Tahsan kiti hi Pathen thu hihen leiset thila jong
natong-hattah ahi. Nanu-napa natahsan jala hichan nahinphah ahi. Tahsan
dalechun, nasonjoulou ding, nahin seilet theilou diu ahi.
Themjilna jong nahilpa/nu chu tahsan tahihlechun,
hichan chu naphah louding ahi. Hetna, thilboltheina ho jong chu tahsana nahung
kichuh jala nachan thei ahi.
Tahsan hih lechun nathilbol chu bolponate. Natahsan
jala nabola na lolhin ahi.
Nadongmanu/pa chu tahsan hihlechun kidei lolhing lhon
ponate. Mi kitahsantoa hung kichenga, insung atundoh’u ahi. Tahsan jala Politic
lamkai jong kilhengdoh bou ahi. Kitahsanto jala solkal, gamsung, houbung le
insung kivaipohna umthei bou ahi.
Sepai le galmanchah choi jouse hohi kitahsanto hihleu
kithatto gamuntin, gamsung kivaipoh le ama ho kiloikhomna jong umthei ponte.
Pathen jong hi tahsan jala bou muthei ahi. Chihna in
Pathen muponate. Ngolthut a natahsana, nakingapna jeng ngaiya ahi. Abraham chu
angol thut a ahi. “Na nu-napa, na in-nalou dalhan, kasolna muna chen” atile
chejenga ahi. Ajotna ding, lamkah a i-atiding jong gellou. Pathen khut a
kingama chejenga ahi. Hichu, ‘tahsan’
kiti ahi.
Jesu Christa kisana, mi pengthah hija hinkho naman dan
ding nagel masah-le, imatih in kisan ponate. “Kijou ponte. Iti kadu-kangai hohi
kadalhah ding ham? Kathanopna hohi, kaloi-kagolte, kachena jiho, kakipana ho
dalhah a iti, Pastor bang hinkho Kaman ding ham? Ningkihal umding.
Kakivahna, kasummuna ho iti kadalhah-le, iti sum
kamuding ham? Kagenthei bep louding ham?
Abram chun imacha gellouvin, Pathen thiljouse sempa,
ama sempa, sum-le-pai, nei-le-gou, chihna-themna, ijakai sempa, aumlouva kona
ijakai umsahpa chun umsah tante ti atahsana ainakona kipatdoh jenga ahi. Ache
jengle, Pathen in aching jingin, ahoidamin, ahaocheh cheh in, amin jong mihem
minsah hitalouvin Pathen in amin akhelpeh in ‘Abraham’ ahitan, mijouse-pa ahung
hitai. Pathen, mingol ho chingjing Pathen hi ahat e. Loupina Pakai chang jing
tahen.
Kichihsah in, “Nachop masangin nachuhna ding vemasan”
ti hih in. Pathen hi thiljouse sempa ahi natahsanle, Alungdeipen, Achapa Jesu
Christa hi jui jengin; ‘athi chun nachonset jouse asopthengtai’ tia Bible in
asei hi tahsan jengin; natahsanle na ‘Huhhingpu’ ahi nakisanna ahi. ‘Huhhingpu’
dia nakisan ahitah-le, Athupeh ho nit in, hichu ‘Pakai’ a naneina ahi. Na
‘Pakai’ chu athu nanit-pa tina ahi. Na ‘Lengpa’ ahi, natahsa, na lhagao,
nahinna le nap hat masang le nahinkho chule nanei-nagou jouse chunga
thunei-vaihom din kouvin, akhut a kipedoh in. Hichu, na ‘Pakai’, na ‘Lengpa’
dia nakisanna ahi.
Chuteng chula, Pathen in pan ahinlah a, napui ding. Na
puiya, napanpina dia Lhagao Theng napeh ding ahi. Lhagao Thenga kona chu Pathen
in nangaichat jouse na hinpeh ding ahi.
Pathen in na panpi jing tahen.
No comments:
Post a Comment