Pakaiya kingaite chu nun le khan’a theng ding ahi

(Deut. 23:12-14; I Pet. 1:15-16)

          Pathen hi atheng ahijeh-in Amite jong thenna hinkho mang din adeiye tihi Bible changlhen sunga konin imuve. Israel sepai galbol dia mun khat’a kititkhom ho chu amaho tahsa hihen aumnau camp sung chule aveltomu hijongle asuhtheng diuvin thupeh ahiuve. Jun le eh athah thang lou diu, kitup keicha leiya avuimang diuvin akiseipeh-uve.

          Leiset akhantou toh lhonin thenna lam’a khantouna jong asang lheh tai. Tulaiyin ichennau India sunga jong mi gamdang banga thenna lam’a khantou ding hi Sorkar tohgon pipen khat ahitai. Gamsung thenna lam’a masot theina din “Clean India Mission” jong gondoh-in aum tai. Mihem jouse thengseh-a umding, nehna donna, gena touna chule ivel itom thengseh-a koiding thuhi akilhangsap pipen khat ahi. Hiche thilgon lolhinna din sum le pai chule tha le jung tampi akisulut’e.

          Pathen houlou ho sanga Ama tahsante chu imalam jousea theng ding dol ahi. Ajehchu, thenna le Pathen hi kikhen theilou ahi. Thuchih khat’in, “Thenna hi Pathen bantah ahi” (cleanliness is next to godliness) tin aseiye. Israel sepai ngahmun’a umho koma chun, “Ngahmun thengsel’in koi jingun, ajehchu napanpi diu le melmate chunga gal josah dia na Pakai na Pathen’un ngahmun’a nachenpiu ahi. Pakaiyin nadalhah lona theiyu thil thenglou imacha bol dauvin,” tin akiseipeh-e (23:14). Hichea kon hin Amite chu nun le khan’a theng din Pathenin adeiye ti imuve. Then louna hinkho jeh-a Pathen toh kikhen thei ahi tijong imuve. Hijeh-a chu Ama-a kingaite chu nun le khan’a theng ding ahiuve.

          Kitepna Thah sunga jong thenna thudol hi mun tamtah-a akiseiye. Peter’in lhenchom Christiante henga alekhathot na-a jong nun le khan’a then ding thu aseiye, “... nakoupau athen bangin nangho jong nun le khan’in theng’un,” (I Pet. 1:15). Tahsante hinkho-a chu Ama thenna hinkho akhumpeh jeh-a imalam jousea nun le khan’a theng dinga ngeh ihiuve. Sinai molsanga Israelte Pathen toh kimuto dinga akigot’u chun Mose jah-a Pakaiyin, “Eihin nailut jep ding Thempuho jeng jong kisutheng masa diu ahi; achuti loule talen kamatsah diu ahi,” ati (Exo. 19:22).

          Tahsa nun le khan chule lunggel ngaitona keo hilouva lhagao hinkho-a jong thengsel’a Ama hou ding chu Pathen dei ahi. Judahte le Muslim hohin tahsa pumpi kisutheng masa louvin Pathen ahouji pouve. Hitobang hin hou dan dang danga jong tahsa pumpi kisuhthenga Pathen hou ding hi dan aum cheh-e. Koi hou dan’a jong Pathen hi atheng ahijeh-a koihile amahou ding jousen jong thenna hinkho aman ding tichu thupeh banga ajuicheh ahi. Hitobanga hi tahsa lam hihen Hou thudol hijongle thenna hinkho hi boipi pen chu ahijing jenge.

          Kipa umtah-in ikho cheh-uva Houin phatah tah isadoh thei tauve. A-In kisah dan loupi le loupi lou chu thupi pen ahipoi. Houin loupi pen le ahoipen sadoh jong leuhen ahina banga isuhtheng jou louvu le melse tah ahi. Mun bang khat’a Houin asung apo suhtheng lou, asunga um thil le lo ho don le daiya kineilou, Pulpit, touna ho, dokhang pon ho, sacrament kintheng bolna-a kimangji thil ho gelkhohna neilou Houbung tamtah ium nalaiyuve. Adeh-a Houbung lhacha hon amin’in chowkidar um jongle achung vum’a Pathen houna thudol’a mipite jouse thalhenga mopohna ineiyu hi suhmil louding ahi.

          Khosung, Houin sung chule insung thengsel’a ikoi diu hi imopohnau khat’a gelcheh ding ahi. Kholai dung thenna dinga atum’a mopo koima aumdeh poi. Khosunga cheng jouse mopohna ahi. Chule Pathen ihounau mun sangpen Houin jong thengsel le ima jouse kitupchit chet’a koitoh ding chu Houbung lhacha ho kin pipen ahi. Adeh-in thinglhang lam’a cheng Houbung miten mitmona tamtah inei nalaiyui. Houin asung apo suhthengna lam’a ilhasam lheh jeng nalaiyui. Khosung bang khat’a Houin chu khul’in achup jeng, asung jong gancha hon gena-a aneiyu, hapta lhung keiya theh khah lou, Houin kaiya chehon ama touna ding cheh akisuhtheng thu ding chule kikhop vaipo hon jong dokhang (table), chair akisuhtheng thu diuvin aum nalaiye. Hichan bep’a hi idin nah laiyu leh Pakaiya kingaite imalam jousea nun le khan’a theng ding ahi ti thupi hitoh ihinkhou kigamla lheh nalai ding ahi.

~~~