CHRISTA TO HINKHOM HI KIPANA AHI

            Jesu Christa tahsana kisanjou hinkho hi ‘Christa-to hinkhom’ akiti. Hiche ‘Christian hinkho’ hi Athupeh Bible’a kisun ho nit’a, Ama kipuisah jing ding ngaiya ahi. Ipithil bolin, itobang dinmunin dingjongle chun, Ama vaihopna ngajing ding, Ama’a kingai jing ding ngaiya ahi.

     Pathen’a nakingai jingle, lhagaova na khantou jing ding ahi. Lungdon -lungjin bollou ding hi I-Pakaiyu Jesu Christa’n eideipeh’u ahi. Hichu, eiho dia tahsa le lunggel damna ahin, Pathen itahsannau le Ama isonnau jong ahi.

I-Pakaiyu Jesu Christa’n, “Na lung’u donsah hih-un. Pathen tahsan’un, Kei jong neitahsan’un” (John 14:1) ati hi bolin. Aman na-umchan jouse ahen, nakhohsah jing’e ti hejingin. Lungdon-lungjin, kichat le olmona neilouvin, Ama’a kingaiyin, khantouna lam mano jingin. Nitinin Bible simin, Tao jing jengin. Chutile, tahsanna in khangtou jingin natin, kipanana, nopna le lolhinna nahin nei cheh cheh ding ahi.

     Jesu Christa hi ‘huhhingpu le Pakaiya’ kisan ahitah-le ‘Athupeh nit jingin. ‘Pakaiya nanei’ kiti chu ‘athu nanit’ tina ahi.Chule, Jesu Christa hi Pathen ahi’na in, na-Lengpa ahi. Leng chun agamsung le amite chunga vai ahom’e.

Jesu nakisan masanga chu ‘chonset’ thua nung nahi. Jesu nakisan phat in, Aman chonset thaneina’akona na-‘Huhhingpu’ ahitan, chonset akona ongdoh nahitai. Tua hi Jesu hi Lenga nanei ahitan, na chunga vai nahopsah ding ngaiya ahi. Ama khut’a hin nahinkho le nap hat masang jouse athuthua napuidin pedoh jengin. Chutile, Aman nachunga vai ahoma, nangma dia aphapen chu napeh ding ahi.

Nangma dia aphapen chu, nasempa kipana’a na umding hi ahipene. Hijehchun, nahinkho, nathaneina le na masang hinkho chule na thilgon jouse akhut a pedoh in. Ama hi nahinkhoa thuneipen le vaihom in neiyin. Chutile, Aman “Hinna aneina diuva hunga kahi, chule, hichu bulhingset a anei diu ahi “(John 10:10) tia aseibanga, Ama phattheibohna, panpina chu bulhinga nakimuthei ding ahi.

Pathen in napanpi jing tahen.