Bible in Chonset atihi Hechenin

Pathen thu Bible in ‘chonset’ atihi, mihem khat in miehem mu le het thei suhkhel aneiho mai hi kiseina ahipoi. Hiche ho jong chu ahop cheh nai.

Pathen chu Atheng chamkim, apha chamkim, kidih chamkim ahi.

Mihem in iti kihabol jongle Pathen banga theng joulou, kidih joulou, phachamkim joulou ahi. Pathen in Ama Limloa eisem’u ahin; Ama bang hidia eideiyu ahi.

Mihem hi Pathen lungdei bang ahijoupoi. Chusangin, alunga lunghanna, lhasetna, kineplouna, kipalouna, thangsetna, chan chunga lunglhai louna, eima gel le sei dih kisa a migel le sei dihmo sah, eima kipana ding, kichoisang ding noma, midang seiphat le eima sanga phajoa gelna neilou.

Hiti hochu, Pathen deilou kijet ahi. Hitia umchu, Bible in ‘Chonset’ ati chu ahi. ‘Chonset’ chu ‘Pathen dei bollou’ le ‘Pathen deilou bol’ tina ahi.

Mihem jouse hi velechun, mipha ahija, kitim thema  ‘Pathen deilou’ abolda khah jongle, ‘Pathen in boldia adei le asei’ ho jouse abolthei dehpoi. Hichu, ‘Chonse’ ahi’na ahi.

Nangla, ‘Chonse’ nahi em? Ole, ‘chonselou’ nahi jeng em?

Chonselou nahile Jesu Christa huhhingna hi nangaichatlou maithei ahi.

Chonse nahi-le, Jesu Christa kisanin. Itobanga chonse hijong lechun, Aman nangaidam theiye. Aman nangaidam-le Pathen ngaidamna change nahitai.

“Eiho chonset neilouva ikisei vangule, eiho le eiho kilhem lhaa, thutah chu isunguva um lou ahi. Eihon ichonsetna jouseu iphondoh vangule, ichonsetna jouse ngaidam ding le then louna jousea kona eisutheng diuva, ama chu tahsan umtah le dihtah ahi. Eiho chonse louva ikiseiyule, ama chu ijoubol’-uva, athu eiho sunga umlou ahi. (1John 1:8-10)

Pathen in panpi jingtan.