Pakai ngahjing te athau semthah in um’in te

(Isa. 40:29-31;  2 Cor.4:16). Hb.La No. 361.

Bible sunga Muvanlai (Eagle) thuhi muntam tah-a akimui. Isaiah Themgao in jong hiche ganhing Muvanlai hi mangchan Pakai ngahjingte tha semthah ahiding thu seidohnan amang’e. Ajehchu eihon ihetchet chet lou vangun Muvanlai hi Pathen thilsem ganhing ho lah-a hinkho kidang tah nei ahi. Ahin sunga hi teh-a hatmo-a hung lhasamji, hitia hi vel tampi umji ahi. Hitia ahung teh-a alhahsam teng munthip khat’a touthip’a chomkhat jouteng atha hung kisemthah kitji-a ahi. Atha ahung kisem thah teng masanga ahatna bang bep bep hung hikit ji-a ahi. Hitobang hinkho nei ahi hi Isaiah Themgao hin ahetchet mong hinte ti tahsan aum’e.

Hiche Muvanlai banga hi Pakai tahsante jeng jong mihem hina-a phat khat khat chol le nan, hinkho-a lhahsamna phat hung lhungji ahi. Hijongle Pakaiya kinem’a Ama ngahjingte chu Muvanlai atha semthah ahibanga athau semthah-in um’inte. Goshen’a kona Canaan gam ajot’u chun Israel chate atamjo lamkah-a lhalhop’a ajotna gam lhung joulou aum’uve. Hinla Caleb le Joshua vang Pakaiya kinem’a Ama-a kingai jing ahijeh-un athau semthah-in aum’in Canaan gam alhung jou lhon’e.
Themgao Elijah thusima konin jong Pakai ngahjingte athau semthah ahidan imuve. Elijah hi Themgao kidang tah le hunei tah ahi thu Bible’a imuve. Ama jong ahat ngaiyin ahat jing deh poi. Phat khat lhahdahna le hatmonan ahin phai. Amaban’a toh ding tamtah Pakaiyin agonpeh molso pai ding ngaito talouva aphat achang louva thi jeng ding angaito thu imuve. Elijah in “Pakai kathohlel behseh jeng tai, kahinkho lan lang thi jeng tange !” tin ataove (I Kgs.19:4). Tulai tahsa-a lamkaiho le Houbung lhacha tamtah in amimal hinkho cheh-a thohlel, doulel thu akisei banga Elijah jong hin lhacha na atoh sunga thohlel tampi anei ding tahsan aum’e.
Thohlel tampi jeh-in thi ding nom jeng jongle Pakaiyin agonpeh molso ding tohban tamtah anei nalaiye. Gilkel dangchah thoh-a, thachol le lungkham’a thimil hel’a a-imutna konin atohban tongjom dingin Pakai Vantil’in athou khang’e (I Kgs. 19:5). Elijah chomlou kah a hitobang lom’a lhalhop jeng din akilom poi. Ajehchu Pakaiyin nasatah-in thahat apei ti akimui (I Kgs. 18:46). “Pakaiyin Elijah tha apen Ponsil konga akivei singin Jezreel geiyin Ahab sangin ana masai”. Elijah hinkho-a hin tahsan chate  jong lhasam thei, hatmo thei ahi ti akimui. Hinla hinkho-a lhahsamna hung lhung jongle Pakaiyin toh dinga einganse houhi Elijah thathah apeh-a atohmolso sah banga eitoh molso sah thou thou diu ahi. Mi toh ding chu aman akitoh ding, nang toh ding chu nangin nakitoh ding ahi. Elijah in agilkel, adangchah thu aseipoi, hinla Pakaiyin ahetpeh nai. Gilkel dangchah thoh pum’a atoh ding ho atoh bulhit joulou ding ahen, koima honsa hilou amavang muthei an tuitah aneh din apei (I Kgs. 19:6-7). Pathen hin Lhagao an jeng seh hilouvin tahsa an’in jong mihemte hi avah-e ti Bible’a akimui. (Exo. 16:15;17:6; Matt. 14:18-20; Jn. 21:12-13).
Changlhah aneh-a twi adon jouvin, Elijah atha semthah ahin, nisomli sunga Moltheng Sinai molsang gei ajot lhungna din thahat aneitai. (I Kgs. 19:8). Israel chate Canaan gam jon’a cheho jong Elijah avah bangin Manna leh twi neng tah-in apen avah-e. Eiho jouse Ama Lenggam machalna dia natonga eikoiyu ahijeh-in neh le don lhasam louvin eipe jing’ui. Akhatveina chun Elijah in an anen, adon’in a-ihmu kit’e. Hinla Pakaiyin avel’in athoukhang kit’e. Hitah chun akipatdoh in Pakaiyin anganse atohban molso din akondoh tai. Pakayin atha asemthah peh jal’in lhasam kit talouvin Van’a akaltou geiyin anatoh amolso tai.


~~~