(Deut.
24:19-22; Lk. 18:22; 19:8)
Bible sunga hin vaicha genthei khoto
ding thuhi mun tamtah-a akimui. Nebuchadnezzar lengpan vaicha gentheite
akhotolou jeh-in alenggam’a konin del mangin aum’e (Dan. 4:27,33). Mihaosa,
ponsandup le tupat ponnem jeng sil’a niseh-a aning anop’a hinkho mangpa chun
vaicha genthei (Lazarus) akhotolou jeh-in athi nungin Damun’a achei (Lk.
16:19-24). Vaicha genthei khoto hi Pathen deilam ahi. Pathenin Nebuchadnezzar
jah-a, “... vaicha gentheite khoton. Chutile na phatthei joh ding ahi,”
(Dan. 4:27) ati. Pathenin ahilna ngaihen lang vaicha gentheite chu khotona
neileh alenggam’a konin kidelmang ponte. Vaicha genthei khotona neilou hi
Pathen douna ahi ti imuve.
Deut. 24:19-22 sunga hin chaga
gentheite khoto ding thu akiseiye. Hiche hi Pakai thupeh mong mong ahi ti imuve.
“... hijeh-a chu hiche thupeh hi kaseipeh nahiuve,” (24:22) Chang-at
teng chomkhel changphal nunglah kit lou ding, Olive ga jong lomoh chengse lokit
lou ding chule lengpiga jong lomoh vel lo kit lou din Israelte chu Pathenin thu
apei. Chomkhel changphal hihen chule Olive ga le lengpiga hijongle lomoh
chengse chu vaicha gentheite chan dinga Pathenin agonpeh ahi. Hiche ho jong
velel nalai chu aumle ama jong vaicha thei ahi.
Boaz kitipa hi Pakaiya kingai, vaicha
genthei khoto tah ahijeh-in Ruth alou laiya changphal chom’a akilo chun Boaz in
asohte koma, “Changphal alhuh lhuh-a kise jong dalhah peh-un, phoh hih-un.
Hiche keo hilouvin, changphal phalai lai jong dodoh peh-un, kichom sah tauvin,”
ati (Ruth. 2:15-16). Hitobang tah-a
vaicha genthei khoto themtah ahijeh-in Boaz hin ahinkho lhumkeiyin vang le
phatthei adongin ahi. Bible thusim’a panmun khohpen Jesu penna khanggui
kisutna-a jong ahung pange
(Lk. 3:32).
Mihem hina hi akibang poi. Phatthei
achan ho hongphal tah-a midang penom jing aum’in, amu sun itchah jeng aum’e.
Inei igou chunga chu thuneina kineicheh ahin, koima acham louvin kilahpeh thei
ponte. Hinla koi tobang hijongle it louhel’a Pathen phatthei achan sum le pai,
nei le gou hijongle hongphal tah-a homdoh nom jing chu hamphatna chang jing
ding ahi ti Jesu thuhil’a konin imuve. “Peuvin chutile nakipe diu ahi ...,” ati
(Lk. 6:38).
Lk. 18:18-30 sunga khangdong mihaopa
thusim imuve. Danthun toh dinga aseiho jouse bat beihel’a anit’a ajuisoh kei
thu Jesu koma aseiye. Dan thupeh atamjo ajui bukim hinante. Hinla hiche ho
lah-a akhohpen juilou khat aneiye ti Jesun ahei. Hichu anei chengse ajoh-a
vaichate apeh ding chu ahi. Danthu peh adang tamtah asuh bulhit hohi bolbai deh
ponte. Hinla abonchan asuh bulhit in aseiye. Hiche ho jouse bon asuh bulhit
thei le vaicha genthei anei agou apeh ding chu ipi kal’a hahsa deh lou dingin
akilang’e. Hinla mihaopa ding chun ahithei tapoi. Ajehchu, ama lungthim sunga
vaicha genthei khoto nomna aumpoi.
Pathen phattheina ichan hou neipap
kiloset jeh-a alam louva kikhol hohi kiphat chompi lou maithei ahi. Israel ten
gamthip’a nehpap jeh-a Manna alokhol hou chu anedeh pouve. Amon’in, athan’in
nehmo asoh gam hel’e (Exo. 16:20). Neipap kilosetna lunggel hin vaicha
gentheite khotona ding lungthim adal’a chule pehna ding khut chu atuh kit ji
ahi.
Jacob 5:1-6 sunga mihao gihsalna thu
imuve. Hao chu Pathenin adem ahipon, ahaosatna vaicha genthei khotona-a aman
nomlou jeh-a chu demna le gihsalna amujoh ahi. Pathen phattheina ichan houhi
phatah-a igel leh abang eima kikoi ding um’in tin, abang hopdoh dinga eipeh
umtei ding ahi. Aboncha phattheina eipeh jouse hi eima kikoi dinga eipeh hisoh
kei ponte. Hopdoh dinga eipeh, hopdoh louva ikoi khah-u aum jengle Israelte
Manna lokhel nehmo aso bang le Jacob in mihao ho nei le gou jouse lungin aneh
chai ding asei banga umthei ahi.
Vaicha genthei khoto ding hi Pakaiya
kingaite toh ding pipen khat ahi ti suhmil lou ding ahi. Khangdong mihaopa chun
khotona chu neihen, Jesun aseipeh bangin anei agou chengse chu joh henlang
vaicha genthei ho chu hoppeh le minunnom pen hijeng ding ahi.Hinla abol lou
jeh-in hao jongle mihao gentheipa chu ahitai. Pakai tena-a ilhin jouna diuvin
vaicha genthei khotona lungput neiyute.
~~~
No comments:
Post a Comment