PATHEN VETDATENPA MILOUPI SOHTA

Mihon “Pathen hi kidihtah le thengchamkim ahin, mijouse thu atanding, alungdei bang hilou jouse  themmo achana gotna apehding, damun meidila asolding  ahi” ti aseiyule, Pathen chu avetda tai. Pathen hi umdale’ ti agelin, ahotlheh tai. Pathen lungdeibang ahilou ding akihet in, themmo achan teidingin akigel in, avetda lheh jengtai.  

Mihon, “Pathen chu munjousea um, munjouse musoh, thiljouse hesoh ahi” atiule akicha kit in, “Kei jong hi eimuteiyintin, kalunggel le kachonna jouse hentin, themmo eichana, gotna eipeh teiding ahi” tin avetdan, athet cheh cheh tai. Peldoh danla ahepon, amuteiding, ahetteiding chula ahe-ngalin; aning kihalin, hinla, apeldoh dan aholhol in amudeh poi. Alung agimin, Hou lamkai ho agadoh-le,

 “Na chonset phongin, ngaidam nachan ding ahi” atiuvin, aphongjin, hinla, alunggimna le Pathen avetdana abeithei dehpoi.

Hou lamkaipan, “Pathen chu na ngailut ding angaiye” atile, aman, “Themmo eichana, gotna eipe dingpa iti ka ngailut ding ham? Thengtah in seileng, Pathen hi ka vetda tahbeh ahi” atitai.

Lungmonna aneitheina din Bible simin sun le janin ataotao jengin, sagoh keuvin jan khovah vah in, dap thoh in ataoji.

Nikhat hi PSALM 22:1 “Ka Pathen, ka Pathen ipi dia nei dalhah hitam?” tia kisei khu amun, hichu, Jesu’n cross’a akhetbeh’uva asei chu ahi ahen, alung adong tai.

Alungin, “ itidana, Pathen hin Achapa Jesu jengjong, athohgim pet adalhah jeng ahidem?” tin agelgel jeng tai.

“Keilele, Pathen in eidonda ham tia kagel hi, achapa chan-gei jong, bolgentheiya aumpet a ana dalhah ahi. Ipi jeh ahidem?” tin agelin, alunggim chehcheh in, Pathen avetdana anasa chehcheh jeng tai. Peldoh danla ahedeh pon, themmo achana, gotna apeh ding chula ahi ahen, akicha kit ngal e.

Akhonnan, Rom lekhathot a Paul in asei, “Pathen kidihna chamkim (righteousness) hi tahsanna’akonin tahsanna in ahung kiphongdoh tai, ‘midih chu tahsan jala hingding ahi’ tia kisun bangin” (Romans 1:17 NIV kalethu) ti hi asimdoh phat in –

“Pathen kidih chamkimna chu, Jesu Christa tahsanjouse suhkhelna, chonsetna angaidam le themchang dia akoina hi ahi” tin ahin-geldoh tai.

 Hichun, “tahsan jala bou mihem hi huhhinga um ahi” ti amuchentai.

Aman aseina achun, “hitia Jesu Christa tahsan jala mihem hi Pathen in them achana, huhhingna apeh ahi’ ti kageldoh nia chun Paradise kot chu hung kihonga kalut in kakihet tai. Jan muthimpia kona sun khovah a hung umin kakihet in, a Pengthah chu kahitai’ tin kakihettai. Bible kasim jousea chun, aseiho kahetdan ahung danglam in, kahin hechen thei gamtai” ati.

Hitichun, ahinkho ahung kikhel in kipana le thanopna, Pathen thu sim nomna ahin neiyin, Roman Cathalic Pope vaihop dan le huhhingna thu seidan jouse ahin choutan ‘REFORMATION’ aumdoh in, Pathen Lenggam nasatah in ahung machal pantai.

Ama hi Christianten sumil tapouvinte. Amin chu Martin Luther (1483 apeng. Reformation kipatna 1517 ahitai)

Eiho jong, chonse, ihicheh’uve, hinla, Pathen in, Achapa Jesu Christa tahsan jouse ‘huhhinga umdia’ atepna hi anit chamkim in, hichu a ‘dih chamkimna’ ahitai.

Nang le kei jong, chonphatna ineipouve. Hinla, Jesu Christa i-tahsannau hi ‘i-chonphatnauva’ Pathen in eisanpeh’uva, Acha dia eipomuva, i-suhkhelna jouseu eingaidamuva, huhhingna, tonsot hinna, ‘Pathen chate’ hina chu eichan’u ahitai.

Loupina Pakai chngjing tahen, Amen.