Pakaiya kingaite gamsung vaipo-a pang diu ahi”

(Gen. 41:37-44; Deut. 28:13; Daniel 2:46-49)

          Pakaiya kingaite gamsung vaipo-a apan’u hi Bible’a muntam tah-a akimui. Gen. 37-50 sunga Joseph thusim imuve. Joseph hi Pakaiya det tah-a kingai mi ahi. Apa Jacob mitmu keo hilouvin Van Pathen mitmu-a jong Joseph hi nolna bei ahi.

          Asopiten ahotbol’un akhonnan Egypt gam’a sepai lamkai Potiphar henga soh-in ajoh mang tauve. Dihlou tah-in asopiten hotbol jongleu Pakai mitmu-a lunglhaina achan jing jeh-in Egypt gamsung pumpi-a vaipon lengpan apansah tai. Lengpa hi amin’in Egypt gamsung din lengvaipon pang jongle ama sangin thuneina le vaihomna jouse hi Joseph chunga akoi tai. Lengpan hitin Joseph jah-a - “Leng kahivangin, nang thulouva Egypt gamsung pumpin khutlha le kalson abol louhel diu ahi,” ati (Gen. 41:44).

          Deut. 28:13 sunga hin Pakai lhacha Mose’n Israel chate atilkhouna le ahilchahna thu imuve. Pakaiya kingaiya Athupeh anit’u leh - “... mi nungjui mai mai hilouva namtin vaipi lamkaiya na pansah diu ... ahi,” ati. Akiseipeh bang tah-in bulhing keiyin chonthei hih jongleu Pathen khotona jal’in Canaan gam alo-uva pat’in namdang jouse sangin loupina le minthanna aneiyun ahi. Namdang ho gin le ja achang’un, gamsung pumpi vetkah theiyin aumdoh tauve. Leng loupitah tah le thunei vaihom thei anam sung’uva akisep doh jing theiye.

          Daniel le aloi mithum hohi nampi chonset jeh-a Babylon lenggam sunga sohchang ahiuve. Hiche asohchan nau gamsunga hin adiu seiding koima aumpoi. Hinla Pakaiya det tah-a kingai ahijeh-un hiche Babylon gamsung jenga jong khotona sangpen achang’un ahi. Pakaiya kingai ahijeh-un mihem khotona sanga chungnung jo Pathen khotona achang’uve.

          Pakaiya kingaite chun gamsung alo keovu hilouvin vaipo-a jong pang diu ahi tihi Bible simmun kilheng ho-a konin jong imuchen theiyui. Joseph hi asopiten adeimouva soh-a ajoh mangu ahi. Hijongle Pakaiya kingai jing mi ahijeh-in Egypt gamsung pumpi vaipon apangin, thuneina le vaihomna ho jouse lengpan akhut’a akoi tai.

          Hitobang hin Daniel le aloite jong Babylon lenggam pumpi sunga thunei vaihom’in apang tauve. Babylon lengpa hin hiche Judah gollhang ho hinkho-a amudoh pen chu thina hihen, hinna hijongle det tah-a Pakaiya akingai jingu hi ahi.

          Babylon lengpa hin agamsung mite ama-a kingai ho sanga van le leiset sempa Pakaiya kingaiho achungnun johnau amuchet jeh-a sohchang mi Judah gollhang hohi achi anam mite sanga ason joh-a vaihomna mun sangpen mun’a abon chauva atousah ahi.

          Tukhanga jong koihile Pakai ginga Ama-a kingaite chu ichennau gamsung jenga jong hi vaihopna le thuneina mun chang ding ahi. Leng le lal toumun le le-a toupa bou chu vaihom thunei ahipon, ipi tohmun hijongle lamchom chom’a mun lona jouse hi vaihopna le thuneina mun ahicheh-e. Tu dinmun’in inam sungu ivet le vaihopna munsang tah tah-a tou jong ium tauve. Hinla thunei vaihomna mun’a tou mi abang khat’in atousahpa Pathen gelpha louva nehguh chahguh chule kiletsahna dimset pum’a hinkho mang jong um’in te. Inam sung’uva Pakaiya kingai jing atam chan’a Pathenin Nampi vang le phatthei aboh ding ahi. Joseph phatna le Pathen agin jeh-a gamsung tampin Egypt gam chu kel le chah laitah-a kihinsona aneiyu ahi.

          Inam sungu le gam sungin angaichat pen chu Joseph banga imalam jousea tahsan um Daniel le aloite banga Pathena det tah le hang tah-a thina hile hinna hile panla ngam mi ahi. Tutua vaihomna mun’a touho le khangthah tuban’a hung touna lai ding jousen Pakaiya kingai jing hinkho hi mangcheh leuhen ichi inam diuva Pathen phathei ichanna diu lampi phapen hinte.