JESU PEN HI PATHEN THUTEP GUILHUNNA AHI

Semtilin Pathen in mihem chu Ama limlo le Ama hiina neiyin ana seme. Hichu, Pathen banga thenna le phatna nei tina ahi.

Hinla, Satan lheplhah in mihem chu ana umin, Pathen alona chu amangtai.

Mihem chu Satan thua anun phat achu Pathen lim lota louva, a pakai satan lima lo joh ahitai.

Hijehachu, Pathen in akoma kona mihem chu ana paidoh ahitai.

Hinla, mihem chu amachama hilouva satan in ana puiset a akipuimang ahi jehchun Pathen in, lunghang tajongle, mihem chu alungset e. Hijehchun, Ama lim alo kit a Ama kom ahinjot kitna ding lampi asemtai.

1.       PATHEN KITEPNA :

a). Adam le Eve jah din Gul (Satan) koma Pathen in thutep aneiyin aseiye, “Numeinu chilhah in nachilhah lu ajepchip ding ahi” ati. Hichu, satan thaneina jouva mihemte huhhing dinga Jesu (Messiah/Christa) hung ding atepna anahi.

b). Khang achepeh in, vannoiya mihem jouse achonsetan, Pathen tahsanna aumtapoi. Pathen tahsan khat ana umin, ama chu Abram ahi. Pathen in Abram chu michonsete lah akonin akoudoh in, aman jong akhelpeh in ‘Abraham’ (mijouse-pa) asahtai. Achilhah vana ahsi le leiya neldi jat hidin ateppeh  tai. Hichu, Jesu (Messiah/Christa) hung ding, anungjui (achilhah/Christian) simjoulou hiding atepna anahi.

c). Abraham ateppeh guilhunna din achilhahte namlen (Israel/Juda) in atungdoh in Lenggam le Leng loupe Leng David atungdoh tai. David koma Pathen akitep kit in, achilhah khat Leng loupe hung hiding, a Lenggam in kemtih neilou ding,khangtou jingding, tonsot a umjing dingin anaseiye. Hichu, Jesu (Messiah/Christa) hung ding, tonsot geiya Leng hiding aseina anahi.

2.       JESU PATHEN KITEPNA AHIDOL:

Jesu hi Pathen kitepna bulhinna ahitai. Ahidan kicheh tah a kimu ahi. Ajeh seiyute –

a). NUMEI CHILHAH AHINA :

Numei chilhah Jesu ahidan hi Matthew le Luke sut kipana thupha in akimutai. Anu Mary chun Joseph to akichen masang lhona Lhagao Theng akona avop ahi. Pasal panglouva, numei sunga hungpeng ahi. Hichu, pasal (Adam) panglouva Numeinu (Eve) chilhah ahina ahitai.

Hijehachu, Jesu chun chonset neilou hinkho amana satan lhepna ajoa, satan le athaneina (thina) jouva thoudoh kit ahitai. Hichu, satan ajona ahitai. Chuin, vana lahtouvin aumin, Pa jetlama touvin, lei le vana thunneina jouse Pa’n apetai. Hiche, thuneina chungnungpen chu mangcha a Ama tahsanjouse tonsot a hingdia thu apeh a, satan le Christa tahsanlou jouse vang tonsot a damuna umdia thu atan (thulhuhna asemsa) ahitai.

3.       JUDA NAM ATEPPED MESSIAH AHINA:

 Judate Pathen in ateppeh dol in jong adih chet e. Hichu, Pathen in Leng David guiya kona leng khat pengdia anatep peh ‘Messiah’ ahidol hi Matthew in aseiyin adihchet in ahi. Hitia chu, Judaten anga jingu Messiah (Christa) chu Jesu hi ahitai.

Matthew hin a lekhabu 1;1 “ABRAHAM chilhah DAVID guiya peng JESU CHRISTA khanggui thusim” in apanin, 1:17 “Hiti hin ABRAHAM a pat DAVID gei khang som le khang li ahin, David a pat Babylon lama gal-hinga akai mang geiyu chu khang som le khang li ma ahi kit’e; chule Babylon lama gal-hinga akai manguva pat MESSIAH pen gei chu khang som le li ahi” tin achaiye.

Judaten leiset leng hidia ana gel jeh un ana lamtokhel tauve. Ama Lenggam chu leiset lenggam ahipon, lhagaolenggam joh ahi. Leiset lenggam chu mangthah ding ahin, lhagao lenggam vang tonsot a ding ahi. Hichu, David koma akitepna “tonsot a manglouding” ati chu ahi. Hiche, tonsot Leng ahina chu, satan le athaneina (thina) jouva thoudoh kit a, vana lahtouva uma, Pa jet’a touva, lei le vana thunneina jouse neiya tonsot a vai ahop jing ding ahitai.

4.       MIJOUSE DING AHI ;

Jesu hi Judate Pathen in ateppeh ‘Missiah’ (Christa) chu ahitai ti seina in, Abraham akonin Joseph (Jesu nu Mary jipa) geiyin aseitoh e. Hiche hi, Judate (exclusive) kitep pilhinna kiseina ahi.

Luke sut kipana thupha hin Judate keu ding hilouva mijouse ding (inclusive) ahije asei kit in, Jesu khanggui hi Adam geiyin aseitoh e. Ajehchu, Adam le Eve chu mijouse Pa le nu ahilhone. Amani akona ‘Huhhingpu’ hungding kiteppeh “Numeinu chilhah” chu mijouse ding ahi.

Jesu chu lei mihem in ahung pengin, Pathen lenggam/ Vanna Lenggam thu ahilin, athi in athoukittai. Thinan ahenjoupoi. Satan in athat joupoi. Satan thaneina lenpen tahsa thina chun atuhden joupoi. Satan le athaneina ‘chonset’ le ‘tahsa thina’ chu jouvin, loupii tah in athoudoh kit in, Pa jet a touvin, lei le van chunga vai ahomtai.

Hiche thaneina chu mangcha a mijouse thu atan ding ahi. Ama tahsanna Huhhingpu le Pakai dia kisan jouse tonsot geiya Amato chengkhom dia apui ding, Ama tahsanlou jouse vang satan le tonsot a meidila umdia Jesu Christa’n meidila akoi ding ahitai.

Nang vang Jesu Christa hi na kisan tah ding kakineme. Ijemtia nakisan loulai jengle tuhin taovin, Ama kouvin kisanin.

Hitia, satan le athaneina akona ei huhhingpu’u PakaiJesu pen hetjingna le geldoh kitna dia kimangji CHRISTMAS  hi kipah le thanomin mangin. Chule, Ama thupha hi miten ahettheina din mangin.

Pathen in panpi jingtan.