JESU LUNGDONNA HAPTA

Hiche hapta sunga hi I-Pakaiyu Jesu Christa’n amite chonsetna akona ‘lhatdohna’ dia kiphaltah a Cross ajotjengna phatsung ahijal a  ‘Passion Week’ kiti ahi.

Hiche hapta sunga hin thilsoh tampi aum’e : 

1). Jesu’n avelni channan Hou-in asuthengin (Luke 19:45-46) ahile Pharisees hoto akinellouve, athuneina chungchang in.

2). Olive mola thuhil (Olivet Discourse) aneiyin, phat kichaiding thudol, Ama hungkit ding thu le thudang tampi hilna aneiye.

3) Jesu’n aseijuite-to ‘Jan-an nukhah’ chu Jerusalem indan chungnunga aneuve (Luke 22:7-38).

4). ‘Jan-an nukhah’ anehjouvin, phat hunglhun ding ngana a taona mangdin Gethsemane hon lam ajontai.

5). Gethsemane hon ahin, Judas in amatsahtai.

6) Achungthu tandin Thempu-chungnung ho, Pontius Pilate, le Herod anga dinsah in aume(Luke 22:54-23:25).

7) Achungthu tanjouvin, Roman sepaite pehdoh ahitai. Sepaihon, ajep un, adaithangun, totnopnan amangun, chuin, aki khetbehna ding Cross aputsah un Jerusalem khopamlama apuitauve.

8).  Lugumun kiti ‘Golgotha’ muna chun Cross in akhenbeh taove.

9). Hiche nikho chu Judate choldoni ‘Sabbath’ ni masang ahin, vuiyin aumin, Judate choldoni ‘Sabbath’ nikho sungse lhana alumina hi.

10). Judate choldoni ‘Sabbath’ kichai nikho masapen, Sunday nichun athoukittai : (Matthew 28:6; Mark 16:6; Luke 24:6)

Pharisees  le Rom vaipoten that joulouvin,

Thina le lhan in henden joulouvin;

Satan le atha-hatna ‘Chonset’ le ‘Thina’ jouvin,

Lhan kotkhah song phu-hongin,

Loupi tah in athoukit tai!

                               Halleluiyah, Amen.

Jesu Christa chu athoukit in,Atahsante jouse thokitna ding lampi semin apangtai !

“Keima Lampi, chule Atahbeh, chule, Hinna Kahi. Keiya kon tailouvin koima Pa-kom alhungngaipoi” (John 14:6) tia asei chu photchetna ahitai.

Ama Pa jetlama touvin, tonsot a dia vaihom ahitai. Anungjuite jouse tonsot geiya Amato cheng khoma vaihom khomding ihitaove.

                          Loupina Pakai changing tahen. Amen.

Hiche lai hi, phatechan velechun, thilkhat uma ahi:

Genesis bula kimu — Pathen in nigup sung thil asemin, Nisagi nin akicholdo tai (Genesis 2:2-3) Hiche, Nisagi-ni chu ‘Atheng’ tin aphongdoh tai.  Hiche, nikho hi i-Pakaiyu Jesu kicholdoni jong ahitai.

Jesu’n, Ahinlai sungse ‘Pathen Lenggam’ kin abolin, athia alonglupni, hiche Nisagi-ni, ‘Sabbath’ nikho lele hin lhana akicholdo’e.  ‘Sabbath’ kichainin athoukit in athoukit in, ‘Pathen Lenggam’ kin abolkittai. Seijuite akimupin, thu ahilin, tunigeiyin, Lhagaovin na atongjingtai, akhonni geiya atoh jing ding ahi.

Chule, Genesis a kisei, Pathen thilsem dan hito mihemte hinkhoa Jesu Christa’a ‘Hinkhothah’ hunh umdan hi akitoh kit’e.

Pathen in thil asem masanga chun ‘thimpi’ ajing’e. Pathen in, “Vah hung umhen” ati phat a ‘Vah hung uma’, hiche nia kona chu thildang jouse ahinsem ahi.

Lhagao hinkho jong chuti ahi.

Pathen hi ‘Vah’ ahi (1 John 1:5).

Jesu hi ‘Vah’ ahi. (John 1:9)

Pathen chenna mun, vaihopna mun, Pathen Lenggam hi ‘Vah’ ahi.

Pathen umlouna, Satan vaihopna, Satan gam chu ‘Muthim’ ahi.

Mihem in Jesu Christa akisan masang hinkho hi ‘Muthim’a um ahin, Satan vaihomna ‘chonset muthim’ a uma ahi.

Min Christa akisantengle, “Pathen cha hunghi ahitai’(John 1:12).

Pathen cha chu Pathen koma um, ‘Vah’ a um ahitai. (1 John 1:7)

Min, Christa chu Huhhingpu le Pakai dia nakisan-ni chu, Pathen insunga achenpatni, ‘thilsemthah’ (1Corinthians 5:11) ahipatni ahitai. Thilsem lama seidin, ‘Penthah-ni’ chu ‘Sempatni’, nikhatni,  ‘Vah’ umpat-ni (Genesis 1:3)ahi.

Na penthah tengle nanga chu ‘Vah’ chu uma ahitai. Hinla, Christa-to hinkhomna lama nakhantouna din, nanga chu Lhagaotheng le nangma, chule, midang ho chenna ding ‘Lei le van’ ahinsem tahding, tui le asunga umho, Vanthamjol le avela umho, Nisa, Lha le ahsi; ganhing le louhing ho ahinsem ngai nalai ahi. Chutengle, ‘Pathen Lenggam’ chu nanga um ding ahitai.

Rivival, Crusade, Camp, ibol’un, min thu chu ajah tengule, Christa chu asangji nauve. Hinla, hichu ‘Sempatni’ bou ahin. Kipuihoina, kihilna aumji loujeh in, Nini- nithumni chan jong umdoh joulouvin, akitangden jitaove. Chuteng, “Revival, Camp, Crusade’ jong aphachompoi. Vetau, hichepa jong khu abangbang hikitta khu” itiji tauve.

“Kikaihoina pha umlouna, Kelngoiten Lhagao anpha amulounau Houbung chu akhangtou ngaipoi”.

“Revival, Camp, Crusade’ a lamkai din eima sunga mi hilou, melthah don, maljin dom aphai. Ajeh chu akimu jing hohi min avohnom behseh poi. Amaho chun, khatvei dia mipi achothouva, mikonkhat in ‘Christa chu akouva, akisan tah-le’ aban chu, Houbung sunga lamkai ho kin ahitai. Kipahtah a, akisannau chu, ‘Nikhat nia’ sanding. Nini apat nisagi gei thil chu asohna dia Houbung lamkai hon kihilna aganpeh diu ahi.

Houbung lamkaiyin ahildiu, apuihoi diu tina ahidehpoi. Mihilding agonpeh a, akihilnau chu avila, avetpi jiji ding, tilkhouna le taopehna aneiji ding ahi,

Jesu Jerusalem agalut chun, Juda mite le aseijuite geiyin jong, Rome solkal vaipohna noiya aumnauva kona jalenna apeh’uva, Israelte dia David banga leiset a lenggam atundoh din anagelun ahi.

Hijehchun, mipi kipah in, achena lampia chun akigolun, apon hou aphauvin; konkhat in theoboh (Lusudo -Palm Leaf) kichoiyin, kipah in asamun

“Pakai min a hungpa hi anunnom’e!

David Chapan huhhing hen!” (Matthew 21:9) atiuve.

Amahon, leiset lenggam tungdoh dia anagel vangun, Jesu’n leiset thu agelpoi.

Chomkhatjouva, amaho gelbang ahilou amu phat’uva, mipi chu Jesu douva panga, amatsah’a panga ahitauve. ‘Hossana” tiho mama chun, “Cross a khenbeh in” ahintiu ahitai(Luke 23:20-21).

Hinla, mipi chun, ahetlou vanguva, Pathen thutep bulhinsah na’a, anasap’u ahi.

Leiset a leng ho itih a Sangan chunga atouva gal asat khah’u vem?

I-Pakaiyu Jesu chu leiset lenggam tungdoh dia hunga ahipoi. Alenggam tundoh chu, ‘Pathen Lenggam’, mihem sunga Pathen vaihopna mun, Pathen thu nitna lungsung semtoh a hunga ahijoi.

Hijehchun, koima toungailouna Sangan chunga ahung touve.

Koi hijongle, Pathen chenna le vaihopna, Jesu Christa vaihopna lungsung le hinna neina dia ‘kineosahna’ angaiye.

Mipihon, ahetlou avanguva, “Pakai mina hungpa chu anunnom’e” tia asap’u chu adihtahbeh aseidoh’u ahitai. Jesu chu Pathen mina hunga ahin, Pathen hinsol ahi aphondohnau ahitai.

Koihile, Pakai mina kalsong jouse “Anunnoma ahi” ahiuve.

“Kipana thupha hinpole ho keng chu iti hoi hitam!” (Romans 10:15) tia kisei Bible a imuve.

Jesu chena lampia “Pon” aphau jong chun, Jesu Christa ‘Huhhingna’ channa dia kingaitom angaije eihilui.

Navonlui, kiletsahna, louchalna, lungtahna, lungmonna dihlou, monsolna,namijelui chu apailhan; kingaitom in, nunnem in, kingainemin nalungkot hongin. Chutile, minunnempa, Huhhingpu Jesu Christa chu nakoma hunga, nasunga cheng ding ahii.

Hiche khanglaiya chu ‘Lusudo, tumkao’ chu ‘jona’, ‘galjona’ melchihna (Victory Symbol, Victory Fla) a kimang ahi.

Pathen lam sanga, nanunchan (navon)lui phalou napailhah’a, taona’a Jesu nakoutengle, Ama nalunga hung chenga, vai ahop’ a, na Lengpa, na Huhhingpu le na Pakai hung hiding ahitai.

Chutengle, Aman nanga um chonset thaneina jouse chu najopeh a, Pathen cha naso ding, chonset gal najopeh a, ‘Galjona’ nachansah ding ahi. ., ‘Jona tumkao’ chu nadopsang ding ahitai.

Navonlui, nanunlui phalou jouse chu nakheldoh peh a, nunchan pha, athah (vonthah) chu napeh ding ahitai. Goljoupa, galjounu nahisah ding ahi. Kipanakim, nunnopna chu nachan ding ahitai. Chutengle,

 “Koihile Christa a um chu thilsemthah ahi, alui chengse abeisoh in, ven, athah ahitai” (1 Corintians 5:11) kiti chu nahiding ahitai.

Ven, tunin, Jesu nakoma ahung e. Na Lengpa din ana kisanin.

                       Pathen in na panpi jing tan, Amen.