Nu Manlutje

‘Nu Nikho’ hi Nu ngailutna geldohna ding le Nu dinmun lutje hetdohna ding le nute ngailut ding thu seina dia kinit ahi.

‘Nu’ kiti hi mihemte dia min ngeipen le dei-umpen ahi (Pakai Jesu tailouva). Ajehchu, mijouse ngailutpen le mijouse ngailutna changpen ahi.

Mijouse dia, Pathen bana eingailupen’uva ‘Nu’ ahi. Eijen penuva, ann netheilou ihilaiyuva anoituiya eina vah’uva, thenje ihetmasanguva eina suthenguva, eiseilen penuva chu ‘Nu’ ahi.

Athisana chate vah achu ‘Nu’ ahi. Anoitui hi athisan ahi. Noitui achedoh chanin, ‘nu’ chu ahatmo cheh cheh in, alhasam cheh cheh e. Hinla, ‘Nu’ chun ama ding gellouvin acha ding gelnan, itlouhelin, acha chu ‘anoituiyin’ avah e.

Natna min atoteng akingainapen ‘Nu’ ahi. Hahsat-genthei le lungdonna’a kingaipen chu ‘Nu’ ahi. Inpha le loupi, neijongle ‘Nu’ aumlouteng chate, adeh a aneoho le a inneipan kipana aneithei dehpoi.  ‘Nu’ umlouna chu innom aumtheipoi.

Chapang in aka le alungdonteng akoupen chu ‘Nu’ ahi. Pasal jong itobang kinasatsah hijongle natna atoteng anu, ahiloule ajinu bou angaipen le akingapna pen ahi. ‘Nu’ beiya chapang anoptheilou bangin, mipa jong a’jinu’ beiyin ahinkho anom theipoi.  ‘Nu’, ‘jinu’ hi mijouse kingaina ahi.

Pasal jousen pan (decision) alah diu, anop le anoplou ‘Henge, ahiloule kanompoi’ atijouse hi atamjo numei, anu ahiloule ajinua kon ahi. Pasal chu agumding le ameisan ding numeiya kon ahi. Numei ching le gunchu chun ajipa lung alensah in, thillen bolngamna aneiji.

‘Nu’ lutna hetlou jeh in, numei tamtah akipasal sah in, nasatnan agel e. Hichu, hetna lhasam ahina ahi. Numei ‘Nu’ lutna hejousen ‘Nu’ phatah hiding anomin, numeiya asem jalin Pathen athangvah e.

Numei jousen ‘Nu’ ahung hiding akihet ding. Ateh teng min iti abolding adei em? Hiche banga chu, anu le atehpi akibolding ahi. Amana nu’n ahin khoukhah banga, aji deitahpa hin hinga le seilennu ‘Atehpi’ chunga chu kipah a, abat asah ding, ngailutna chungnung neiya ajen ding ahi.

Atehpi bolsea chu, ama jong amouten ahin bolgenthei diu ahi. Atehpi jenpha achu, amouten ahin jenphat diu ahi. Ajeh chu, amuchena le thil jouse gongtoh a Pathen ahi. Mi atoh bang cheh a peding Pathen ahi.

Pasal hojong anu ngailulouva ajinu joh khohsah a, anu tehse jennomlou atam e. Hiche hochu mingol ahiuve. Nahingnu najen phat ding, athigeiya nangailut a najen ding ahi. Hichu, Pathen in phatthei nabohna ding ahi. Najinu ngol le phatmo manin nanu donda hih in.

Numei loupina chu ‘ajipa’ le ‘achate’, ain ahi. Aman insung bulpi ahi akihet ngaiya ahi. Insung phat le phatlouding ‘Nu’ a kingam ahi. Achate amisoding, ajipa jong pasal pha asothei ahi.