Saturday, 5 September 2015

Pakaiya kingai jing mite chu suhling hoi hiponte”

(Ps.125:1-3; Mat.7:24-27).

Mitam tah-in eima dinga Pakai phatna hi akiseinom pon, midang dinga aphatna joh akiseinom joji-e. Midang dinga aphatna seisanga eima dinga aphatna seiding hi thupijo ahi. Hijehchun, hibanga nadinga Pakai phatna nahetdoh thei loule Pakai ngailutna Ama-a kingai jing ding chu thil hahsa ahi. Hinla nadinga Pakai phatna ho nageldoh theiya, naseinom jing thei le Ama-a kingai nahina phondohna ahi.
Mijouse dia Pakai phatna thuhi Bible sunga muntam tah-in akimui. Psalm sunpa David chun hitin aseiye - “Pakaiya kingai jingte chu Zion molsang bangin suhling hoi hiponte, Jerusalem khopi molsangin akolkhum bangin, tule tonsot in Pakaiyin Amite aumchah jinge. Migilou vin midih gamsunga vai ahom louhel ding ahi. ...” (Ps.125:1-3).

Zion molsang hi thupi tah le kidang tah chule minthang tah chu ahipoi. Hinla Jerusalem kisahdohna molkhat’a aumkhah jeh-in Bible thusim’a min neitah khat’in aumtai. David hin Mol thupina le akidanna ho aseidoh nom hilouvin, akisemtil’a pat’a det tah-a adin jing theina hi avet’a Pakaiya kingaite jong hitobanga adet ding dan’u het theina dia tekah banga aseina joh ahi.
Pakaiya kingaite chun lungkhamna le hahsatna him him toh pouvinte tina ding ima aum poi. Dou le gal melma tampi kidintepi ding umtei ding ahi. Pakaiya kingaite ding deh-a chu leiset’a lungkhamna ding tam dehset ding ahi. Hijehchun, Bible’a Pathen lhacha tamtah hinkho-a hahsatna hung lhung ho-a konin kihilna ding tampi ineiyui. David jeng jong Pakai dinga lhacha phatah le leng loupipen khat ahijeng vangin, ahinkho suboi ding tampi aumin, dou ding le sat ding gal tampi ahinkho lhung keiyin aneiye. Hinla Pakaiya kingai jing ahijeh in suhling hoi ahipon chule agal satna-a jong alosam ngaipoi. Hijehchun, ama dingin Pakai chu Pho le Lum chule Kulpin akisung jinge.
Jesu jong leiset’a alen laiyin dougal melma tamtah aneiye. Ajehchu athuhil hi Pathen’a kona adih chu ahin, maipha vetna umlou ahijeh-in adoudal atam’in, hiche athuhil doudal ho chu ama melma ahitauve. Hinla aman koima adouthuh pon, thutah hang tah-in achepin, tahsan det tah neiya Vannoi thutah-a joding thubou ahil’e.
Mat. 7:24-27 sunga hin Jesun tahsan det tah neiya Ama-a kingaite suhling hoi ahilou ding thu song chunga Insa toh tekah-in aseiye. “... ka thusei hiche hi ja-a bol’a chu milungthimpha song chunga in kisah to kitekah ding ahi,” ati (ch.24). Gon ajuh khum’a, vadung’in asoden’a, huipin amut vangin a Inbul (foundation) chu song chunga kiphut ahijeh-in ima atipoi tin Jesun mite thu anahil’e. Hinla athusei ja-a jop louho chu nellei chunga Insa to atekah-in, gon ajuh khum’a vadung’in asoden’a, huipin amut teng melse tah-a alhuh ding jong aseiye. Jesu thuhil’a hetdoh ding chu Ama-a kisadoh-a jungkho lou jouse chu lhulhop’a mangthah ding, koihile Ama-a kingaiya det tah-a kisadoh jouse Zion molsang banga suhling hoi hilou ding ahi.
Tulaiyin leiset’a nitin thusoh le thilsoh ho chule  khantouna thil hohin nasatah-in tahsa le lhagao hinkho asuboi lheh jeng tai. Pakaiya kingai jing lou mite dingin manthahna ding atam’e. In kisa asuse ding go, vadung twisoh chule huipi kiti jouse hi tahsan suse thei, suboi thei phat tin’a hung lhung jing ho seina-a gel ding ahi. Thil chu asoding banga soh ding mong ahi. Soh jongle aboina aum poi. Aboipen chu song chunga Insa nahim ahiloule nellei chunga Insa nahim gel le ngaito ding pen ahi. Song chunga Insa nahile ima boina umpon te. Amavang nellei chunga insa nahikhah leh vangset umtah hiding ahi. Song chunga Insa jouse chu Ama-a kingai jing ho ahin, suhling hoi hipon te.

No comments:

Post a Comment