Tuesday, 8 September 2015

Pakaiya kingai jing minu


(I Sam.1:27-28; Isa. 49:15a).

          Vannoi leiset’a mihem jousen angaichat ho lah-a ngaichat lenpen chu ‘nu’pha ahi. Nu pha neikha ho chu leiset chunga mivangpha ahiuve. Leiset’a nu tamtah um jongle nupha vang lhomcha bou ahi. Bible jenga jong nupha simdoh thei lhomcha bou ahi.
          America gam’a thusei minthang tah D.L. Moody chun - “Vannoi leiset’a hin mijousen keinu tobang hi neicheh leh songkul (jail) hi semkhoh ngai ponte”, anati. D.L.Moody banga anu phatna phongdoh chu - St. Augustine, Charles Wesley chule John Wesley ahiuve. Ama hohi Houbung mite ding le vannoi mihem ho dinga Song mantam tobang ahiuve. Thusei minthang, lekhasun them chule Pathen vahchoina la ngeitah tah (Houbung labu a isah hou) hin boldoh chu ama hohi ahiuve. Amaho hin ahinkhouva mihem jouse het thei ahung hinau le abol theina ho jouseu hi nu taona jal ahi tin aseidoh soh keiyui.

          Imtijungla Longchar, Ao numei lekha sunthem tah hin - “Every Mother is the diamond cutter” tin anaseiye.  Aman tekah banga aseihi “Nu jouse hi Songmantam at ahiuve” ati ahi. Songmantam hi joh thei thil lah-a amantam loipen ahi. Thilpha tah manlu pen hijongle alutna helou ho dinga chu Song mai mai  tobang bou ahi. Hinla Songmantam ahi heho chun apotheng seh-uva, A-at toh chet’uva alimsem tengu le amanlutna chu hung umdoh ahi. Hiche banga hi chate hinkho jong semtoh ngaiya ahin, asemtoh ding le asemtoh thei chu ‘Nu’ hi ahi tina-a hiche thuchih tobang hi lekhasun nu hin ana seidoh ahi.
          Pakaiya kingai jing nukhat chun chate hinkho asemdoh teiding ahi. Hannah kitinu jong hi numei lhasam tah khat hinte. Hinla Pakaiya kingai jing ahina jal’in hamphatna achang’e. Acha neilou jeh-in musit achang’in jum le jachat thoh-in mit hah ngamlou khop’in hinkho amang’e. Hinla Pakaiya akingaina alhakang deh poi. Hijehchun, khonung’in chapa khat ahingin, akipana jal’in ataona la, I Samuel bung 2:1-10 sunga imuve. Tehnung, voinunga ahin achapa Samuel chu Pakai dingin it louhel’in akatdoh jenge, “Pakai henga hiche naosen hi thum’a kahin, kathum chu eipetai. Hiche naosen hi Pakai dia kakatdoh ahitai. Ahinkho lhumkeiya  Pakaiya ding ahitai,” ati (I Sam.1:27-28).
          Pakaiya kingai jing Nu chun achate lungsunga muchi phalou atulut pehji poi, Achate thil dih louvin a-o jipon, akihuhpi jipoi. Nun acha alam louva a-o hi chate hinkho setna ahi. Nu chun acha chu tahsa le lhagaova amacham’a akipoh jouna dinga akhoukhah-a lampi ahil ding ahi. Pathen lam gelkhoh kisa Nu tamtah-in achate lah-a abilboh pen ham aveise pen ham chu Pathen’a din aphal doh-un, adamna pha, aching athem thei khat vang chu aphalnom poi. Hannah vang chun khatseh aneiyin Pakaiya din lungtheng sel’in it louhel’in akatdoh jenge. Hitia akipeh jouna ajeh hi Pakaiya akingai jou jeh ahi.
          Leiset hinkho chedol’in koima nomsa tah-a hinkho mang lhung ding aum poi. Hahsat, gentheina, nat le sat chule thina geiya toding umsa cheh ahi. Hitobang phat hung lhun nikho teng Pakaiya kingai jing minu hin chate le Pakaiya kingailou, ama hatna le chihna kisong, ahilou le a-u anao, a-inkote a kingai minu hin chate chu kikhe lheh ding ahi. Nu Pakaiya kingai jing chun chate Pakaiya kingaije ahil ding ahi. Min nu le pa ching tah, themtah chule hat tah nei jongle phat khat amaho-a kingai thei louna phat hung lhung ding ahi. Nun Pakaiya kingaije ahil themsa ho din olmona ding umta ponte. Phat le nikho hung lhun dol’a hahsatna le gentheina ho mun’a jong lhukam deh pouvinte.
          Pakaiya kingai jing minu chun - adamlai sangin athi nung teng a-umchan’in mihem ho koma thu ahasei joi (Acts 9:39). Lungdonna twipi chunga ol-heova kongtol dan achate ahil them’e. Lungdon khoisatna mun’a thoh-ol theina lampi achate ahil’e.
          Taona-a galsat minu (prayer warrior mother) chun Pakai dingin sepai hangsan tamtah chate hinkhoa asemdoh ding ahi. Bible’a nasatah-a nute panlahna akimui. Apanlah nauva vetkah thei le kihilna thei hinkho apodoh cheh-uve. Amaho pang lou hin mipate keo hin panla leh Pathen thu jong hi chamkim jou ponte.


~~~


No comments:

Post a Comment