(Num.
14:11-19; Jacob 5:7-11)
Gen. 6:9-22 sunga twisang ahung let’a
kihuhhingna dinga Noah in Kong asui thu imuve. Bible’a imu bangun Kong suina-a
hin kum jakhat lam asulut’e. Nikhat jankhat kah jenga jong lunglha jeng thei
eiho din vang gel hahsatah ahi. Kong asui sungin mi khang gilou achenkhompi ho
mitmu ding chun ngolhoi lheh-inte. Tot nopna le daithanga aum ding jong tahsan
aum’e. Leiset mihemte lah-a Noah banga thoh hatna neihi mi koima umponte.
Mihon ipi agel, ipi asei thun akisalel
pon, Pathenin Kong kisui dinga asolna chu atuhchah in thohhat tah-in Kong chu
asui jouve. Noah hin thoh hatna neihih leh mihem hinan losamna jong neida
ponte. Athohhatna jeh-in Pathenin atoh dinga agonpeh na lentah chu atong
molso-e.
Pathen thilgon ho tohdohna dingin tha le jung sen angaiyin, phat
suhmang angaiyin, thohhat angaiye. Eiho atamjon nalen itohdoh theilou nau ajeh
pen chu lunglhahna ineiloi jiuvin chule thoh hatna ineijou pouve. Imalam jousea
thilpha boldohna dingin thohhat angaiye. Num. 14:11-19 sunga Mose thohhatna thu
imuve. Doumah abol jeh-uva Israel chate chunga Pathen lunghanga natgol
lhutkhum’a thagam ding ati chun Pathen koma ngaidam thum’in amite din ataove.
Nang le ken vang Israel chate hi phat chomkhat jong kikaihoi thei ponte. Mose
vang chun kum sot tah thohhatna neiyin lungneng tah-in akaihoiye. Mose hinkho-a
konin Pakaiya kingaite chun thohhatna aneidiu ahi ti imudoh theiyuve. Nampi
lamkai hihen, Houbung lamkai hijongle Mose thohhatna hinkho-a hin kitilkhouna
ding tamtah aum’e.
Jacob 6:7-11 sunga thohhat ding
thudol’a lamchom chom’in muntin’a chehchao ho Pathen mite Jacob in tilkhouna
anei imuve. Amasa pen’in loubolmi thohhatna vetkah din aseiye. Loubolmi gapha
tah tah sodoh hohi thohhatna nei ahiuve
ti akihei. Louma-a kona ga tampi hung sohdoh hohi thohhatna ga ahicheh-e.
Loubol mipa thohhat banga hi koihile Pakaiya kingaite chun thohhatna aneiding
ahi.
Aban’in Themgaoho hesoh genthei le
thohhatna jouse vetkah-a juidin aseiye. Themgao koima hesoh genthei thoh lou
aumpoi. Bol thada umtah tah boldia akisol tengu jongle nop le da thu seilouvin
Pathen solna chu thohhat tah-in ajuiyuve. Thohhatna neilou Pathenin amanchah
ding thil hahsa ahi. Elisha hin thohhat tah-in Elijah nung ajuiyin kum tamtah alhachan
apange (2 Kgs. 3:11). Hichelai Bible changa hin “Elijah kithopi” tin akisun’e.
Bible bang khat’a “Elijah in khut asop teng twi sunpeh-a pang” tin akile-e.
Themgao khat lhacha-a pan chu thohhatna neilou din thil hahsa ahi. Elisha vang
hin thohhat tah-in kum tampi Elijah nung ajuiyin, akhonnan athil tup Elijah
thilbol theina chu achangin, ajatni-a phattheina akisan tha-in ahi (2 Kgs. 2:9,15).
Job hi Pathen jengin jong akisonpi jou
lhacha phatah ahi. Job Pathen mitvet’a alhinna hi khatna-a athoh hatna hi ahi.
Achunga patepna akoiyin, athohhat jeh-in Job in Satan amolphou sah-in Pathen
achoi-an’e. Bible’a Satan sumolphou jou mi lhomcha lah-a Job hi khat ahi. Natna
athohgim behseh jehchun Pathen samse tale Job thohhatna thu hi Jacob in
alekhathot’a hin phapoh ponte. Mihem thoh hoi hilou achate numei pasal melhoi
tah tah som achanna, asoh akol chule agancha jouse Chaldea miten kichepna-a
aneipeh-u, akhonna atahsa apum alonga aphahnat hi Job thohna chu ahi. Agolpha
cheh mili ho jong Job dingin adougal asoh gam tauve. Aban’in a-inneipi jengin
jong a-Pathen samse dingin a-inneipu Job chu asol tai. Hiche ho jouse hi Job
thohna chu ahi. Achunga thil hung lhung ding jouse thohhatna jal’in anang
jouvin achainan Pakaiyin ahinkho akiledoh sah kit’e. Hiche Job thohhatna thuhi
vetkah-a neidin Jacob in eihil’ui.
Ama-a kingaite chu Pakaiyin Job banga
Satan sumolphou dinga ei manchah nom cheh-u ahi. Hinla mi atamjo hi leiset
gouthil ngaichat jeh ham, chihna thepna del jeh ham ahiloule nat le sat chule
thi le man, vangset toset’a kona hoidohna ding mai maiya Ama-a kingai kihinte.
Hitobang hinkho-a hin eihon Satan isumolphou jouji pouve. Job thohna bang lom
hihih jongle thohna neocha cha ichung’uva hung lhung tale ipang jouna diuvem ?
~~~
No comments:
Post a Comment