JESU DIHNA CHANGIN HINNAN NEIYIN

Pathen hi dihchamkim (Righteous) ahin, midihlou chun akom ajontheipoi. Mihem koima adih aumpon, chonse kijen ihiuve. Pathen dihna le loupe le ja-umna chu koima achangthei aumtapoi.

Hinla, Pathen in amihem semsate angailut jal in, atahsan jouse themchanna din Achapa Jesu chu vannoiya ahinsoltai.

Jesu leiset chunga ahungin, chonsetbei hinkho amang lhumkeiye. Chubanin, mihemte chonsetna jouse apon, Cross chunga ahinna toh in athitai. Jesu natohphat chu Pa Pathen akipah lheh jengin, loupitah in akaithou kit in Pa Pathen in jetlama atousah in, lei le van chule asunga umjouse chunga thuneina apetai.

Koihile Chapa Jesu tahsana Huhhingpu le Pakaiya kisan jouse chu Pa Pathen in Jesu kidihchamkima (Righteousness) chu atahsan jalun lungsetna bulhingset neiyin achansah in, themmochanna ding jouse ngaidamin themchang din aphongdoh tai. Hitia Jesu natohpha le phatna chang jouse chu ‘tonsot hinna’ apetai.

Jesu dihna chu tahsante dia adihnauva Pathen in asimpeh ahitai. Jesu dihna chu eiho atahsanten Pathen loupina ichannau ahitai. Hijeh chun, Bible in aseiye,

 “Tun vang Danthu le Themgao hon ahettohsah Pathen dihna chu Danthu vang hilouvin ahung kiphongdoh tai; hiche Pathen dihna chu Jesu Christa tahsan vanga atahsante jouse ding ahin, koima imachom aumpoi; ajehchu mihem jouse chonsea Pathen loupina changlel ahitauve; Jesu Christa’a lhatdamna jal’a lungset vang’a manbeiya them changkha ahibouvui; Pathen in Jesu chu athisan jala tahsan vang’a kithoidamna dia miho chonset chesa asuhbei photchetna a Ama adihje phondohna dinga atundoh ahin, Jesu tahsan chan chu them achansah in, hotobang hin Pathen Amatah adihje avetsah in ahi.” (Rome 3:21-25)

Nang jong Jesu Christa hi na kisana, Amatoh hinkho mangkhom nahitah ding akineme. Achutitahle kihet in,

 “ Tahsan jal’a themchang ihi phat’un i-Pakaiyu Jesu Christa vang’a Pathen to kicham ihitauvin, Ama jal’a idin nau lungsetna ahi lut theiya, kipah thanom’a Pathen loupina chang dia kinem jing ihiuve.” (Rome 5:1-3)

Hijehchun, “ Ama khovah sunga aum banga,eiho jong khovah sunga ivale vangule,eiho khat le khat kiloikhomna nei ihiuvin, Achapa Jesu thisanin chonsetna chengsea kona eisop theng soh’u ahi. Eihon i-chonsetna jouseu iphondoh vang’ule, ichonsetna jouse ngaidam ding le thenlouna jousea kona eisutheng diuva, Ama chu tahsan umtah le dihtah ahi.” (1 John 1:7&9).

Chonset hi thina khop-hel aumin, thina khop hilou, hinla, Christa-to hinkhomna susethei le Pathen lunglhailouna, chule, adingdola panpina le phatthei channa muda theina aum jinge. ‘Thinathei’ chonsetna chu ‘Jesu tahsan lou le kisanlou hi ahi. Chule, chonset dang ho chu nitina suhkhel kinei hohi ahi.

Jesu tahsana kisan nahitah-le, thina theikhop chonsetna chu napeldoh ahitai. Nitin suhkhelna chonset hohi, nasuhkhel ho taonan phongdoh inlang, ngaidam thum jingin. Chule, Lhagao Theng panpina le chonset-gal jona nape din Jesu minin thum jingin.

Kisanloulai nahile, phat kichaikah in, tuhin kisanin.

Pathen in panpi jingtan.