JESU PAKAIYA NEI HO CHU KHOVAH CHATE AHIUVE

Semtila Pathen in asem masahpen chu ‘Vah’ anahi.

Bible a New Testament in Jesu Christa chenna le vaihopna mun chu ‘Vah’ in aseiye. Ahideh a ‘mihem in achamtah a ama hinkhoa Jesu Christa Huhhingpu le Pakaiya aneiya, ahinkho manna a vai ahopsahna, Pathen lungdei hinkho amanna’ kiseina ahi. Hitobang hinkho chu ‘Vah a hinkho man’ ahi.

Bible in Jesu hungpen ding thu aseina in “ Muthim lah avahle ten khovah loupitah amutauve! Muthim gama chengte chunga kho ahungvah tai!.....:” (Isaiah 9: 2):

Jesu umlouna mun chu ‘muthim’ ahi. Jesu ahung masanga chu vannoi pumpi chu ‘muthim’ ahi. Jesu ahungpen-le vannoiya chu ‘Vah’ hung uma ahitai.

Mihem khat hinkhoa chu Jesu achenlou, vai ahoplou-le, hiche mihem hinkho chu ‘muthim’ ahi. Min Jesu akisana ahinkhoa vai ahopsah tengle ahinkhoa chu Jesu chenga ‘Vah’ hinkho anei ahitai. Chutengle, hiche mihemnu/pa hinkho chu hung kisemthah a nun le khan pha aneiya, mite dia dei-um mihem sohdoh ji ahitai. Hiche mihem hinkho chu ‘Vah hinkho’ ahiji tai.

Jesu hungpen thu chu, Themgaopan aseiyin “ eiho din Naosen khat apengin, chapa khat eipeuve! Ama hi eiho vaihoma pangding ahi.Ama hi “Thumopthem kidang,Thaneipen Pathen,tonsot mi-Pa,Chamna leng Chapa,”kiti. (Isaiah 9: 6).

Jesu hi ‘Huhhingpu’ ahin, ama kisan jouse chu ‘chonset’ akon, chonset thaneina, chonset hinkhoa kona ahuhdoh a hinkhotheng apehji ahi. Hiche ‘hinkho theng’ chu Bible in ‘Vah aum hinkho’ ati ahi. Hiche ‘hinkho theng’ chu ama ding le mijouse dia pha ahin, mite dia ‘phattheiboh channa’ thei hinkho ahiji.

Chule, min Jesu hi Pakaiya aneitengle, Jesu chun mipa dia phapen chondan chu ahila, apui ji ahi. Boldia pha le hinkho Mandan phapen lam chu ahila, apanpi jia, mipa chun tahsa le lhagaova Pathen phattheibohna akisanji ahi. Hijehachu, Jesu hi ‘thumopthen kidang’ (adviser phapen) ahi.

Hitia, ahinkhoa Jesu vai hopsa miho chu ama dia phapen le kipanapen ahin, ama hinkho chu Jesu chenna le vaihopna (lenggam) ahii. Hitobang hinkho chun kisuhmo, kipal le lhahsamna aneilou ding, khangtou, phatou ding ding joh ahi. Hitobang hinkho chu leiset chunga jong kipa le lungmonna hinkho hija, aphatdan chu khangtou jing ding, leiset hinkho khellama hinkho kit a jong Christa-to tonsot a vai ahomkhom diu, a tonsot atonsot a kemtih neitalou ding, khangtou jing ding ahi.

“Aleng thaneina khangtou jingding,Alenggama cham leng jing ding ahi.David khel’a lengvai apoh a tua pat akhonni geiya vaihom ding ahi.Thaneipen Pakaiyin hiche hi aboldoh ding ahi. (Isaiah 9: ).

Hitobang hinkho chu naneipat tah em? Jesu hi nakisan tah nah em? Jesu’n nahinkhoa vai ahop nah em? Ole nangman nathuthua nahinkho naman nah lai ham?.

Nathuthua nahinkho naman sungin kipana le lungmonna tahbeh nei ponate. Nabol jousea lungkim joulouna namu ding bou ahi. Ajehchu, mihem hi ‘akimlou’ akihi bouve. Eima dia phapen jong kihelou ahibouve.

Na ngailupen Pathen belin, alungdei bolin. Pathen lungdei chu Achapa Jesu kisanna amato kivop jing hi ahi. Chutile, Achapa nahija napanpi jing ding ahi. Kisanin, Jesu tutah hin.

Nakisan tah-le, nahinkho chu Jesu puisah in. Bible sim jingin, tao jing jengin.

Pathen in na panpi jing tahen.