HUHHINGNA NGAICHA CHEH IHIUVE

1.      Bible’a kisun thuhohi Pathen in asei, ageldan, ahi-sah thu ho ahi.

Bible in “Mijouse chonse-a Pathen loupina changlel ahitauve” (Romans 3:23) ati.

Nangin “kachonsepoi” natile ‘mi’ (Mihem) nahilou hinte. Ahiloule, Pathen thusei hin nang nahoptha lou hinte.

Pathen hi thiljouse sempa, nang le kei jong eisempau ahi. Natahsa, nahinna, na hinkho, nahinding, nadamding, nathi ding, navom ding nakanding, aboncha Pathen thu thu ahi.

Pathen in mijouse hi achonse-a akoiya, Ama loupina chu achansah tahlou, apehsa alahpeh ahitai.

2.      ‘Pathen loupina’ ati hi ipi ham?

‘Pathen loupina’ chu ‘Hingjing, thitheilou, kikhel ngailou, abang hijingjeng’ hi ahi.

Pathen in mihem asema chu, Ama banga ‘tonsot hinna’ apeh ahi. Hichu, mihem nah homa alhalut ‘hu’ chu ahi. Hinla, mihem in athupeh nit-louva satan thua anun phat a Pathen in, Aloupina chu alahpeh ahitai. Hijeh achu, natna, hahsatna, gentheina, thina gei umdoh kha ahitai.

Mitamtah in, ‘chonse’ ahilam akihetpoi. Adeh in, aneova pat a mipha, ima suselou hohin, “Ipi chonset kabol em? Ipi kachonset kaphon ding, ngaidam kathum ding ham?” tin agelji.

3.      Pathen natahsan em? ‘Mi’ angollou jousen Pathen aum atahsan cheh e. Achutiloule, Pathen lekhabu Bible in “Mingollin alunggela Pathen aumpoi ati” tia asei ahi.

‘Mi’ nahin, ‘Mingol’ nahipoi. Pathen natahsane, Athusei jong tahsan in.

“Mijouse chonse ahitai” atihin, “mijouse huhhingna ngaicha ahi” atina ahin. Hitia atichu, “Mijouse Ka huhhing ding ahi” atina ahikit e. Pathen thusei ngaijouse ‘Huhhingna’ chang ding ahi.

4.      Nang jong Pathen ‘huhhingna’ hi nachan ding ahi, asei hi ngaiyin.

Pathen in tonsot’a Amato chengkhom dia eina semu ahi. Pathen umna achun hahsatna le gentheina, natna le gentheina aumpoi. ‘Chonset’ hung um jeh a hahsatna,gentheina,natna le thina humg uma, hinkho hi boina dimset ahin, thina gei umdoh a ahitai. Nang jong nathi tei ding ahi. Ajeh chu, mihemte hi Pathena kona gamlatah a um ihitauvin, Pathen ‘loupina’ (thitheilou, hingjing ahi’na) chu changlel ihi gamtauve. Hichu ahi, Pathen thu’n asei

 “Mijouse chonse-a Pathen loupina changlel ahitauve” (Romans 3:23)

5.      ‘Chonset’ kiti hi ‘Pathen deilouva um’ tina ahi. Chule, ‘Pathen lung toh-lou’ tina jong ahi.

Pathen chu ‘Athenga’ ahi. Mihem hi ‘athenglou’ ihiuve.

Na lunggel chu ‘theng jing’ theiya nahet em? Nang le nang jong nakideimo kom, nalunggul nangdia phalou kom uma nahet em? Nalunggul le nalungsat bangin chon lechun khonunggeiya nangdia phamo dia nahet kom um am? Nanu-napa, nangailupeh ahi. Abanin, naji-nacha, chule na insungmi, nagolpha ho ahiuve. Ama ho nathet kom, adiuva naphatmo kom umji am?

Natahsa, na gilpi, nathin, na lung le namit, naha, nakol, le adang ho thohmah nabolnom, nanehnom, nagelnom kom um kha am?

6.      Natahsa le nalhagao ngailupen, nasempa Pathen lungdei dia nagel le nahet ho nabol nomlou kom, nathaset kom, thilpha bolding na jolou kom um kha am?

Hitiho chu nanga aum jengle, Bible in asei ‘chonset’ chu nanga uma ahi. Nasunga, nathisan, anlungsunga ‘chonset’ chu chenga ahi. ‘Chonset’ in athua nanunsah, nahin thununji ahi. Achutile, Bible seibanga ‘michonse’ nahi. Nasukhelle, adihlou nabolle, tina ahipoi. Adihlou boltheina ‘chonset’ chu nanga hin achenge tina ahijoi.

Nanglele asukhel nahipoi. Mijouse chutia ahicheh e. Miphatah nati ho jong chute thou ahiuve. Hijeh achu, Bible in,

 “Mijouse chonse-a Pathen loupina changlel ahitauve” (Romans 3:23).

Hitobang ‘chonset thaneina’ a kona chu nahuhdohthei, mihem koima aumpoi. Mipha, nanu-napa le nangailu mihem tamtah in nachintup a thilpha nahila, nakaihoi jinga, nangma jong nasatah a naha kibol vangin, ‘chonset lunggel’ nanei jing theiye. Hichu, koiman ajo theilou ‘chonset tha hatna’ nasunga chenga chu ahi.

7.      Koi ham ‘chonset thaneina’ joutheiya? Pathen, Jesu Christa bou ahi.

Jesu hi Pathen ahi. Leiset a mihem a ahung chun mihem hi’na aneiye. Hijehchun, ‘chonset thanei’ (Satan) chun ana lhemin, mihem maiya hung ahile ajodin ana gele. Hinla, mihema ahung jeng vangin, Pathen ahi’na a thaneina chu anei jinge. Hijeh chun Satan in ana joupoi. Leiya alenlaiyin, mihemte hahsatna, natna le gentheina jouse atoh in, apanhu theichan apanhutai. Hiche ‘chonset thaneina’ jouse chu atahsa le lunga po in, Cross chunga, hiche mihem tahsa aneichu Cross chunga akhetbeh sahtai. Hichun, Ama tahsanna kisan, mihem jouse chonsetpo tahsa chu akhetbeh ahitai.

Chonsetpo tahsa chu lhana vuiyin aumin, Pathen ahi’na Lhagao vang chu thina in hetjou louvin, loupe tah in athoudoh kit tai. Hichu, Satan thaneina ‘chonset’ chu athamit ahitai.

Chonset joupa Jesu Christa tahsana, Leng le Huhhingpu dia kisan jouse chu Pathen in Lhagao Theng (Pathen Lhagao) chu apeh ji ahi. Masanga ‘chonset’ ana chenga, ama deideiya achonsah chu, Lhagao Theng in ‘chonset’ chu anodoh a, Ama chu Atahsanho lungsunga cheng a, alunggel-ngaitona, ahinna jouseu chingtup a, amanchah ji ahitai. Hitia chu, chonset jeh a suhkhel, tohkhel, thildihlou anaboljiho chu bolkit talouva, adih le aphalama apuiji ahitai. Hichu, ‘chonset thaneina akona Huhdoh’ tina ahi. Hiche kin chu ‘Huhhingna’ kiti ahi.

8.      Jesu Christa huhhingna changa Lhagao Theng in achenpi hochun nunthah aneiyuva, hinkho aman danu chu hung danglama, hinkho – nundan thah chu ahinnei jiu ahitai. Hichu, “Penthah” jong akiti. Hijeh achu, Bible in

 “Koihile Christa a um chu thil semthah ahitai. Alui (nunlui) chengse chu abeiyin, ven athah ahitai” (2 Corinthians 5:11) ati ahi.

Jesu Christa tahsan (hinna thah nei) jouse chu Pathe chate kitiuva ahi(John 1:12).

Hinnathah neilouva chu Pathen cha hitheilou ahi.

9.      Bible in, “Na Penthah tei ding ahi” (John 3:7) ati ahi.

Phatecha Jesu Christa huhhingna chang ho chu ‘chonset thaneina’ hin ajolou ahitai. Mihempa chu ajolou ahipoi. Asunga cheng Lhagao Theng chun ajopehji ahi. ‘Chonset thaneina’ chun asuhboilou ahipoi. Ahin suboijiji nai. Hinla, Lhagao Theng chun ajopeh jithou thou ahi. Hichu, Jesu-a hinnanei’ ahi hetna ahi. ‘Jesu-a hinna’ chu ‘Lhagao Theng’ nei, chenpi tina ahi.

‘Chonset thaneina’ chu nanga um nalai am? ‘Jesu-a hinna’ nanei miho Pathen apeh dia asei ‘Lhagao Theng’ hi nanei tah em?

Huhhingna chu nachantah em? Nachan, nanei loulai-le  nanei nom em?

Kihilna, kikaihoina phatah nanei-le msg in hinseiyin, koiman nasei amulou- ahetlou ding ahi. Kahinthotna ding na email address hinpen. Na umdan le na ngaichat banga kihilna namuding, taona jong kahinneipi ding nahi. Email naneiloule Mobile in jong kihon jengin. Chule, mobile keu naman ham ole Computer naman em hinseiyin. Nasimthei dia hinthot abailam nadin.

Pathen in panpi jing tan.