Nikho tia kimang jing ding ahi. Hijehchun, akho khoa Haosa le Houbung lamkai makaina noiya hiche September 13 nikho hi ajeh beiya kithat Sahnit nan man’in ahung umpeh tan ahi. Akiman dingdol hi hitheina lam cheh a bolding ahi. English chonna banga intin’a banga Ponvom khaidoh a, Pomvom sil’a kikhop khom’a taona le athudol hilchetna le Pathen thua kitilkhouna-a man ding ahi. Hiche hi Kuki Christian Church Assam Synod ten jong Lhalam kisuhhalna to kilhon’a kumseh a Pathen thudol’a hiche nikho hi ihin man jingu chu ahi.

Bible thuhil ivet le : Pakai Pathenin mihem khat akhut tah a leiset alah a Ama lim le mel pu-in anasem’e, hinla hiche mihempa chu mihing ahiloulai jehchun Pathenin Ama-a um hinna Hu mihempa nahhom’a chun ahailut peh le mihing hung sohdoh ahi (Gen. 2:7). Hichelai mun’a gelgil dia pha chu Kukite monabei tamtah ana kithat ho chu ahinnau, ahai theinau chu Pathen eisempauva kon ahi. Hiche laiya gel di chu; mihem hinkho aum hinna hi jabol ding ahi. Aninan, thina anatoh ho lim le mel chu Pathen lim le mel hija ahi. Pathen lim le melpu sumang mite chun Pathen khutsoh ajabol louvu ahiti akimudoh theiyin ahi.

Ezekiel Themgao lekhabu lam chu ivet kit le phaicham’a gugosa thudol anaseina-a chun Pakaiyin Ezekiel jah-a, “Thithei mihem hiche gugosa hohi hingkit theiyin tem ?” (Eze. 37:3) ti kisei thucheng hi giltah hija ahi. Ajehchu, gugosa chunga hinna pethei le kaithou thei thunei, vaihom chu Pathen ahi ti aseidoh nom chu hija ahi. Kukite mona beiya hinkho kisumang gugosa hohi hing kit theiyin tem ti thudoh lentah hi mihemten ageldoh pouve. Pakai hi mona beiya kisumang ho hinkho semdohpa, hinsahpa, Ama gou mihemte chu hija ahi. Pathen gou suhmang hi tijat umtah ahi (Eze. 37:1-14 vekah in).

Tuni chan hin, India Govt. henga mona beiya kisumang hohi ipi nalo diuham ti Kuki Inpi lamkaiho thudoh ahijingin hinla, donbutna khatcha umlou ahi. India gamsung thilsoh ho dinmun hi veleuhen, Rail khat in accident ato-a mi tampin thina manna atoteng athu seiding kichutho jeng ahiuve. Thina manna tohten jong panpina le athu seichaina kitup tah in aneijiuve. Hinla, Kukite chunga thilsoh chung changa vang hin athusei ding koima aumpoi, hinla lunghan lhaset pat’a gal ibol diu ahipon, Pathen’a ikingai diu, thutah chu iseidoh diuhi ikitilnau thupipen ahi. Ajehchu, Kukite hi Pathen vaihomna Christa sunggil’a um ihiu isuhmil lou diuvin aphai.

Jesu Christan, amona louhel’a themmo achan’a, den le jep, chilset khumna changei atoh-a, Cross leh-a thihkil maha pu-a akikhai pet’a athu seidoh hi agilmong mong jengin ahi. Aman asei chu; “Pa amaho hi ngaidam’in, ajehchu ipi abol’u ahepouve,” ati (Lk. 23:34).

Kuki Sahnit Nikhoa Nam miten ilungthim, itahsa, ilunggil’u hem’a kidot banga thisan phulna hinkho hi Pathen min’a ithoh-uva. Jesu taona banga ingaidam joudiu hi athupin ahi, ajeh chu, Pathenin thilse bolte umchan amun ahi. Phat khat le thilse bolten Pakai koi ahi ahet diu ahi. Eiho Kuki Christian tedia chonsete ngaidam jou Pakai chu i-Pathen’u ahin, ilungthim sung’uva aman vai ahop ding hi athupin ahi.

Kuki Sahnit Nikho iman’u hi ilung letnau seidohna jong ahi. Ajehchu, mithat ho hinkho, lungthim, lunggel akikhel’a seitoh-a athu aum’a, chamna aumna ding tohgon ahin,hichu Christian te natoh ahi. Achuti loule gugosa ho asempa Pathenin nin akai thou kit nile thilse boten thutan na anga seidi aneilou diu ahi. Hiche umlouna dia athu seitoh-a lungmonga mona beiya thiho gu hi cholsah ding hi thukhoh tah chu ahi. Aban’in mithat hon kisihna hinkho aneiyuva Pathen henga akisih diuhi ideipi pen’u ahi. Chule Pathen vaihomna (Lenggam) sunga um Pathen chate kibolsetna hi asempan asumil pon, eiho achate ihiuvin thilse bolte ingaidam jouvuva, athudol hi chamna dia iseitoh sah diuhi Sahnit kiman lona le ichepi jing diu ahi. Pathen vaihomna insunga chengte tohding dol tah ichung’uva um ahi.

Hijehchun, Kuki Christian ten Sahnit Nikho nile thilse lungput neilou hel’a Christa-a um ngaidamna hinkho lhakang louva iman diu akhoh in ahi. Sahnit Nikho thuchaina aum kahsea Christa sunggil’a pansa-a thutah le thudih iseiphong diuva lom mong ahi. Ajehchu, Pathen lim le melpu mihem kijabolna hinkho aumdohna ding jong ahi.

~~~~~~0~~~~~~

Lhalam 14, 2014 (Pathenni Nilhah)

Thupi : “Jalhang hinkho-a Pathen Lenggam”

Job 14:5 ; Thuhilpa 12:7, 13-14;

Matt. 11:25-30; 25:31-46 ; 5:1-12.

Jalhang hinkhomna-a chamna, thutah le ngailutnan vai ahom thei teng Pathen Lenggam (vaihomna) gongso chu hung kilangdoh ahi. Hiche umdohna dinga amugil pen’a um chu “HINKHO” kitihi ahi. Hijehchun, jalhang hinkho Pathen Lenggam seidohna din hinkho hi koiya ham, iti mandan hetding ham chule Bible in hinkho chungchang iti aseiyem tihi gelgil’a seidoh angaiyin ahi.

Hinkho hi Dolna chunga Twi kivei mitphet kah a longmang jeng thei mihem’a um Pathen thilgon hinna chu ahi. Aban’a “HINKHO” akiti tengle suhmil louhel ding chu tahsa le lhagao hinkho aum’in ahi. Hiche mihem tahsa um hinkho chu Pathen aneipa ahi. Chule Lhagao hinkho jong chu mantih neitalou dinga Pathen sem ahi. Aman mihem hinkho hi kum lhingset’a hing dia asuhtosa ahi (Job14:5). Hinla, Pathen vaihomna sunggil’a umlou mihem khat hinkho chu ahin ding kumjat amatah in akisuh chombe thei ahi ti suhmil louding ahi.

Kitepna Luiya Thuhilpa Lekhabu ivet le tahsa mihem hinkho hi asempa Pathen sunggil’a aum angaikhoh dan anaseidoh in ahi. Thuhilpan mihem hinkhoa umding dan hitin aseiyin; “Pathen ging’in, thupeh chengse nit’in; ajehchu hiche dinga hi mihem asemdoh ahi,” tin anaseiye (Thuhilpa 12:13). Chule Aman aseibena-a chun, “Thil ijakai apha hihen ase hile guhthim’a kibol ho geiya Pathenin ibol hou chunga ithu atan cheh ding ahi (12:14). Chutah le itahsa pheu leiset’a kile kit’a leivui sohding, hinna hu hi eipeuva Pathen henga kile kit ding ahi (12:7). Hiche laiya igelgil diuva pha chu tahsa mihem hinkho ahin hinkho eipepao gin le jabol angaina aseidoh in aban’a eima nopsahna-a nakitong jouse akiselguh ding aumlou dan aphongdoh in, phatchom chakhat hinkho ineiyu jong ihainau hinna hi Pathenin alahmang kit ding akimudoh theiyin ahi. Hijehchun, hinkho kitihi mihem khat in ama deiya amanchah theilou ding ahi ti kicheh tah in Bible’in eihil’uve. Itahsau hinkhoa hi Pathen Lenggam kin ibol’uva tonsot thina umtalou Lhagao hinkho ijopmat diuhi ibidoiyu ahi. Paul in Rome mite henga lekha ana thotna-a chun mihem hinkhoa angaichat hitin anaseiyin, “Pathen Lhagao nasung’uva achen le tahsaphe deibang hilouva Lhagao deijoh-a hing nahiuve. Christa Lhagao neilou mi vang chu Christa mi ahipoi,” ati (Rom. 8:9). Hiche hin kicheh tah in tahsa mihem hinkho a Pathen Lhagao apansat dinghi seidoh in hiche Pathen lhagao asunga cheng mihemte hinkho chun avetsah chu Christa mihina, Christa vaihomna hongsung’a um chule tahsa hinkhoa pat tonsot hinna Lhagao hinkho guitan louva jop ahina aphochen’in ahi. Hijehchun, tahsa mihem khat hinkhoa athupi pen’a hung pang chu Jesu Christa thuhil le natoh hi vetkah a neidinga hung umdoh ahitai.

Kitepna Thah thuhil chu ivet le Jesu Christan apa henga hitin anaseiyin, “Pa Van le leiset Pakai ! michingte le mithemte dia na-impeh chengse mimol ho naseipeh jeh-in kathangvah-e ! hiti dinga hi nadei mong hinte Hepa ! (Mat. 11:25-26). Hichelai changin aseidoh nom chu mi kiletsahte hinkho chun Christan ipi abol ahedoh joupon, hinla kineosah a kinoigolte hinkho chun Christa natoh le thilgon amuchet dan aseidoh in ahi. Jesun aseibena-a chun, “Kapan thil ijakai eipedoh tai,” ati (11:27). Hichea mudoh theichu mihemte hinkho hi Christa khut’a um ahina akicheh-e. Chuti ahile Christa lungdei tohding chu mihem hinkhoa thupi pentah hija ahi. Christa Lenggam’a tonggimte le pohgihte chu Pakai Amatah in “... kahenga hungun, keiman cholsah-unge” tin anaseiyin ahi (11:28). Chuban’a Jesu Christan tahsa mihem ten ahinkhouva abol diuva anadei chu, “Ka namkoljon kilah-un pouvin, Keiya kihil’un, Keima lungneng tah le nunnemtah kahi, Keiya hin jouna nanei diu ahi. Ijeh-inem-itile Ka namkoljon apoh nop’in Kapoh jong ajange,” ati (11:29-30). Hiche laiya mudoh thei thugol tampi umjong le igel diuva pha chu Christan Ka namkoljon kilah-un pouvin atihin avetsah chu hinkhoa ngailutna na toh ding hi aseidoh in ahi. Aninan, Keiya kihill’un atihin Christa hinkho hi ivet le kineosah (Phill. 2), nunnem (Mat. 27:!3-14) thohhat, (Mat. 26:39) tah a Pathen Lenggam’a na hinkho hin Ama-a iti kihil ding aseidoh gam chu ahitai. Hijechun, ihinkhouva Christa khonung ijuidiu hi tupet tah a ihinkhouva jong chamna, ngailutna, kitahna hinkho eijotsah theiyu ahina ban’a tonsot thini umtalou ding hinkho eipuilhung diuva jong ahi. Christa sunggil’a umte hinkho hi eiho lah jenga jong mudoh theiyin aum ji-e. Amachu, mijouse din lungmon, lhamonpina mel apuvin Houbung gam’a jong thutah in vai ahom jiuvin, insunga dinmun’a vet din jong lolhinna aneijiuvin, khosung dinmun’a vetdin jong son umtah le kho-chaga din lungmonpi aumjin ahi. Ajehchu, hito bang miho chu ama-a kisong ahipouvin ama hinkhoa chu Christa Lhagao Theng chu pansa ahin hichun, athusei, avaihom, ijakai alamkai chu ahi (cf.Mat. 11:25-30).

Matthew lekhabun, Pakaiyin Thutan khumkhana thu anaseina hi ivet le, Christa hi loupitah a phat khat le hung ding ahi ti akimun ahi. Hiche ni hile Pakai amatah in Hinkho kitup tah le Christa kinbolte alhen chil ding ahi tin akimun ahi. Kilhen chil nikho teng Pakaiyin mipha chengse ajet lam’a koiyin tin, agilou chengse aveilam’a akoi ding ahi. Chutah le ajet lam’a umte lah a, “Hungun ka-Pa phattheiboh changte, vannoi kisemtil’a pat nangho dia gonsa kikoi Lenggam chu hung louvin,” ati ding ahi tin anaseiye (Mat. 25:34). Hiche thucheng hi hinkho Christa-a umte dia iti ngei hitam, alang khat’a hinkho Christa-a umloute dia lhilonna le kana kisih jongle phachom talou ding tonsot thina nikho jong hija ahi.

Hiche nikho le ihinkhouva ikisih louna diuvin Pathen Lenggam’a toh ding tampi umho; dammo, genthei, chaga, gilkel, dangchah, lungngahna ding neilou imihem chankhompi hou hinkho chunga inatoh-u le, itoh louvu hi Christan Ama ibolset/ ibolphat nauva ahin simding ahi ti Bible in eihil’un ahi (cf.Mat. 35-46).

Chunga ihin seijouseu hin avetsah chu, imimal cheh-u hinkho hi athupin ahi. Mihem khat, ni, thum ahung kigop khom’a mi tamtah ahung lhatkhomna hinkho chu Jalhang hinkho kiti ahi.Hiche jalhang kilokhomna ilah-uva hetthei ho chu - Insung, Khosung, Houbung, gamsung hi ahitai. Hijehchun, ihinkhou hi Pathen to akiloikhom louteng jalhang hinkhomna hinkho suse le Pathen doumah boldoh mihem kihiji ahi. Ajona pen’a ikithukhi nomnau chu ahile hinkho hi moh man man thei ahipon, chonset soh a ihetlou kah-a panna thei tampi aum’in. Hijehchun, ihinkhou hi Chihna bulpi Pakai ilamkai sah-uva napha itoh doh theina diuva hin taona hinkhoa ikibulphu diu Houbung mite ikitem nau ahi. Christa sungil’a umjing le Ama to kihoumat jing Houbung mite Pathen Lenggam natohnan athau alhasam ngaipoiye.

~~~~~~0~~~~~~

Lhalam 15, 2014 (Sempatni Jan)

Thupi : “Tahsanna-a Pathen Lenggam” Heb. 12:1,7.

Tahsan kitihi athua hetmai, ginchat mai hilouva thu chu tahsan ahimong monga koi tina ahi. Christiante din Jesu Christa chu Pathen Chapa vannoi themmo sah ding hilouva vannoi huhhing dinga hung penga, thi-a thoudoh kit’a nikhat amithengte puiya hung kit dingpa hechen’a tahsan’a kisan ahin, hijehchun tahsan hi Christiante dinga kibulphuna ahi. Pakai Jesun Pathen Lenggam lutna dia amasa tahsan angaidan anaseiye. Ajehchu, tahsanna beiya koima huhhingna achang theipoi. Hiche tahsan jal’a chu i-Pathen’a kikisan theiya ana kitong ahi. Hiche thilsoh ding kineppi jeh-in tupet jenga jong lunglha louva, lungmonga, lungdetna longlouva pandetna ahin, hiche kinepna chun thohhat asodoh ahi.

Heb.11:7 na chun Noah Pathen tahsan dan kidang tah ahi. Pathenin Noah chu nichangsat laitah twisang aletsah ding jeh-in Kong kisui din aseipeh-e. Hiche tobanga thilsoh hi anaum khalou ahin, tahsan jong hahtah ahi. Ahin Noah chun Pathen thusei atahsan jeh-in athusei anitpeh-e. Ahin nichangsat laitah a Kong kisui chu ngolkai tah tobang ahijeh-in mihon anuisat’un ataitom’un’ anelpeh-ui. Ahinla, ahunglhung ding akinepna jal’in Noah tahsan alongdeh pon, Twisang ahung let phat in koima dang asohcha jou tapon, Noah le a-insung mite vang sochatna chu achang tauvin ahi.

Pathen tahsan keovin alhing joupoi, atah a jong toh ngaiya ahi. Ajehchu, Jacob 2:27 a chun Jacob’in. “Natoh bei tahsan chu achangseh a athisa ahi,” anati. Pathen itahsan nau chu itoh-in aphondoh ding ahi. Ajehchu, Bible’a Pathen tahsan ho chun tohga aneithei dan akimun ahi. Daniel le aloite chun tonsot Lenggam chate ahidol dihtah chu asohchan nau Babylon gamsunga amang’uve. Sohchang Pathen dang tahsante lah jenga jong a-Pathen atahsannau alhadah pon dettah in atuhchah-uve ti akimui. Pathen atahsannau suboh thei thil ho neh le don ham, milim hou tilou adang jouse ajui chamkimsoh keiyin ajonan thina-a kon asohchauvin chule leng pan jong ama Hou Pathen chu ajabol jotan ahi. Pathen tahsan’a kona lheplhah thei tampi aum’e.

1. Pathen tahsan sanga sum muna thei mijoh tahsan

2. Pathen sanga imihem chanpi kinaipi kitahsan

3. Meithal thahatna kitahsan

4. Leiset chihna le hetna joh tahsan.

Pathen dei vang chu amajeng tahsan’a thupeh nit’a alungdei bolding chu ahi. Hiche Houbung mite dinga Alenggam machalna ahi. Christian hinkhoa itahsan nau sumo thei hahsatna hunglhung jiho leh ahunglhung nalai ding hohi itahsan nau patepna ahi. Hijehchun, Houbungte Pathen Lenggam kehletna ding le khantou sahna dinga einganseu ahijeh-in ngansena banga tongdoh cheh dia ikigot diu angaiye. Pathenin amite aumpi jing banga tahsanna puimang thei hoa kona jong eipanpi diu ahi. Chutile itahsan jal’uva mukhah lou thil tahsan jal’a ikineppi nauva hattah le hang tah a Pathen na itoh-u le tonsot Pathen Lenggam chu ilothei diu ahi.

~~~~~~0~~~~~~

Lhalam 16, 2014 (Leisemni Jan)

Thupi : “Taona a Pathen Lenggam”

I Sam 12:23; I Thes.5:17.

Taona thucheng hi Kitepna Thah langa chun thucheng ko (9) a manchah ahi. Thucheng li hi noun ahin, 5 hi vers ahi. Euchomai thucheng hi verb ahin, ngaichat tina ahi (II Cor.13:7) Erotao hi Pathen henga midang dinga thumna ahi (Jn.14:16). Deomai hi Paul’in I Thessalonica 3:10 mun’a, “Tahtih neilouvin tao jingun,” atina mun’a anaman ahi. Parakaleo jong hi verb ahin hichu Pathen kithopina ngehna tin ahi (Mat.26:53; Acts 16:9). Noun thuchenga taona ho chu Proceiche, hichu Pathen heng nailut tina ahin, chule Enteuxas hi midang dinga taopeh thuchenga kimang ahi. Taona ahin hetding khoh cheh gup (6) aume, chonset phon (Ps.51:1-3; Ngehna (Phil.4:6) midang dinga taona (Rom 15:30) chule thumna (Lk.11:9). Chunga taona thucheng hilchetna a kon hin Pathenin A Houbung mite chu moh taomai hilouva toh jong atoh diu adeidan akimun ahi.

Taona thucheng hi giltah a ivet le masanga thil khat hung lhung dinga kigotna khat jeh a kibol ahi mudoh thei ahi. Hijehchun, moh-a tao ihipouvin, Pathen thilgon bulhinna ding hichu Alenggam hunglhun ding jeh ahi. Ajehchu, Pathenin eithupeh-u chu gentheite panpi ding, suhnem’a umho dinga thutah umsah ding, mitcho kho musah ding, elbai lam jotsah ding, meithai le chaga vetching ding, soh-a tangho lhadoh ding, thilsem jouse toh kichamdel’a umding, galmun’a chamna semding kimelma ho kah-a kiguijop tona semding, lhagao mang dingho Jesu Christa Huhhingna thu seipeh ding kitiho jouse hi Pathen Lenggam’a mijouse umtheina dinga inatohnau ahi.

Hijehchun, taona hi noiya banga seilhah thei ahi.

1. Taona hi tahsan natoh ahi. Jesun Ankammu te tahsan neijong lechun mol geiya jong natolmang theiyu ahi ati bangin, leiset chunga Pathen Lenggam machalna dinga itaonau hi itahsan jal’uva hung gaso ding bou ahi. Hijehchun, taona kitihi tahsanna-a natohna ahi, Tahsan jouva taona nei kiti chu lolhing teiding ahi.

2. Taona hi kithununna-a natoh ahi : I-Pakaiyu Jesu Christa chun aseijuite chu taodan anahil’e, Samuel thempun jong Israelte chu taona aneijing diudan anahil’e. I Sam.12:23), hito bangma chun Solchah Paul’in jong tantih neilouvin tao jing’un tina Thessalonian mite henga chu lekha anathot ahi (I Thes. 5:17). Taona hi Pathen Lenggam machalna dinga natoh theina lenpen khat ahi. Missionary tampin taona pum’in Pathen Lenggam ana sumachal’uve.

3. Taona hi natong hat tah ahi : Taona hi natoh lentah ahi, jingkah, nilhah seh-a tao jingho chun taona hatdan aheuvin ahi. Hahsatna le boina tampi lah a eihuhdoh thei diuva chu eima thahat le bolthei jeh hilouvin, amavang taona thahat jal’a ahi tin Oswal Chambers chun anaseiye.

4. Taona hi ngailut natoh ahi : Ngailutna chun achangin na atong molso thei jipoi, amavang taona toh akitho teng ngailutna chu abukim theiye. Leiset chunga mijouse ingailut thei jong chu ihinkho tah in akitong doh theipon, amavang ilunggil tah a tantih neilouva taona chun eingailutsah jouvin chule hichu tohdoh jouna jong ahi.

Hijehchun, taona kiti hin ahung lhung dinga Pathen Lenggam nunchan ithodohnau khat ahi tihi mudoh thei ahi. Houbung gam chu Pathen Lenggam isotheina diuvin Houbung mite jousen taona athupi dan hi ihetchet’u angaiyin ahi.

..~~~~~~0~~~~~~

Lhalam 17, 2014 (Vahchanni Jan)

Thupi : “Natoh a Pathen Lenggam” I Thes. 4:9-21.

Hiche chang hin pachatna in apan’in, hinla agihna in ajouve. Hijehchun, ipithu um’a hitobang thucheng chu hung umdoh thei ham tihi dohna umtheiyin te. Paul chun Thessalonica te chu lunggel tampi neilouva atoh diudol chu akhut cheh-uva atoh-uva kisalel dingin aseiye. Ajehchu, Jesu Christa hung kit ding thu ahin, thuhil dihlou ana um jeh-in Thessalonica mite chun niseh-a atohnauva kona tanglouva nomtah-a hinkho aman’u chun amaho lah a boina tampi sohdoh-a natoh umtalou neh ding hol talouva Jesu Christa hungkit ding chu apong nga tho jeng’u ahi. Hijeh-a chu Paul’in adinmun’u dih lou chu ahilchahna ahi. Natong theiya um’a tong louho chu apho ahi.

Jesu Christa hung kit’a umchan dingdan Paul’in Christiante dia asei chu niseh-a kidih tah a atoh diudol atoh diu chu ahi. Jacob lekhathot chun tahsan chu anatoh beiya athisa ahi atibangin Christian hinkho jong nitin’a natoh dingdol ho Pathen thu toh kitoh-a toh ding ahi. Hijehchun, Lou natong, Hou natong, Jilkung natong chule Officer ho jong adingdol’a niseh-a tong dinga um jouse chun itoh-u angaiye. Christian hinkho chu nikhat beiding le Jesu Christa hung kit ding timaiya natoh ngah (kho-ngai) ding tina hilouva, Jesu hung kit’a Ama Lenggam’a ilut theina diuva nitin’a na toh joh ding ahi.

Christiante hi itobangmi ihinau inatoh le i-umchan’a kiphongdoh chu ahi. Chule midangho jong hichea kona chu itobang Pathen hou hiuvam ahin hetdiu ahi. Christiante ihinkhouva natong pha, kitah, mingailu ihinau chu ithuseinau phapen ahi. Pam’a Houdang ho chu Houin sunga Pathen thu kisei ngaiyin hung khel pouvinte, ahin pam’a nitin’a ihinkho mandan’u eimu jing’un ahi, hijehchun, Christian natoh kiti chu seitho geltho hilouvin hichu ihinkhouva inatoh-u chu Pathen Lenggam dinga natong ihinau ahi.

Christian dih tah a natong ding chu midang kithopi ding, midang tampin aphatchompi ding hichu toh bulhingna ding le ama phatchomna ding maiya natong hilou ding ahi. Pathenin natoh theina ding khut le keng kim’a eipeh chu moh umthimna ding hilouva apepa loupina dinga mandoh tei dinga amanchah ding ahi.

Houbung kitihi Pathenin Alenggam atundoh nom jingna mun chu ahi. Houbung tampi hi kinganse tona Houbung atam’e, Houbung hing ihinom jing’ule eiho cheh in itoh diu dol cheh itoh diu angaiyin ahi. Pathen Lenggam’a Houbung pum khat ihina diuvin midang dinga natoh angaiyin ahi.

~~~~~~0~~~~~~

Lhalam 18, 2014 (Vanghomni Jan)

Thupi : “Thilpeh a Pathen Lenggam” II Cor. 8:1-5.

Thilpeh kitihi muding kinepna beiya peh ding tina ahi. Mi tamtah in muding kinepna neiya thilpeh ineiji vangun adol tah vang muding gel louva peh ding ahi. Pathen thilpeh lenpen chu manbeiya Achapa Jesu Christa Vannoi mite apeh chu ahi. Hichu thahat le bolthei man’a kilah thei ahipon, angailut jal’a moh-a apeh ahijoi. Hibanga chu eihon jong itahsau, ilungthim pumpiuva Pathen chu ingailut’uva Ama-a ikipeh theng tengle Houbung sunga hihen imihem chanpi koma hileh ithilpeh nau chu Pathen natohna-a ipancheh chehnau hiding ahi.

II Cor. 8:1-5 kona mudoh thei chu thilpeh hi eiho khanga isemthu-u le ibolthu-u hilou ahi. Jerusalem Houbung chu Houbung bulpi (Mother Church) seijuiho umna mun ahi. Chule hichelai mun’a kona chu gamdanga Houbung um jouse boina ho ahin, toh ding jouse agon jinau jong ahiye. Hijehchun, Jerusalem Houbung chun gambih Houbung hoa kona kithopina angaicha jinge, hijehchun, Paul in Gentiles Houbung ho chun ahahsatnau ahetpeh-uva, atahsan nau kipatna Houbung ahi jong ageldoh-uva kithpoina-a hi apanhu diuvin Corinth Houbung mite chu thilpeh hoikeicha apeh diuvin tilkhouna aneidan lampi li seiyute -

Khatnan, Macedonian Houbung miten hongphal tah a thilpeh abol dan’u aseiye. Macedonia Houbungte chun hahsatna, gentheina tampi anei vangun, aneisun’u chu mihem gelsanga sangjon abonchan Jerusalem Houbung kithopina din thilpeh ape jing’uve.

Aninan, Jesu Christa kipehdohna-a konin ahil’e. Paul ngaidan’in, Jesu mihemte dinga akipehdoh chu apen’a kipan hilou, athi-a jong hilou, amavang Van’a kipan ahi ati. Van gam nopna jouse dalhan ahinkho leiset’a din apedoh-e.

Athumnan, Corinth Houbungte chu ahinkhou masa in tilkhouna aneiye. Ajehchu, Corinth chu masanga thilpeh, sumto-a hatpen le koima delphah hilou anahiuve. Hitobang chun boljom jingleu ati ahi.

Alinan, midang amaho sanga hatmo le lhinglel hotoh akitekah lou diuvin, atilkhouve. Ajehchu, phat ahung kikhel’a hatmona neihon jong nikhat ahat ho ahin juidiu chule ahat chengin jong atoh ngai banguva atoh jompeh diuvin atilkhouvin ahi.

Corinth Houbungte Paul’in atilkhou bangin eiho jong eitilkhou-uve. Ajehchu, mimal tinin thilpeh-a mopohna aneicheh bangin Houbung tinin jong Pakai kinbolna adeh-in thilpeh a hin mopohna aneicheh-e. Hijehchun, Patheng Lenggam machalna ding le Houbung kipunkhom theina dingin Houbung tinin thilpeh ho jouse hi pehcheh ding ngaikhoh tah ahi. Hijehchun, thil ineihou jouse hi Pathen’a kon ahijal’a Ama kipekit ahijeh-in Ama lunglhaina dia ipehdoh teidiu angaiye. Pathenin toh theina damna lampi eisempeh-u chu Pathenin moh a eipeh-u ahi tihi suhmil louding ahi. “Moh-a kimu chu moh-in hom’in,” ati (Mat.10:8). Pathen dei le Alenggam holjing mite din tohnom umpen le bolnom umpen hinte. Ajehchu, thil jouse pe-a chu Pathen Ama ahi. Suhdam theina, lasah themna, thusei themna, haosatna eipeh-uva boltheina eipeh-uva tohtheina eipeh-u jong Pathen’a kon ahicheh-e. Aman eiho kiveina ding le eima phatchom holna-a manchah dinga eipeh-u hilouva Ama kinbolna ding Alenggam machalna-a manchah dinga eipeh-u ahibouve.

~~~~~~0~~~~~~

Lhalam 19, 2014 (Gansemni Jan)

Thupi : “Mission natoh a Pathen Lenggam”

Lk. 4:17-18.

Tulai vannoi leiset a Christian ho kisahlelna pen le anatoh lenpen chu Mission natoh hi ahi. Bible’a kimu bangin Mission hi Pathen’a kon hung pengdoh ahi. Pathen hi aphutdohpa le aneipa ahi. Alhangpia Mission’in adoi chu Pathen’a Huhhingna thudol vannoi leiset a mihemte hetsah ding hi ahi. Mission iseiteng melchihna ding thil thum aum’e -

1. Asolpa, 2. Akisolpa, 3. Akisolna mun ahi. Hiche thum hohi Mission iseiteng kikhen theilou kijopmat jing jeng ahi. Mission umje hi thilkhat tongdoh dinga kisoldoh hi ahi. Christian Mission natoh hi ititeng mimal tin kithahsemna ding le tulai jalhanga lhatdan ho semphatna dinga Pathenin hinna bulhingset tonsot hinkemlou Jesu Christa-a eihin peh-u seitho le natoh a phondoh hi ahi. Mimal tin le jalhanga Adam le Eve a kona chonsetnan asuhsetsa hi Christa a semphat kit leh ama tonsot phatna chamkimna vaihopna aumdoh theina ding hi khohsah ding chu ahin chule eikisol lona jong ahi.

Christiante Mission natohna dinga Lk. 4:17-18 a kipatna Kipana Thupha hillhang leding sohchang ho lhadoh ding, mitcho ho khomusah ding, gotchep’a umte lhadoh ding tiho hi Luke in Jesu Christa natoh patna dinga aseidoh masah pen ahi. Hiche hohi koi seiham Pathen thugil kholsang ho mudoh dan’in Israelte atina ahi -

1. Israelte chu Pathen’a kona Huhhingna ngaicha ahiuve

2. Sum le paiya genthei hi aseina hilouvin, milungnem Pathen dinga lungkot hong jing ho atina ahi.

3. Sum le paiya genthei jeh-a jalhang hinkhoa michotpha-a umho atina ahi. Chuban’a genthei atiho hi pamlam mi Gentiles te jong ahoptha-e. Hichu gilkel, pulthohte suh gentheiya umte, elbai, nakong chatmo mite ho miphah, gotchep’a umho kaidong (tax collector) chonsete numei ho chule adang dang tina jong ahi. Hiche hi ivet leh Jesu Christa chun tahsa le lhagaova Mission natoh abol ahi. Pathen Lenggam natohna-a Houbung mite i-Mission diu chu eima phatsah-a bolding ham, ahiloule Jesu Christan anatoh hohi boljom ding ham ichennau gamtoh Israel gam thilsoh hohi kikhelna um behseh lou dingin mudoh thei ahi. I-gam sung’uva hin nitin’in gentheina lam imano-un ahi. Neh hahsat kisei apung cheh cheh jengin, themjilna alhasam jingin, aphalou lam’a mipi kiphin kichai theilou, meithal thaneina, gucha, kitha, michom, khutdo phung le chang, sumneh, insung cheh chule adang dang gentheina tampi umhohi Houbung’in iseikhah lou jeng’u tampi aum’e. Jesu hung lonapen chu mihemte chonset’a kona huhdoh ding keo hilouvin tahsa lam’a jong huhdoh dinghi ahi tihi mudoh thei ahi. Hijehchun, Paul’in Galatia mite henga chun, genthei kithopina langa pan ahalah diuvin aseiye. Gentheina hi Jesun jong adeipoi, hijehchun, genthiena jatchom chom’a kihen-oh jouse hi huhhdoh-a umding hi Houbung Mission Pathen lunglam inatohnau lenpen khat ahi.

~~~~~~0~~~~~~

Lhalam 20, 2014 (Misemni Jan)

Thupi : “Thupeh nit’a Pathen Lenggam” John 14:15.

Thupeh kitihi Pathen O chenga kona kimang pan ahi. Vannoi leiset le asunga thil umjouse hi Pathen thupeh-a kona hung umdoh ahi. Ama thupeh-a Adam le Eve jong chu Eden honsung’a chamlhatna aneilhon’e. Pathen thupeh mihem tenin ahin palkeh lhon jeh-in Pathen angsung’a konin nodoh ana hilhon’e. Hijehchun, thupeh kitihi juitei dinga thil umkhat chu ahi. Thupeh nitlou hi Pathen to kigamlatna ahi.

Pathenin Abraham, Jacob, Mose teho jong thupehna noiya anapuiye, adeh-in Mose henga Thupeh 10 (som) le Dan thu Israelte chu anapen ahi. Thupeh nit jeh-a aga chule thupeh nitlou jeh-a aga chu Israelte hinkho thusim’a akimun ahi. Pathenin Mose koma athupeh chu alungtah jeh-un gimnei tah le lungsetna beihel’a anapeh dan’in akilang’e.

Pathenin amite koma athupeh ho chu abukim joulou khat aum’e, hiche thupeh suhbukim ahina dinga Achapa tah in ahung suhbulhit dingdan Themgaoho henga avel vel’in anaseiye. Hinla Jesu Christa thupeh chu Pathen Lenggam thu ahi. Pathen Lenggam chu Ama tah in ahung tungdoh-in chule anungjui jousen jong hiche Lenggam sunga chu umcheh uva athupeh thah ho ajui diuvin eihil’uve. Jesun “neingailut’u le kathupeh chengse nanit diu ahi,” (Jn.14:15) atihin ahinkho lhumkeiya athilbol jouse tahsan’a athupeh jouse nitding atina ahi. Jesun hiche mun’a kathupeh atihi Aman vannoi angailut banga eihon jong vannoi ingailut diu tina ahi. Hijehchun, thupeh nit kiti chu thungai tina ahi. Jesu chun Pathen thu angaina chu Pathen angailutna chu ahi. Jesu thupeh juiding le ama thu ngaiding kiti chu ama ngailut ding tina ahi. Mi konkhat’in ngailutna kaneiye atin ahinla midang hinkhoa setna le boina asemdoh peh jiuvin ahi. Chate konkhat’in kanu kapa kangailui atin, ahivangin anu apa hinkho lunggimna semdoh-in apang jiuve. Hijehchun, Jesun ngailut atihi kam’a kisei mai le lung’a gelmai hilouvin tahsa tah a thodoh ding ahi.

Jesu thupeh lah a thupeh lenpen chu, “Nangman Pakai na Pathen chu nalungthim pumpia, nahinkho pumpia chule nahet theina pumpia nangailut ding chule nangma na kingailut banga naheng nakom na ngailut ding ...” kiti ahi (Mat.22:37, 39) chutengle, “Hijehchun, cheuvin lang muntina mijouse seijuiyin gasem tauvin, amaho chu Apa, Acha chule Lhagao Theng min’in Baptize gabol’un chule kathupeh chengse anitna diuvin gahil’un; Veuvin leiset khang kichaini geiyin keiman nangho kaumpi jing nauve ati,” ati (Mat. 28:19-20).

Thupeh dang tampi um jongle hiche teni jong hi ivet le toh molso dinghi mihem lhomcha bou um’in te. Ahin hiche teni tilouvin jong thupeh tampi aum’e chule thupeh nit hi Ama Lenggam Ama toh hinkho mankhomna ahijeh-in kipana, chamna, thutah le lhamonna kiti ho jouse hi ineidiu tina ahi. Ahinla Mose Dan banga apet tah a thupeh nit lou jeh-a thutanna aumlou jeh in mitampin thupeh ho cheng akigel thupi pon, akijui joupon ahi. Ahivangin Jesu thupeh ho jui jouna dingin amasan ngailut nei angaiyin ahi. John Gospel thuhil bangin Ngailut hi thil jouse bul ahi. Pathenin Jesu angailun, Jesun Apa Pathen angailun, Pathen leh Chapan mihem angailun ahi. Mihem’in Jesu min’in amihem chankhompi angailun chule mihem khat le khat akingailun hiti chun thil jouse hi ngailut’in akangom ahi.

Ngailut thupi dan chu Jesu Christa thina-a kona athodoh jong chun Danthu them ho le Pharisee ho chule Ama doudal’a pang Judaho koma kilang louvin, Ama damlaiya angailuho mama kom’in akilang masan ahi.

Jesun eithupeh chengseu hi nang le kei hatna le boltheina jeh-a joding hile ijo joulou diu hetsa ahi. Ahinla, Jesu Ama ngailutna inei ban’un thupeh chengse ijui jou theina ding’uvin, eikithopi diu Lhagao Theng chun Apa henga angeh-a tonsot’a eiumpi diuva eihin solpeh diuvin aseiye. Hijehchun, Houbung Pathen Lenggam sunga mite chun, Jesun neingalut’u le kathupeh nanit diu ahi atihi ka Lenggam’a umnom chun eingailut’a, kathupeh anit’a, Lhagao Theng toh hingkhom’a hinkho manding tia eingeh-u ahiye. Houbung Pathen Lenggam machalna ding le Pathenin eingailutnau vetsahnan athupeh chengse init diuhi tunia Jesun nang le kei eithumop nau ahi.

~~~~~~0~~~~~~

Lhalam 21, 2014 (Pathenni Nilhah)

Thupi : “Tupet’a Pathen Lenggam” Mat. 6:10.

Pathen Lenggam thuhi Jesu Christan athu lhangsap lah-a athupipen khat ahi. Chule Kitepna Thah lam’a dingin jong Pathen Lenggam thuhil hi thu-mugilpen khat ahi. Ahin, Pathen Lenggam hi jat tamtah-a seithei ahi. Bible’a kimu dungjuiyin Pathen Lenggam chu achesa, apet chule a lhungsa dinmun akimudoh theiyin ahi. Hichu Pathenin amite (Israel) jong anapui lai chu ahi. Aban’in, Jesu Christa amatah ahungin Pathen Lenggam chu ahung polhan, hiche Lenggam chu Aman atundoh A-Houbung’a adalhan tuni geiyin A-Houbung hin Pathen Lenggam hina chu apodoh jingin ahi. Chule Pathen Lenggam chu ahunglhung kit ding jong ahi. Ama loupitah-a A-Vantil cheng toh, mithengte cheng puidinga hung dia Christa Houbungten inga jingu ahi.

Tupet’a Pathen Lenggam thu ahin, Bible mun tamtah in kicheh tah in eiseipeh-un ahi. Mat. 6:10 a kimu dungjuiyin ; “Na Lenggam hunglhung hen, Van’a bangin leiset’a nalung chamkim soh hen” atin, hichea hi Hebrewte lekhasut dan’a chu Parallilism akiti. Hiche chu chekhom, kilhonkhom tina ahi. Hijehchun, Na Lenggam hunglhung hen kiti le Van’a bangin leiset’a Na lungdei kimsoh hen atihi, asei masahpa chu ipi ahi ahilchetna-a jong lahthei ahi. Hijehchun, Pathen Lenggam chu ipi mong ham ? hiche chang’a kona hi ivet le Pathen Lenggam chu hoikom hijongle Van’a Pathen lungdei banga kiman doh theina mun ho chu ahi ti mudoh thei ahi. Hijehchun, koi tobang hijongle Pathen lungdeiya bukimset’a tongdoh ho chu tupet’a Pathen Lennggam’a natongl e umho chu ahiuve.

Pathen Lenggam chu Pathen lungdeiya ama thupeh nit chu ahi. Chule Pathen Lenggam chu nampi, gamsung, mipi a kipan ding hilou, amavang amichang cheh hinkhoa hung umdoh ding dan ahi. Ajehchu, Pathen Lenggam chu nopna, lunggel, hinkho hoa kona kipehdohna angaiyin ahi. Hijehchun, mikhat cheh chun Pathen Lenggam’a umthei nadinga akipehdoh teng Houbung le insunga Pathen Lenggam chu tupet’a jong imanthei diu ahi.Chule Pathen Lenggam hunglhunna dinga itao jong chu, Ama lungdeiya kipehlut theina dinga kitao ahi ti jong akimudoh theiye.

Hijehchun, Houbung mikhat ihinauva Pathen Lenggam chu itidol’a tupet’a imandoh thei diuham, tihi hetchet dingin aphai.

1. Tupet’a Pathen Lenggam ahitheina chu, tahsa damlouho damna ahinmu nauva kona ahi. Jesun seijui 72 (somsagi le ni) ana soldoh chun, khopi sung nalut’uva mihon nalamdot’u jongle; na-ang’a aluiyu chu ne-jeng’un; chukom’a chun adamlouho boldam’un, ajah-uva, Pathen Lenggam chun nakom’u ahin phatai, tin seipeh-un,” ati (Lk.10:8-9).

2. Pathen Lenggam tupet’a aumjing hi athiho thodoh-a kona mudoh thei ahi. Jesun aseijui 12 (somleni) asoldoh chun, hitin anaseipeh-e “nache pum pum’un, mithi kaithouvun, aphah sutheng’un, thilha nodoh-un manbeiya nakisan’u ahin, man beiyin homjal’un,” ati (Mat. 10:7-8).

3. Thilhavop ho kinodoh-a kona mudoh thei ahi. Jesun Judate koma chun, “thilha ho nodohna dinga Pathen khut jung kaman ahivang le Pathen Lenggam nalah-uva hunglhung ahitai,” ati (Lk. 11:20).

4. Chondihna hinkho kimanna-a kona het thei ahi. Ajehchu, Solchah Paul’in anaseiyin, “Ijeh-inem-itile Pathen Lenggam chu neh le chah thu ahipon, adih le chamna chule Lhagao Theng kipana ahijoi,” ati (Rom. 14:17).

Houbung tupet’a Pathen Lenggam mandoh ahitheina dingin mimal cheh-in panmun anei cheh-e tihi thuhilna-a konin akimudoh theiye. Pathen Lenggam ahung lhung dinga ipan cheh theina dingun tupet’a hi Pathen Lenggam’a hina jouse chu neicheh ding jong ahi.

~~~~~~0~~~~~~

Lhalam 22, 2014 Thupi : “Pakai munsem” Jn.14:2,3; 17:24; I Thes. 4:17b; Heb. 13:14.

Eihon leiset’a phat chomkhat chenna ding In isah teng’ule iti isah jiuvem, itobang mun chule iti bol’a iloding ham tiho nasatah in gel’in, ulsa-long le chol le nang pum’in genthei tah in phat tampi sum le pai tampi seng’in isajiuve. Hichu leiset tahsa-a chenna ding bou ahi. Hinla, Jesun vang leiset’a ding bou hilouvin, Lhagaova tonsot’a kem talou ding mun Pathen Lenggam (vaihomna)’a eiho le mijouse dingin eisempeh-uve. Hiche thudol hi phabep seiyuhite.

Jesun, “ka-Pa in’a chenna mun tampi a-ong’e, ... nangho ding mun kagon jouteng hung kit ingting keima umna-a naum theina diuva kaheng’a dinga kahung puiding nahiuve,” (Jn.14,3) ati. “Ka Pa in” atihin Vangam, Pathen Lenggam (Pathen vaihomna) aseina ahin, mun tampi a-ong’e chua chun Pathenin mijouse dia mun agonpeh, mitin achan ding mun-on thu aseina hinte. Leiset’a In le lou, gam le go chule mihem atam’a apuncheh cheh tengle gam leiset akitet’in, mun-ong alhom jitai. Hinla, Pathen Lenggam (vaihomna) vang chun chitin namtin, phungtin dingin Pakaiyin mun agonpeh-e.

Jesun mun asem danhi ivet le ahin solpa thupeh nit (adeibol) chule Kipana Thupha aseiphong Pathen Lenggam (vaihomna) chondan asem dan’in akimun ahi.

“Vannoi kisemdoh masanga pat Pathenin ana semdohsa khopi mundet, Pathen Lenggam’a chun Jesun anungjuite aum theina diuvin, Pa henga athumpeh-a (Jn.17:24). Pathen Lenggam (vaihomna) chondan Jesun atahbeh a amanchah ahinkhoa muthei chu -

(i) Atah, adih le chamna chule lhagaova kipana (Mat. 6:33; Jn. 18:36; Rom. 14:17).

(ii) Pathen thaneina/ thahat thilbol theina (Lk.11:20-22; I Cor. 2:4 ; 4:20; I Thes. 1:5). (iii) Thutah (Jn. 8:31-32; 14:6,16-17; 15:26; 16:13; 17:17) (iv) Thenna (Cor.1:2,30; 2.Cor^;17-7:1 ; Eph.4:24). (v) Vah (light) (Jn.1:4-9; 3:19; Col.1:12-13). (vi) Ngailut (Mt.5:43-48; 7:12; I Cor 13:1f; Eph. 5:2).

Chunga chondan kisei hohi phatecha ivet le Pakaiyin mun asemna adoi hi akimudoh-in ahi. Hichu Pathen Langgam hi mihemte lungsung le atha hinkhoa tudinmun’a asemdoh nom le adoi chu hidin akilang’e. Hichea chondan hi eiho Kukite chonna “Khankho” hi ahitai. Alang khat’a seidin, Pakaiyin nang dia mun asem le nangin na hinkhoa Ama mun napeh hinam ? tijong gel angaiye.

Christiante tahsan bu (Bible) a imu bangun “tahsante hinoi leiset’a hin maljin le khopem ihiuve” (Heb.11:13). Hijehchun, hikom’a hin eihon khopi det ineipouve, ahung lhung ding khopi joh chu ihol’u ahibouve (Heb. 13:14). Hiche khopi chu Abraham’in anakat jingsa ahitai (Heb. 11:10). Hiche khopi hi Pakaiyin Ama tahsante dinga agonpeh chu ahin, chu-mun’a chu Pakaiyin amite apuitouva imatih chan’a Pakai toh umkhom diu ahi (I Thes. 4:17b). Pathen jeng jong amaho Pathen’a kikou ding jahcha talou diu ahi. Chu-khopi chu Van Jerusalem thah tin jong akihe-e (Thup. 3:12). Khopi theng Jerusalem thah-a Pakai Pathenin amaho achenpia, amaho amite hidiu, Ama a-Pathen’u hiding ahi (Thup. 3:2,3). Hichu ahung lhung ding Pathen Lenggam (vaihomna) kisei chu ahin, Jesu tu-hinkhoa atah a thodoh-a hinkhoa lhunsah ding adoi le atup chu chamkim lou, hinla Pathen Lenggam hunglhun tengle chamkim tah a iumdiu ahijoi, Christa hung kitna ding kisei Kitepna Thah a tahsante kinepna chule Jesu tahsante ikinepnau ahi. Hinla, Jesu bou chuche lampi le atah chu ahi (Jn......)

La isah jiu chu - “Pakai munsem, chua nilhum ngailou thingna jong pul ngailou, chua chun Lhandampu le mithengte cheng, chung sana khopia chun” Aw chu-khopia chen iti anop tadem ? Pakai munsem khopi chu, Insung mite ikimna diuvem ? Houbung mite ipang chehna diuvem ? Lhatsa le mithengte chemasa golngaite chu-a aleng tauve. Eiho jong chu-khopi Pakai munsem’a leng dingin tahsa lunggel, hindan, lhagaova kisemthah tauhite.

~~~~~~0~~~~~~

Lhalam 23, 2014 Thupi : “Tahsante kilekitna ding”

Heb. 10:13; 13:14; Ps. 39:12; Col. 3:1,2.

Bible isim’a phatecha ivet le tahsante chu leiset chunga kholjin le khopem ahiu aphongdoh-e (Heb.11:13). Ijeh-inem-itile hikom’a eihon khopi det ineipouve, ahunglhung ding khopi joh chu bou ihol’u ahibouve (Heb.13:14). Achutile hoilaiba hitam ikhopiu chu - Pathen Lenggam kiseina-a kimu dol’in Pathen Langgam (Pathen vaihomna) chu tahsante khopi le kilekitna ding mun chu ahi tihi Hebrew lekhabu-a pat imu’u chu ahi.

Tahsante kilekit nading khopi chu itobang ham hetchet theinan noiya banghin veuhite.

(i) Lei lenggam sanga phajo cheh lenggam chu Pathen Lenggam, Avaihomna chu ahi (Heb.11:13-16). Hichu Pathenin tahsan chate kilekitna dinga agon khopi chu ahi.

(ii) Pathen choldona gamnom (Lk. 23:43) ahi. Hiche mun’a kipana le thanopnan einga jing’ui.

(iii) Pathenin tua Jesu Christa umna thutep dungjuiya chua pat Christa eiho puidia hung ding ahi (Jn. 14:2,3).

(iv) Pathenin amite dia agonpeh khopi (Thup. 21:10-27, 3:12), hichu Van Jerusalem thah akiti-e.

(v) Christan eiho dia agon khopi chu ahi (Jn. 14:2,3).

(vi) Van’a um ipau Pathen chenna (Mat. 5:16,45,48; 6:1,9; Heb.12:22,23; Eph. 1:10; 3:15; Thup.5:11 ) ahi.

(vii) Pathen Laltouna (Thup. 4:2; Ps. 11:4) ahi.

(viii) Atahbeh le muntheng chungnung Bible chang Ps. 20:6;24:3; Is.57:15)

(ix) Chonset gilkel dangchah lungjin, kana, natna, thina le sapsetna umtalou mun chua chun Pakaiyin amit’uva mitlhi jouse athehhul peh ding ahi (Thup. 7:16-17; 21:4; 22:2).

(x) Chu-mun’a chu chonset umtalou thengsel’a Christa toh ikibah diu ahitai (I Jn. 3:2; Thup. 3:4-5; 4:4; 6:11; 7:9)

(xi) Chu-mun’a mithengte jousen Christa toh kiguijopna kidang tah aneiding Songval khatcheh amuding chule minthah aneiding hichu akisanpa le Christa tilou koiman ahetlou ding ahi (Thup. 2:17.

(xii) Chu-mun’a chu mithengte itih-a kimuto khalou hijongleu kimuto kihetoa lhakhom diu ahitai tichu Lhagao Theng natoh thilgon jal’a (Lk. 16:19-24; I Thes. 2:19)

(xiii) Tahsa neh le don ngaitalou Christa hinna-a hing diu ahi (thup. 2:7; 22:2; Lk. 22:41-43) Christa toh anekhom adonkhom tauve.

(xiv) Thoh gentheina umtalou, kipana chamkim nunnom le kicholdona mun Pathen laltouna kimvel ahi (Ps. 16:11; Lk. 16:7-10; Thup. 14:13).

(xv) Chu-mun’a tumging selangdah saiyin lathah asauvin Pathen thangvah le vahchoina Ogin tanglou ding (Thup. 5:9-13; 14:2-3; 15:2-4; 19:1-6).

Chunga kisei hoa pat’in tahsante kilekitna ding mun Van Jerusalem thah khopi theng chu ihechen tauve. Hichu aloupi dan seijoulou, anop dingdan jong seitheilou Chu-khopia chun mithengte chemasaho chu Pakai Jesu toh alengkhom tauve. Chule hichea dinga chu Christan nikhat eihung puikit diu ahitai.

Chunga thu kisei hoa pat tahsan chate kilekitna ding tonsot indet Pathen Lenggam (vaihomna) limso ihechen tauve. Leiset’a ikholjinnau gam’a hi phat khat le inlam’a dia kouna (Home calling) chu bulhing ding ahi. Chu-nikho tengle tahsante Indet Pakaiyin asem gam Pathen Lenggam’a nangdin mun aumna dem ? Tuhi hiche mun lut theina dia kigotna phat ahi.

Pakai Jesu le mitheng chemasaho chu-mun’a tonsot Pathen Lenggam’a akilekit tauve. Nang le kei jong chu-mun’a kilekit dingin Pakaiyin eikou jing’ui. Pakai ahungkit ni le atahsan mithengte jouse apuitou ding ahi (I Thes.1:10;2:19; 3:13). “Ahung dingpa chu hunga, geisang louding ahi” tin Hebrew 10:37 in aseiye. Pakai amatah in eiho dia amun semna, tahsante dia agonsa mun’a kilekit dia eihung puidiu ahi. Chutah le Amato tonsot’a iumkhom diu ahi (II Cor. 5:8; Jn. 14:3; I Thes. 4:17; 5:10; Jn. 17:14). Hichu Pathen Lenggam tohgon bulhinna hiding ahi. Chu-mun/ gamnom’a kilekitna ding lamdang umlou Jesu bou lampi phapen tah ahi. Hijehchun, tahsan chaten In’a kilekitna ding Jesu vejingin Ama toh kilekhom ding ngah jing’ute.

~~~~~~0~~~~~~

Lhalam 24, 2014 . Thupi : “Pumhat’a lothei lou Pathen Lenggam”

Thuchih 11:30 ; II Sam.11,12; Mat. 2; Phil. 2:6.

Mihem lungthim hin lhoh le tahsa tibah hohi athunun ahi. Hiche poh chun, mihem’a um hinkho sunga hin lungthim kiti hin vannoi leiset kolkimvel hopsoh chule muthei, mumo thil ijakai hetthei mihem hinkho tuh-a le puiya pang chu ahi. Hiche lungthim hin gongtoh le hin semdoh-a chu Pathen ahin, Ama deibolna ding le Akin le Ana tonga hinkho, tahsa tibah ho vaihom toh dinga lungthim hi asem ahi. Hinla, mihem tamtah in chonset thaneina chu hiche lungthim sunga hin mun asempeh jin hiche chonset bulpi (Diabol) chun mihem lungthim sunga vai ahopteng pumhat natoh chu mihemnu/ pa chun ahinkho tahsa tibah, lungthim, lunggel chule hetna-a hung kiphongdohji ahi. Hiche agiloupa thilgon mihem hinkhoa pumhat natoh hung kilangdoh chu Pathenin amah le mihem hinna a umdia adeiloupen khat ahi.

Pumhat’a thil kibol ho veleuhen - Pumhat natoh hi thanei, vaihom, chungnun kichuna, genthei chaga chanvou lahpeh adang dang hohi ahi. Jalhang hinkhomna-a thilsoh hoa pat hetdoh le mudoh thei chu ahi. Pumhat’a insung vaipo, Houbung gam’a vaihom, gamsung vaihom Christiante lah-a abeipon ahi.

Kitepna Lui (Bible’a) ivet le thuchih sunpan mihem hinkho hitin aseiyin, “Thudih in mi ahinson, pumhat’in athat’e,” atin ahi (Thuchih 11:30). Hiche laitah a hetdoh thei chu hinkhoa um lungthim sunga hi Pathen achen angaiye, ajehchu, Pathen hi thudih, kitahna kondohna ahin, Pathen chun mihem lungthim apuihoi teng mihemte dia hinna, kipana, lungmonna le lhamonna hinkho hung kilangdoh ding ahi. Hinla, pumhat natoh jomte chu ajona le ahinkho that’a pang ding ahi ti Bible’in kicheh tah in aseiye.

David lengpa hinkho veleuhen ahung kisuhmona suhmilmo-a um chu angaichat thil ijakai Pathenin apen, hinla Urah in aneisun ajinu Bathseba chu adeichan achonsetpin, agel phahlou laitah in Nathan Themgao mangchan Pathenin David pumhat natoh aphondoh sah in ahi. Chuban’a achapa chunga hamsetna jong achuhsah in David dinga lainat umtah achunga aguilhun dan imuvin ahi (II Sam. 11:12). Hiche laitah a geldoh theiya umchu; David chu leng ahin, thaneina jong aneiyin koijeh-a Leng ahilam, Pakai kinbol dia aumlam ageldoh lou ahitai. Hijeh-a chu Uriah hinkho jong lungthim dihlou tah a asuhmang sah ahi. Aban’a, mivaicha (Uriah) neisun ajinu alahpeh hin pumhat thilgon natoh apohdoh ahi ti mudoh theiyin aum’e.

Jesu Christa pen chung changa Herod lengpa lungthim hi vekit leuhen, Naosen Jesu dinga alungthim chun mun asemlou dan akimun ahi. Ama lungthim’a um hung kilangdoh chu pumhat natoh vaihom, thilgon kicheh tah akimudoh in ahi. Hijehchun, miching, mithem aneiho akhom’in alungthim’a kondoh thilgon aneipi in, Ahsi umdol hethem ho akimupin a lungthim’a kondoh thilgon phalou tah molsona din thulhahna aneiyin, Jerusalem mipite chunga thu nasatah apen, avaihom dan ijakai chu ivet le naosen Jesu (Herod in, Chamna, phatna, Chihna le vaihom themna Jesu-a aum ageldoh joupoi) thana ding thilgon ahiye. Hinla, alungthim’a pumhat natoh hungdoh jouse chu akhonnan ama thinan apanlo tan ahi. Herod lengpa chun, naosen Jesu chu hethem tave le ama tahsa lenggam vaipohna sumo ding hilouva ahatna le aloupina cheh hijo ding ahin, hinla tonsot’a pumhat’a anatoh phatlou suhmilmo ding thusim akisemdoh joh ahitai (Mat. 2).

Kitepna Thah thuhil’a pat seibe leuhen, Paul’in Christa kineosahna le Jesun pumhat natoh adei louna atah langin ahi. Ajehchu, Jesu Christa vannoi leiset semdohpa, thahat, thanei chungnung pen ahijeng vangin ijakai Ama-a um Pathen hina chu akoidoh in kineosah tah a ahungna Phillippi mite henga ana seidoh in ahi. Paul’in hitin aseiyin; “Aman Pathen lim le mel aput jing jeng vangin pumhat’a Pathen to kibah ding agel naisai poi” ati (Phil. 2:6). Hichelai chang hin aseidoh nom chu Jesu, Pathen Lenggam tungdoh pan hiche gamsunga pumhat natoh, thilgon adeipoi ti kicheh tah akimudoh theiyin ahi.

Jesu kamsung soh veleuhen; “Keiya kihil’un keima lungneng tah le nunnem tah kahi, keiya hinjouna naneidiu ahi” (Mat. 11:29) tin anaseiye. Ipiham Jesu-a um chu amatah in aphondoh lungnengna le nunnem’a hinkho aum’in ahi, hiche hi tahsan chate imimal cheh lungthim’uva achen ding hi thupi tah hija ahi. Chule Jesu-a um phatna natoh hi mihem lungthim’a achen thei teng ahung gadoh ding chu, hinjouna tu le tonsot geiya umdi ahi akicheh in ahi. Aban’a John Gospel sunpan Jesun Judaho adonbutna thucheng anasutna-a chun, “Nasung’uva kathun mun aneipoi” (Jn. 8:37) anatin ahi. Hichea mudoh thei chu, mihem lungthim hi Jesu vaihomna ahiding angaiyin ahi. Chutile hiche lungthim chun pumhat natoh jalhang hinkhomna mun ho; Insung, Khosung, Houbung, Gamsung, Kailhang dung, Office hoa muchi phalou tah tah hohi kehdohna ding mun neiponte.

Ajonan, Pathen Lenggam (vaihomna) hi Christa natoh le thuhil chunga kingam ahin, Ama vetkah-a nei angaiye. Ajehchu, Christa-a um chamna, thutah, phatna, lungmon le lhamonna hinkho hi Pathen Lenggam (vaihomna) natoh gongso hija ahi. Hijehchun, hiche Lenggam chu pumhat’a lothei ahipoi ti akicheh-e. Chunga ihinsei bang’uvin David le Saul hinkho jong ivet le pumhat’a natoh ahin pat’u leh Pathen to akimaito nau agasoh chu thina le lhasetna ahi ti jong igeldoh diu aphai.

Kuki Christiante lah jenga jong pumhat’a natoh, thilgon, vaihomna umda ponte chule genthei chaga ho isuh lungnatnau, achanvou hou isuh mahthah pehnau, dihlou tah a Christa Lenggam kin ibolnau, i-insung jeng’uva jong Pathen pang louva tahsa lunggel hat’a cha le naote kaihoi ding itinau tam’in te, bolkhel tamtah umding ahin, hiche ho jouse vel geldoh-u hitin Christa hinkhoa ikihil diu akhoh tan ahi. Chule kineosah le nunnem tah Pakai ibel le Pathen vaihomna hong sunga chanvou loupi tah ineidiu banna, ihinkhouva itoh, ibol jouseu kipana le mitin lunglhaina Pathen vaihomna dihtah soh ihinkhouva soh ding ahi.

Thinung hinkho ikinepnau tonsot gam jong pumhat’a ilotheilouhel diu ahi. Hinla Pakai khonung juiten vang tahsa thina toh jongle mantih neilou tonsot hinna Pathen vaihomna gamnomtah chu alo diu ahi.

~~~~~~0~~~~~~

Lhalam 25, 2014 (Vanghomni Jan)

Thupi : “Gal jousoh Pathen Lenggam”

I John 3:18 ; Mat. 4:1-14 ; Thuphon 20:7-10.

Leiset’a hin gambung chom chom tampi aum’e, kivaipohna, Houthua chondan, tahsa vouso, lim le mel, lungput jong jatchom cheh ahi. Chule chi le nam tampi cheng ihiuve. Hijehchun, leiset thusim ivet le gam khat le gam khat chi le nam’a kigaltona hi tuni geiyin aum jingin ahi tijong ihet’u ahi. Chugoh hilouvin, mimal jengin jong lamchom chom’in dougal melma ineicheh tauve. Hitobang chun Bible’a Kitepna Luiya pat gam le nam mimal kigaltona jong imuve.

Pathenin jong melma lenpen anasei chu Satan anahi. Aman hichu iti ana doudoh a, ajosoh a Pathen Lenggam atundoh ham? ti phabep veuhite -

1. Semtil’a pat’a Pathen hin dou jing Diabol natoh le alenggam sumang dinga Pathen chapa hunga ahi (I Jn.3:8). Diabol in amanchah Saul chunga thaneina vaihom, agiloupa chu jouvin, Ama Lenggam natong din amang jotai ti akimui (Jn.12:31; Acts.26: 15-18). Amite muthim’a kona khovah-a ahung kiheilut theina diuvin asol’in, achaina Mitheng Paul chu Pathen thu hettohsah gilpen, sangpen tah in ahung pang tai.

2. Jesun, Lhagao Theng thahat jal’in Diabol lhep patepna chu ana jouvin, chonsetnan alhapon ahi (Mat. 4:1-11; Lk. 4:11; Heb. 4:15). Aman Pathen thu mangcha-a hiche lhepna gal chu ajo ahi tijong imuve. Hijehchun, Ama chu chonsetna neilou ahitai (Heb. 4:15).

3. Jesun, mihem sunga cheng thilha, lhagaoboh ho anodoh-e (Mk. 1:25-26), thilha hon Jesu chu Pathen’a kon Jesu chu amaho sumang dinga hung ahi aheuvin, akichauvin, Athun anung’un, ana bolgenthei mihou jong alha-ongji tauve tijong imuve (Mk. 1:24,34).

4. Pathen Lenggam tundoh/ tohgon molsona dingin Pathenin Jesu chu van le leiset’a thaneina jouse apeh ahi ti imudoh-uve (Mat. 28:18). Hiche Pathen thaneina mangchan, Diabol thaneina ajouvin Pathen Lenggam akehlen’e.

5. Jesun eiho chonset jouse Atahsa phen apon, Thingpel chung geiyin apodoh in, chonsetna jousea ithiuva, themchanna-a ihin teina diuvin aboltan, Ama kijepna mahan eidam sah tauve. Hijehchun, Themgao Isaiah in gim hesoh thoh lhacha Pa (Jesu) anati (Isa. 52:13-53 ; 12 ; I Pet. 2:24) chu guilhung ahitai.

6. Leiset chonsetna bulpi (Diabol) thaneina chonset gal chu jona Jesu Christa chang ding ahi tihi John henga Thuphon’in imuve (Thup. 17:14; 19: 11-21; 20: 7-10). John’in amu Christa chu galjou, galhat, (cf. Solomon Labu 17:23-27). Tahsan le kitah, adih a galbol, atah a thutan, kelngonou chule pakai ho Pakai le leng ho Leng atin ahi. Diabol thaneina ho jouse Jesun ajosoh hel’a galjona chang ding chule hichu Christa galbol achaina le gimneipen hiding ahi tijong Thuphon Lekhabua imudoh-uve. John henga Thuphon’in adoi mugil kicheh tah kimudoh chu, Christa mangcha-a Pathenin achaina geiya adoute ajotheng helding, Satan geiya ajo-a, akitah jing mite kipaman Vanthah le Leithah apeh chu galjo pilhinnan akiseiye.

Christan leiset mihem’a ahung pen nia pat, Satan gal ahin dou pan’in (Mat. 2:16 ven). Pathen na ahin toh sunga jong agiloupa thaneinan adou jingin (Satan’in alhep patep Mat. 4:1-11), Cross-a akikhetbeh in jong (Mat. 27:40) gal adou jingin, Pathen Lhagao Theng thahat in Ama jona achang jinge. Achainan, Christan melma Diabol thaneina dougal jouse ajosoh-a Alenggam chu Gal jousoh Pathen Lenggam ahisah ding, chua Ama vaihom’a pang ding Alenggam thaneina khangtou jing ding cham leng ding, Alenggam’in beitih neitalou ding (Isa. 9:7) ahitai ti limso kichentah in imutheiyun ahi. Tahsan chaten Gal jousoh Christa ineiyuve, Ama sungil’a chengin gal jousoh Pathen Lenggam’a, Pakai Christan avaihomna-a Ama tonsot’a leng changkhom din eikouvuve. Gal jousoh Christa nanei hitam, Ama sungil’a naum hinam ? Mimal le Houbung kingaitou hitin, hinkhon Ama bel’u hite. Na hinklhoa Diabol lheppatep’a naum khah tah em, Chonset gal iti idou diuham ? Christa-a konin kihil’u hite.

~~~~~~0~~~~~~

Lhalam 26, 2014 (Gansemni Jan)

Thupi : “Jalenna tahbeh Pathen Lenggam”

Pathen lekhabu Theng’a imu bangun thilsem jouse hi jalenna ngaicha ahiuve. Ajehchu, thilsem khat le khat kithana, thina gimnei, nat le sat, soh-a kivultona, kineh chinto, kisuhgepna, lunggim le gentheinan ilah-uva vai ahomtan ahi. Hijehchun, thilsem namkim hi huhhingna (jalenna) ngaicha peng peng ahiuve. Achutile jalenna chu hoiya imudiu hitam ? Jalenna tahbeh Pathen Lenggam thudol phabep seiyuhite.

Achesa Pathen Lenggam’a chun jalenna imudoh-uve, hichu Israelte thusim’a pat ahi. Israelte soh le kol, nehchinto, kivaipohna le Houthu-a suhgep’a aum nauva pat Joshua (Jesu) chu Pathenin amangchan, galjousoh-in Canaan gam (Pathen Lenggam), gamtep gam apuilut’in, chu-gam’a chun agenthei nauva pat Pakaiyin ajalensah tai ti imuve (Heb. 2:10; 2 Cor. 2:14). Israelte jalensah-a chu Hatchungnung Pathen ahi.

Christiante jalenna tabeh chu Jesu ahi. Aman aseichu - “atah chu nahet’uva, atah chun najalen sah diu ahi,” tin anaseiye (Jn. 8:32). Jesu le aman ana lhangsap Pathen Lenggam chu ihet’ule ijah-u hi atah chu hija ahi (Jn. 14:6). Chule atah chu Pathen Lenggam lut theina le chondan jong ahi ti iheuve. Jesu le aseijuiten jong ahettoh sah-u chu atah ahi (Eph. 2:10). Chuti ahile atah chu hoiya, koiya kon ahitadem ? Atah chu Jesu Christa-a kon chule Ama chu atah ahi ti imudoh tauve (Jn. 1:14; 1:17; 14:6).

Tun atah chu ihet’u ahitah le atah-a chu ipi imudiu hitam ? Atah chun eijalensah diu ahi (Jn. 8:32b). Jalenna hi Jesu Christa-a kipan ahi (Gal. 5:1) ti Mitheng Paul’in Galatia mite henga lekha athotna-a aseitai. Hichu achesa, apet’a chule ahung lhung ding Pathen Lenggam’a jalenna tahbeh, chonset’a kona jalenna amasapen le tonsot’a dinga jalenna ahitai tijong Pathen thugil hethem mihon eina seipeh-uve (2 Cor. 3:7-9; Rom. 6:6,14).

Ajehchu, Jesun hitin aseiye, “... chapan jalensah leuchun najalen tahbeh diu ahi” ati (Jn. 8:36). Henge, atah khatseh, Jesu chun chonset thina le agiloupa thuneina noiya pat amite eijalensah tauve tihi Pathen thun eihil’u ahitan, tua vang chonset soh-a kona eijalensah-u ahitah jeh-in atah (Jesu) sohte ihitauve. Hinkho-luiya pat hinkho-thah ahitai. Hiche ijalennau aga chu kisuh thengna chule achaina Pathen Lenggam’a tonsot hinna ahi. Ajehchu, atah chu tonsot’a Pathen Lenggam’a I-Pakaiyu Jesu Christa to hinkhomna ahi (Jn. 6:21-23). Hiche hi tupet/ apet’a Pathen Lenggam hinkhoa mandoh ding thudoi/ bidoi phatah chu ahiding tahsan aum’e.

Achainan, ahunglhung ding jalenna tahbeh Pathen Lenggam’a tahsan chate le Pathen hinkhom ding dan kisei phabep veuhite. John henga Thuphon’a chun, “Ven, Pathen chenna in chu mihemtte lah ahitai, Pathenin amaho achenpi-a, amaho amite hidiu, Pathenin amaho achenpi-a a-Pathen’u hiding ahi. Amit’uva kona amitlhi jouseu athehhul peh ding, thina umtalou ding, lunghemna le kana, thohgimna jong umtalou helding ahi; ...” ati (Rev. 21:3,4). Hiche thua hin Kitepna Luiya, Israelte amite asemdoh-a, Ama a-Pathen’u hiding Pathen kitepna ho guilhunna hitading ginchat aum’e. Hiche ho chu sim’in - (i) Leviticus 26:11,12 (ii) Jeremiah koma Pathen kittepna (Jer. 31:33) (iii) Ezekiel koma Pathen kitepna (Eze. 37:27) (iv) Kitepna sangpen chu (Solomon Labu 6:3). Pathen Lenggam’a Pathen to chenkhomna-a chun mitlhi, thina, lunghemna, kana le thohgimna jong beitading ti ahi. Hiche thu jonghi Pathenin Isaiah Themgao kam’a ana phondohsa ahitai (Is. 35:10). Aseikitna-a chun, “Jerusalem le amite jal’in keijong kipah-inge. Kana le panpi ngaicha kana beisoh tante” (Is. 65:19; 25:8). Chu-gam chu tahsan chaten agaldot, akinepnau ahin, chu-gam’a chen iti anop tadem !

Christian hinkhoa Christa kanei tah em ? Ama jal’a najalen hitam ? Jalenna tahbeh Pathen Lenggam nopje kisei minthang’a chun umnan natem ?

~~~~~~0~~~~~~

Lhalam 27, 2014 (Misemni Jan)

Thupi : “Pakai hungkit tei ding”-Mat. 26:64; Jn. 14:3; Thup. 22:12,20.

Christian tahsanbu (Bible) Kitepna Thah (NT) sim jousen Pakai hungkit ding tahsan lhongpi hi Houbung masaho lunggel’a mun khohpen aloi ti mudoh thei ahi. I-Pakaiyu leiset’a ahungkit ding thudih sanga thupijo adang Bible’a aumpoi. Ahung masah chu miho huhhing achanna diu ahin, aniveina-a ahung ding hi tahsanna le thununna-a huhhing chang ho puidinga hung ding ahi (Heb. 7:28). Mihem khat’in asuttohna-a Kitepna Thah pumpia hopnga-a hopkhat hin Pakai hungkit ding thu aseiye, ati. Mitheng Paul lekhathot’a jong atamjo hiche thu hija ahi. Adeh in Thessalonica lekhathot masa ahin Mitheng Paul’in lekha athot Houbung jousea Pakai hungkit ding thu in achaiye (I Thes. 1:10; 2:19).

Mihem phabep in atahsanlel vangun mun tamtah a Pakai hungkit teiding ahidan akihechen’e. Chule Jesu leiset’a hungkit ding ahi ti hetna alhasam poi Heb. 10:37 a kisei hi David in gaova anamusa ahitai (Dan. 7:13).ahung ding photchetna phabep veuhite.

1. Jesu amatah in Athutep in ahungkit ding thu ahet tohsah-e. Ven Mat. 26:64; 24:30 Thup. 22:12,20; Jn. 14:3; Mat. 24:35.

2. Vantil ni hettohsah, Pakai Jesu Van’a akaltou Solchah hon avet pet’un, Vantil nin hitin aseiye, “Galilee gam miho ibol’a dinga Vanlam navet’u ham ? Hiche Jesu nakom’uva kona Van’a akaltou hi, Vanlam akaltou namu bang bang’uva hungkit ding ahi” (Acts 1:11). Ahung kilekit teng jongle ahin lhonpi diu ahi, ti Bible’a imuve.

3. Solchahho hettohsah : Solchah Peter in Pakai hungkit ding pomlou ho chu khaotah in anelkhup’e (II Pet. 3:1-14; I Pet.1:3-13l 4:12-13). Christa hungkit ding hettohsah O tampi chungvum’a John in jong nasatah in ahet tohsah-e (Thup. 1:7 ; I Jn. 2:28; 3:2; Thup. 22:20). Solchah dang jouse sangin Mitheng Paul’in Pakai hungkit ding thu ahahil’in hatah in akipapin ahi tihi alekhathot hoa pat akimu theiye (I Thes. 5:2; Heb. 9:27-27; Rom. 2:16; 8). “Ijeh-inem-itile Pakai Amatah Ogin toh, Vantil pipu Ogin to chule Pathen sumkon gin to thoa Van’a kona hung kumlha ding ...” (I Thes. 4:16).

4. Pakai Ankong’in ahettohsah : Pakai Ankong/ Anjon hin Calvary akoh-e tihi igel dan’u ahipen’e. Ahinla, Pathenin nunglam’a Calvary chule malam’a Ama hungkit ding akodoh dinga vetsahna atun chu ahi tithei hinte. Paul in Corinth miho aseipehna-a, “Ijeh-inem-itile hiche Changlhah naneh-uva chule khon’a nadon laiseuva ahung kit kahsea Pakai thina chu naphondoh jingu ahi” (I Cor. 11:26). Mikhat’in, “Pakai Ankong hin giltah a thu asei chu ngailutna chungnung leh Christa chamkim tah a lhatdoh dia ahung kit ding avetsah ahi” ati.

Jesu hung kit teiding ahihi hettohsah tampiho jal’a eihon, Solchah Peter in aseibanga ahung ding tahsan kicheh tah neiding angaitai, aman keihon i-Pakaiyu Jesu Christa le ahungkit ding thu nangho kahetsah-uva chu semthu thusim pou mangcha-a sei kahipouvin, Alal loupina mit tah a mua kaseiyu ahibouve (II Pet. 1:16). “Hijehchun, kong kingah bangin nalungthim gil’in kiging’un lungnem’in Jesu Christa hung kiphondoh teng nakipeh diu lungsetna-a chun lhingset’in kinem jing’un” (I Pet. 1:13).

Jesu hung kit teiding ahi ti hettohsahna tampi isei tauvin, Ama nungjuiten itahsan cheh diu, ingalel diu tahsan le kinep aum’e. Hijehchun, Aman ipijeh-a avel’a hung ham tihi Jesu to ikiguijop avel’a igeldoh kitna diuvin, phabep seikit’u te.

1) Amite, kinemtah a Ama galdot jingho huhhingna pedia aniveina hung ding ahi. (Heb. 9:28b).

2) Miten atoh dungjui cheh-a tohman peh ding keiya tohman chu kahin poi, (Thup. 22:12). mitin atoh dungjui cheh-a tohman apeh ding ahi.

3) Ahung masahpa chu miho huhhing channa ding ahin, aniveina ahung kit ding hi tahsanna le thununna, Pathen Lenggam chondan’a hingho huhhing chang ho puidia hung ding ahi (Heb. 7:28).

Pakai Jesu ahung kit teiding le ahung kitna ding ajeh ho chu chamkim hih jongle phabep iseiyuva pat ihetauvin, achutile Ama hung teng tohman ineidiu hinam ? Aman lhenchomte apuitou ni leh ipang nadiuvem ? Mimal, Insung, Houbung hinkho kingaitou hite tunin, Pathen Lenggam (Jesu Christa) kisan’in tahsa, lhagao, hinkho amadin mang tauhite. Ajehchu, “Ama hung kilah teng kisonna ineiyuva, ahung kit tengle maimohna ineilou nadiuvin ama sunga umjing jeng’uvin (I Jn. 2:28). Theology gilpen Mitheng (St.) Paul in asei Christa sunggil’a umhi Pathen Lenggam’a dingin akilang’e. Chuteng le Ama hung ding galdot jingin, “Amen Vo ! Pakai Jesu hungin” (Thup. 22:20b) tia itao diu ahi.

~~~~~~0~~~~~~

Lhalam 28, 2014 (Pathenni Nilhah)

Thupi : “Ahung ding galdot”- Titus 2:12-13; 2 Peter 3:11; 1 John 2:15-17.

Pakai hungkit teiding kisei banjom’in ahung ding dan chu - Mutheiya (Acts 1:11), Meilom hoto (Exo. 24:16; 13:21; Mt. 17:5;24:30) chule Vantil hotoh loupitah-a (Mt. 25:31; 1 Thes. 4:16; 2 Thes. 1:17) hung ding, amavang aphat le nikho thudol’a Jesun aseina-a, “Pa tilou anikho le anidan tah chu Van’a Vantilte le Chapan jong koiman ahepoi,” ati (Mk. 13:32). Ahung ding phat hi mihem seithei hitalou, Pathen khut’a bou um ahin, mihem’in ahetding chan chu ahile Pakai hung kitna ding galdot jinga kigosa umding chu ahi.

Tua iseidiu chu Christian hon iti Pakai Jesu (Pathen Lenggam) hung ding igaldot diuham ? Pathen lekhabu thuhil’a pansan veuhite.

Vannoiya kona chomkhen : Mitheng Paul’in Titus atilkhouna-a chun - “Hou ngaisah louna le vannoi leiset ngaichat jouse paimang’a lunglimgeh le adih chule Hou ngaisah tah a tulai khanga hi ihin diuva eihilchah-u ahi. Chule thanop umtah kinepna, Pathen nasatah le eihuhhing’uva Jesu Christa loupitah-a hung kilah ding kat jinga iumdiu ahi” (Titus 2:12-13). Peter’in, “Hitobanga hi thil jouse hung kisumang ding ... nun le khan, thenna lam, Pathen ngaisahna-a” hinding anaseiye (2 Pet. 3:11). Pathen lekhabun Christiante eihilnauva chun, “Vannoi leiset le asunga um thil ho ngailu hih hel’un ... vannoi leiset le athil ngaichat lunggel abeikon ahitan ... “ (1 Jn. 2:15-17). “... vannoi leiset le asunga um nakitong jouse kavamsoh helding” (2 Pet. 3:10b) ahile amangthah ding thil hoa kisahlel chu Pathen Lenggam mite chonna ahinadem, ahung ding igaldot nauva chondan to akitoh nadem, kitohlou maithei ahi.

Changval thenna-a Peter’in asei chu, “Hijehchun deitahte, hicheng hi kat jinga naum nauva ama henga nolna beihel le bohbeh louva nahung mudoh theina diuvin...” (2 Pet. 3:14). Chule “Ama jal’a hiche kinepna neichan chu ama then banga ama jong kisutheng ahi” (1 Jn. 3:13). Thumun ahin kijahda lam’a seidin, Christa hungkit ding igaldotna diuva vannoi ngaichat jouse inungsun diu ahi. Bolding lam’a seidin, “lunglimgeh le adih chule Hou ngaisah tah-a tulai khanga hi ihin diu” chule hitia chu “thanop umtah kinepna” chu inga diu ahi (Titus 2:12-13).

Christa hungkit ding igaldot jing’u chu Christian hinkho iman nauva lung chohthouva pang jing ahi. Hiche thu themkhat achom lam’in veuhite -

(i) Kitahna (Phil. 1:10-11), (ii) Lunglimgeh (1 Thes. 5:2,6; Lk. 21:34), (iii) Kichang ngailut lou (Phil. 4:5), (iv) Thohhat (Heb. 10:36, 37; 1 Pet. 1:7), (v) Kitahna (1 Pet. 5:4), (vi) Kiging jinga um (Mt. 24:42; Mtt. 25:13; Mk. 13:37; 1 Cor. 1:7), (vii) Natoh (2 Tim. 4:1-2a; Mtt. 25:1f; Lk. 12:43).

Christian khat kiging jinga um chun atahsan avetsah ahi. Aman a-Pakai hung ding chu aginchat ahi. Hijeh-a chu kiging jinga um pum’a anga ahi. Kiging jinga umhin ahung ding adeina jong avetsah ahi (Titus 2:13). Christian jousen ama khanga Jesu hung dingin gingchan angah cheh-e. Achuti ding mong ahi. Ahung ding galdotna hin Christian khat chu chondihna chule kitah tah-a galdotna chule gunchu tah-a natohna hinkho amansah ding ahi. Nikhat nile Christa (Pathen Lenggam) chu hunglhung teiding ahi. Iti nakigot ding ham ? Mimal hinkho, Houbung hinkho chule kho le veng nam hinkhoa iti Pathen Lenggam hunglhun ding ngah jinga igaldot diuham ?

La isah jiu chu - “Pakai munsem, chua nulhum ngailoum thingna jong pul ngailou, chua chun Lhandampu le mithente cheng, chungsana khopi a chun” Aw chu khopia chen iti anop tadem ? Pakai munsem khopi chu, Insung mite ikimna diuvem ? Houbung mite ipangcheh nadiuvem ? Lhatsa le mithengte chemasa golngaite chu a aleng tauve. Eiho jong chu khopi Pakai munsem’a leng dingin tahsa lunggel, hindan, lhagaova kisem thah tauhite.

~~~~~~0~~~~~~

Lhalam 29, 2014(Sempatni Jan)

Thupi : “Na Lenggam hung lhung hen”- Matthew 6:10.

Thupi hi taona thucheng’a kona kiladoh ahijeh-in taona umdan chomcha seiyute. Taona hi Pathen to kohoumatna, thangvahna, kipathu seina, ngaichat thumna chule Pathen kom naina ahi (Lk. 11:2; I Tim. 11:9). Thupi to kitoh-a seidin Pathen Lenggam (vaihomna) mihemte lah a aum theina dia taona ahiding tahsan aum’e. Ajehchu, leiset’a mihem hinkhoa hin Pathen lungdei aphalam’a chonna le kingailutna nasatah a lhasam’a ahitah jeh-in, Pathen Lenggam (vaihomna) sangtah/ giltah a ngaichat ahitai. Pathen Lenggam chu Kitepna Luiya Israelte le Themgaoho chule Jesu mangchan leiset’a ahung lhung tai. Hinla, leiset min chamkim le bulhingset’in ahenai poi. Hijehchun, Pathenin ahung lhung dia atepsa guilhun theina dia tahsan chaten Pathen henga taona ahaimil louna diuva eihil’u ahi. Pathen Lenggam chondol’a chonna hinkho manding hi mihemte ngaichat khohtah ahitai.

Pakai Jesu ahung lona, thuhil pen le akingaicha ho khohpen tah chu Pathen Lenggam thujeh ahi ti iheuve. Hichu ihetchet theina diu Luke sut Kipana Thupha’n asei chu, “Jesun khopi jouse le khote jouse aban ban’in achon’in, Pathen Lenggam Kipana Thupha ahillhang len ...” ati (Lk.8:1). Achutile Pathen Lenggam chu kichen tah a hetlou akhoh tai. I-hetchet theina diuvin Jesun Pathen Lenggam chu lam thum’in aseiye; achesa, apet chule ahung lhung ding thupi apatna langa kisei chu ivel geldoh kitdiu aphai. Hiche ban’a dohna umkit chu ahile, iti achesa, apet’a chule ahung lhung dinga aboncha thakhat’a hithei ham, iti thakhat’a soh ding ham chule koi hung ding jeh-a taona imopoh-u ham ?

Pakai taona-a hin thugil kimangkop imuve. “Na Lenggam hung lhung hen, Van’a bangin leiset’a Na lungdei kimsoh hen;” (Mat. 6:10). Hiche chu Hebrew poetry kijih dan khat Parallellism akiti. Aumje chu thukhat lamni-a kisei anina pan amasapa hilchetna apehji ahi. Vetsahnan Psalms 23:1 sim’in. Pathen Lenggam van’a banga leiset’a kiloikhomna-a Pathen lungdei dihtah akibol chu Pathen Lenggam ahi tia santheina mun aum’e. Hichea hin Pathen Lenggam achesa, apet’ a le ahung lhung ding abon’a thakhat soh ding ham ti donbutna chu imutauve. Koi hijongle itih phat hijongle thusim achesa, apet’a dih atah a Pathen lungdei bolmi chu thupeh nit’a Pathen Lenggam’a um ahitai.

Pathen Lenggam chu Nam, mitamtah, chule gambung’in atoh a asemding kin ahipoi, chusang’in eiho khatcheh kin joh ahibouve tihi tahsan chaten ihet teidiu aphai. Lenggam’in angeh chu - Keima nopna/ dei, keima lunggel, keima hinkho chu ahi. Eiho khatcheh ikigel lhah-uva ikipehlut teng’ule Lenggam chu hung lhung ding ahi.

Chinese Christian ho taona chun - Pakai, Na Houbung semphan hinla keima-a pan masan ati, chutobang chun tahsan chaten isei diuvin - Pakai Na Lenggam hin polhan, hinla keiya/ keima-a pan masan. Pathen Lenggam dia taona kiti chu Ama lungdeiya ikipehlut theina diuva taona ahi.

Pathen Lenggam chu Pathen thunit, tahsan, Pathen deibol miho taona ahi :- Pasal ho dingin Joseph (Gen. 39:9) Nathan (II Sam.12:7), Elizah (I Kgs.18:21), Daniel le aloite (Dan.1:8;3:16-18), Mordacai (Esther 3:4-5), Peter le John (Acts 4:19-20), Stephen (Acts 6:8; 7:15) chule Paul (Phil. 3:13-14).

Numei ho ding :- Deborah (Judge 4:9), Ruth (Ruth 1:16-18), Esther (Esth.4:16), Mary (Lk.1:26-35), Anna (Lk. 2:36-38) chule Lydia (Acts 16:14-15, 40). ivatkah diuva kikoi ahi.

~~~~~~0~~~~~~

Jesua hinna

Pages

Lenggam

No comments:

Post a Comment

Total Pageviews