JESU SILLOU HON PATHEN LENGGAMA MUN ANEIPOUVE

Jesun athiding phat ahunglhun ahetai. I-jakai Pa’n akhut’a apehdoh a, Pa-henga kilekit ding ahi ahetai. Hijehchun, aseijuite, an anehkhompi laitah in akipatdoh-in, seijuite keng asilpeh-in, pon in atheh pehtai.  A Pakaipa tah in ama ho keng asop a, athehpeh jeng chu Peter anom tapoi. Hijehchun,

Peter in, “Pakai, nangin kakeng neisilpeh ding ong?” atileh;

Jesun, “Tupet tah-in kabol hi ipi ahi nahepoi, ajo teng henan nate,” ati.

Peterin, “Nangin a-itih a jong kakeng nasil louhel ding ahi,” ati.

Jesun, “Nang kasil loule Keiya nangin chan naneipoi,” atipeh-e.

Hichun Peterin, “Pakai, kakeng te ni keo hilouvin kakhut te ni le kalu jong ahe,” ati. (Joh 13:3-9)

Hichun avetsah chu, koihile Ama (Jesu)  thisana kisillou chun Pathen Lenggama mun aneilou ding thu aseina ahi.

Hichethu kasima, Pakaiyin, aumdolthu eihetsah chun, ka eodoh jeng in, “O, Peter, Peter, nasei dih val jenge!” katin, chule, kalungin kataaovin :

“Pakai, keijong, kapum in nei silin, kalungthim le ka lhagao jouse jong silin, na thisan thengtah achun!” katitai.

 Hichun, lungmonna le kipanan kahung dimtai.

Christa a ka insungmite, nang jong Jesu thisana nakisilngim tah ding kakineme. Ijemtia, kisil loulai, Ama thina hi kipana le lungmonna, Pathen-to kikhutjopna thah hinkho mang loulaiya, chonset in na thunun jeng nahlai-le, tuhin taonan Jesu kouvin :

“Pakai, keijong, kadinga hung longlha, Cross chunga kadinga nathina, thisan chun neisop in; kapum in nei silin, kalungthim le ka lhagao jouse jong silin, na thisan thengtah achun! Kadinga nathina-ga chu neipen. Ka Pakai le Huhhingpu hung hinlang, kahinkhoa hin hung vai homin. Pa deilam in neipuiyin” tin taovin.

Ana kisansa nahija, chonset najopeh a, chonset hinkho mang talouva, Christa vaihopna hinkho manga nahitah-le, midang ho panpi jingin.

Pathen in panpi jingtan.