Minu phatah chun, nao avop apat a acha hungpeng ding ngaichat
thil hochu ana bolmasahji ahitai. Akisilna ding, avon ding, aneh ding, adon
ding le adang dang ana gongtup jitai. Hiche hi, numei hon Pathen thilgon
ajuinau khat in kamui.
Pathen hi mihem dia ‘Pa’ keu ahipoi, ‘Nu’jong ahi.
Thiljouse le mihem sempa ahina ahin ‘Pa’ ahin, ijakai
avetchingna le eichinuva, ei jen jingnau hi ‘Nu’ ahina ahi.
Pathen in thil anasem thu hi phatecha kasim sim-le Pathen in
mihem angailut dan kamu chen cheh cheh jeng e.
Athilsem lah a achaina pena asem lona hi, asemnom ‘mihem’
chu asem masanga achenna ding le angaichat ding jouse chu ana sempeh le gonpeh
masah ahijoi. Asem jouse chu angailut ‘mihem’ dinga pha din asem e. Hijehchun, lei
le van chule assunga um ho anasem chun ‘apha’ kijet in anasem inahi. Thilkhat
asem chai seh-le, athilsem chu aven, aphat dan amun ‘aphai’ anati peh e.
“Semtil'a chu Pathenin
van le leiset ana sem ahitai” (Genesis 1. 1
). Hinla, hitia asema chu mihem
dia chenna thei hiloulai ahi. Ajehchu, mihem in hinkho aman theina dia ngaicha
hochu ana umloulai ahi.
“ Ahin leiset chu alim le agong bei, twipi thuh tah a
kikhang chule achunga thimpi jing ahin, twipi chu Pathen Lhagaovin a-opkhum'e” (Genesis
1. 2 ).
Hijehchun, Pathen in asemnom ‘mihem’ chenna ding chu agong
pantai. Mihem in ‘vah’ angaichat masah pen ding ahi jeh in, amasapen in
“ Pathenin, "Kho
hungvah hen," atile, ahungvah tai. “(Genesis 1. 3 ).
Chuphat in, “Pathenin
khovah chu avet le apha lheh jengin, muthim le khovah asep khentai.” (Genesis 1.
4 ).
“ Pathenin khovah chu "Sun" asah-in, muthim chu
"Jan" asah-e. Jan akichaiyin jingkah ahitan, nikhat alhingtai.” (Genesis
1. 5 ).
Aban ho jong hi sim peh in, mihem in angaichat thil asempeh
ahi gel jingin, angailut mihem nahi kigel jing in simin.
Angailutna changa aphattheina changkim din Pathen in napanpi
jing tahen.
No comments:
Post a Comment