ALOUPINA DIA PATHEN IN NASEM AHI KIHET IN

Pathen in mihem hi aloupina ding, phongdoh ding, kilahna dia asem ahi. Hinla,leiset a ‘chonset’ ahungum phat in mijouse asuboh gamheltai. Hijehchun, loupisah malah in  Pathen adou jotai. Koima Pathen thu-nit aumtapoi. Athupeh palkeh cheh ihigamtaove.

Pathen hi ‘ATHENG’ ahi. Mihem khatcha atheng aumpoi. Alungthim’u,  ahindan’u, aneh-adonu le achonnau atheng aumjou tapoi. Pathen deiloulam gelin, tongin, thamin, ne-n-donin ium gamhel taove.

Hinla, eisempau Pathen in, asemsa amite hi ei-ngailu behseh jenguve. Eingailutnau hi hethema, Ama ngailua, angailut a i-um diu hi Pathen in adeipen ahi. Hinla, mihem koima Pathen ngailu dihtah i-um pouve.

Nu le Pa ten achateu angailuve. Hinla, chaten anu-apa ngailut ahethem pouvin, aanu le apa’n angailut bangin angailupouve. Mihem in amu jing anu le apa bon angailut theiloule, amit a amulou Asempa angailut ding chu hahsatah ahi.

Pathen in mihem koima Ama ngailu ding, Athupeh nit jouding le loupisah ding aumlou ahei. Ajeh jong ahe ie. Ajehchu, mijouse ‘chonset’ in ajosa le athua anunsah cheh ahi Pathen in ahei. Chule, hiche ‘chonset’ tha-hatna jouding le ‘chonset’ akona mihem koima ama le ama chule midang jong ahuhdoh joulou ding Pathen in ahei. Pathen tha-hatna tailouva mihem hi huhhinga aumlouding le, ‘chonset’ thaneina akona mihem ahungdoh jouloule koiman Pathen lungdei jong ahetlouding, angailut theilouding le aloupisah (choi-at) joulouding Pathen in amuchentai.

Hijehchun, Pathen in Achapa neisun Jesu chu vannoiya ahinsoltai. Pathen in ahinsolna ajeh chu – mihemte ‘chonset’ thaneina akona huhdoh ding ahi.

Pa thupeh nit jouhel in, Jesu chun mihem hinkho amangin, chonsetna beihelin thupeh anit e. Pa lungdei jouse muntina ahillhanglen, ahinkho gei jong atoh tai. Mihemchepen jong huhhingna achantheina din, mijouse lah a chonsepen ho kithana ‘Thingpel’ (Cross) chunga chun ahinna pen, ahung thitai. Hichun, mijouse, michonsepen in jong ‘huhhingna’ akisanle changthei ahi hetna ahitai.

Jesu chu Pathen dihtah khatseh Chapa ‘Christa’ ahi tia tahsana, “Athina chu keima ei huhhingna ahi” ahi tia tahsana, ahinkhoa thuneiding le vaihom ding a ‘Pakai’ dinga kisana, chule, setna jousea kona ahuhhing dia ‘Huhhingpu’ dia kisan jouse chu ‘chonset’ thaneina akona ahuhhing ahitai.

Hitia, huhhinga umjouse chu Lhagao Theng apeh a, Lhagao Theng in ‘chonset’ akona ahoidoh jinga, Pa lungdei hinkho chu aman khompi jia ahi.

Chutengle, ‘Huhhingn chang’ ho hinkhoa chu Pathen loupina chu hing kilangdoh ji ahi. Hitia, ‘Huhhing chate’ bouchun Pathen lungdei , mihem asem-lona chu hung lolhingjouji bou ahi.

Bible in aseiye, “Tahsan jal’a them chang ihi-phat’un i-Pakaiyu Jesu Christa vanga Pathen to kicham ihitauvin,  Ama jal’a idin nau lungsetnaa hi lut theiya, kipah thanom’a Pathen loupina chang dia kinem jing ihiuve.” (Rom 5:1-2)
Hitobang, Pathen lungtup lolhinna hithei din Pathen in panpi jingtan.