Thursday, 3 September 2015

Pakai thupeh a chonten gamsung alodiu ahi

Chang lhen : Deut.28:1-14; Matt. 5:5; September 1,2015 Jan

          Gamsung loding thudol hi Pathenin anamlhen Israelte koma veltampi anasei peh-e. Aseipeh mai mai hilouvin Amite dia Pathen akitepna thujoh-in akilang’e. Gam jouse Ama semsa ahijeh-in alo ding jong aman adei deiya akoitoh ahi. Pathen thutep hi ivet le mihem hetman, chihman, thepman, haoman chule tam man’a gamsung hi lojeng thei ahipoi ti akimui. Gamsung lothei ding le lojing theina dingin umdan ding (Condition) tampi aum’e ti Bible’a akimui.

          Phat itih ham’a konin jat le nam kah-a kinehtona ahung khang len’in, ading kisei theilou le kisei joulou hodin dinmun hahsa jep jep ahung lhung tai. Eiho jong pu le pate hatlai nikho-a alalnau le avaihom nau gamsung muntam tah ilojou tapouve. Lokit theina din tunjong Nampi lamkai tamtah akisalel jing’uve.
          Kum chesa itih ham’a kon chun “Zalen Gam” thu jong ahung kisam phongin, la le thu tampi kithon Nampi chitin kolkimvel’a chengte hetthei dingin kholhang akisam sam jenge. Inam sung’uva lekha sunthem tamtah-in thusim lui tampi aphong doh-uvin, isim le lungnatna thei le kinepna thei tampi jong aumda poi.
          Thusim kidang tah Myanmar gamsunga Bongthing abah-a kona ajung hung kailha-a tol asuh teng Nampi kithodohna hung um’a, chenphasa gamsung kichenpha jou talou ho ilokit diu ahi tithu jong tulai hin aha kisei lheh-e. Hitobang thusoh le thilsoh hohi ivet leh gamsung loding tupna le delna ahipen’e. Israelte hihen, koi chi le nam hijongle tup le del pentah chu gamlo ding hi ahipen’e. Eiho Nam jong hichu mitin kisahlelna  pen ahitai. Ichenna jouseu igam bang’uva gel hi athusim’a seidin dih nante, hinla pumhat’a kinotona le kinehchinto phat ahung lhungtan tunia ilonau gamsung ho jong hi masang phat hung lhung dinga i-ahung tiding lungkham louthei ahipoi.
          Hetman louvin leiset khantouna hon muntin ahotling tan, eiho chenna gamsung jong ahin phatai. Khantouna amachal toh lhonin ngaichat deichat, apung jingin, du-amna le papsetna, thangthipna jong asang cheh cheh jeng tai. Mi nei le gou deichatna apungin alam louva mi thil le lo chunga kichem go atam tai. Khopi sung ho jong bohse paina ding jong ong talou khop’in ani nin kichuthon mun jouse lodim’in aum tai. Hitobang nitin thilsoh hohin nasatah-in eitongkha tauve. Iti panlah ding ham ti ngaito phat ahitai. Ole bol ding tomo-a hem le thal ipat diu ham ? Hitobang bol chu dih ponte. Pathen thun ipi aseiya iti chon ding eihil’um juiding chu thilkhoh le adih pen hiding ahi.
          Gamsung loding idel nauva hin David koma Pathen kitepna thuhi tunin ngaitou hitin veuhite, “Na chena chan’a kalhonpin, na nona lam lam’a na melmate kajopeh-e ... kamite Israelte dia munkhat kalhensa ahin, hikoma chu kachen sah diu, koiman bolse kit louhel dia cheng diu ahi ... mi pumhat ten adelkhum jingun, tu-a vang chutilou ding ahitai ...” (2 Sam.7:9-11) Jesun jong hitin aseiye - “Kicha hih-un honlhom ho, nangho na Pauvin lenggam napeh nom’ui,” (Lk.12:32).
          Tahsa hinlai khankho-a gam leiset chenpha jou jong chu lolhinna khat hinante. Hinla, leiset’a gam leiset loding keo ihipouvin, Pakaiya kingaiya Athupeh-a chonte chun tonsot gam jong ilo nah lai diu ahi. Hijehchun, amang thei gam leiset loding tupna jeh-in neipap kiloset bol louvin Pathen dei le Athupeh ipiham geldoh-u hitin gamsung loding del jou hite. Ajehchu, Pakai thupeh-a chonten bou gamsung alodiu ahi.


No comments:

Post a Comment