MOUPUI GOLVAHNA A JESU KIKOU HO AVANGPHAUVE

 ‘Moupui’ hi mijouse kipana ahi. Min anei jouse jong aseng nomji, adeh a ‘Nungah pha’ amukhah-le.

Jesu leiya alenlai chun, moupuina a kouvin ana ume.

Hinla, kipa val jeh in mitamtah in Pathen lungdei asumil leuvin, Jesu kou ding asumiljiuve. Jesu kou kha jouse avangpha jiuve.

Cana khoa Mou puipa chu avangpha ahi, Jesu ana kikou khah chu. Haosa lheh jongle mihem hin lhahsamna akinei teiye. Cana khoa Mou puite jong hi haosa tah hithei ahiuve. Achuti loule, Jesu le aseijuite jong kou ponte. Ajehchu, Jesu akou-le mihem tam ding chu hetsa ahi.

Hinla, haosa hen akigot loupe lheh jongle, alhasam ana um kha tai. Jesu akikou khah hi avangpha ahitai. Ajachatna ding Jesu’n ahuhdoh e. Lengpitui lhasam a jachat thohthei ahi chu, Jesu’n apanpi in Lengpitui tampi atopeh tai.

Athu hi sim tadiute, John 2: 1-11na a :

1. Nithum lhinin Galilee gama Cana khoa moupui golvah akibol’in, Jesu nu jong apange.

2. Jesu le aseijuite jong hiche moupui golvahnaa chun akouvui.

3. Lengpitwi alhahsam phat’un Jesu nun ajah a, “Lengpitwi anei tapouve,” atileh;

4. Jesun ajah a, “Numei, nang le Kei i-kin um am? Kaphat lhing loulai chu,” ati.

5. Anun lhacha ho jah a chun, “Najah-uva asei chan bol jengun,” ati.

6. Hikom chu Judate chonna ngaiya kisuh thengna ding tia songbel twi atena ni ham thum ham dol cheh bel gup kitung ahi.

7. Jesun ajah-uvah, “Bel ho chu twi sung dim’uvin,” ati. Amahon abelgei let cheh-in asung dim’ui.

8. Chujouvin Jesun ajah-uva, “Tun phabep thal’un lang golvah lamkaipa henga dom’un,” atileh; amahon adomtauve.

9. Golvah lamkaipan twisih lengpitwi kiso sah chu atep’in, hoiya kila ham, ti ahepon, twi hinthal’a hindom lhachahon vang ahenauve. Hijeh chun aman aji neipa chu akouvin,

10. ajah a, “Min lengpitwi chih ahom masan, mi achim tengleh akholam ahom boume, nangin tugeiyin lengpitwi chih nakoi nalaiye,” ati.

11. Jesun hiche hi Galilee gam Cana khoa melchihna abol patna ahin, aloupina aphongdoh tai; hijeh chun aseijuiten Ama atahsanlo tauve. (John 2:1-11)

John sei dungjui ahile, hiche ‘Cana’ khoa Moupuina a alhat hi japi kina lhat masah penloi hinte.

Hiche masang hin Jesu’n ‘thil kidang’ abol in akiseipoi. Hiche kina ‘Tui’ maimai ‘Lengpitui’ asosah hi ‘thil kidang’ abol masah pen in akihei.

Hinla, keima gel danin, Jesu hi ainuva, anu le apa umna a jong ‘thil kidang ana bolsa hinte’. Achutiloule, anu’n Lengpitui lhahsap thu seipeh ponte. Chule, lhacha ho koma “aseisei bol un” ati jeng hi, Anu Mary hin Jesu thil kidang bol thei ahetsa ahi tina ahi. Chule, anu thusei ngaisah le nit jing ahi ding jong katahsan e. Achutiloule, Jesu’n “Numei, nang le kei kin ipi um am?” ati jouva jong, anu Mary hin, athusei anitding ahet jeh a lhachate koma “asei sei bolun” ati hinte.

Hiche kasei lona hi, mtamtah in ama insung le ama umna Houbung mite lah a kin bolsangin midang le mundanga kin bolna aneimasa jin, hichu, ahiding mongin agele. Jesu vang anu-apa koma thilkidang jong ana bol masah hinte kati. Insung lhahsapna a jong pan analah hidin katahsane.  Achutiloule, anu hin song ponte kati.

Hijehchun, eiho jong eima insung le Houbung sunga thilpha bol masautin, hitheina inei hou jong sodoh masaute.

Anina in,  Jesu chu Pathen Chapa ahi. Mary chu mihem a ahungpenna ‘nu’ bou ahi. Hinla, Jesu’n anu thu phatah in anit e. “Kaphat lhing loulai chu” ati vangin, anu’n akineppi chu abol thou thouve. Ama nungjui ihinauva, mihem a nu le pa a ineihou thu nit ute.

Athumna in, Cana khoa Moupuipa bangin mihem hi lhasam jingthei ihiuve. Moupuina hihen golvah dang, chule, ipi ibolnau le gonnau hijongle, taona nasatah mangin Jesu kou teiyute. I-lhahsamnau, Aman eipanpi diu ahi.

Alina, Pakai Jesu ‘thil kidang bol’ jouse hi Matthew, Mark chule Luke hin ‘Thil kidang’ (Miracle) tin aseiyuve. Aseijui John vang hin ama jong ahinkhoa Pathen natoh loupe kidang atotam tah jal jong hintin “Thil kidang” atipon “Melchihna” atijon ahi. John tahsan dana chu Jesu hi Pathen Chaapa ahin, Pathen ahi. Pentih neilou, tonsot a umjing Pathen, thiljouse sempa ahi. Pathen dinga ‘bolmo umlou’ ahi. Jesu hi Pathen ahijeh in, athilbol hohi ‘akidang’ hilouva ‘Pathen ahina hetdohna le melchihna’ joh ahi. Hiche athilbol hohi ‘Pathen ahi phondohna’ (Melchihna) ahi tia asei hinte.

Eiho jong, Christ nungjui ihinauva, thil jouse bolthei Pathen tahsana jui ihiu hi kihet a, tahsanna lhingset a Jesu Christa hi ijui jing diu adol ahi. Taona le thumna inei tengu jongle  “amusa a kigel ding”  Pakai Jesu’n eideiyu ahi hejingute.

Solchah John banga hi, i-tahsanule, idiuva abolmo ding imacha aumpoi. Natna jouse aboldammo aumpoi. Jesu dia ‘jendammo natna’ umlou ahi natahsan em?

Hahsatna le boina jouse asemphatmo le ingaichat jouseu eipehmou aumpoi ti natahsan em?

Achaina in, Jesu’n inneipa ngaichat apehnom, natoh kidang le aphattheibohna, aloupina asodoh ding chun ‘manchah’ (Bel) angaicha e. Hichun, Bel chug up sehseh amuve. Hiche, bela chun, Jesu seibangin, tui asungdim taove. Lhacha hon belgup tui asundimu chu Lengpitui asohdoh tai. Bel sagi hihen asanga tam neiyu henlang sungdim cheh leu Lengpitui tam cheh anei diu ahi.

Pakaiyin, mihemte lah a kinloupi abolna din ‘manchah’ angaicha jinge. Lhacha angaichai, manchah chomchom angaichai. Nang le kei ikipeh diu anome. Eima kitodoh ding le nei le gou tohdoh din ei deiyuve. Pakaiyin amanchah jouse anunnom ahiuve. Tua le tonsot geiya Pathen in aumpi jing ding ahiuve.Lhacha akipe atam chana, nei le gou todoh atam chana Pathen loupina kilang cheh ding, A Lenggam mmachal cheh ding ahi. Napan nom em? Panla ho lah a napan nom em?

Pathen in panpi jingtan.
(Tujan Houbung kindang abol khohten pet sungin hiche hi ka lunga achen jingin, katoh kachaichaiya jan sot nung hijongle, ka lunga beimo thu hi gangchela kahin ta a, velsim umlouva ‘facebook’ a kahinso jeng ahi. Asim jouse Pathen in ama dia phalamcha apanpi ding katahsan le kataona ahi. L.K.Hengna 14/1/2016)