NA NEH LE DON JOUSE PATHEN LOUPINA DIN BOL IN:

Changlhen : “…neuvin don jong leu chun nabol jouseu Pathen loupina din bol’uvin” (1Corinth 10:31)

Mi tamtah in ka thusei chunga kipathu aseinau khat chu :

“kum kihei (season) tinin theiga le anche chomchom kape jinge, necheh-lechun natahsa dia ngaicha (Vitamin, mineral le adang) jouse nanehkhah a nadam ding ahi” tia Pathen in asei kaseidoh chu ahi.

 Kaseidohna chu jingkah Houina taokhomna a mihem themcha lah bou ahi. Hinla, mitamtah in ahin Jason peh in; khosungmi tampi banin, khodang mi jong “hiche nasei chu katahsan in, ka insung miteto kabol jingun, ka kipah lheh jenguve” tia sei atam thim tan, Pathen ka thangvah in ahi.

Pathen dei thupha kisei hi mitamna ngaikhel ahipoi. Pathen alunglhaiya, amite dia pha le Ama loupina ding ahile, mi themcha lah a kisei jong athe chansoh jengthei ahi ka hedoh tai.

Dammo jeh in, nehngamlou kijet kahisah in, bu jong ne ngamlouvin ka umin ahile, ka lhasam val jeng tai. Katao jin, taodam ho jong kabelin, Pakaiyin damna eipetai. “kichalouvin nen” eiti phat in, ngampel in bu le anche, theiga, sa, nga, le adang nehdia kamu jouse kanetai. Kana nehtheilou “Bongsa”, “Vohthao”, thaome ho nomtah in kanen. Theithuh le alhum ho jong kamumu kanene jeng tai. Kaneh jouse kakitopi tan, kadam in kahat doh paitai. Hinla, neh le don louding jong aseiyin; hiche ho chu tunigeiyin eipeldohsah jing e.Hijeh hin, Pathen thu Bible in

“…neuvin don jong leu chun nabol jouseu Pathen loupina din bol’uvin” (1Corinth 10:31) tia asei hi –

Namu jouse, nanopnop chu Pathen dei hidia gelin, Ama loupina din nain-don in tina hikhel din kagelpoi. Chusangin, Pathen loupina dia neh le don thei, Ama mitmua theng le pha, Ama lungdei le aloupina hithei ho (Ama jahda lou jouse) chu Pathen loupina din nein –donin ti aseina hinte kati.

Hetding chu -Pathen in theiga, louhing, anche le adang, mihem tahsa ngaichat jouse hi phat bih (season) tina hi banneicha eipeh’u ahi. Hiche hohi Ama loupina dia neh cheh ding ahi. Hichu, tahsa dia damna ahi. Hinla, Ama deilou jong aume. Hiche hochu ‘Ama loupina dia neh thei hilou, donthei hilou ahi” aume, hiche hochu peldoh ding ahi.

Hitia chu, nabolle, na tahsa le lhagao dia damna, hatna,kipana le hinna hiding ahi. Chule, alungdeiya nea-don nahija, na sempa, thiljouse sempa na loupe sahna hiding ahi.

Pathen in panpi jing tan.