CHRISTA -TO HINKHOM KIPANA AHI

Bible in, “ Vo khangdong, nakhangdon kipapin! Nakhangdon pet’in kipah jingin. Nabolnom nom bol’in, nadei deiyin chonin……………” ati ahi. (Ecclesiastes 11: 9)

Nadeideiya navale, natohthei, hinkho namanthei laiyin, kipah tah in hinkho mangin. Hinla, nabol jousea chun nasempa lungdei ahiho bou hiteidingin kihabolin, tao jingin. Aman aphal chana chun kipah in, lhingset in gelin. Nangma loupina ding hilouvin, napepa Pathen loupina din bolin.

Thiljouse hi  aphabep aum’e. Chule, nachenkhompi ho hetthem chanin bou chonin. Na umna ‘standard’ chu he in. Miho kipalna thei le gelset thei bolda jengin, hichu Pathen dei ahi.

Metropolitan city hoa chonna mihon se asahlou tampi chu, nakhosunga miho mu-in bollechun, miho kipalnathei hithei ahi. Hichu, nakhouva dia ‘chonset’ ahitai. Chule, thinglhang miho chonna tampi, numei ho kisemdan tampi hi muslim lah a boldia ‘chonset’ ahijitai. Hichu, bollou ding aphai.

Pathen in, mi kipalsah hi ajahda le Adeilou ahi. Pathen deichan bou bolding ahi.Ajeh chu, Pathen thu, Bible in “…ipi hile nabol chan chu Pathenin thu natanpeh ding geldoh jingin” ati ahi. (Ecclesiastes 11: 9)

Kipahtah a hinkhoman theina chu Jesu Christa-to imankhomna bou hi ahi. Gentheiyin, imacha behseh neihih jong lechun Pathen in na-umpi-napanpi jing kihet in, naboljousea taona nei jing lechun, naboljouea nakipah ding ahi. Pathen koma taojing jeng hi kipana, damna, lunglhaina, khantouna le lolhinna pen ahi.

Niseh-le Bible sim teiteiyin, chomcha hijongle. Chule, tao jingin. Hitia bol hi, kamohsei le mihosei kaseison maimai ahipoi. Kabol le kahinkhoa aga kamu jing thu kasei ahi. Bol in. Keima dia pha naboldia kasei ahipoi. Nangma dia phapen. Nakipana pen, na lolhinna pen, nadamna ding pen, tahsa le lhagaova nakhantouna ding pen ahi.

Mohmaimai thu, lekhabua kasimdoh pha kasah mana sei kahipoi. Ka hinkhoa Pakai Jesu’n eibolsah a kona anople aphatdan, kipana chullou, lunggimna- thacholna umlouna, chol le nan umlouna thil, nitina aphatdan le Pathen phatheibohna channa ahi kahet’a, midang ho jong changleu, mijouse hi change, kipah diu ahi. Kei eimu le eihe hih jongleuchun Pathen in Acha ihinauva – Pathen’a Ucha ihinau hi, iki khohsah-tonau ahidol muntin, ibonchauva tua le tonsot geiya ‘Jesua hinna’ chu eipeh diu, bulhingset’a eipeh diu kakinepna chullou ahi.

Pathen in umpi jingin, Jesu mina nataona jouse nasanpeh tahen.