TUNI IPI THUSO THAH UM EM?

Tuni thuso thah aum-le phone a eidong adimset in. Konkhat vang kakoma ahungun, phate mongmongin eidonguve.

Min thu hea eigel a, eiman kihechenlou hi pohgih hahsa tah ahi. “Kahechenpoi” iti jongle akiseipeh nomlou eibahsah jiuvin, hetchet nadin midang tampi phone bola doh-le angaijin, sum chena tampi avodohji.Hijehchun, mihon eisuhboi boi sanguva peldoh ding, ina thipbehcha umding akinom joji.

Pakai Jesu vang mihem in pohgih a igel houhi imacha pohgih in aneipoi. Ajehchu, Ama Pathen Chapa ahin, Pathen ahijeh in ijakai ahesoh in, ijakai aboltheiye.

Mihem hi lhasam le lhinglel akihin, Pathen vang chamkimsoh ahi.

Jesu’n eiho eingailut behseh jeh un lungdong le pohgih poa ium diu anompoi. I-pohgih jouseu ei ngaijang nom jinguve. Hijeh chun, Aman

“Tong gimte le pohgih pote kahenga hungun,Keiman choldo sah’unge! Ka namkoljon kilah’un pouvin, Keiya kihil’un, Keima lungnengtah le nunnemtah kahi, Keiya hinjouna nanei diu ahi. Ijeh-inem itile, kanamkoljon apoh nop in, kapoh jong ajang’e,”ati. (Matt 11:28-30)

Hiche asei hi tuni kageldoh in, keima ima kahilou,miho lunggimna jong panpi joulou kahi kakigel doh in, thu chu kadongle tai. Hichun, thu kichen kahet phat in, ka thuso bol, ‘press’ a peh jeng dia kakoisa chu asemkhel in thuthah chu kajihlut thhatai.

Pakai Jesu’n, hichea ‘tonggim’ ati le ‘pohgih’ atihi ‘lunggela kisahlel, boipi, boina nei, lungdon-lungjin,lunggentheina, nat le hahsatna, kichat-tijatna, tahsa le lhagaova hahsatna le gentheina’ jouse hohi aseina ahi.

Hijehchun, ipi pohgih nanei em?

Tunia ipi nato em? Ipi thuso um em? Na boi em? Ole nakipah em?

Naji, nacha, nagol le pai, natohna le nathilgonna ho le nat le hahsatna, tahsa le lhagaova boina le hahsatna nanei jeng em?

Jonin, taonan Jesu kouvin. Na pohgih jouse akoma seplhan. Aman naboina, na pohgih jouse nagelpeh din ngeh in. Ama tahsanin, Ama jenga kingaiyin, Aman nakhankho ding gelnante.

Tunia, na chunga kipana thuso aum teiding kaki neme. Tunia aumlou jongle, tua beh kipana thuso nanga aumna din Jesu belin.

Hitia nabol jouteng kipana thuso nanei jengle kei jong neihin hetsah lechun kipah lheh inge. Chutile, keiman jong nang mina Pathen ka thangvah ding ahi.

Pathen in panpi jing tan.