Pakaiya kingaite chu chamna dei hiding ahi”

(Gen. 45:5-8, 24; Mat. 5:38-42)

          Joseph hinkho thusim hi ivet leh ama banga thoh jou ding koima kium ponte. Aman vang thilse bol asopite chu thilse-a lethuh louhel’in lungnem heovin thilphan alethuh jouve. Athilbol’a kon hin Joseph hi chamna dei le chamna lungput nei ahi ti akimudoh theiye. Ama Egypt gamsunga vaipo-a ana panga kelkhoh jeh-a akoma neh hol’a hung asopite chunga phulah ding chu ama dinga phat gomkom khat ahi. Hinla aman phulah sangin lungset le khoto tah-in neh le chah jong man beiyin ape nalaiye. Chamna dei mi ahijeh-a Egypt gamsunga hi Pathenin vaihomna mun’a hi atousah ahi.

          Akoma neh hol’a hung asopite chu achaina lam’in akihetsah tai. Asopipau Joseph  ahetdoh-uva asopite umding dan chu hahsa mong mong thou ding ahi. Kichat tijatna-a dimset diu, jachat le maimoh athoh diu, kel le chah thua alungkham nau sanga asopipau Joseph in athilse bol jeh-uva alethuh diu bou chu agel’u ahitai. Hinla Joseph in amaho gelbang  gel louvin ngaidam achan joi.

          Asopiten thil gilou achunga abol’uva apa Jacob toh asuhkhen’u hi Joseph in asopite bol’in asimpeh pon, chonset thilbol theina joh-in agel’in hijehchun ngaidam jouna aneiye. Hichelai tah hin tahsan chate jong apau Pathen toh chonsetnan Joseph toh apa akhen bangin eikhen jiuve ti imudoh theiyuve. A-angsunga asopite tija tah le lungkham tah-a aumpet tah-uva Joseph thusei hi amaho din iti lhamon aum tadem ! “Tun hikom’a neijoh mang jeh-un kiphatlam dauvin, themmo jong kichan dauvin ... datmo tah-a nangho hindoh sah dia Pathenin einasol masah mong mong ahi. Hijehchun eisol masa nangho nahi pouvin Pathen joh ahibouve ...” (Gen. 45:5,7,8).

          Vannoi leiset chunga chamna dei lim’a um’a, ahijala alung sunga chamna him him deilou mi atam’e. Hijeh hin ilah-uva chamna thu akisei sei vangin chamna tah tah chu aumthei poi. Chamna kadeiye ti sanga cham bol ding le cham lensah ding chu Pathen thu toh kitoh jo ahi. Cham lensahna dia galbol tamtah jong aumda poi. Hinla hitobanga chon ding chu Jesu Christan asei poi. Ngaidamna lungput neiya kona chamna hung umdoh ding bou ahi tihi Jesu thuhil ahijoi.

          Dr. John Parankimalil kiti pan “Inspirational stories for purposeful Living” ti lekhabu-a thusim chomcha cha 150 asut ho lah-a hin chamna dei bang lim’a um, chamna him him alung sunga umlou thusim khat asun’e. Hiche thusim’a kon hin hinkho kimuchet theina aum’e.

          Ahchal khat hi thingchung khat’a atouvin akhong jin ahile Sial khat hin akhon git ajan tha-a neh ding tin agahol tai. Amun alhun phat’in Sial pan agah vet leh Ahchalpa touna chu thingchung khat anahi. Thingleh-a akal theilou jeh-in Sial pan Ahchalpa atha theina din lungthim khat abol tai.

          Sial pan duhathuh tah-in Ahchalpa agah ven, kateiyo ! ipi kichat jeh-a thingleh dunga touva genthei tah-a um nahim ? Tulai thusoh helou lai nahim ? agah tileh, Ahchal pan ipi thusoh            hitaimo ? ati. Sial pan, leiset chunga chamna aleng tai. Keipi leh Kelngoinou jong nomtah-in alhakhom’un, Mengcha le Jucha hon jong kong khat’a Dut (milk) adon khom’un, Humpi le Sakhi ho jong kitoh del’in akichem khom tauve. Hijehchun, nang jong hung kum’in lang, masanga kinah kisaona ho jouse sumil hitin kichem khom hite tin Sial pan aseiye.

          Hinla Ahchal pan, Sial pan alungthim sunga ipi avop ahen, kate ! nasei chu aphalheh jengin, hinla ken jong thusoh thah khat kahei tin adonbut’e. Ipi thu hitaimo tia Sial pan adoh leh, gamleng ho thingleh-a konin kagah mun eini umna lam ahin jon’uve, nang toh kivop nom hiuvin te tin Ahchal pan adonbut’e. Sial pan Ahchalpa koma kakinona khat aum’e chetange atileh, Ahchal pan ipi iti hita chamna aleng tai nati hilou ham ? atileh Sial pan henge, hihih ding ham hijongle gamleng ho khun ahetman loulaiyu hinte, atin athi abongin alhaimang del tai.

          Hiche thusim chomcha-a kona imudoh diu chu vannoiya chamna thu sei jouse le chamna deiya kisei jouse lung sunga chamna aumdeh poi tihi ahi. Hinla Pakai ginga Ama-a kingaite vang chu Joseph banga chamna dei tahbeh hidiu ahi. Asopite Inlam’a akile kit’u chun ama jeh-a khat le khat ki-oimoto-a kinah lo thei ahiu ahen, hijehchun, Joseph in, “Lamdunga kinapa hih hel’uvin,” tin athulhah-e (45:24). Pakaiya kingaite chu chamna dei hiding ahiuve tihi Joseph hinkho-a imuchen’uve.

~~~