LHAGAO THENG PANPI HOCHU MANLUTAH AHIJIUVE:

TAHSA LAM DOMIN SEI MASAUTE:

Gideon chu milham bangbep ahi. Pathen lhagao achunga aumtah in, melmate khut a konin amite ahuhdoh tai.

Samson chu apena phat Pathen lhagao chenpi ahijalin, ahat lheh jengin ahi. Amelmaten iti thading atup vangun, athat thei pouvin, Samson joh in amaho athatgam jitai.

Hinla, Samson in Pathen deilou ahin abol phat in, Pathen lhagaovin adalhatan, ahatna jouse abeitai. Hichun, numei khat kantim theibep ahitai. Melma ho manchah adongmanu chun akhut akeng akanpeh in, melmate apedoh tai. Amelmaten, gamsa bangin akaiyin, akichep nauvin, amit akaldoh peh un; vetnom umtah bangin mipin aveuvin, anuisat un, akichepna tauve.

Akhonnan, Samson in Pathen deilou abola, Pathen Lhagaovin adalhah ahi akihetdoh tai.

SAMSON KISIH CHU AGEISANG THOUTAI.

Amitbei nunga kisih chu Samson din ageisang thoutai. Amit akaldoh taovin, mitbeiya kimailele, chapang khat in akailele bou ahitai. Hichea bou chu Pathen lhagao umpi jala hat ahi akihetdoh tahbeh ahi.

Atahsa hinkh din, Samson kisih aphachomjou tapoi. Hinla, akisih tahbeh a, Pathen lhagao angaichat tahbeh a ataotao jeng phat in, Pathen in ataona asanpeh in, lhagao chu achunga ahung umkittai. Chutah chun Samson chu ahung hatdoh kittai. Hichun, khumpilen teni chu atuh in, ahot lhutai. In sangson chunglama um jouse akilheh lhauvin, anoilama umjouse, adellih gamtaove. Ahinkhoa amelmate tampi atha ho sangin, hichenia Samson in atha ho chu atamjoi tin Bible in aseiye.

Akidange! Anasai! Hinla, Samson, ama tah jong athithatai! Ana lheh jenge!

Vainung kisih ahin, tahsa hinkho din aphachomjou tapoi.

Hinla, athimasanga kisih a Pathen bel ahijalin, Pathen in apanpin, akin loupitah, ami Israelte melma tampi that in Pakaiyin amangcha thou nalaiye. Samson lhagao jong asohchai ti tahsan thei ahitai.

Nathi kon beh in Pakai belin, chutile, na lhagao beh sohcha ding ahi. Na dalhah na insungmite dia pha beh jong Pathen in nanga kona apehthei ahi.

Samson chu tahsa thahatna apeh ahi. Ajehchu, hiche khang chu thagum sona khang ahi.

Tukhanga mihenten angaichat hatnathah chu chihna-thepna ahitai.

Pathen in akinbolna dia angaichat le amanchah chu chihna le thepna ahitai.

Chihna-thepna khat beh nanei em?

Lasahthemna napeh em? Lekhat thepna lamchomchom um ho khatbeh napeh em? Ole, lunggelthemna- sum veikandan themna, sum le nei-le-gou chomchom lamdohthemna napeh jeng em?

Thuseithemna, thutam themna, lamkai themna, vaihop themna, mihil hemna, mi tilkhou themna, mipachatthemna, lhamon themna, themthil bolthemna le adang napeh jeng em?

Na themna chu Pathen deilamin mangin. Bible sim jingin, tao jing jengin. Na thepna chu lultaah le kipah tah in, Pathen loupina din mangchan.

Chutile, ven, nadinga phapen hiding. Mite dia phapen hiding. Pathen loupina kilahna hiding, chue, Alenggam machalna dia pakaiyin amanchah ding ahi.

Napeh louhel lasah thep teitei ding tup hih in. Louthem doctor, Engineer, IAS, le Officer ; BA.MA. nahilou mana lungneu ding ahideh poi. Degree sangtah naneilou mana nathepna lam nadonda ding ahideh poi.

Masangin degree ana ummasapoi. Min achanga hetna aneiya, scientific discovery le invention ho ahin boldoh u ahibouve. Chihna-themna, kihilna thei lampi jouse hohi, mi penpi chihna neihon ahin boldoh uva, amaho hetna chu kilakhoma tua chihna-themna kihilna hohi kisemdoh ahibouve.  Hitobanga ching le them ho chu kichuh a ichan ham hetna nei hochu Degree kipe ahibouve. Dihtah a seidin, degree hohi milham dia kisem joh ahibouve. Mipi dia kithem chuhna kisema, kihilna uma bou ahi. Penpi chihna le themna neidin, degree angaikho valpoi.

Tukhang in vang school-college hoa kihilna um ho kichuhna angai khoh e. Lekha simthei-jihthei ding angaiye. Paodang, adeh a English, Hindi le eima channa gama themjilna hoakimang le mipi thopen pao ho jong hettei angaiye. Hinla, degree sangthan neilou mana lungneova, kingainemna dihlouva kingainem a, pannabei le thil loupe boldoh theilou banga moh um chatvai ding ahideh poi.

Penpi chihna le themna mijousen aneiye. Hiche, penpi chihna le themna khatbeeh min anei chu mudoh le manchahdoh theina dia themjilna uma ahi. Themjilna nei hochun, hiche ama penpi chu ahin kimatdoh khah-le, ama chu mantheitah hung hijia ahi.

Tua themjilna ho deibangin nei khel hih jong lechun, ichan ham lekha nahet poule, Pathen ging le jajing puma na thepna lamchu, Pathen loupina dia, adeilama naman khah-le mantheitah nahung hithei thou ahi.

“Ipihile, nabol jouseu Pathen loupina din bolun” (1 Corinth 10:31) tia Bible in asei chu bolcheh leuhen hichu eima dia thilpha, insungmi, Houbung, khosung, gamsung le namsung dia phapen hiding. Hichu, Pethen lenggam machalna hung hiding ahi.

Christiante dia kin khohpen chu Pathen tahsana, ijakaiya Pathen sonna, kingaina neiding; Bible sim jing ding, tao jing jeng ding; chule, athupha hi seiteitei jeng ding ahi. Pulpit a seiteitei ding tina ahipoi. Na heng nakom, naloi-nagol, natohkhompi ho koma beh naseijiding ahi. Chule, nanun—nakhan in Christian nahina chu sodoh in. Christian chonna ho mite mudin thodoh in.

Pathen in panpi jing tan.