Lhepna Natole Kipah in

 ‘Lhepna’ natole vangsetna le toset nato danin gel hih in, kipanan ding joh ahibouve. Ajeh chu………….

Ajeh hethem val jenga, Solchah Jacob in “Lhepna nato tengule kipanan-gel jouvin” (James/Jacob 1:2) tia asei ahi. Kei jong hitihchan chu hethemlou kana hin, tu’nvang Pakaiyin eihiltai. Hiche hi ahi -

‘Lhepna’ kiti hi Satan thilbol, Christa tahsana juite, Christiante ajolna ahibouve. Lhepna toh hochu ‘Christa mi/ Christian ddih’ kihetna ahibouve. Hijeh achu, Lhepna natole kipah in, Satan in ‘Christa nungjui nahi’ ahet jeh a amami hidia najol ahibouve. Huhhingna chang nahile nahilou na kitahsanlou kom umthei ahi. Lhepna natole ‘Huhhingna changsa’ nahi kihetna ahijoi. Kipah in, Pathen min thangvah in, tao jingin, Bible sim jingin. Hichu,lhepna jona dia manchah phapen ahikit e.

Satan in ama mihem, anungjuijing hochu alhemjipoi. Acha hilou, Pathen tahsana Christa nungjui ho bou chu ama lama panga, adei boldia ajolji ahibouve. Hitia, amijol le mi atemna hi Chriista nungjuite dia ‘Lhepna’ kiti ahibouve.

Ju dondona johsah, donlouva umtheilou hochu Satan in judon dia ajol le alhep ngailou, achamtah a adon jengji ahibouve.

Mijong chu ajong dia jol ngailou; gucha chu mithil gudia sol ngailou,aguh tei ding chu achonna ahi.

Mithat nom jing chu, mithat dia jol le sol ngailou, along akisuhloule michu atha jeng ding chu achonna ngai ahi.

Hitobang mihem hochu Satan mihem, Satan nungjuiya akipana ding boljingsa ahiuve.

Satan in ama lungdei bollouva Pathen dei bolnomji ho johchu jollhah/ lheplhah a alungdei bolsah ding gotjia, aboltengle hichu ‘Christian’ dia ‘Lhepna kitoh’ kha ahibouve.

Hijehchun, ‘Lhepna’ tohi ‘Christian’ hi kihetna, Christa nungjui kihetna ahi.

 ‘Kitai-umtah’ ahijoi.

Lhepna natole, Pathen cha nahi kihetchetna ahijoi.  

Kipah in, Pathen min thangvah in, tao jingin, Bible sim jingin. Hichu,lhepna jona dia manchah phapen ahikit e.

Velseiyute. Satan in nalhep-le, ‘apengthah, Christa a hinna nei, Lhagao hinkhothah nei’ nahi photchetna ahi.

Kipah in, Pathen vahchoiyin, “Amen, Pathen cha kahi kaki hetchet mong mongtai” tin. Kipah in, Pathen min thangvah in, tao jingin, Bible sim jingin. Hichu,lhepna jona dia manchah phapen ahikit e.

Hijehachu, Pakai lhacha Solchah Jacob/James hin “Lhepna nato tengule kipanan-gel jouvin” (James/Jacob 1:2) ati ahi.

HETDING - Christian dihtah chun lhepna hi kijosah ding hilouva, joding joh ahi. Eiho hatna a vang jothei ahipoi, ‘Lhepna-joupa, Jesu’ bel jing le koujing ngaiya ahi. Jesu bou lhepna-gal jouva, Satan le atha-hatna jouse jousohpa ahi. Ama bel jing chu lhepna jona ahi.

Jesu’n, “Vannoiya hin hahsatna natoh’uve, hinla, lungmong tah in umun, Keiman vannoi kajoutai” (John 16:33) tia asei ahi.

Satan le athahatna  -  Lhepna, chonsetna le thina chengse hi i-Pakaiyu Jesu Christa’n ajosa ahitai ti he inlang, lhepna nato tengle Ama (Jesu) kou jingin, taonan. Chutile, Aman najopeh ding ahi, nakoule najopehsa ahi hejengin.

Jesu min kou jeng jong hi Satan kichatna ahin, taona a ikoutengle Satan hi ajamjitai.

Pathen cha nai kihet jingin. Kipah in, Pathen min thangvah in, tao jingin, Bible sim jing jengin. Chutile, Satan in nakom nai ngamponte. Hichu,lhepna jona dia manchah phapen jong ahi. Hiche hi, keisei maimai ahipoi. Keiman kabola kajo jingsa tina hilouvin, Pathen thu’n eihilnau ahijoi. Hinla, keiman vang, keima kisong hilouvin, i-Pakaiyu Jesu Christa’n ei umpi jing kahe in, lhepna jong eijopeh jing ding ahi kahei. Nang jong, chute jing thei din -

Pathen in napanpi jing tahen.