MIHEM GELA MIPHA HIHO DIA HETDING

1. MIPHA HO DIA HETDING : Pathen a penthahna thusei hon JOB thu hi asei jingun, Job hinkho’a thugil um hi aseidoh jipo’ve. Job hinkho’a Pathen in eiseipeh nom’u chu ‘chonphatna hin mihem Pathen kom alhutjoupoi; Pathen koma chonset ngaidam thum’a, a anga kunteitei ngai ahi’ ti ahi

2.Chonphatna le thilpha bol hi ngaikhohten ahi. Hinla, hichemana chu Van-gam lutding, Pathen kom lhunna, Penthah hi’na ahipoi. Bible sunga mun tamtah a akimuna chung in JOB hinkho ahin, veute.

Amaho seidan hile- Job hi mipha, Pathen ging, thilphabol ahijal a Pathen lungdei amu ahin, Christiante’n jong hin thilpha ibol’ule Pathen kom i-lhun diuvin aseiye.

3. Hinla, JOB lekhabu le ahinkhoa kimu hi –Job chu mi chonpha le Pathen ging, thilse bollou ahin, Pathen chan-geiyin jong mipha ahi ahe’n, phattheina lhingset apen; mihaotah le insung pilhingset nei ahi. Hinla, chonphatna chun Pathen kom alhuttheilou ahi. Aman, hahsatna atophat in achonphatna asongin, hamsetna ato chu Pathen in apatepnan agel’in, Pathen koma akiphin’e.

4.MIPHA HO DIA HETDING 4. “Pathen in mi apatep ngailou lam ahepoi” ( James 1:13)

Job chu mipha le Pathen ging ahijeh chun, ahetthemlou jeh a kiphin ahibou Pakaiyin ahei. Hijeh chun, ahilding aloiho asolpeh’e. Ahildia che, aloihon ahilthem tapouve. Hijehchun, Pakai, Amatah in Job chu ahouvin, ama le ama kihuhhing din aseipeh tai.Job in achonphatna ason vanga, ama le ama kihuhhing theilou, achonphatna’n jong ahuhhing joulou akihet doh tai.Chonphatna hon ahuhhing joulou akihet phat in, Job jong akisonna jouse abeitai. (aban ven)

5. MIPHA HO DIA HETDING 5. Akhonnan, Job in chonse ahi chu ahin kihetchenin, Pathen koma ngaidam athumtai- “Hichun, Job in Pathen adonbut in, “Nanga kona imacha lungguh jong selthei ahipoi ti kahetai. Koiham kihilna helouva selmangpa chu? Hiche jeh achu kahetlou kanasei ahibouve, thil hohi keidin akidang valin, kahetthemlou ahi. Ngaiyin, ka tao ahi, chule na koma kaphon ding ahi: Nang kangeh ding chule ka phondoh ding nahi. Nangma thu hi kakhojah ahinai, hinla, tu’nvang kamittah in Nangma kamutai. Hijeh hin, kei le kei hi kakikhop in kakikidah in, kakithetai, chule kisih in leivui le vut kakinutai” ti’n Pakai anga dinsun ngaidam athumtai.(Job 42:1-6) (aban ven)

6.MIPHA HO DIA HETDING 6. Chutah chun, Pathen along alhaitai. Job loi le gol, Eliphaz teho jong chun Job ahilthemlounauva Pathen in aphoh in, kilhaina asemlouvule Alunghanna achunguva lhung dia agihsal phat in Eliphaz tehon jong kilhaina chu aboltauve.

Job vang, kisih a Pathen koma ngaidam akithumtah jeh in, Pathen in, phatthei aboh in, masanga sangin ahung haojotan. Chanu aneikit hojong, nungah hoipen ahung hitauve.(Job 42:6-17) (aban ven)

7.MIPHA HO DIA HETDING 7. MIPHA HO – mipha, mihem dila setna mong neilou, koima seisettheiya chonlou, houin kaihat,houlamkai, tao jing, Pathen thu jong ngaiya –sei jing, tolom pejing, ju donlou, houlama kipe ho, chule, midinga jong pha, mijong panhu nom. Hiteho dinga hi Pathen koma ngaidam thum ding ngai behsehlouva gel atam’e. Hiche’na lama hi hitobang ho dinga hi Van-gamlut, Penthah, Jesu Christa mi Huhhingna kisan hi hahsa ahi. (aban ven)

8.MIPHA HO DIA HETDING 8. Pathen in apha adeiye. Hinla, Amakom chena dinga LAMPI khat asem chu naho loule chonphatna keuvin, napuilutthei ahipoi. Hiche LAMPI chu ho-lechun nathilbolphat le nachonphatna sese chu na lallukhuh ding ahi.

Hijeh ahi, I-Pakaiyu Jesu Christa chun Pharisee ho ana housal’a , aphoji ahi. (aban ven)

9.MIPHA HO DIA HETDING 9. Mi khat in, “Judon chu ahung kisemphat a, Pathen ahinhet-le keichan eihin phah bou ahi” ati.

Job sanga jong kisong tina hilou ham? Hichu, mipha ho kisonna ahiji. Pakai LAMPI vang JESU le Ama CROSS ahijoi. CROSS hi KINEMSAHNA CHUNGNUNGPEN, chule, THOHHATNA, KIPHALTHENG, KIPEHDOH tina ahi. Hichu, Pakai GALJONA ahi. (aban ven)

10.MIPHA HO DIA HETDING 10. Job in achonphat ason jeh’a Pathen panpina amuvah theilou, Satan in abolchahna akona Pathen in pan alahtheilou, ahuhhdoh theilou chu hejing’ute. Ama’n Pathen ahet’a, chonphat abol le Pathen ahoujing jala chu, Pathen in ahung huhhdoh jeng ding chu Pathen kin le mopohna a akoikhah ahi. Hitia chu, Pathen in abolding dol, (Job gela) alhacha kitah tah ahung huhdoh lou jeh a chu Pathen chunga lungphamoa kiphin ahi. (aban ven)

11.MIPHA HO DIA HETDING 11. Hinla, mihem hi Eden’a pat chonse, Edena chonset bolpa thisan chu hung chepeh a, numei le pasal thisana hung kijil ihicheh jah’uva, Eden chonset behcheh ihiuvin, hichu Pathen in asuhtheng ngai ahi. Pathen in eiho thisana chonset umchu asuhthengna dinga, Ama koma natao ding ngai ahi. Hichea ‘tao’ hi – chonse nahi chu nakisih a, nakisih thu Pakai koma naphona, ngaidam nathuma, panpina nathum ngai ahi. (aban ven)

12.MIPHA HO DIA HETDING 12. Eden’a jong Adam le Eve chu, Pathen in chamlhatna, delhen theina tha apeh ahi’n; hibanga chu, chonset ngaidam nathum le nathum louding jong chamlhatna nanei ahi. I-tobangin thilpha bolin, chonpha’n lang, Pathen hou jing jong lechun, ‘chonset nakisih a ngaidam nathum tokahsea Pakaiyin, pan alahlou le nahuhhing lou ding ahi. (aban ven)

13.MIPHA HO DIA HETDING 13. Jesu Christa ahungjouva hi, chonset nakisih le panpina nathum keo hitalouva, Jesu Christa chu Leng le huhhingpu dia nakisan jong ngai ahitai. Hitia chu nabolloule ima hiponate, “Lhagaova napenthah teitei ngai” ahi. (aban ven)

14.MIPHA HO DIA HETDING 14. Tuhin, gelin, judon le michavai hon anohphah piu chu ajudon, thilphalou bola hi. Hiche ho jong chu ‘chonset thaneinan abolsah’u ahi. Chonset kisih a Pakai koma phonga ngaidam akithum diu, chule, Jesu Christa hi Leng le huhhingpu dia akisan diu ngai ahi. (aban ven)

15.MIPHA HO DIA HETDING 15. Ahile, nang MIPHA, mihem gela setna behseh neilou, ipiham Pakai kom, Van gam nalhunding sumo thei nanga um?

Ole, Na phatna chun, na suhmoa, lungmonna lem napeh ham? Na phatna le natohphat ho chu nasona Pakai anga bohkhup a, chonset ngaidam thum ding chu nang dia ngailou dia gelna, Satan in napeh jeng em? (aban ven)

16.MIPHA HO DIA HETDING 16.Naphatna chu pamaitah ahi, Phatna le tohphat nabolsa ahitah-le, tuhin, chonset thisan neiya, Pathen mitmua nachonphatna jong lhing joulou, hijala nakisonpi thei chu Agiloupa’n nabolsah ahi chu kihet inlang, dilsun lang Pakai anga ngaidam thumin, chule, Leng le Huhhingpu din Pakai Jesu chu kouvin, pomin, nahinkho aman apui din taovin. Nangdia cross chunga ahung thi chu kipathu lhut in. Eiteppeh’u Lhagao Theng chu, napan-hu le kaihoi din thumin, Jesu minin. (aban ven)

17.MIPHA HO DIA HETDING 17. Chutile, thilpha nanabolsa ho jouse gapha chu nasan pai ding, Pathen in phatthei naboh ding, masang sanga nasa le pha jong nachana natohbe thei kit ding ahinalaiye.

Hitia chu nabol-le nachonphatna, nathilpha bol ho jouse chu kipaman nasanna dia napan-hua hungpang pai jengthei ahi. Phatna hi ngai ahi. Phatna keuvin vang Pathen kom eilhut pouve tina bou ahi.

Na Penthah tengle vang, chonphatna le thilpha bolna hi, naga le naga lou kivetna hung hiding. Jesu Christa hin, thilpha boldia eilhatdoh’u ahi. Pengthah tah ajong thilpha boltheilou, chonphatna neilou vang chu, Ama THINGPHUNG chu aphalou, apenthahna chu dih lou hithei ahi.

(lkhengna27/7/2013 repeat 24.8.2015)