(2 Chro.
20:13-22; Acts 16:25-30)
Pho le Lum hi galvon lah-a manchah
ahi. Pho hi tuchan’in jong akimang jingin Lum vang hi tukhangin akimang tapoi.
Hoijoh ahin hiche galvon hi hem le thal’a kihoibitna-a kimang ahi. Hitobanga hi
koi hijongle Ama-a kingaite dinga chu Pakai hi Pho le Lum’a kisungji ahi.
I Sam. 19:9-10 sungin Saul’in
atengcha-a David bang toh kilden agon, hinla Pakai chu Pho le Lum’a akisun
jeh-in David ahoidoh-in, tengcha chu banga akiphut jenge ti akimui. David hin
hiche mun’a hin hem le thal’a kinanna ding imacha Lum le Pho aneipoi. Hinla a
Lum le Pho chu Pakai ahi. Hitobang hin David mun tamtah-a Pakaiyin Saul khut’a
konin ahuhdoh-in chule agalkonna chan’a jong ahuhdoh jinge.
Hiche tobang hin 2Chro. 20:1-30 sunga
hin Judah lengpa Jehoshaphat Pakaiyin kidang tah-a ahuhdohna thusim imuve.
Jehoshaphat lengpa dia kichat louthei ahipoi. Ajehchu, ama satdia leng thanei
cheh hung pang khom’a simsen lou sepai toh hungkon ahitauve. Ama ti, agamsunga
mipite ti abon’un atija sohkei jeng tauvin, hiche phat chun Van Pathen lam
sangin Jehoshaphat in, “... bolding kahe tapouve eipanpi diuva Nangbou kakat
cheh-u ahitai,” tin kineosah tah-in ataove.
Hitia panpi ngaiya atao jou hin Pakai
chu Jehoshaphat dingin Pho le Lum’in ahung kisung tai. Pakai Lhagaovin Levi
mipa Jahaziel chu ahin mangcha tai. Aman Pakai Lhagaovin ahetsah bangin thu
ahin seiyin, “... hiche gal hi Pakai sat ding ahin, nangho gal’in gel
dauvin,” (20:15). Hiche mun’a Pakaiyin Judahte dinga gal asat dan hi
thusim’a ana umkhalou galsat dan (war tactic) jatchom beh ahi ti akimui.
Themgaopa koma asei bangin lathem ho (choir) chun galsat dia hungkon sepaite
anga chun, “Vahchoiyun Pakai ! Alungset longlou ahi !” ti la asauve. Hiche alasah-u hin galkon
sepaite lungsunga meidoina apetai.
Alung sunguva meidoina anei keovu
hilouvin, mitphel doiya kibol bangin amit’u alamvaiyin, galsat dia konkhom
amaho le amaho akisatto tauve. Hiche laitah hi Pakaiya kingaite dinga Pho le
Lum’a Ama akisunna chu ahi. Pakai Amite dia Pho le Lum’a akisun ding chu thil
hahsa ahipoi. Hinla Ama Pho le Lum’a akisun theina dia chu songlel louhel’a
Jehoshaphat banga “nangbou kakat cheh-u ahitai” tithei ngaiya ahi. Pakai
chu nang le kei dinga, nampi ding le gamsung dinga Pho le Lum’a ahung kisun
teng kichat ding aumpoi.
Acts 16:25-30 sunga Philippi kho-a
Paul le Silas songkul ngapet’a thilsoh kidang tah thusim imuve. A ponsil lhon
aholhah peh-uva, mol’a tamtah vei avoh-uva, thupeh dungjuiya songkul dansung nung
lam peh-a akhochong lhon’a bul kituh-a kihen lhon ahi. Paul le Silas dinga
hiche mun’a kona ondohna ding lampi him him aumpoi. Hinla thohgim genthei pum
hijongle lungthim sunga olmona beihel’in Pakai avahchoi lhon’e. Songkul sunga
vahchoi lasa hi leiset thusim’a seidin lhom lheh inte, um jong um ponte. Hinla
Pakaiya kingaite din vang hoilai mun hijongle taona mo vahchoi lasahna mo
aumpoi. Rome gam’a Christian masaho suh gentheiya aum laiyuva ataonau le
alasahnau mun chu leiko noilam ahi.
Hiche mun’a hin Paul le Silas din
Pakai chu Pho le Lum’in ahung kisungin bitkei chan huhdoh-in aum lhon’e. Pakai
thilbol hilou hileh songkul chim jeh-a sohchang dangho jong akisulem (injured)
tam’in tin chule athi amang jong umding ahi. Ling nasatah akiho-a In (Building)
achim teng akisulem, athi amang umteiji ahi. Paul le Silas jeng jong toset
tohmo ahilhon poi. Hinla Pakai Pho le Lum’a akisun jeh-in koima akisukha, athi
amang chule sohchang ajamdoh aum pouve. Chuti tah sangin songkul ngahpan jong
hinkho kikhelna aneilo tai. Songkul chu chimlha ahitan, sohchang jouse jamdoh
dia atahsan jeh-a achunga mona achuh ding tijat jeh-a kithat go-a ahi. Adeh-a
Paul le Silas hi alunga ahagel pen himaiyinte, ajehchu mona chungchon neiya
kihen lhon ahi. Ama ngaito bang hilouvin Paul’in, “... keiho kaum sohkei
nauve,” tin asam’e. Songkul ngahpa (Jailor) hin anoiya sohchang teni (Paul
le Silas) ‘Pu’ (Sir) tia akou jeng jonghi Pakaiyin alhachate mikiletsahte anga
achoisange ti imuve. Hiche thusim’a kon hin Pakai chu Ama-a kingaite Pho le
Lum’in akisunge ti imu theiyuve.
~~~
No comments:
Post a Comment