LHEPNA TO HI KIPANA AHI

Amen! Ka hethemtai, Pakai ! Hetthemna neipeh jalin, namin kathangvah e!, Hethem cheh a mangcha thei din neipanpin, ka Pakaiyin.

Mihem din ‘Lhepna’ hi vangsetna le tokhel kitoh dana kigelna aumteiye.

Ahipoi.

Solchah Jacob in “Lhepna nato tengule kipanan-gel jouvin” (James/Jacob 1:2) na a asei hi hitihchan chu kana hethem poi.

Tu’n Pakaiyin eihiltai. Hiche hi ahi -

‘Lhepna’ kiti hi Satan thilbol, Christa tahsana juite, Christiante ajolna ahi.

Satan in acha, anungjui hochu alhemjipoi. Acha hilou, Pathen tahsana Christa nungjui, Satan lungdei bollouva Pathen dei bolnomji ho johchu alheplhah a alungdei abolsah gotji ahibouve.

Hijehchun, ‘Lhepna’ tohi Christian hi kihetna, Christa nungjui kihetna ahi.

 ‘Kitai-umtah’ ahijoi.

Lhepna natole, Pathen cha nahi kihetchetna ahijoi.

Velseiyute. Satan in nalhep-le, ‘apengthah, Christa a hinna nei, Lhagao hinkhothah nei’ nahi photchetna ahi.

Kipah in, Pathen vahchoiyin, “Amen, Pathen cha kahi kaki hetchet mong mongtai” tin.

Hijehachu, Pakai lhacha Solchah Jacob/James hin “Lhepna nato tengule kipanan-gel jouvin” (James/Jacob 1:2) ati ahi.

Hetding chu - Christian dihtah chun lhepna hi kijosah ding hilouva, joding joh ahi.

Hinla, eiho hatna a jothei vang ahipoi, ‘Lhepna-joupa, Jesu’ bel jing le koujing ngaiya ahi.

Aman, “Vannoiya hin hahsatna natoh’uve, hinla, lungmong tah in umun, Keiman vannoi kajoutai” (John 16:33) tia asei ahi.

Lhepna, Satan le athahatna jouse i-Pakaiyu Jesu Christa hin ajosa ahitai ti he inlang,lhepna nato tengle Ama (Jesu) kou jingin, taonan. Chutile, Aman najopehsa ahitai. Amin nakou keuva jong Satan chu jamjia ahitai ti he’in. Taona ‘Jesu’nakoukal Satan ajamtai ti he in. Nanai ngam tapoi. Gala konin nahin houhou theiyinate. Hinla, nanaingam tapoi ti he in.

Na lungin “Satan/ Lhepna kakoma konin jamdoh in, kei Jesu Christa lhatdamsa ‘Pathen cha’ kahitai” tin taonan Pathen thangvah jon.

Pathen in napanpi jing tahen.