NA HINNA DIA JESU THIA AHI

Pathen Chapa chu vannoi chonset akona nang le kei huhdoh dia leiset a hunga, JESU ( huhhingpu) hung hija ahi. Ama Pathen Chapa ahijeng vangin, Pa lungdei holin, Vanmun nopna le loupina jouse dalhan, Pa thua nungin, leiset a, nang le kei eiyin tonsot-hinna ineitheina diuvin ahunge. Mihem in ahung pengin, mihem tahbeh hung kisoh in, genthei le jum le jachat, lungdon-lungjin thoh in, Cross chunga kikhenbeh in, thina gei atoh tai. Hichu, nang le kei tonsot damuna i-umdiuva kona ei hung huhhing nau ahitai.

 “ Aman Pathen lim le mel aput jing jeng vangin, Pumhat’a Pathen to kibah ding agel naisaipoi; Ama chamtah-in keohel’in akilhan, Soh lim le mel akivon jon, Mihem khat bangin ahung umin, Mihem bangin mihem mel’in ahung kilah-in, Thina chan geiyin achamtah-in akineosah-in, Thingpel’a thina chan geiyin thun anunge." (Philippians 2:6-8)

Achamtah in, Cross ajonin, thina atohtai. Hinla, thinan ahenjouhoi ahipoi. Ama tonsot Pakai ahi. Thina hi chonset tha-hatna ahi. Chonset tha-hatnan ajohoi ahipoi – I-Pakaiyu Jesu hi. Ama ‘Christa’ ( tonsot Lengpa’ hidia thao kinu) ahi.

Hijehchun, nithum nin athoukit tai.

“ Hijeh a chu Pathenin Ama chu munsangpen chungvuma akhansanga, Min jouse sanga minthangpen apeh ahin; Hijeh a chu van le leiset chule leiset noiya cheng jousen Dilsua Jesu min’a chibai aboh diu; Chule lei jousen Pa Pathen loupina dinga Jesu Christa chu, ‘Pakai’ tia aphondoh cheh diu ahi." (Philippians 2:9-11)

Hiche, athohna chu nang le damna ding ahi. Nang inla na hinpi tah em? Na dampi loulaile, tuhin, taonan Jesu kouvin. Na chonset jouse phong inlang, ngaidam thumin. Nangaidam ding ahi. Na Huhhingpu le Pakai din kisanin, na kisanna thu phongdoh in, akoma.  Nahinkho chu Ama khut a pedoh in. Aman nangma dia phapen pathen lungdeiya nahinkho apui jing din ngeh in. Chonset najopeh a, Pa lungdei hinkho namansah dinga, na chin jingdin ngeh in.

Hitia, chu tahsan tah a, nataova ahile, Asei thon ngailou Pathen in na ngaidama , Acha naso ding, Christa a hinkho thah, nunpha le dei um, kipa le lunglhaina hinkho nap eh ding ahi.

Chule, nang jong ha kibolin, nitinin Bible simin, tao jing jengin.  Ama kilamkai sah in, nundan pha, tohpha tongtheiya, lungdih, lungnem, thenna hinkho mang thei ding le, akina pangtheidin Lhagao Theng panpina thum jingin,

Chutile,  “Jesu Christa sunga cheng lungput chu nang ho sung gil a jong cheng ding ahi.” (Philippians 2:5)

Pathen in panpi jingtan.