CHONSELOU CHONSEA KISIMA CHONSEPA CHONPHA A KISIM AHI:

Vannoimite ngailutna jala Pathen in Achapa Jesu ch ahinsol ahi. Chapa chun Pa – thu jouse nit in, Van-mun loupia vantilte le vanmiten Pakaiya aneiyuva, loupe le ja-uma aumna mun chun hindalhan, nang le keiyin ‘chonset’(Satan) vaihopna noiya leiset hahsatna i-thoh jinguva, tonsot-geiya ithoh diuva kona ei huhdoh diuvin ahung tai.

Pathen Chapa Jesu chu mihem lim le mel pun Bethlehem bongin a ahung pengin, mihem ahina a anu le apa thua nungin, pilhingset kum 30 ahi phat in Pathen Huhhinga thu le Pathen Vaihopna (Pathen Lenggam) thupha ahillhang len, nat kidang ho boldamin; aathi jong kai thouvin; lhagaoboh suhgenthei le hahsatna thoh tampi tahsa le lhagaovin ahuhhingin; Kipana thupha aphongjal letai.

Chonset beihel hinkho amaan jouvin, Jesu chu, mihemte (nang le kei) chonset le suhkhel jouse ( ahinsukhel ding ho gei) chonset le setna jouse aman chunga kilah in thingpela apodoh tai.

Aman chonset neilou ahi chu Pilate hihen vaihom dang ho jouse le achungthu tandia adinna jousen jong asuhkhel amudoh pouve. Hinla, Pathen thilgon ahin, Jesu chun ama chamtah a mite chonset akipoh ahi jeh chun chonsen (nang le kei chule mijouse) chonset po in Thingpel (Cross) in khet beh in aumtai.

Pathen thua kisun bangin, Amanla chonset neilou chu iti sapsetna chang ding ham? Sapsetna changlou ‘Thingpel’(Cross) a kikhenbeh ngai am?

“Danthua kisun chu, “Thinga kikhaisang tapou chu gaosap chang ahi,” kiti ahijeh in, Christa chu eiho jal’in gaosap achangin, Danthu gaosapna akonin eihung lhatdam tauve.” (Galati 3:13)

Mite chonset apoh ahi chu kicheh mong mong ahi. Thingpel in akikhenbeh tai.

“Chonset helouhelpa chu, Ama hinkhoa Pathen dihna ichantheina diuvin eiho khel’in, Pathenin chonse’n asimtai.”(2 Corinth 5:21)

“Aman eiho chonset jouse atahsaphe’n apo’n, thingpel chung geiyin apodoh in, chonsetna jousea ithiuva, themchanna a ihintheina diuvin aboltan, Ama kijepna maha’n eidamsah tauve.” (1 Peter 2:24)

“Chapa (Jesu Christa) jal’a eiho’n hinna ineitheina diuva Pathennin A-chapa changkhatseh vannoiya ahinsol, hichea hi eiho sunga Pathen ngailutna chu kiphongdoh ahitai.” (1 John 4:9)

            “Ajehchu chonset jeh a nanghodia Christa’n hesoh-genthei khatvei thoh a athoh a,midihlouho dinga midih chun athoh a, nang ho Pathen kom nalhut theina diu abol ahin,tahsaphea thia Lhagaova hing ahitai.” (1Peter 3:18)

           CHRITA’N ACHAM TAH A ATHOH: “Tonsot Lhagao jal’a Ama chamtah a nolnabeiya Pathen henga kilhaina gantha dinga kikatdoh jeng Christa thisan chun Pathen hingjing lhacha kinbol dinga, athisa natoh chengsea kona, eihet khen nau lungthim hohi gamchenga asuh thengjoh ding ahi.” (Hebrew 9:14)

Tunin, kigelin. Nachonset apohsa ahitai. Chonset chu athisana athoiya asoptheng ahitai.

Pa pathen in mihem jouse konna Adam koma “Na neh nini nathi teitei ding ahi” atisan ahi. Asei thonngailou Pathen chun aseisa chu abolteitei ding ahi.

Chapa Pathen chun, “Ka lim le mel pua kisemsa mihemte chu tonsot a amahthah sangin, ama ho khel in ka hinna le ka thisan penange” atia, eiho jouse thiding khela Ama hung thia ahitai.

Pa pathen in Achapa Jesu kipehna chu apompeh in, Achapa Jesu thi chu Achapa tahsana Huhhingpu le Pakai dia kisan jouse khela thi in agel tai.

Eiho hetbaidin kiseile :  Chapa Jesu thohna chu ‘MIJOUSE DING’ ahi. Hinla, Pa Pathen in ‘ATAHSAN JOUSE DING’ in apom ahi tithei ahi. Ajehchu, Bible in “atahsan jouse” ati ahi.

 ‘Huhhingna’ ‘Pathen Cha hitheina’, ‘Jesu lhatdamna kinbol phatchomna’ nachan theina dia tahsana nakisan ngaiya ahi.

Hijeh chun, tuhin, taonan, Jesu kouvin. Na chonset phongin, ngaidam thumin. Nang khela athi jalin kipathu phongin. Na hinkhoa nachunga vai homa pang(na Pakai) dingin kitemin. Chonset thaneina, setna jouse najopeh a, chonset (Satan) thaneina jousea kona na ‘huhdoh’ din ngeh in. Pathen cha dia nasema, Pa lungdei hinkho namana, Christa nunchan jom nahisahna din Lhagao Theng thahatna napanpi jing din ngeh in.

Chutile, Aman napanpia, tonsot geiya Amato hinkho mang theidia ‘Pathen Cha’ naso ding ahi. Tua hinkho jenga jong, tahsa le lhagaova phatthei naboh ding, na panpi jing ding ahitai.

Pathen in panpi jing tan.

(L.K.Hengna 20/3/2015)