Pakaiya kingaite chun dou lung aput lou ding ahi

(Lev. 19:17-18; Rom. 12:9-21)

          Melma ngaidam ding hi Jesu thuhil lah-a apipen khat ahi. Jesun melma ngaidam jouna aneiye. Ajehchu Ama lungsunga dou lungputna aumpoi. Aman dou lung aput lou banga Ama nungjuiten jong dou lung aput lou diu adeiye. Mihem koihile dou lungpu jing chu mito hinkhom ahah-e. Vannoiya hin dou lungput neihi mihem atamjo hinte. Mihemte lah-a hin mi kisuhmona ding le thina ding jeng ngaito-a kisalel jong um’in tin, midang demna thu seisei jeng jong tam’in te. Hijongle Pathen thu chun, “Min eidemna gel gel jing hi tijat umjo ahin, Pakaiya ikingai le hoidohna pha ahipen’e,” (Prov. 29:5) ati.

          Satya Sai Baba, Hinduten Pathen banga agel jengu ama hin anungjuite bol dinga asei pipen chu mi panpi jing ding (help ever), mi suhnat lou ding (hurt never), mijouse ngailut ding (love all), mijouse jen ding (serve all) hi ahi. Chujong leh French te thuchih khat chun hitin ati. Min na suhnatna thu chu neldi chunga sun’in lang, min na dinga thilpha abol thu chu marble song chunga sun’in ati. Mi tamtah in vang chuti chu hilouvin min eisuhnatna ho joh marble song chunga akisun’in, min idinga thilpha abol ho chu neldi chung joh-in akisun’e. Neldi chunga thu kisun chu mang loi tantin, marble song chunga kisun vang mang lou ding ahi. Dou lungpu jousen vang neldi chunga sut dingpa chu marble song chunga sun’in tin, marble song chunga sut dingpa chu neldi chunga sun’inte.

          Lev. 19:17-18 sunga hin Pakai Pathenin Ami Israelte koma, “Koimacha dou lungin vetdan, nakitomo lona chu seitoh thon, hitia chu ama jal’a nachonset lo louna din. Koima setna lethuh louvin, hot’in jong boljom dan, chuti sangin nang nakingailut bangin naheng nakom ngailun,” tin anaseiye. Dou lungpu ho-a kona kikangse ding hi Pakai thun adei ahi. Solomon lengpan thuchih hiti hin anaseiye. “Migiloute umchan thangse hih-in, kijolpi dingin jong geldan. Amahon kinah kibao ding bou adeiyui. Apaodoh chan’un mi lungnatna aseidoh jing’ui,” (Prov. 24:1-2).

          Rom. 12:9-21 sunga dou lungpu louhel’a khat le khat kideito kisato cheh-a umding thu eihil’ui. Eibolsete gaosap louva phatthei boh joh ding, khat le khat lung ngaito thakhat hiding chule kiletsah le kichihsah bol lou dingin eihil’uve. Kiletsah, kichihsah, midang ija selou, ama bol jeng apha le adih-a gelna neiho hi dou lungput neimi ahiuve. Mi lhahsamna le hatmona ho hetthem pehna lunggel nei mi chu mijouse toh ahing khom theiye. Mi hina hethem theilou ho koimacha to ahing khom thei poi. Igam sungu, inam sungu chule i-Houbung sunguva dou lungpu lou mi itam tengu kitona le kipumkhatna hung um tante.

          Jesu seijui somleni ho lah-a hin ahinau achom cheh ahi. Amaho lah-a hin Judas Iscariot hi dou lungpu hidin tahsan aum’e. Ajehchu aman a-Pakaipa thana din nasatah-in pan alan chule apedoh-in apangin, akhonnan ama le ama akikhailih-in tol athat tai. Judas Iscariot Jesu seijuiya akipeh lut him him jong hi imadang jeh hilouvin Rome sorkar dou ding agel jing laiya lamkai thei dinga ason jou jeh-a kipelut ahiding tahsan aum’e. Hinla Pakaiya kingai jingte chun hem le thal chule pumhat (force) mang louva gam alodiu thu Jesun ahil jon ahi. Kiphulah lou ding thudol’a Jesu thuhil - Min ingeiphe abeh leh langkhat jong dopeh ding thu hi Judas Iscariot ding deh-in ngai hahsante. Ajehchu ama hung vaikon lona chuto kitoh him him talou ahi. Jesu kisonpi-a akhoh jongle Rome sorkar chu ano-a nodoh tho jeng ding ham ahiloule lel le jo gel louva lunghan thangtom man’a dou jeng ding agel hinte.

          Hinla Judas Iscariot gel bang hilou, nang le kei gel bang jong hilou, kelngoi amul voupa anga hampoh louva aum jeng banga, Ama-a dou lungputna umlou, thutah le nunnem’a thina chan gei thua nungpa chu ahijoi. Britishte khut’a kona India ten chamlhat amuthei nau jong dou lungpu lou Pu Mahatma Gandhi lamkaina jeh ahi. Amabon Hindu Hou dan juikhat hija hitobang lungput dih Jesu gel bang agel thei le Pakaiya kingaite chun imalam jousea dou lungputna hi ineilou diuva lomtah ahi. Ajehchu Pakaiyin athuhilna-a “Milungneng ho anunnom’ui, amahon leiset alodiu ahi, ! (Mat. 5:5) ati  Dou lungpu umlouna-a thilsem ho ju le va ganhing ho longdel’in mihemte toh aleng khom theiye. Hitobang hinkho hi phat khat atah-a hung lhung din jong Pathen thun aseiye. Dou lungputna abei teng himolou ding mong ahi.

~~~