Ahao le Avai Pathen mitmu in akibange. Hinla, mihem tamtah din akikheta aumtheiji.
“Sopi lhachomin choi-at’a aum chu kithang-atpi hen. Mihaovin jong suhnem’a aum kithang-atpi hen, ajeh chu hao hi hampa banga pulloi ding ahi. Ijeh-inem itile nisa hamvevua ahung sat teng hampa agop jin, pahcha ho apul’in, apahhoi jong amoljitai; hitobanga chu mihao chu akiheina lam jousea molmangji ahitai.” (Jacob 1:9-11)
Hichea mi lhachom ahiti hi ‘tahsa a gentheu le lhagaova vaicha kisa ho’tina ahi. Pakai Jesu seisa James hin avelseidoh kit ahi. Tahsa a genthei le vai hon belding kiletsahna aneipouvin, Pathen a kingaiyin, abel jiuve. Akinepnau chu Pathen jeng ahijalin, Pathen in apanpin, alhamonji. Christian hija genthei ho dehdeh vang lhagaovin ahatjojiuve. Amaho vang lhasam akihisah un, Pathen abel jingun; hijeh tahchun, Pathen in apanpin ahat jing jouve. Tonsot a Pakai-to chengkhom diu, Van-haosatna anei jingdiu ahi.
Tahsa a haosa ho jong ahao jaluva kipah diu ahi. Aching hon ataonau Pathen peh ahi kihet in Pakaiya akipaah un, Pathen kin bolnan aneiyuve.
Haova kisong ho vang hampa pah tobanga, ahaonau le amihem hinnau, chule, alhagao jengu jong mahthah ding ahi. Ahaonauvin kipana nei nauvinte. Hinla, hiche akisonnau chu amanthahnau hiding. Ahaosatnau, nei le gou hihen, akisonnau haosatna chun manthahna a alhut diu ahi.
Tahsa in haovin vai jongle, Pathen bela kipaje helou tampi aimkit e. Agenthei-vaichatna Pathen ngohbep a chatvaina tincheng bola uma jong aume. Hitobang ho jong chu mahthah thouthou diu ahi.
Tahsa in haovin vaicha jong leuhen, lhagaova vaicha le lhasam ahi kihet aPathen bel jinga, Christa nunchan jop ding tup a Bible sim jinga, tao jingjeng ho vang tua hinkhoa jong kipana giltah neiya umdiu ahi. Hitobang ho chu pathen a kingaiyin, pathen athangvah jing un ahi. Hichu tahsa le lhagaova Pathen phatthei-bohna channa ahi.
Chingthei tah a hinkho manding kihilna ahi.
Hitobanga, Pakai Jesu’n lungthim ching ho ati bang ho hithei din, Pathen beljingutin; nitinin Bible simin, tao jing jengute.
Pathen in panpi jingtan.
No comments:
Post a Comment