HINKHO THENG A HINGDIA KOU HO LAH A DIABOL

Bible chang lhen (John 6:70-71; Matthew 16:23)

John 6:70-71: Jesun amaho adonbut’in, “Nang ho som le ni kalhen chil hilou ham? Nalah-uva khat Diabol hinalai ong?” ati. 71. Jesun Iscariot Simon chapa Judas aseina ahi; ajeh chu som le ni lah a apan vangin Jesu matsah a pang ding chu ama ahi.

Matthew 16:23 : Hitah chun Jesu akiheiyin Peter jah a, “Kinung che jengin Satan! Neikipalsah lo ding ahi, Pathen dei banga lung gel louvin mihem deilam joh nagel’e,” ati.

Thupi hin asei hi veleuhen - ‘Hinkho’, ‘Atheng’ ‘Hinkho-theng’, ‘Kou/ koudoh/ kouchom/ khendoh/Lhendoh (election)’, ‘Diabol’ tiho hi akimudoh theiye. Achen-achai seilouvin, achomlamin seiyute.

1.PATHEN:

a). Bible in ‘ATHENG’ ati hi Hebrew Bible (O.T.) a “qodesh” ahin, Greek pao (NT) in ‘hagios’ ati’n, English Bible in ‘holy’ ati’n ahi. Hichu, “achuom’ ‘Chuomkhen/koikhen/sekhen’ ‘Hiina chumbeh nei’ ‘atheng chuom / atheng a koi “apart, set-apart, separate,different, sacredness, holy”’” tina ahi.

b). Hiche hi Pathen “hi’na/ mije” (Attribute of God) lah a khat ahi.

Pathen hi’na ho chu : Atheng, Apha, Ngailut, Adih, Atah, kikheltih neilou, tonsot a umjing, pentil neilou, Hechamkim, munjousea um, ijakai hesoh le musoh, chule adang dang ahi.

c). Pathen “hi’na” hohi ‘pehson/lahson thei” (Communicable) aumin, “pehson/lahson theilou” (incommunicable) aume.

“Kikheltih neilou” ahiina hi mihem pehsonthei ahipoi. Ajehchu, mihem hi ‘pen phat le thiphat nei’ ahi.

‘Atheng’, ‘Ngailut’, ‘phatna’, ‘kidihna’, ‘Kitah/ atah’ ahiina le adang tampi hohi, alhingset hihih jongle, pehson/lahson/kikoppi thei ahikeu hilouva, Ama limloa asem ‘mihem’ hin aneitei dia agon ahi.

Pathen ‘hiina’ mihemin aneiding suse nom jinga chu ‘Satan’ ahi.

SATAN hi : 1. ‘Diabol’, Greek paova ‘Diabolos’, English in ‘Devil’ kiti hi ‘miseise, mihehse’ (slanderer, accuser) tina ahi. (Job 1:6; Rev. 2:10; Zechariah 3:1; Rev.12:10).

2. ‘Satan’ akitile ‘gal (kidoupi), milhem (lhempu), jou kipatna, mi hehse’ tina ahin English in ‘adversary; deceiver, accuser, ’ akiti.

3. Satan hi Bible in ‘chonset bulpi, Gul, Gulse, muthim lengpa/ vaihompa,’ le adang dang jong asah e.

4. Bible ahin ‘Daemon’ (Gk), English a ‘Demon’/ ‘devil’ aumin, hichu ‘lhagao ho, lhagao boh ho’ (‘spiritual beings’) akiti. Hiche hi ‘d’ neova kisuna ‘devil’ akiti. ‘D’ len ahiteng ‘Diabol’ minchom kiseina ahiji.

NB:‘Pathen’ hi ‘Atheng-chamkim’ ahin, ‘Satan’ hi ‘athenglou, abuoh’ ahi.

2.JESU CHRISTA:

a). ‘Jesu’ hi ‘Huhhingpu’ tina ahin,

b). ‘Christa’ hi Hebrew paova ‘Messiah’, Greek paova ‘Christos’, English a ‘Christ’ ti ahi. Hichu, ‘Lengdinga thao kinu’ tina ahi.

c). Jesu hi Pathen thutep guilhunna, pilhinna, suhbukimna ahi.

d). Pathen thutep/thilgon chu ipi ham ?

Pathen in mihem chu ‘Alimlo, Ama mije nei’a achenkhompi ding, asemsa thil dang ho chingtup ding a Mihem anasem ahi. Hinla, Mihem chu Satan in ana lhemlha tan, Pathen mije aneina chu asuboh in Satan thenlouna chu aneitai. Hiche ‘thenlouna’ chu Bible in ‘chonset’ ati ahi.

Hitia mihem chu ‘thenglou’ ahi phat a chu, Theng chamkim Pathen in achenkhompi thei tapon, akoma konin adeldoh tai. Hinla, mihem chu athen kit a, amato chengkhom kit theina din Pathen in tohgon aneitai.

Satan in numeinu alhep achu ‘Gul’ lima chea Eve, honsunga um chu aga lheplhah ahi. Hijeh achu, Pathen in Gul (Satan) koma chu athutep chu aphondoh a :

“Numei nu to nang kakidousah a, ama chilhah le nang chilhah kigalto ding ahi. Ama chilhahpa’n nalu avoh chip’a, nangin akhotaljum nachuhpeh ding ahi,” ati. (Genesis 3: 15)

Hichea ‘Numeinu chilhah’ tia atep hi ‘Jesu’ ahung hitai.

HETDING :

1.Gul (Satan) in Jesu khotal achuh ding, thina khop vang hilou;

2. Jesu’n vang Gul(Satan) chu alu avohchip ding (alu achip-le thitei ding ahi).

3.Hichena dinga chu Jesu mihem a hungpeng teiding

4.Thohna ato teiding, ‘Cross’ a thina gei ato teiding ding

5. “Cross” chu “thohgim-genthei thohna’ melchihna ahin, ‘Satan lu ajepchipna’ manchah le ‘agal jona’ melchihna jong ahi,}

6.Nithum nile Pathen in akaithou kit ding, hichu Satan (chonset) gal jo bukimna ahi.

7.Jesu’n Satan ajo (atha) teng mihemte chu Satan thanneina a kon jalen tading, ‘athenglounauva kona theng kittading, Pathen-to chengkhom kit thei ding ahitai.

8.Hichu, Jesu thisana kisopthengna, lhatdamna, thoidamna chu ahitai

9.Bible in ‘Huhhingna, sochatna, chamlhatna, jalenna’ tia asei ahi.

10.Hiche lhatdamna hi mijouse dinga ahi. Hinla, tahsana kisan ngai ahi.

3). JESU MIHEM A AHUNGPEN :

Satan that dingpa Jesu chu ahung pengtan, Pathen thilgon chu ahung lohing pantai ti Satan in ahetai.

Satan tup pentah chu Jesu “Cross” a thisah louding, “Cross” peldohsah teiding chu Satan lungtup ahi. Ajehchu, “Cross” chu Pathen thutep le thilgon Jesu lhatdamna natoh molsona ahi.

Hiche hi Jesu hungmasang kum sang sagi masanga ana kilangsa ahitai.

Israelten Pathen doumah aboljeh’uvin Gulse’n athatgam deh jengtaove.

Mipi khel in Mose Pathen koma ataovin, Pathen in molleh a ‘gul’ akhaisang a, gulin achuh a dammo thikon ho lah a Mose gulkhaisang ve jouse sohcha diu ahi. Hiche vetding jong nomlou, tahsanlou adimset’uve. Ave jouse asohcha’n, tahsanlouva velou jouse athigam heluve.

Hichea, Mose’n gul akhaisang chu Jesu ‘Cross’ a ahung thi ding vetsahna ahitai.

Jesu ahung pengin Cross a khaisangin aumin, athi in athoukittai.

Mose’n molleh a gul akhaisang vechan asochat banga, Jesu cross chunga athi tahsana kisan jouse Eden hona Gul lhepna jeh a chonset a thiding jouse huhhing a um ding ahi.

Na tahsan em? Na kisan nom em? Tuhin kisanin. Tuhi phatpha ahi. Tuhi huhhingna nikho chu ahi.

Vel seikit’ute :

Satan that dingpa Jesu chu ahung pengtan, Pathen thilgon chu ahung lohing pantai ti Satan in ahetai. Jesu “Cross” lhung louva, apeldoh teinadin Satan in hiche gama lengpa (Herod) chu mangchan Jesu thading tup in naosen tampi athat tai. Naosen Jesu vang Pathen in ana huhdoh e.

Jesu apilhing in Kin bolpatna dingin gamthip lah a anngola taodin achetai. Satan in leiset loupina le lalna hoa lhep lhah ding atup in, ajoupoi.

Jesu’n atohkhompi le anatoh tongjom din Seijui 12 (Som le ni) alhengdoh in, nasatah in natoh apanin Satan thahatna ahin sumang pantai. Dammo adamsah in, lhagaoboh vop ho adeldoh peh in, mithi akaithouvin, thilkidang tamtah aboltai.

Hichun, Satan in Jesu seijuitah Peter chu ahin mangchagotai. Peter in Jesu thilouna ding lung ageltai. Hinla, Jesu chu Pathen Chapa, Pathen masap ahijalin, Satan in Peter amanchah got chu amutai. Hijeh achu, Pater ahousal hilouva, Peter sunga um Satan chu ahohsal’a

“Satan, Keiya konin kichon mangin”(Matt. 16:23a NRSV) ati ahi.

Hiche hi, gamthip laiya alhep laiya Satan anomangna a “Satan, che mangin” ati banga chu anomangkit ahi (Matt. 4:10a). Hinla, Peter jong ahilchan na in “Neikipalsah lo ding ahi, Pathen dei banga lung gel louvin mihem deilam joh nagel’e,” tia aseipeh ahi (Matt. 16:23b NRSV).

HETDING : Peter chu Jesu seijui lah a jong achallangpen, tahsanna dettah nei le lungtheng le lungjang ahi. Hitobang Jesu seijui loupi bon Satan in amanchah ngap-le nang le kei ipi ihi ham? Eimanchah jing theiyu ahi het a Bible sim jinga tao jing ding ahi.

Chule, Kipana Thupha (Gospel) hi seiphong dinga Christiante jouse einganseu ahi.Pathen natoh lah a apipen, Pa le Chapa Jesu Christa tahsana hi khatna ahin. Anina chu, Kipana Thupha seiphong hi ahi. Houbung natoh dang jouse – Bible sem, tolom, houkhom, Houbung phu le kivaihopna le kivaipohna jouse jong hi ‘Kipana Thupha seiphongna dia kibol ahi.

Hijeh achu, Houbung mite jouse aseithei dia tilkhou ding, hilding ahi.

HB kipat tila neh le don thua Judami le Greek nute akiboiyuva chu Solchah Peter le adang hon ipi aseiyu vem?

Sum le, neh le don ding boipi dia lhacha (Deacon) dia mi sagi mipi alhensah’uva, ama ho (Solchah ho) vang ‘Kipana Thupha’ seiphong dinga bou kiseiyuva, kipeuva ahi. Solchah Paul in “‘Kipana Thupha’ seiphong dinga bou ei kikou ahi” atia aseiphongle hilou ham?

‘Hijehchun, Pathen thuseiphongna lam hi HBmi jouse hilthemna din pan lou hite. Chutile, natohna chomchom, munchomchoma um hon jong, natoh dang abolnauva jong, amaho kham cheh a Kipana Thupha miho ahinseipeh thei diu, Pathen in phatthei aboh’ a Pathen lenggam hi machal ding ahi.

Jesu chu Satan in atohtangjoulou phat in, agomkom aholkittai.

Jesu chu Pathen Chapa, Pathen masap ahijeh a asuhmo joulou ahi Satan in ahechentai. Jesu chu “Cross” lhung teitei ding ahitai.Hijehchun, Jesu insung chu suhset ding agongin, Jesu seijui lah a khat ‘Judas’ chu amangcha tai.

Judas chun amatsah in, Jesu chu “Cross” in akhenbeh un athitai.Hichu, ‘Gul’ (Satan) chilhah ‘Judas’ le ‘Roman solkal’ chule ‘Juda mipi’ hochun Numeinu chilhah (Jesu) chu akhotal achuh peh nau ahitai.

Jesu athi’n, hinla, athiden poi. Nithumnin Pa Pathen in akaithou kittai. Hichu, Jesu’n Satan gal ajona ahitai.

Satan le alhacha - ‘Judas’ le ‘Roman solkal’ chule ‘Juda mipi’ ten that tahtah jou talou,

Thina le lhankhuh in hen jou talouvin, Nithum lhinnin Satan le thina gal jouvin,Loupi tah in Jesu chu athoukittai!

Chonset le thenlouna jousea kona ‘silthengna kin’ ‘thoidamna kin’ khatveiya Jesu’n achai thu hi, theologian hon ‘atonement’( ‘at-one’ ment) tia aseiyu ahi. Hichu tahsana, Jesu Christa hi ‘Huhhingpu’ le ‘Pakai’ dia kisan jouse chu ‘suhtheng’, ‘soptheng’ a uma Pathen in Acha dia akisankit ahitai. Hitia chu, Christa kisan jouse chu Pathen in, apanpi diuva, Lhagao Theng apeh a, Pathen lungdei hinkho,’hinkho theng’ chu amansahji ahitai.

Koiman, Pathen Lhagao panpi louvin, hinkho theng amang theipoi.Hijeh achu, Solchah Paul ‘chalamthu’ ihiuve asei ahi. ‘Lamthu’ tichu ‘acha hilou’ acha dia akisan/akisem tina ahi. Eiho lah in jong hitobang, Pathen ngailutna hi neiya, acha hilou acha dia kisem ium sausau tauvin, Ama ho jalin Pa Pathen chu thangvah in um hen.Hitobang cha-lamthu hohi anu le apa’n angailutnau asang chomin, lhase khalente ti’n adem geu jing jiuve.Christa jala chalam-thu hiho jong hi i-pau Pathen in eingailutnau sangdehset ahin, lhase khalente ti eidep jingo ahi. Hiche ngailutna sangtah chu songa apa Pathen koma lungiltah le laina tah a mitlhi puma tao hohi, Ama deiloulam ahilou nahnah-le, Pa Pathen in asangteiji.

Loupina Pakai chang jing tahen.

Nangla, hiche ‘hinkhothah’ ‘hinkhotheng’ chu nanei tah em? Nanei loulai le tuhin kisanin.

Aneijouse’n, chingtheitah in hinkho mangute. Tahsan mite lah’a Diabol ahat’e.

HETDING:

Eiho lah a geldan le seidan hi kavet-le ‘atheng’ hi tahsa thenna, English a ‘clean/ cleanliness’ kiti bou a kiseiyin akimui.

Ipihile ‘tahsa thenna’ jong aphan, tahsa damtheina le hoina jong ahin aphai.

Hinla, ‘Holy/holiness’ hi tahsa thenna, sil le chen, neh-le-don mai ahipoi.

Hitia hi Pathen thu iseikhah’ule lhinglou le dih joulou ding; Christa a Kipana thupha hin mijouse ahopsoh louding ahi.

Ajehchu, tahsa thenna ‘cleanliness’ hi mi khangtoudom ho jobou ahin, khangtou joulou (uncivilze) hon tahsa thenna aneijou pouve. Vonbei tobanga nen dehduh nalaiyu, amumu hou asel le amina aneh’u adon nahlaiyu ahi. Hinla, hitobang miho jouse jong chu Christa hinna thupha hin ahopsoh cheh, huhhingna, Pathen thenna hi chang thei cheh ahiuve.

Neh le don thudola Pakai Jesu sei chu iheuve–sunga lut’a kithadoh kit bou ahi.Peter chun aneh ngailou ‘gul le adang’ tampi Judaten ‘Sathenglou’ atihou Pathen in anehdia aseipeh chu geldoh in.

Pathen in adei le Bible in asei chu ‘tahsan theng, lungtheng, nun le khanna then hi ahi.

Neh le don, sil le chen a then vang apha le deium pen ahi. Tahsa damna le vet dia jong hoi ahi.

Hinla, Pathen lhagao neilou vang chun ‘tahsa thenna le chonphatna’ anei jongle Satan manchah phatah in apangjitai. Mi oimona, mi thetna, midehna, a elela mi houna a ahinmankhah-le hichu Satan manchah ahijitai.

Labulpu’n : “Pakai Lhagaova konlou chu chihna le themna lalna, danpha le chonphatna dan lunggila hungpah ding ngei chu setna gallen ahung soh tai”.

Na thenna, na phatna,natohphat, na chih-nathepna hochu nang le midang dia setna gal asolouna din Christa kisanin, Lhagao Theng chenkhompina hinkho mangin. Chutile, na thenna, naphatna ho jouse chu ‘miten Pathen phattheiboh’ achannau hiding ahi.

TULAI VANNOI DINMUN HETCHET DING KHAT CHU –

‘First world’, ‘Second World’, ‘Third World’ kiti hi ipi ham?

Jesu hungpen hin vannoi pumpi hi asekhen, Kum kisimdan jong akhelin, chihna le themna jong akhangtouvin, eiho jong hichan eiphahsah jengun ahi.

Jesu hin lhagao keu chonset a kona alha-ong ahipoi, tahsa jong genthei, mitmona le michotpha a umho jong ei lha onguva, khantouna eipeh’u ahi.

Jesu chu penna gam chu Palestine, Asia gama ahi. Hinla, Kipana thupha (Christian) hung machal patna hi Europe gam ahi. Abanin, America ahin, chujouva bou Africa, Asia le adang ahung hi.

Hijeh achu, ‘Europe’gam hi ‘First World’ akitin, ‘America’ hi second world ahin, Asia le adang se hi ‘Third World’ kiti ahi. Eiho jong ‘Third Word’ a um ihiuve.

Hitia, ‘Third World’ kiti hoa hi migenthei 60-80%, BPL sangtah cheh ahi.

India sunga tribal tahbeh hinkho manga dimset ahi. Hiche ho lah deh ahi Pathen thu hi lut’a ahi. Amaho koma tahsa thenna ipi naseithei ding ham?

Pathen thu hi hoilaimuna jong manthei, adih hijing ahi. Mannatheilou mun uma kiseise chu Pathen thudih lhinglou ahi. Eima nopnop hisahthei ahipoi.

VELVETVA :

1. Tahsante jouse hi ‘Hinkho theng’ mangdia kou ihiu ihetaove.

2. Hiche ho lah’a Diabol natohdan jong iheuve.

3. Mimasa hinkhoa Adam le Eve, Cain le Abel, le adang ho hinkhoa jong ana hat mong ahitai.

4. Jesu vang ajoupoi. seijui khat ‘Judas’ chunga Diabol hatna achang e.

5. HB kipattilin nasatah in Diabol ahat in, thuhil-dihlou tampi aumin, tugeiyin asohdoh jinge.

6. Tua hinkhoa jong atong jinge. Insungmi, HB lah, tohkhompi, gol le paite lah hoa mi jong amanchah thei jing ahi.

7. HB sunga chohchi bol, kiseiset, kidemto, mi-tilkhou sanga mi lhahdahna ding bol, lamkai dehna, lamkai kichuna, sum le paiya dihlouna,

8. Tolom : Leiset ahina laiyin, neh le don, sil le chen, che le vana, chule, chalohna jousea sum le thil angaiye. HB hinkhomn, tohkhomna ahi sumbeiya hitheilou ahi.

9. Toh nomlouna neiya chu Diabol lhep lhah a um, HB khantousah dia apansah nomlou ahi.

10. Sum le pai mandan dihlou, angai behseh louva HB sum man hi lheplhah channa ahi.

11. HB sum manthem, mandih angaiye. Tahsa le lhagaova mimal hinkho phat ding le kitup ding

12. Kotpia lut achun athei sunin na atongin ato theichan atohji e.Toding le toh ding nomlouva chu Kelkot a lut hilouva, kot dihlouva lut, agumang ding le athat dinga hung bou ahi. Kotpi in lut cheh ute.

13. Kivaihopna dihlou, kithuneisah, asanga len jalou, asanga neo munem le chotphana.

14. Insung kitolouna, jicha, pacha, nucha, tehpi le tehpu kitoh lou, guhchat, lahchat, thaset, kitim themlou, chonchatvai, lamdihlouva nei le gou khol, le adang sei joulou adime.

15. Nupa, golcha, tohkhompi, HB lamkai lah a kiginmoto hi Diabol gal manchah lenpen khat ahi. Kitahsanto angaiye.

LHEPNA PELDOH DING HAM

1. Mimal Hinkho : Mimal le eima insung hinkhoa lhepna jona theina -

Christa kisanna hinkho thah, hikho theng man ding. Hichu, Lhagao Theng panpi channa, chonset peldoh’a hinkho theng mantheina ahi.Pathen tahsanna dettah neiya, Bible sim jing ding, tao jing jeng ding ahi.Insung maicham sem jing ding, tahsante lah HB a pan jing ding ahi. Tahsan mite pankhomna hi setna tamtah peldohna ahi.Tokhom, tohkhomna a pan jing ding. Itheisuna (othei chana) pan ding.e). Midang ngailut ding, changchu, neipap-kiloset, tangthip bollou ding.

2. Mipi hinkhomna (Corporate life) :

Jesu Christa’n HB aphudohna chu tahsante pankhomna ding, tahsaanna a akhantou khona diu, Pathen Lenggam machalsahna dinga atundoh ahi. HB hinkho kitup tah a umte chun mimal hinkho jong ‘tahsanna det, Pakaiya kipana hinkho theng amang thei jeng e. HB kikaivop le kivaipoh chatvaina a umte chu Christian kitup ahithei jipoi. Hijeh achu, HB lamkai hon HB kivaipoh, kivaihop, Houkhom dan, Sunday School le adang ho mimal tin tahsanna hinkhoa akhantou teiteina dia semtup le lamkai ding ahi –

a). Christa le aseijuite tohban tong ding, Kipana Thupha mitin hildia nnganse ahibanga bol ding . HB member alen le aneo hilthem a Christa seijuiya sem ding, Thupha hilthem thei sosah ding.

b). Pathen houkhomna Houin kai hi ja-umtah bol ding, mipin lung kitoh tah a Pathen vahchoina La sahkhom ding, tokhomna umding, tao khomna umtei ding; adeh a Pathen thuhing phatecha HB miten phatchompina aneitei diuva seidohna umtei ding. Min khatvei Houin ahung kaina achu ‘Pathen thu het be aneiteiding a seiding’. Pathen in mihem hi Ama vahchoi dia asem ahi jala mipin Vahchoina La kitoh tah a sahkhomna khatvei beh umtei ding.

c). Pastor Care kiti hi ‘Pastor, HB Upa, Deacon le lamkai’ dang keu bolding ahipoi. Christian jouse bolding ahi. Hichu, damlou le hahsa ho vilna, tao pehna, phatecha nei jing ding.

d). Counselling hi kichuhna neidom ‘Pastor’, HB Upa le adang in abol ding. Midang hon apanpi diu –

(i) Dammo, thikon, HIV/AIDS; suicide tendency, etc.

(II) chapang, khangdong, pilhing hihen, jinei, tehse hijongle lunggel boina nei ho

(III) Tahsan thudola boina le tilkhouna ngaicha ho ding

(iv) Nupa kinahna nei ho, kicheng ding, kichen thudola boina neiho

e). HB sung keo hilouva, tahsanlou gamdang le mun danga pan lah teitei ding. Hitia mission natonglou HB chu akhangtou ngaipoi. Ajehchu, Jesu Christa solna pipen ( the Great Commandment) ahi

f). HB dang hoto pankhomna, toh khomna neitei ding ahi. Hichu, khantouna, eima HB sung jong hung kitona le kitupna ahiji.

ACHAINA :

1.Achaina penin, vannoi mite, tahsanlou lah akona lhendoh, chate nahi kihet in.

2. Nalhendoh lona chu ‘vannoi mite sanga achombeh nahiya, hinkho chom beh – ‘hinkho theng’ mang dia koudoh nahi jong kihet in.

3.‘Hinkho theng’ chu namgma thahat le chihna themna, houna hoa naman joulou ding ahi kihet in

4.‘Hinkho theng’naman theina din “Jesu Christ hi tahsanin, na Huhhingpu le na hinkhoa vaihom din na Pakai din kisanin.

5.Chutile, Pathen in Lahagao Theng napeh ding ahi

6.Chuteng, Pathen Lahagao Theng chun ‘hinkhotheng’ Christa-to hinkhoma hinkho chu kipah tah le lolhing tah a namanpi ding,Diabol lhepna jouse najopeh jing ding ahi.

7. Chule, tua hinkho le ahung lhung ding hinkhoa jong tonsot a Pathen koma nachenpi ding ahi.

8.Kiging jing in umin. Athi jeng ding in kigo jingin. Thi abaitai. Tuhin thilechun, na lhagao Van-gam alutna dem?

9. Jesu Christ hi Huhhingpu le Pakai dia nakisan tah em? Na kisanlou lai-le tuhin taovin, kouvin, kisan in.

10. Pathen in panpi jing tauvin.

‘Lhalam kisuh-halna 2016. Songpijang CH. Church a Date 17.9.2016 jana kasei - Dn.L.K.Hengna.

Assam Rifles a Brigadier Viswasrao le aloihon jong ei hung kikhoppiuvin English in themchacha kathusei kaseipeh in, chule amaho het ding dehset in 'NAZARETH MANIFESTO' Luke 4:16-18 chomcha le the Great Commandment "Love your God, and 'Love your neighbour as you love yourself" thu jong themca kaseiyin, "when we truely love God and our neigbours, we will have peace with God, peace of mind and peace will prevail in our family, church, village, district, state, country and in the world. Lest there will never be true peace" tin jong kajop be in ahi.

Loupina Pa Pathen chang jing tahen.