BETHLEHEM JONUTE

JESU PENNA CHU AVANGPHA PEN AHIJI (BETHLEHEM JONUTE : Thumakai ):

Pathen in anop nop amang cha ji.

Ipi hijongle, Pathen in amanchah tengle aloupi in aminthang jengji.

Mihem jong hi aching-achinglou, athem- amol,  ahoi-ahoimo, ahat-ahatmo atichompoi.Apha-ase atideh poi. Anop nop amangjin, aman man chu avangpha ahijenge.

Pathen in alhen jouse lah in Achapa Jesu penna mun avangpha pen ahi.

Mary jong mijouse lah a mi vangphapen le aminthang pen ahitai.

Bethlehem jong khopi neocha bou ahi, Pathen in alhen jalin, Pakai Jesu penna mun ahitai. Vannoiya khopi lah a khopi vangpha pen, aminthangpen, tuni geiyin minthang jing ahitai. Jesu penthu akisei poupoule, Bethlehem min akisei jingtai.

Kelngoi ching ho chu Jesu pen thu Pakai Vantil in aseipeh phat un, apenna mu “Bethlehem a cheu hitin gaveute” (Luke 2:15)atiuvin achevin chibai agaboh taove.

Nang jong Jesu penna nahi jalin Pathen thangvah ute.

Jesu pen chun Vantilin apenthu ana seiye. Jesu athia athodoh jouva pat in Solchah le Pathen thusei jousen Jesu thu aseiphongle jingtai.

Athu jah a, Kelngoi ching ho banga, Jesu kom jona chibai bol jouse Huhhingna changa hi.

Tunin Jesu tahsa tah a apen muponate. Apen, athuhil, anatoh, athi le athdoh kit thu nahetai. Akom najotna le chibai nabohna chu hiche ahi –

Pathen lungdei hinkho mangtheilou (chonse) ahi kihet a, akoma ngaidam thuma, ahinkho Pathen khut a pedoh a, Jesu Christa tahsana Huhhingpu le Pakaiya kisan, Ama thuhil ho nit a, alungdei hinkho mang dia kipedoh ho chu –Akom jona, chibaiboh ho ahiuve.

Nang vang, Akom najot a chibai nabohsa ahitah ding katahsane.

Achutile, nang jong  Jesu penna nahitai.

Mi vangphapen ho lah a khat nahitai.

Leiset chunga jong Pathen panpina chang ding nahin, vanmun geiya jong nachan ding, vanmuna jong namin kijihlut ahitai.

Kipah in Pathen thangvah jingin. Amin na choisang channa Aphattheibohna nachan jingding ahi kihet in, vahchoi jing jengin.

Jesu penna ho anunnom ahiuve. Pathen het le apanpi nom jing ihiuve.

Bethlehem sanga jong vangphajo ihiuve.

Bethlehem chu Jesu penna bou ahi.

Nang le kei vang Jesu penna mai hilouva, Jesu chenna le chenpi jong ihiuve.

Apenna le achennamun ihijaluva, Ama mina ithum jouseu eipeh diuva kitep a ahi. Athum dola thum ding le amudingdol hijing ding bou ngaiya ahi.

Athum chan channa dia Alunglhaina mi hiding ahi.

Eiho Pathen hi asei thonngailou, aseijouse bolteitei Pathen ahi.

Nathum jouse namuna dia, Ama lungdei lama nathum ding, Alungdei nahol jing ding bou nakin ahi.

Na ngaichat ho napeh ding nanople nathu ahi.

Achan dan ding kisei ho bang hin bolin, thumin. Najui themle  nathumchan nachansa ahi.

Pathen in panpi jingtan.