Pathen Kimupi Jouse Hinkho akikhelji

Abraham in Pathen akimupi chun, i-macha ahilou akimuchet in, “Keima vang leiset le leivui maimai kahi” ati (Genesis 18:27) Ahinkho kikhel in, Pathen tahsahte jouse dia ‘Pa’ ahitai.

Moses  in Pathen akimupi chun, Pakai loupina amuchenin, akicha in, amai asel jenge.(Exodus 3:6)

Mose’n, mihem chonse le hatlou dia, Pathen mai mu ngam ahilou ahetai. Mulou ding amu jeh in, thichan-geiyin Pakai kin aboltai.

Joshua chu Pathen tahsantah, Pathen thu nit’a, mitamtah in thupeh anitlou pet’uva jong kichalouva pangdet jing anahi. Sinai mol geiya Mose che jong chun, akilhonpi din Pathen in alhenge. Mose thijouvin, Pathen in Mose khel in Israelte lamkaiyin apansah tai. Hinla, Pathen mel mukhalou anahi.

Nikhat chu, Pathen thupeh nit in, galboldin akontai. Pakaiyin akimupi-le, Joshua chun koi ahi ahepoi. Galmanchah lhingset a ana lamto ahijeh chun, akoma achen, “Nang keiho eipanpi ding nahi ham, ole, kagalte lama pang nahi jeng em?” tin adongtai.

Hichun, Pakaiyin, “Kahipoi; Keima Pakai sepaite lamkaipipu kahibouve. Tua hichelaiya hunga kahi”  atipeh tai. Hichun, Joshua chu a anga tola chun abohkhup in, chibai boh in, Pathen hou-in ahoutai. (Joshua 5:13-14)

Lamkai lentah, Pakai lhacha ahi vangin, Pakai anga ima ahilou akimun, lamkai len khat kineosahna nasapen, tola bohkhup in, Pakai chu a houtai.

Simon Peter in Jesu akimupi chun, “Pakai, chemang jengin, keima michonse kahibouve” ati. Pakai Jesu, “Kicha hih in, tua kona mihem manna napan ding ahitai” ati. Peter chung, alen dalhan, asopipa to Jesu nung ajui lhontai (Luke 5:8-11) Peter chu, seijui lah a lamkaipen ahung hin, Houbung phutdoh a Pakaiyin amanchah pen ahung hitai. Christian jousen Peter sumil ponte.

Golhang-hat, lekhathem tah Saul chun Jesu amunin, tola alhun, vana kona vah chun amit asuthim jeng tai. (Acts 9:3-9) Houbungte bolgenthei penpa chu Houbung lamkai len le Bible a lekhasun tampen, tahsanna bulpipen khat ahung hitai. Jesu Christa kipana thupha hilpipen, Christian jouse kingaina khat ahung hidoh tai. Chule, Christa jalin ahinna atohdoh in ahi.

Job chu Pathen jengin jong "solama miphapen" anati ahi.Pathen tahsan le ging, mipha kidang, chonphatah le Pathen kin boljing anahi. Hinla, aphatna le Pathen kin aboljing keu chu lhing din anagel khai. Hahsatna le gentheina khontop atoh in, atahpan jing jenge. Hinla, Pathen thu tah chu ana jui chen jou deh poi.

Jop chu mihem bolthei chana dia chonpha mong mong anahi; Pathen jengin jong “solama kami chonphapen” anati ahi. Hinla, achonphatna chu aman lhingset dia anagel jeng vang in, Pathen chonphatna chu aphajou him himpoi. Pathen mel amutah in, chonse ahi chu akimuchet tai. Chonset kisih in, achonset chu Pathen koma aphongdoh tai :

“ Nathu hi kanakhangin kanajai; tunvang kamit tah in kamutai; hijeh hin, keima kakikidah in, kaki thet in; chule, kachonset kisih in leivui le vut kakinu’e” atitai.(Job 42:5-6)

Israelten chonset kisihna avetsahnau sangpen chu ponsil botela, vutvai kimu hi ahi. Hichu, solama miphapenpa chun, Pakai akimupi nin, aboltai. Hiche pettah chun, Pathen in phatthei aboh in. Masanga anei sangin, ahao jon, chanu le chapa tampi aneiben, Bible in “Job chanute banga hoi aumpoi” tia asei jeng ahi. (Kaseipap valle, Pathen in eingaidam ding kataona ahi)

Tuni geiya jong, chonset phon ding ngaiya gellou Christian umthou nalai maithei ahi. Bol-hahsa loutah, bolna dia kineosah nomlouna, kiletsahna pea chu, Pathen le amite doujingpa, Satan ahi.

Pathen in phattheina tincheng nape henlang, Athupha hethema, nit a le seiphongle theiyin napanpi tahen.