Tuesday, 13 May 2014

TAO JINGIN

 Pathen ihounau phapen chu taona ahi. Jesu Christa, Ama Pathen Chapa jeng in jong nitina Apa ahouna chu taona hi ahi. Eiho jong tao jing dingin eihil’un ahi. Pathen thu’n aseiye -
             “Pathen kom ibelnauva ngampela i-umthei nau chu hiche hi ahi – Ama lungdeilama i-thumule aman iseiyu eingaipeh uve. Chule, Aman i-thumu eingaipeh’u ihet’ule- i-thum jouseu chu- imusau ahitai ti iheuve.” — 1 John 5:14-15

 Pathen thu nasima, nagel jou chomkhat tengle, taonan Ama chu houvin. Napa deitah, napanpi nomjing le nangma dia phapen bolpeh nomjing, napa deitah koma thu naseibangin Pathen koma seiyin taona in.Nikhat sunga hin itih phat hijongle Pathen koma natao theiye – natohna mun jotna, anneh kon, ponsop pet, lekhasimpet, school kaipet le adang hoa jong. Hinla, nikhat sunga hi phat bih tum jong Pathento kihouna ding pedoh in, i-machan jong nasuhmo lou ding phat, thipbeh chan Pathen chu houvin –Bible sim le taona phat in mangjin. Jingkah phapen thei ahi – lungthengsel le halpela na umpet, natoh napat masang, ahiloule nilhah kicholdo phat, lup masang jong pha thei ahi. Apha cheh vang chu, jingkah le nilhah in, na changseh in Pathento phat mangjingin.(Psalm 55:17)!

            Nikhat sunga itih phat hijongle, gunchu tah le ngaina tah in bolin. Jesu chu jingkah matah in ataoji, chule, munthip laiya jong taodin  acheji.(Luke 5:16).

No comments:

Post a Comment