Pathen to Kimuto Kidanje

Themgao Isaiah in Pakai chu amu thu aseiye “ Leng Uzziah thikum [740 BC] chun Pakai kamui; laltouna sangtah in atouvin, alengponsil chun Hou-in chu alosoh hel’e.  Achunga chun seraphim adingun; lhaving gup cheh aneuiyuve. Alha ni cheh in amai akhun, ni cheh in akeng akhun, chule lhaving ni in aleng e. Khat in adang khat akouvin: “Atheng, atheng, atheng , Pakai Hatchungnungpen hi Atheng ahi; vannoi pumpi hi aloupinan alosoh e” tin aseiyuve.  Hitia, akihou nau ogin hin Houin bulpi khom jouse akithingsoh-in. Houin sung chu meikhu akijel let lut jenge. (Isaiah 6:1-4)

Pakai amuchun, ama chonse ahi akimuchet in, them changjou talouva, mahthah ding ahi ahechen  tai:

“Hichun, keiman, “He-kaden! Akichaihel kahitai; lei le kam thenglou kahibouve; kachennamun jong lei le kam thenglou kijet umna mun ahi; ijeh-inem-itle, Lengpa, pakai jouse Pakai hi kamu ahitai!” katitai. (Isaiah 6:5)

Kinepna ding neilou hija kigela, amahthah jeng dia akikoi phat in, kineppa neiloute kinepna Pakai, ‘Lunglengvai ho anunnom ahiuve’ tipa chun pan ahinlatai :

“Seraphim lah a khat chu kaheng lama ahungleng in, maichama mei-am khat chu  chaiche choiyin kamuh ahin kahsah’e. Hichun,  “Ven, hichehin namuh atong khatai; na suhkhelna jouse alamangin, na chonset jouse suthengna ding ahitai.” Eiti peh tai. (Isaiah 6:6-7)

Hitichun, achonsetna jouse suthengin, ngaidam achansah tai.

Hitia, Pathen in akimupia, asuhtheng hochu, akina pang din asolna nom jeh ahiji :

“ Hichun, Pakai Ogin kajai, “Koi kasolding ham, chule, koiham keiho (eiho) dia cheding?” ahinti. Hichun, keiman, “Kei ka ume ! Neisolin.” katitai. (Isaiah 6:8)

Kicheh tah a Pakai kimutopi hi, athaneina in eilodim tan. Koiman “michonse nahi” ati ngailouvin, chonse akihina akimu chenin, sonding aumji tapoi. Pathen in alolo eilo dia kipeh lhah tailou lamdang aum tapoi. Hitia, kipehlhahna chu Pakai panpina channa ahijitai.

Pathen in, chonset a thidingsa eihuhhing akimu chet tengle, hoilaimun hijong akina pan ding nopna le ngapna akinei jitai.

Nang jong Pakaiyin kicheh tah in nakimupi tahen.