Athu hi phatecha gelchenin tao pumin simin, Pathen lungsetna changin:
“Danthu them ho le Pharisee hon ajon pettah a kimandoh numei khat ahin kailut’un, Jesu to akah-uva adinsah-un, ajah a, “Houhil hiche nu hi ajon pettah a kimandoh ahi.
Danthua chun Mose’n hitobang numei ho songa selih dinga asei ahi. Nangin iti na-ngaitom?” atiuve.
Ama hetsahna theiya akipalna dia aseiyu ahin, ahinla Jesu abungin akhut jungin tol ajih tai. Amahon adoh tei tei jeng phat’un Jesu ading jangin ajah-uva, “Nalahuva chonsetna neilou pen chun amanu hi songin sep masapen hen,” atin; abungin tol ajih kittai.
Hiche hi ajah phat’un a-upapen hoa pat’in khat khat’in adalhauvin Jesu le numeinu chubou alailunga aumtai.
Hichun Jesu adahdoh-in ajah a, “Numei, hoiya umtauvem? Koiman themmo nachan lou hitam?” tin adonge.
Amanun, “Pakai, koiman themmo eichan tapoi,” ati. Jesun, “Kenjong themmo kachan poi, chen lan chonse kit ta hih-in,” ati. (John 8:3-11)
Ajon pettah a kiman numeinu hi vangse kanasaji. Chule, athu hi thusim bangin kana simji. Pakaiyin kalunga hetna eipeh nichun, hichenu hi ‘numeikhat’ hilouvin, kei kahi kakihetdoh tai. Ajeh chu -
Pathen tahsan le Jesu Christa kisansa kana kihisah jing laiyin, alungdei hethemlou le boltheilou, alungdei hinkho mangtheilou kanahi. Chonset jona changloulai, achonse kanahi jing ahi.
Pathen mitmu din chonset hi alen-aneo aumchom behseh poi. Numei khat jon lunga navet jong chu, Pakai mitmua najonpi ahitai. Numei khat in pasal khat ajonpi dia agot le agutten jong chu Pakai mitmua ajonpi ahitai.
Mihem mitmu le mihem gel dola thilse bolkhel hih jongleng, Pathen in thilgon - Jesu Christa tahsana Huhhingpu le Pakai kisan dia agonsa, keiman kakisanloule achonse jing, ajong jing kahi. Hichu, Pathen mitmudia, ajonpet tah a kimannu chuto thakhat kahi.
Numeinu chu avangse hilouvin, avangpha chungnung ahi.
Danthu them ho le Pharisee hon amat uva Jesu kom alhut’uchu mivangpha ahi.
Dan in na mat a michonse nahi atahlah ahi. Solchah Paul thusei geldoh in. Dan hi ase ahipoi. Chonse nahi nahila ahi. Dan jeh a chonse nahi nakihet-le, Pakai kom nabel ding ahi. Danin namat jeh a Pakai kom nalhun-le ngaidam nachan ding ahi. Numeinu jong chute ahin, Jesu kimu tahbeh hojong chute ahi.
Lungthim thema dan peldoh a, themchan nagot sungsen ngaidam chang ponate. Dan chu kimatsah inlang, nachonset kihet in Pakai kom belin. Chutile, ngaidam nachan ding, hinkhotah nachan ding ahi.
‘Achonset sela chu them chang louding ahi. Chonset phonga dalha vang chu ngaidam chang ding ahi’ tia Bible in asei ahi.
Dan in namat ahitai. Tun, Jesu kouvin, nachonset thumin. Aman nangaidama, hinkhothah napeh ding, them nachan ding, tonsot geiya amato nachenkhopi ding ahi.
Nang jong, dan le Hou lamkai ho hihen midang hon jong themmo nachan jingu, miphalou le mijonga nagel jing maitheiyu ahi. Hinla, Jesu hi taonan kouvin. Tahsanna lhingset le ngaicha mong mongin kouvin. Chonset najopeh din kouvin. Aman nakimupia, na ngaidam ding ahi.
Nangaidam iti nahet ding ham? Na mit ala mutheilouva.
Chonset najopeh ding. Chonset nun nadalhah sah a, hinkhothah, hinkho theng napeh ding. Na hinkho thah chu akahntou banga nakipana khangtou cheh cheh ding ahi.
Chapangpha, nungahpha, gollhangpha, houlamkai pha nahi manin ‘chonset ngaidamna le jona’ changing kigel hih in. Agomkom nato khah-le keibanga na manthah thei ahi. Nungah ( gollhang/ pasal) in agomkoma nachaithei hijeng nalai am? Sum in agomkoma na veilhuh thei hijeng nalai am?
Chonset hinkho na lhasah a, hinkho thah naman theilou tokahsen, itobanga thusei them, houlamkai hi jongle, athuseiyu ngai hih in. Taovin, Jesu kou jing jengin.
Kei hinkhoa namuthei ahi. Pathen jalin, kaneova pat in seiset mong kana hikhapoi. Thei sunin hou lama kakipen. Lamkai theina le seitheina, hiltheina jong eipei. Hinla, jineiya, chule ka neiding jat cha kanei nunga Politics a kalut-le, masanga kana deilou tah ‘ju’ kahin don doh tai. Houbung a phatecha pan kanop kit phat in ‘ju’ chu ka moh haithei tapoi. Jan khovah dehdeh in jong, ju kangoltheina din kana tao ji. Hinla, ka taona chu Pakaiyin asang him himpoi! Ajehchu, thum dingdol kanathumlou anahi. Thum dingpen chu ‘Jesu Christa’ joh anahi kahedoh tai.
Pakai Jesu ngaicha mong monga ka koukou jeng phat in eikimupin, ei ngaidam in chonset eijopeh in, hinkho thah, hindan le nundan thah eipetai. Midin ima hihih jongleng kei din vang ‘athah mong mong’ chu eiso ahitai’ ti kakimun, Pathen kathangvah jinge.
Hinla, kakitahsan vahpoi. Pakaiyin ei semkhel jong chu tahsanlelna kaneiteitei nalaiyin, lha sagi jen kangol nungin jong Houbung anga kipa thu sei ding ka nom poi. Kalungin :
“ michavai kahi ken kikihet a. Ka don tapoi, kangoltai kiti jongle, amun kivahlut hen; loi le golten ‘naki gospel sah e’ eitileu kidon kit jeng am” katiji.
Lha sagi jouva, tahsanlou ho kinneina hoa jong kache phat in, ‘ju’ chu eipe nauvin, ka mit in jong kamunai. Hinla, ka lungmit chun amutheitapoi. Gotna himhim aumtapoi. Kidangtah khat chu, mikhat in ‘ju’ eipehle, midang khat in “Pe hih in, sot a ango, ahitai” ahintiji. Hitobang hochu, Pakaiyin aseisahji ahi kahetai. Ka kipana asang cheh cheh in, nitin in akalsangbe be jeng tai. Hitichun, kei hitalouvin, Pakai Jesu’n eijopeh mong mong ahichu kahin muchen in, kumkhat jouvin ‘internet’ in ka ‘testimony’ kaseidoh tai, Pakai loupina din.Tuhin, kumnga ahitan, Pathen ka thangvah in ahi.
Nang jong Pakaiyin napanpi hen, cchonset jaopeh tei tahen. Chule, nahinkhoa aloupina phongdoh tahen.
Pakaiyin panpi jing tan.
(LKHengna 30.3.2015)
No comments:
Post a Comment