Nitin hinkho manna ahi Christa-to hinkhom ihi kihet a tao jing puma hinkho manna kinei hi kipana, lungmonna le ito jouse lunglhaina ahi. Jesu’n Ama tahsante chu, ‘Ka umpi jing ding nahiuve’ (Matthew 28:20) ati bangin aumpi jingin, angaichat jouseu Pathen lungdei-to kitoh jouse chu apejingjin, lhasamin akoi ngaipoi.
Hinla,hitobang Christian hinkho hi man ahahsaji. Eisuboi ding le ikipana eilahmang peh ding atamji. Hijongle, ina chesao jep jongle, tao jing din vang Pakaiyin, eihin sukhang pai jitai. Hitia, ium theilou phat tamtah ho sunga hin kipahna le lunglhaina tahbeh neithei ahijipoi.
Christa-to hinkhom louna vang chu lunggim,kinepjoulouna,monlouna,kichat le hinnomloutah a hinkho manna bou ahiji.
Jesu Christa jala Pathen cha ihi kihet jinga, Pa lungdeiya um jing ding ikin ahi kihet a taojing hi hinkho mannopna, Christa-to hinkhomna ahi.
Aminmaiya Christian hilou ding, atahbeh hija ‘ Jesu Cross’ kaput jingding ahi. ‘Cross’ chu ipiham?
‘Cross’ hi I-Pakaiyu Jesu Christa thua nunna, thoh-hatna, thohna, chule ‘gal jona’ ahi. Midang ngailut a panpi jingna le Pathen-to eijopmatnau ahi.
‘Cross’ kaput chu eiho dia hahsa ahi. Hinla, Christa tahsanna Ama a kingaijing ho chu ‘Jesun aputpeh ji ahi’. Eiman kilah a put ding Christa songa, chutle Aman eiputpeh jiu ahi. Langhan, lunggim ihinto teng jongle eihin lhamonji tai.
Christa kisanloulai din vang ahitheipoi.
Kisanjouva hinkho kasei ahi.
Ijemtia, hitobang hinkho hi mang theiloulai nahi jengle, tuhin Jesu hi taonan kouvin. Kisanin, Pathen thun asei bangin.
Pathen thu hi natong-hattah ahi. Asei hi boljeng ding ahi. Asei banga bola, chonseh kisihna, akom bela, kisan hochu avangpha ahi jenge. Abollou vang chi akisih ding ahi.Hinkhonom amantheilou ding. Leiset hinkho kichai tengle ‘damun’ a tonsot a umding ahinalaiye.
Christa kisanloulai hinkho mang jouse chu ‘Chonset’ in ahen ahi. Hichu kihet a, Pathen koma guhthim taona manga, chonse ahi chu phongdoh a ngaidam thum jouse vang, Pathen in angaidam ding, “angaidamsa in.ahitai”. Lungheiya chu, alungheiya pat a Pathen in angaidamsa ahijitai. Hinla, kama phondoh jong angaiye.
Ajehchu, Bible “Nangman nakama ‘Jesu chu Pakai ahi’ tia na phondoh a, chule, nalungthima Ama chu Pathen in mithilah akonin akaithouve, ti natahsanle na sochat ding ahi” ati ahi.(Romans 10:9).
Chonset kisih a taona mangnom dia noiya banga hi taothei ahi. Adan mong vang aumpoi. Eima nop nop a taothei ahi. Hinla, athu chedan chu hitobang hi aphai-
“Pakai, chonse kahi, nei ngaidamin. Nei huhhingin. Ka chonset ngaidamna dia ka Pakai Jesu hung thi chu katahsan e.
Ka Pakai Jesu, nang ka Huhhingpu din kakisane. Tuhin, ka lungsunga hung chengin. Kahinkho nakhut a kalhane. Nadei bangin nei puiyin. Ka dinga nahungthi jalin naming kathangvah e. Kahinkhoa ka Pakai hijing jengin lang ‘Pa’ lungdei hinkho chu neimansah in. Lhagao Theng in nei umpi jing jengin. Amen.”
Pathen in nataona jouse sang hen, phattheina naboh jing tahen.
No comments:
Post a Comment