MIDIH BOU VAN GAM LUT DIU AHI

Midih ho bou van-gama lut diu ahi. “Midihlouvin Pathen leng gam alolou diu nahetlou laiyu ham?  Lhep chatvaiyin um hih un; jonthanhoi bol ho, doi houho, mito jong ho, pasal le pasal- numei le numei jong ho, gucha ho, neipap kilose ho, jukham ho, mi hanse ho, michom hat ho khatcha’n jong Pathen lenggam alo louhel diu ahi.  Nang ho abang bang hitobang chu nahiuvin, hijongle Pakai Jesu Christa min le i-Pathen’u lhagaova kisop ngim’a kithensoa them kichansah nahitauve. (1Corinth 6:9-11)

Pathen lekhabu-a kisun

 : “Midih khat’a khatcha jong aumpon, Ahekhen them’a le Pathen hol’a khatcha aumpoi; Aboncha’n akihei mangsoh tauvin, lam hilouva achesoh keitauve; thildih bol’a la aumtapo’n, khat’a khatcha jong aumpoi. Alol hom’u la lhankot kihongjah abangin, Aleiyu jong lheplhahna thujeng seiyin apang’e; ane-gei-noiyuva gulse-gu tobang aumin, akamsung’u la gaosapna le kase jeng adim’e;Thisan-sonading lam’a akeng’u asep jangkhaiyun, Alampiuva manthahna-hesohna aum’e; Chamna lampi ahepouve. Amitmu’vin Pathen gin-na aumtapoi,” kiti bang chun.”  (Rome 3:10-18)

Pathen deilhen lengpa David in jong, “ Chonsesa kijil’a themmosa hungpeng kahi! “ ati.(Psalms 51:5):

Pathen Themgao lah a jong alenloitah Themgao Isaiah jeng in jong aseiye, “Kelngoi vahmang-te bang’a ideilam cheh-a che-ah ihitauve! Ahi’n eiho talen donding Pakaiyin Ama adonsah-in, ithoh diu talen Ama’n athoh tai”.(Isaiah 64:6): “Ka boncha’ chonse-cheh kahiuvin, thilphapen kabol’u jong aboh jeng ahi. Kachonset jeh’un thing-na-go pullha-a hui-lhohmang bep kahiuve.” (Isaiah 53: 6)

Achutile, koima van-gama lut louding hitam?

Ahipoi. Jesu Christa tahsana Huhhingpu le Pakaiya kisana nei jouse chu ‘atahsan nau chu lungset mana’ Pathen in midih (chonpha) a eisanpeh’u ahitai. Hijeh achu, tahsante chu ‘chonpha, midih’ banga van-gam lut ding ihitaove.

“Ajehchu, mihem jouse chonse-a Pathen loupina changlel ahitauve; Jesu Christa-a lhatdamna jal’a lungset vang-a manbeiya them changkha ihibouvui.” (Rome 3:23-24)

“Ajehchu chonset man thina ahin, Pathenin manbeiya apeh vang chu tonsot’a  i-Pakaiyu Jesu Christa to hinkhomna ahi.” (Rome 6:23)

Hijeh achu, kipah thanoma, ei huhhingpau Jesu Christa mina Pa Pathen chu vahchoi jing jeng ding, tahsante i-kinu ahitai.

Hijehchun, hatah in boluhitin, i-thusei, neh le don, nun le khan, lunggel le ngaitona, hinkho mandan le i-hinnauvin Pakai choi-an jingute.

Hichu, eiho michonse le hatlou hin bolthei poute. Ama choi-at theina dia Ama mama panpina i-ngaichat jingu ahi. Ama Lhagao Theng panpi louvin koiman Pathen loupina din hinkho imangthei pouve ti hi Pakai Jesu’n ahet jala PANPI ding Lhagao Theng eiteppeh’u ahi. Hichu, phat tinin thum jingute. “Pakai, na Lhagao Theng in neiumpin, nei panpi jingin, nalungdei hinkho kamantheina din” tin tao jingute.

Pathen in panpi jing tan.