Pakaiya kingaite chun heng le kom angailut ding ahi

(Lev. 19:18; Lk. 10:25-37)

          Pathenin Mose, Israelte seipeh dia thu apeh ho lah-a hin, “... nang na kingailut bangin naheng nakom ngailun,” (Lev. 19:18) tia kisei imuve. Eima ikingailut bang tah-a heng le kom ngailut ding hi Pathen dei ahi. Thuchih tamtah aseina lah-a hin Solomon lengpan heng le kom khohsah ding thu hiti hin anaseiye. “... genthei hesoh teng jongle nahu din nasopi mong hol dan; gamla tah-a cheng nasopipa sangin nakoma naheng nakom’in kithopi thei jon nate,” (Prov. 27:10). ati.

          Israel mi pasal’a peng taphot adeh-a Danthu themho chun phatseh-a nangma nakingailut bangin naheng nakom ngailun tihi avel vel’a asei jing jiu ahi. Danthu thempa, Jesu koma chepa jong hin koima hil ngailouva hiche thu hi alunggil sunga akivop jing ahi. Jesun “Danthu-a ipi kisun nasim doh em ?” tia adoh chun man-gang tah-in, “nangma na kingailut bangin naheng nakom nangailut ding ahi” tin adonbut’e. Adonbut hi adih jeh-in Jesun apahchan, asei banga abol din ahil’e. Kam sunga sei keo hilouva atah-a heng le kom ngailut ding ahi ti Jesu seina-a konin imuve.

          Pi le Pute phat lai chun insah inlhang khohsahna hi analen’e. Khosung mijouse apeh theilou jongle neh le don thu ham ahiloule thil dang ipi thil hijongle a-insah a-inlhang asumil jipouve. Tulaiyin vang insah inlhang kikhoh sahna hi alhom lheh tai. Kikhohsah malah-in insah inlhang, heng le kom toh kilungdou tampi akium tai. Hinla Solomon lengpan asei bangin insungmi kinaipi ale le sangin insah inlhanga chenkhompi chu hahsatni hihen nopni hijongle idinga lam jousea pang thei pen ahi.

          Danthu thempa hin akam sunga heng le kom ngailut ding anasei jing vangin aheng akom chu koi ahi ahepoi. Ahet lou jeh-in Jesu koma, “Kaheng kakom chu koipen ham ?” tin adong’e (Lk. 10:29). Aheng akom chu koiham ahetdoh theina dia Samaria miphapa thu hi thulem’a aseipeh ahi. Hiche thusim’a kon hin heng le kom chu koi tobang ham kicheh tah-in akimu theiye.

          Tulaiyin khosung khat’a ichenkhom nauva insah inlhang kah-a kitomona le kihet themto louna apung cheh cheh jeng tai. Insahpa inlhangpa lungmonpi-a hi kilhom lheh inte. Insah inlhang kah-a kiginmo tona hohin insung tamtah eisuboi lheh jeng tauve. Insah inlhang kitomona ho jeh-a Houin sunga kipah-a Pathen vahchoi theilou jong kium’in te. Ase jouse insah inlhang ngoh sanga eima jong insah inlhang dinga vetda um kihikha jeng’am gel dinga pha ahi.

          Kho chenna jousea hin heng le kom toh lungkitoh tah-in kicheng khom thei cheh leh khosung nomlheh inte. Jingkah nilhah-a insah inlhang thilpha thudol’a kivilto, kikholai lento hi chonna phatah ahi. Khosung khat’a cheng khom, insah inlhanga chenkhompi toh kiheto lou tamtah kium’in te. Ikom naiya insah inlhang khokhel’a khopam lam peh-a cheng khat insah inlhanga ganei jong um’inte. Hichu adihmo monge tina hilouvin, ikom naiya cheng insah inlhanga chenkhompi cheh chu heng le kom’in semthei leuhen khosung pumpi chu kikikaimat cheh theiyin tin, kilungsetna jong pungin te tina joh ahi.

          Jericho jon’a che kholjinpa hi Juda mi ahi. Toset atona mun’a amu masa chu Thempupa le Levi mipa ahiuve. Akinaipi a-insungmi ahivangun ani lhonin akilepdoh lhon tai. Anunung pen Samari mipa chu toset tohpa dinga chu thet um ahi. Hinla Samari mipa chun jat le nam thua velouvin khoto tah-in asasah-in, athisa bang chu achoh hingin ajendam’e. Mithum ho lah-a hi toset tohpa dinga chu Samari mipa chu aheng akom ahitai. Samari mipa thilpha bol banga hi Pakaiya kingaite jousen heng le kom dinga thilpha ibol’uva chule ingailut diu ahi.

~~~