SATAN MI LHEPNA PIPEN CHU KIGINMONA AHI

Satan in Christiante alheplhahna ho lah a ajobaina pen khat chu kiginmona ahi.

Hiche hi, Pathen thu aseina hoa kasei gempen khat ahi. Tunin, keima tah in kaatoh kit e. Mikhat in “Van-gam nalut dem?” eiti.

Ken jong “Lut e” kati chang melin ahile midang adongkit e.

Hichea chun, kiginmona, kitahsanlelna nei khata leng, lhepna chun eipuimang peh a mahthah jengthei kahitai. Kalunga “ija van-gam kilutdeh louding” tia gela kanomnoma hinkho kamana katahsa le lhagao mahthahna a chon jengthei kahitai.

Hetding chu, nang le keima chonphat vanga Van-gam lut ding hilouva Pathen tahsan jala lutding bou ihiuve. Atahsan jouse Pathen in Lhagao Theng panpina chang jing ijotauve. Hichu, tua le tonsot geiya dia Pathen to Vana chengkhom ding ihiuve.

Nang jong, Christa tahsana kisansa nahi nunga jong, Satan in mihem khat ahin manchah a “Van-gam lut dia nakitahsan em?” tia naadoh thei ahi. Chule, nangma lunggil sunga jong “Ole, kei hi min eitahsanlou banga hi alutlou ding jong kahi jong ham?” tia kiginmona nakhumpeh thei ahi.

Chule, mikhat touvin jong “nang hi katahsan poi. Ipi phatna jongla naneipon, huhhingna chang loulai, pengthah loulai nahi hinte” tia aseithei ahi.

Pathen thusei them tamtah in apengthah ho nun le hinkho umdol aseiya, “hitobang hijoulou hochu pengthah loulai, van-gam lut theilou ding ahi” tia ahinsei jeh a, nangman kiginmona, kitahsanlelnaa nahin neithei ahi.

Veiseiyute –

Bible in aseibanga, taona’a nachonset naphona, ngaidam nakithum nunga le Jesu Christa hi na Huhhingpu le Pakai dia nakisan nunga jong lungmonna kinepna lhing naneida jeng em?

 ‘Ole keihi pengthahlou jong kahi ham o?’ tia nakiginmo kom um jeng am?

Christian hinkhoa hin hitobang chu aumji.

Nang lele atoh a nahipoi.

Mitamtah chutia umji ahi.

Hichu, satan natoh ahi.

Hejingin –

Pathen in aseisei chu hijenga ahi. Boldia aseichu abol ahijenge.

Adam le Eve jah a “naneh louding, naneh nini nathi teitei ding” atia, amanin aneh lhon jeh a thina aumdoh jeng chu nahetai.

Hiche banga chu Jesu chu “atahsan jouse them changding” (John 3:16-17) tia asei jong chu hijenga ahi.

Pathen thu mihem in amudan jatni ahi -

1.    Pathen thu tahsaphe kisoh “Jesu”, chule,

2.    Pathen thu jihthoa kimu “Bible”

Hijeh achu, “Pathen tahsan” kiti chu “Athu tahsan” tina ahi. Hichu, “Pathen thu tahsaphe kisoh (Jesu)” tahsan ding, chujongle, “Pathen thu jihtho (Bible) a kisei” hohi tahsan ding kiseina ahi.

Bible in, mihemten huhhingna akisanna diuva, ‘Chonse” ahi kihet a, kisih a Pathen belding, “chonset” phondoh a ngaidam kithum ding ahi. Hichu,  Pathen kamcheng (Athu) Bible’a kisun hohi tahsana bolding/juiding ahi. Bible in aseiye -

 “Eihon chonsetna kaneipoi, itiuva ahile, eima le eima kilhemlha a ihiu ahi, chule thutah chu ilung sunguva umlou ahi. (1John 1:8)

“Eihon chonsetna iphon vangule ama chu eiho chonsetna chengse  ngaidam ding le chonphat louna jouse siltheng dinga tahsan umtah chule chonphatah ahi. “(1John 1:9) tia ei hilu ahi.

Velseiyute-

 ‘Pathen tahsan’ kiti hi ‘Athusei Bible a kisun hi tahsana jui,nit le kingaina a nei hi ahi’.

Bible in asei hohi bol jengin. Alhinglel aumjongle thei kham khamin bol jengin. Pakaiyin, Lhagao Theng in eipanpi nauvinte. Chonset phonginlang, ngaidam thumin, chule, Jesu chu kou jengin “Ka Huhhingpu le ka Pakai hung hiinlang, nadeilamin neipuiyin” tijengin.

Chutile, Pathen in nangaidama, tonsot a Amato cheng khom dia nasan ahitai. Hichu, Christ a hinkhothah, penthahna ahitai.

Hitia, chonset phonga, Jesu Christa hi Huhhingpu le Pakai dia nakisan nunga jong na kiginmo nahlaiya, ‘huhhinga chu kachan tahtah hinam?” tia lung opkaina naneile, tao kit in, lungmonna thumin, napeh ding ahi. Nangma kitahsanlel le kiginmo chun napenthah–napenthah lou thu apopoi, Jesu natahsanna bou chu na penthahna,hinna ahi.  Mihema nahungpentila, na insunguva nanu-napa dia naosenthah nahi banga chu tua Jesu Christa natahsana nahinkhoa nakipom jouva hi Pathen cha thahseh, naosen chu nahi ahi.

Bible in,  “.. Aman, Ama (Jesu Christa) ana sanga Ama mina tahsan chan chu Pathen chate ahitheina tha(phalna)apetai” (John 1:12).

Pathen in na ngailut jala na huhhing ahi chu kihet in. Ol ola lhagaova khantouna napeh ding ahi. Hijeh chun, kipah in, nitinin Bible sim jingin, tao jing jengin. Chule, hitihin Pathen hi thangvah in.

“Pakai,ka chonset neingaidama nacha a neisemtah jalin namin kathangvah’e. Tuhin, lungmonna kim le nanga kingaitheina chu neipen. Neiteppeh’u Lhagao Theng chun nei-umpin, nei puidih jing jengin,  Pakai Jesu minin, Amen”.

Hitia chu natao tah-le, penthahna, Christa-to hinkhomna hinkhothah chu mang pantan.

Hejingin, hitia nabol nunga jong tahsan jou tahatah louva nakiginmo teitei nahlai-le, Pathen thu jihtho Bible a kisun hohi natahsalou tina ahi.

Tahsan tah in hinkho mang jengin, Jesu Christa hi song jing jengin.

Pathen in panpi jingtan.