Pakaiya kingaite chun anatoh akipapi ding ahi

(Gen. 2:8,15; Lk. 12:41-48) Hb La No.187.

          Genesis bung khat sunga Pathen natoh dan thu le anatohna chunga akipa thu imuve. Pathen hi umthim lou natong jing jeng Pathen ahi ti Juda miho koma Jesun aseina-a konin imuve. “Tuchan geiya hi kapan na atoh jing jeh-a ken jong katoh ahi,” (Jn. 5:17) ati.

          Semtil’a kona Pathenin mihem hi natong dinga agonsa mong ahi. “Pakai Pathenin mihempa chu aleibol ding le angah din Eden hon sunga akoi tai,” (2:15). Eden hon chu mihempa vetsui dinga asem ahin, hijeh-a chu alho houva angatup ding chu mihempa toh ding kin chu ahi. Aman na atoh banga Pathenin mihem jong natong dinga asem ahi. Hijehchun, mihem koihile natong louva um chun Pathenin asemlo asuhmil ahi. Pathenin anatoh athilbol akipapi-a, alunglhai banga koihile natong nom jing ho adamtheiyin, lungsunga kipana jong aneiye.

          Mitam tah-in alhangpin loubol le le hi natoh-in gel’in te. Hinla loubol tilouvin jong gamlah thingnoi ahin ding banga umsah theina dia natoh (afforestation) chule honlou bol (horticulture) hiche ho jong hi natoh pipen khat ahi. Mihem khat chun gunchu tah le thanom tah-a na atoh hi Pathen natoh apankhom pina ahi. Koi tobang natoh jeh-a kipah theilou aumle alungput dihlou jeh hinte. Mimasa Adam le Eve keo hilouvin Cain in jong louna atonge (4:2). Semtil’a kona mihem le natoh hi kikhen theilou ahi ti akimui.

          Natoh jeh-a hi mihem Inchen chule neh le don’a khangtouva, adih-a Pathen houtheina jong anei ahi. Mahatma Gandhi chun - “Natoh hi Hou ahi” (Work is worship) anati. Neh le chah muna ding le le-a na toh ding hilouvin, damtheina ding le lunggel kipana dinga na toh ding ahi. Min ama tohga akineh le akipah-in, mi tohga aneh teng kipana aumthei poi. Natong louho sangin natong hat ho akipah jouve.

          Vahchoi labolpa chun -

              Chen lang tongin toh phat ahi,

              Na lungsung kipasah-in lang,

              Pakaiyin napachat ding chu

              gel’in thanom’in na tongin.

              Kipah-in natoh kipapin,

              tohgim chu olna nom ahi. Hitihin la anabol’in, natong dinga kitilna ahi. Lhagao lam’a tohga sona din jong tahsa tah-a tohgim angaiye.

          Luke 12:41-48 sunga hin Pakaiyin soh kitah natong nom le soh kitah lou natong nomlou thu tekah-a asei imuve. Soh kitah chun phat jousea na atoh jeh-in apu chu itih phat’in hung jongle anatoh pet atokhah ding ahi ti imuve. Soh kitah lou, thase, natong nomloupa vang chu apun amupet le bou toh ding, apun amulou teng hinkho nop nop’a kiman chatvai ding lunggel aneijeh-in tong louva aumpet apun atohkhai. Hitobang soh kitah lou, natong nomloupa chu houset changa chule achungthu kitanpeh ding ahi.

          Ibon chauva eiho jong Pakai soh ihicheh-ui. Ahung kahsea natong dinga nganse ihiuve. Mi abang hi soh kitah natong nompa tobang kium’in tin, abang hi soh kitah lou natong nomloupa tobang kitam’in te. Pakai inganau hinkho-a hi tahsa tah-a ijokham cheh-uva pontho tah le gunchu tah-a na itoh diu ahi. Paul’in Ephesus mite henga hitin aseiye. “Gucha chu gucha kit tahih hen, chusangin alhasam ato theina din akhut tah-in napha tonggim hen,”  (Eph. 4:28) ati.

          Pakai inga jingnau hinkho hi natoh to akitomona ima aumpoi. Inga jingu Pakai ahung geisang tai tijeh ham ahiloule ahung ding phat hetchet lou jeh ham’in natong louvin moh um leuhen soh kitah lou, natong nomloupa chutoh ibah diu ahi. Pakaiyin alungdeiya chon ihi ihilouvu eitenau sangpen chu natoh le toh lou thu hiding ahi. Aman toh ding tamtah einganse houhi kam’a seiya kichai thei ahipon, toh ngaijoh ahi. Houbung, Synod, khosung kivaipohna jong committee atam man’a machal ding le khangtou ding ahipoi. Natoh tam le natoh hat jal’a joh machalna le khantouna umding ahi.

          Mijouse anatoh athilbol’a Pathenin tena anei ahi ti sumil poute. Zac Poonen (lekhasun khat) in Jesu twiya baptize achan nikho-a apa Pathenin, “Ama hi kachapa deitah ahin, achunga kalung alhai tangeiye,” (Mat. 3:17) tia aseihi atena-a alhin jeh ahi ati. Atena mun chu - achenna Insung le nitin’a apa koma thingthem na atohna mun ahi tin aseiye. Thilmah kidang abol jeh le thu kidang dang asei jeh ahipoi, ajehchu baptize achanni geihin Kipana Thupha lhangsap na Jesun atong pan hih laiye. Hoilai mun hijongle napha itoh hou jal’a nikhat Pakaiyin, “Sohpha tahsan um” eiti diu ahijeh-in mihem pachat holna hilouvin Pathen pachat thei ding joh-in inatoh cheh-u kipapiu tin na tong’u hite.

 ~~~