PAKAIYA KINGAI JING MIPA

Changlhen : Gen. 7:1; Job 1:1-5

          Mipate dia hetding. Gollhang ho dia mipapha hunghi theina dia hetding. Minu dia mipa pha het a jipa mipa pha sona dia hetding. Nungah in itobaang gollhang chu mipa pha hung hithei ham hetding, chule, nungah in jong agoldei lai gollhang chu iti mipa pha ahung hitheina dia pan lahding ham hetna dia pha. Tao pumin simin.

Bible sunga mipa lolhing ho lah-a Noah le Job hi adeh-a Christian insunga mipate vetkah thei tah ahiuve. Mipa lolhing hitheina hi nopna hinkho keovin akichen thei pon, hahsatna hinkho hoa konin akihechen thei joi. Noah ahin, Job ahin ahinkho lhon’a lunglhahna thei le Pathen tahsan jou louna thei khop hahsatna le patepna atoda lhon poi.

          Noah nikholai hin leiset chunga mihem hohi Pathen mitmun khatcha jong chonpha aum pouve. Pakaiyin Noah jah-a, “Hiche khanga midih nang bou kamui ...” ati. Hijehchun, mihem asem ho chunga chun Pathen akisih behseh jengin mihem ho chu leiset chunga kona suhgam dingin akitep tai. Hinla Noah vang Pakaiya kingai jing midih tah ahijeh-in, achunga Pakai alunglhai jinge (Gen. 5:8).

          Pakaiya kingaite chu Aman akhoto jingin, akiheina ding lamlhah akomu jinge. Twisang alet teng ama le a-insung mite akihuhhing nadiuvin Kong suidin thu apei. Kong akisui jou phat’in a-insung mite toh Kong sunga lut dingin Pakaiyin thu apei (7:1). Noah Kong sunga alut phat’in Pakaiyin Kong kot akhah tai (7:16). Twisang let akichai phat’in aji achate chule amoute toh Kong sunga kona potdoh din Pakaiyin thu apei (8:15). Noah hi Pathenin itilom’a agelkhoh hitam ! Agelkhohna jeh pentah hi Ama (Pathen) a kingai jing ahijeh ahi.

          Pakai khotona achan jal’in Noah dingin lungkhamna ding aumpoi. Pakaiya kingai jing le Athupeh-a chon ahijeh-in, Noah dingin kisuhmona le lolhin lelna ding aumpoi. Mimasa Adam le Eve koma asei pipen chu - “Chiphan pung lhonin ...” (1:28) tihi ahi. Noah khanga mihemte pundan vang Pathen deilam le Athupeh toh akitoh tapoi. Chonchatvai jeh-a mihem hi leiset chunga chuti pun jeng ahiuve. Hijeh-a chu mihem sim joulou lah-a Noah le a-insung mite hi chi-kaiso dinga muchi nget lah-a kona muchi pha kilheng chil banga kilheng doh ahiuve. “... na insung mite toh Kong sunga lut tan,” (7:1).

          Job hi Uz gam’a cheng, incheng thei tah, gancha ajat jat le soh le kol tampi vuljou ahin, achenna gamsunga mi minthang pen ahi. Hitobanga aminthanna le ahaosatna ho jouse hi Pakaiya kingai jing ahina jal ahi.

          Jingkah seh le achate dinga chonset thupha choiya Pathen henga kilhaina sem jing jeng chu Job hi ahi. Christian insunga pate dinga vetkah thei tah ahi. Aman hitobang hin aji achate titah louvin jong asohte chule aganchate jouse ngailutna neitah-in avesui jouve. Nop lai hinkho aman sung seh seh-a Pakaiya kingai hilouvin, hahsatna le vangsetna hinkhon ahin phah phat’in jong lhadah deh louvin Pakaiya akingai jou jinge. Job hi Pakaiya kingai jou mipa ahi muchet theina chu lungdon khoisat laitah-a Pathen kom’a ataona hi ahi. “Sagoh keova peng kahin, sagoh keova kathi ding ahi. Pakaiyin eipeh ahin, Aman akilah kit ahitai. Nunnom hen Pakai min !” (1:21).

          Tulai Christian insunga mipa tamtah hi hinkho nopsah jeh-a Pathen hephalou, agenthei jeh-a Pathen doumah thu tampi seiya hinkho akaleh leh-a mang atam’e. Noah le Job vang nop lai nikho le hahsat nikho-a ahinkho man dan’u ivet leh demna ding ima aumpoi. Mihem jouse Pathenin eitenau kibang cheh ahi. Nopna le hahsatna mun’a hi Pathenin eite jingu ahin, Noah le Job bang hin kisonpi theiyin eimuna diuvem ? Noah ason jou jeh-a kum jakhat val Kong sui dinga asol ahi. Tunia thil kibol, jing nikhoa mujeng ding tup eihon vang lung kidejou ponte. Chutobangma chun Pathenin Job jong akisonpi jouve. Satan kom’a Pakaiyin, “Kalhacha Job chu namum ? Ama banga kitah le pha leiset chunga midang aumpoi. Aman chibai eiboh jingin, thilse pou pou bol louhel ahi,” ati (Job 1:8).

          Pakaiya kingai jing mipa chu achate din monpi aum’e. Phat jousea pa hina-a vaihom louva, akom leh aji achate dia gol le pai hina hinkho jong aman ding angaiye. Hitia umthei mipa vaipohna Insung chu tahsa le lhagao lam’in akhangtou jing theiye.

~~~